⬆️ Першы прыём ежы арыенціровачна праз 3,5 гадзіны пасля пачатку заняткаў, і гэта паўнавартасны абед, бо навучэнцы прыходзяць у школу, паснедаўшы дома, і няма неабходнасці ў раннім прыёме ежы. Харчаванне ў школе носіць падтрымліваючы характар, каб дзіця магло паўнацэнна займацца. Асноўнае харчаванне — гэта клопат бацькоў.

Колькасць прыёмаў ежы залежыць ад часу знаходжання вучняў ва ўстанове адукацыі: ад 3,5 да 6 гадзін — аднаразовае харчаванне; ад 6 да 10 гадзін — двухразовае; больш за 10 гадзін — трохразовае.

🍳 Каб ежа падабалася ўсім школьнікам, распрацавана двухтыднёвае меню з улікам смакавых пераваг па выніках анкетавання дзяцей і іх бацькоў. На працягу эксперымента ўносіліся змяненні і карэктывы. А самае галоўнае — школьнікі і іх бацькі могуць зрабіць выбар: абед 1 (без супу) або абед 2 (з супам).

У рамках праекта прааналізавана ўмяшчальнасць сталовай і прынята рашэнне аб пашырэнні плошчы абедзеннай залы за кошт пераносу буфета ў асобнае памяшканне. Была набыта мэбля для стварэння дадатковых пасадачных месцаў у абедзеннай зале школы, да таго ж арганізавана музычнае суправаджэнне прыёму ежы, устаноўлены тэлевізары. Абсталяваны новы буфет і асобнае памяшканне для харчавання работнікаў школы. У штатны расклад уведзена стаўка “Адміністратар”, у абавязкі якога ўваходзіць каардынацыя дзеянняў дзяжурных сталовай, рэгуляванне патокаў дзяцей пры іх перамяшчэнні, каардынацыя дзеянняў работнікаў сталовай для прадухілення стоўпатварэння.