Sabrsizlik:

1-holat:
Kursga qatnashyapman. Haftada uch kun ekan. Shu holatda ketsam, nasib bo'lsa, 3 oyda yaxshi o'rganib olarkanman.

2-holat:
Bugun qiynalgan mavzuyim yuzasidan dars o'tilar ekan. Naqadar ajoyib, endi bu mavzudan muammoyim bo'lmaydi.

Natija:

1-holat:
Uch oy o'tdi. Lekin hali ham ko'zlangan marraga yetmadingiz. Shuncha vaqtni bu kursda sarfladingiz, lekin hali ham biror topshiriq yoki testni yechishga ishonchingiz komil emas.

2-holat:
Bugun qiynalgan biror mavzuyingizda dars bo'lib o'tdi. Siz e'tibor bilan kuzatib bordingiz, kerakli joylarini hatto yozib ham oldingiz. Lekin ikki-uch kun o'tgach boyagi mavzu yana sizga muammo tug'dira boshladi.

Ishonchsizlik:

1-holat:
Uch oylik kursga bordim, o'qituvchim shuncha vaqt davomida ham meni ko'zlagan manzilimga yetkazib qo'ya olmadi. Demak, u bilimsiz ekan.

2-holat:
Darsda qatnashib barchasini yaxshi tushunib olgandim-ku, kerakli joylarini yozib ham oldim. Lekin nega yana menda shu muammo. Demak, ilm men uchun emas.

Yuqoridagilarni o'qib, o'zini ko'rganlar bo'lsa, o'qishda davom eting.

Birinchi o'rinda siz o'zingizga chegara qo'ymang. Agar sizga kimdir biror fan yoki sohani ikki yoki uch oyda o'rgandim, desa, siz ham shuncha vaqt sarflaysiz, deganimas. Balki bu muddat sizga kamlik qilar. Balki buncha vaqt ketmas. Lekin siz o'zingizga chegara qo'yishingiz orqali umidsizlikka tushib qolasiz. Agar siz uch oydan ko'p vaqt sarflashingiz kerak bo'lsa-yu, lekin uch oydayoq natija bo'lmadi deb to'xtatib qo'ysangiz. Yoki bo'lmasa, siz asli ikki oyda o'zlashtira olsangiz-u, lekin siz miyangizga uch oy deb buyruq bergan bo'lsangiz. Ikki holatda ham o'zingizni chegaralashingiz sizga zarar keltirmoqda.

O'qituvchi sizga yo'nalish beradi, lekin uni qanday davom ettirish o'zingizga bog'liq.

O'qituvchi dehqon kabi egat ochadi. Siz esa suv kabi shu yo'lni o'zingiz mustaqil bosib o'tishingiz kerak. Yangi ariqchada birinchi marta suv yurayotganda, suv yo'lida kichik kesakcha chiqsa ham, u to'xtab qoladi va dimlanib turadi. Kesakka kelib urilib, to'xtab qolgani bilan uning ortidan shu kesakni yengish uchun qo'shimcha suv to'planmoqda.

Ilm bu ana shu egat. Dehqon o'qituvchi. Suv esa o'rganuvchi. Ilmni endi o'rganayotganingizda oldingiz turli to'siqlar, kichik kesakchalar chiqadi. O'sha joyda sabrli bo'lib, ilm olishda o'rganishda davom etsangiz, siz ham suv kabi kesakchani ustidan oshib o'tasiz. Kelasi safar shu yo'ldan yurganingizda esa ancha oson bo'ladi, chunki siz birinchi martasida o'z yo'lingizdagi barcha kesaklarni ivitib, o'z yo'lingizni mustahkamlab bo'lgan edingiz.

Xullas, o'zingizga ishonchingizni tushirmang. Umidsizlanmang. Siz to'g'ri yo'ldasiz. To'g'ri yo'l esa har doim qiyin yo'l bo'lgan. Buni qabul qilmaguningizcha bu to'g'ri yo'lni bosib o'tolmaysiz.

#maqola

✈️ Telegram |📷 Instagram |🖤 You Tube

Kam bo'lsa ham, davomli bo'lsa, o'ylagan natijangizga erishasiz.

Roppa-rosa ikki hafta oldin odat shakllantirib olish uchun har kuni uxlashdan avval bir donagina test yechib, keyin uyquga keting, deb maslahat bergan edim. Boshlanishiga bitta kamdek ko'rinsa ham, tishni tishga qo'yib, o'zini majburlab bo'lsa ham, bir donagina test yechib, bugungacha yetib kelganlar bo'lsa, endi bir dona emas, o'nta yoki o'n beshtagacha ishlamay uyquga keta olishmaydi. Sababi unda odat shakllanib ulgurdi.

Buni quyidagicha izohlash mumkin:

Mana o'z odatlaringizga e'tibor bering. Ertalab uyqudan uyg'oniboq nima qilasiz, kechqurun uyquga ketishdan avval nima qilasiz. Endi savol: uyqudan uyg'ongach boyagi o'z odatingizni qilmasdan yotgan o'rningizdan tura olasizmi? Yoki boyagi odatingizni qilmasdan turib, uyquga keta olasizmi?

O'z ustingizda ishlashga kunduzi vaqtingiz bo'lmaydi. Bilaman, tushunaman. Lekin o'z ustingizda ishlamasangiz bo'lmaydi. Ayniqsa, hozir. Yigirma yil, yigirma besh yil bir maktabda ishladingiz. Bu maktab uchun qancha mehnatingiz singdi. Lekin hozir attestatsiya yoki milliy sertifikating bo'lmasa, ishlamaysan, deb kecha kelgan bir direktor yoki uning yordamchisi sizga shart qo'yadi. U sizning qancha ishlaganingizga qarab ham o'tirmaydi.

Qilgan mehnatlaringiz, yig'gan obro'laringizni saqlab qolish uchun, yangi kelganlar oldida tilingiz uzun bo'lishi uchun ham o'z ustingizda ishlamasangiz bo'lmaydi, qadrli ustozim.

Onam o'qituvchi, men sizlarni tushunaman. Rozg'or, uyingizda usta bor, maktabdan kelib, ovqat qilasiz, non yopasiz. Vaqt haqiqatdan yetmaydi. Lekin uyquga ketishdan avval 5 daqiqa bo'lsa ham shug'ullanishni o'zingizga odat qilib olsangiz, natijaga erishasiz.

Bugungi 5 daqiqangiz bir haftada 35 daqiqaga, bir oyda 150 daqiqaga aylanadi. Shu bir kunlik 5 daqiqani yo'q qilib yuborish ham, undan unumli foydalanish ham o'z qo'lingizda!

#maqola

✈️ Telegram |📷 Instagram |🖤 You Tube

Har qanday fikr yashashga haqli. Sizda qandaydir fikr bormi, erkin bildiring. Ba'zan sizga qarshi fikrlar ham yangrashi mumkin, lekin bu degani sizning fikringiz xato degani emas.

Muhimi nima bilasizmi, siz fikrlashda davom etasiz. Fikrlashdan to'xtagan odam xuddi oqmay qolgan ariqqa o'xshaydi. Yon-atrofingizdagi biror ariqning qurib qolganini ko'rgan bo'lsangiz kerak. Qurib qolgan o'z tubini ko'rsatadi, asta-sekin hidi badbo'ylashishni boshlaydi. Odamlarni o'zidan uzoqlashtiruvchi hidlar chiqara boshlaydi. Siz ham fikrlashdan to'xtab qolsangiz, dunyoqarashingiz sayozlashib, odamlarni o'zingizdan uzoqlashtira boshlaysiz. Har xil negativ fikrlar chiqa boshlaydi. Atrofdan yaxshilikni izlolmay qolasiz. Har bir narsaga shubha-gumon bilan nazar tashlashni boshlaysiz.

Shubha, gumon, negativ fikrlar esa bizdan chiqayotgan yomon hiddir.

Kitob o'qigan odamning dunyoqarashi keng bo'ladi, deb ko'r-ko'rona kitob o'qishga targ'ib qilamiz-u, lekin undan olingan xulosa haqida hech qachon fikr yuritmaymiz. Kitob bu yozuvchining fikrlari, o'y-xayollari, undan har kim o'zicha xulosa oladi. Kitobdagi biror parchani tahlil qilib, bu voqeadan o'zingizga ibrat olmasangiz, siz shunchaki kitobni varaqlab, hikoya yoki qahramon taqdiriga mahliyo bo'lib, vaqt o'tkazgan bo'lasiz.

Har bir qahramon bu o'ziga xos obraz. Va yozuvchi shu obraz orqali jamiyatdagi turli muammolarga yechim berishni maqsad qiladi. Ezop masallari bekorga beshinchi sinfda berilmagan. Mana shu kitobning kirish qismida obrazga ta'rif beriladi. Undan nimani anglashimiz kerakligi uqtiriladi va davomidan Ezopning obrazli masallari beriladi. Agar siz masalni yosh farzandingizga o'qitsangiz, u masaldagi voqealarga hayvonlarning turli munosabatlariga e'tibor qaratadi, lekin bu munosabatlar ortida nima yashiringanini e'tibor bermaydi. Ezop yetkazmoqchi bo'lgan fikrni laylak, bo'ri, qo'y, cho'pon kabi obrazlarga kiritganini anglab yetish esa fikrlashdan so'ng kelib chiqadi.

Kitobni o'qing va unga biroz bo'lsa ham tanqidiy nazar bilan boqib, qahramonlar orqali yozuvchi nimani maqsad qilganini tushunishga harakat qiling.

#maqola

✈️ Telegram |📷 Instagram |🖤 You Tube

Ko'chada ikkita yosh bolaning o'zaro tortishayotganiga quloq solib tursangiz, ularning bir-birining kamchiliklarini aytib, yuziga solayotganiga guvoh bo'lasiz. Biri seni bo'ying past, desa, ikkinchisi o'zingni bil, deydi.

Aslida bo'yning past bo'lishi bu kamchilik emas va umuman olgan ikkinchi bola bu haqidagi haqiqatni gapirdi. Lekin bo'yi past bola o'zida haqiqiy kamchilikni qabul qila olmagani uchun bu gapdan jahli chiqdi.

Insondagi har bir kompleks, ya'ni kamchilik qabul qilinishni xohlaydi. Bo'ying pastmi, xo'p, nima qilibdi, dunyoda hamma standart bo'yga ega-yu, bitta sen kichkina bo'lib qoldingmi, yoki o'zlashtirishing past deyishsa, nima qipti, aslidayam shunday-ku, bu kamchiligingni qabul qilmaganing bilan, yo'q, bu meniki emas, deganing bilan o'zlashtirishing tezlashib qoladimi?! Yo'q, albatta.

Tanqidni qabul qila olmaslik o'zingizni yosh bolalardek tutishingizdan darak beradi va bu sizni yanada portlatadi. Tanqid bo'lsa, uni qabul qiling. Siz shu kamchiliklaringiz bilan sizsiz. Bular aynan sizni boshqalardan ajratib turadi. O'zgacha bo'lish esa ayb emas.

Biz har doim solishtirilganmiz: uni o'g'lini qara sendan aqlli, sendan boyroq, sendan omadliroq, deb ota-onamiz tarbiyasidan boshlab solishtirilamiz. Va aynan mana shu bizda tanqidni ko'tara olmaslikni, o'z kamchiliklarimizni qabul qila olmaslikni shakllantiradi.

O'zingizni boshqalarga solishtirsangiz, hasad uyg'ona boshlaydi. Hasad esa odamni ichdan kemiradi. Ichidan to'kilgan inson yuksalish tugul, o'zini ham tiklab tura olmaydi.

Tanqidni qabul qilish ko'nikmasini hosil qiling. Kamchiliklaringizni qabul qilib, ularni to'g'rilashga, ular ustida ishlashga harakat qiling.

Tanqid bor joyda yuksalish bo'ladi, degan gap shunchaki quruq pafos gap bo'lib qolmasligi kerak. Maqtov bilan o'sib borayotgan odamni to'xtatasiz. O'zim ham bir necha bor takrorlaganman darslarimga ortiqcha maqtov shart emas, aksincha kamchiliklari ustida ishlaylik deb.

Maqtovni ham, tanqidni ham me'yorida olib yurish muvaffaqiyat kalitlaridan biridir.

#maqola

✈️ Telegram |📷 Instagram |🖤 You Tube