Бүгин Нөкис қаласында жайласқан пайызлы орынлардың биринде үш әўлад ўәкиллериниң дийдарласыўы болып өтти

Өткерилген ушырасыўда Қарақалпақстан Республикасы Жоқарғы Кеңесиниң Баслығы Аманбай Орынбаев шығып сөйлеп, елимиздиӊ раўажланыўына мүнәсип үлесин қосып киятырған бир топар ветеранлар ҳәм тараў ўәкиллериниӊ үлгили ислерин айрықша тилге алды.

Онда Өзбекстан Республикасы Президентиниң кеңесгөйи Т.Худайбергенов, Қарақалпақстан Республикасы Министрлер Кеңесиниң Баслығы Ф.Эрманов, Қарақалпақстан Республикасы «Нураный» қоры баслығы Т.Абдижаббаров қатнасты.

Ушырасыўда республикамыздың барлық район ҳәм қалаларынан келген узақ жыллар даўамында халық хожалығының түрли тараўларында жемисли мийнет еткен кекселер, ветеранлар, сондай-ақ, студент жаслар қатнасты.
Жасы үлкен әўлад ўәкиллери жаслар менен пикир алысып, жаслық күш-ғайратын қайта сезингендей болды десек алжаспаған боламыз. Нураныйлардыӊ үгит-нәсиятлары жасларды жақсы инсан болып жетилисиўине, ҳәр дайым жақсылық ислеўге, тереӊ билим алыўға, елимиз раўажланыўына мүнәсип үлес қосыўға бағдарлайды.

Ушырасыў даўамында елимиз раўажланыўына салмақлы үлес қосқан бир қатар ветеранларға Жоқарғы Кеңестиң көкирек белгилери ҳәм баҳалы саўғалары, сондай-ақ, Өзбекстан Республикасы «Нураный» қорының көкирек белгилери салтанатлы түрде тапсырылды.

Дийдарласыў ушырасыўы көркем өнер шеберлери атқарыўындағы концерт бағдарламасы менен даўам етти.

Әлбетте, бундай илажлар жаслардыӊ ҳәр тәреплеме жетик инсан болып жетилисиўине, мийнет нураныйларыныӊ турмыс мектеби менен жақыннан таныс болыўына хызмет етеди.


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter