Шымбай районын раўажландырыў мәселелери қарап шығылды

Қарақалпақстан Республикасы Жоқарғы Кеңесиниң Баслығы Аманбай Орынбаев Шымбай районын социаллық-экономикалық жақтан раўажландырыў, халыққа мүнәсип турмыс шараятын жаратыў, пуқаралардың бәнтлигин тәмийинлеў ҳәм жаңа жумыс орынларын жаратыў мәселелери бойынша мәжилис өткерди.

Онда районға республикадан бириктирилген ўәкиллер, район белсендилери ҳәм мәҳәлле жетиликлери қатнасты.

Айтып өтиў керек, өткен жылдың ишинде Шымбай районын раўажландырыў бойынша ҳүрметли Президентимиз тәрепинен ажыратып берилген қаржылар тийкарында бир қатар жумыслар әмелге асырылды. Халық ийгилиги жолындағы бундай ийгиликли илажлар быйылғы жылда да даўам еттирилиўи белгиленип бир қатар мақсетли көрсеткишлер белгилеп алынған.

Бул илажлар шеңберинде бар болған мүмкиншиликлерден нәтийжели пайдаланып, халықтың бәнтлигин тәмийинлеў, жаңа жумыс орынларын жаратыў, пуқаралардың өзин-өзи бәнт етиўине көмеклесиў, үй шараятында ҳәм қыйтақ жерден нәтийжели пайдаланып дәрамат алыў, бунда мәҳәлле жетилиги системасы имканиятларынан кең түрде пайдаланыў ҳәм басқа да әҳмийетли мәселелер қарап шығылды.

Соның менен бирге пуқаралардың өз исбилерменлигин баслаўы ушын мәмлекетимиз тәрепинен жаратып берилген имканиятлардан, жеңиллетилген кредит қаржылары ҳәм басқа да дереклерден кең пайдаланыў кереклиги айрықша атап өтилди.

Мәжилис даўамында тийисли тапсырмалар берилип, ўазыйпалар белгилеп алынды.


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter

Мектепке шекемги ҳǝм мектеп билимлендириўи тараўын раўажландырыў мәселелери талқыланды

Бүгинги күнде елимизде билимлендириў тараўына айрықша итибар қаратылмақта. Өткен қысқа дәўир ишинде тараўға байланыслы бир қатар нызам, пәрман ҳәм қарарлардың қабыл етилгени бул бағдардағы илажлар көлемин жаңа басқышларға көтермекте.

Қарақалпақстан Республикасы Жоқарғы Кеңесиниң Баслығы Аманбай Орынбаев мектепке шекемги ҳǝм мектеп билимлендириўи тараўында әмелге асырылып атырған жумыслар, бул бағдарда жол қойылып атырған кемшиликлер ҳәмде алдағы әмелге асырылыўы тийис ўазыйпаларға арналған видеоселектор мәжилисин өткерди.

Онда Министрлер Кеңесиниң Баслығы Ф.Эрманов видео байланыс арқалы қатнасты.

Мәжилисте атап өтилгениндей, соңғы жыллары билимлендириў системасын жаңаша раўажландырыўға, тәрбияшы ҳәм муғаллимлердиң жəмийеттеги абырайын арттырыўға, оларды руўхый ҳəм материаллық қоллап-қуўатлаўға, келешегимиз ийеси болған балаларымызды, жасларды ҳәр тәреплеме билимли етип тәрбиялаўға айрықша итибар қаратылмақта.

Соңғы бес жылдың ишинде балаларды мектепке шекемги билимлендириў мәкемелерине қамтыў көрсеткиши кескин арттырылып, улыўма билим бериў мектеплери саны, питкериўшилердиң жоқары оқыў орынларына кириў көрсеткиши көбейтилди.

Өткерилген мәжилисте жаратылып берилип атырған усыншама имканиятларға қарамай, тараўда шешимин күтип турған бир қатар машқалалар да бар екенлиги айрықша тилге алынды, айырым мәселелер сын көз-қараста талқыланды.

Сондай-ақ, белгиленген тапсырмаларды орынлаўда немқурайдылық пенен қарағаны ушын бир қатар мектепке шекемги билимлендириў шөлкемлери ҳәм улыўма билим бериў мектеплери басшыларының лаўазымына ылайықлығын көрип шығыў бойынша тапсырма берилди.

Мәжилис жуўмағында ўазыйпалар белгилеп алынды.


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter