Radio Rojava

Em Kedkar û Berxwedêrê Xwe Rêheval Şervan Rojvan Bi Bîr Tînin

Em rêhevalê xwe Şervan Rojvan (Dilxwaz Loqman Bekir) ku di nav Hêzên Ewlekariya Hundirîn de cih digirt, bi ruhekî fedayî di berxwedaniya Eşrefiyê û Şêx Meqsûd de têkoşiya û di 7’ê Çileya 2026’an gihaşt şahadetê bi rêz û minetdarî bi bîr tînin.

Di şexsê hevalê Şervan Rojvan de; em hemû şehîdên xwe yên berxwedaniya Eşrefiyê û Şêx Meqsûd bi rêzdarî bîr tînin û ji malbatên şehîdên xwe yên canbexş û gelê xwe yê welatparêz re sersaxiyê dixwazin
Ji 6’ê Çileya 2026’an ve, komên çete yên girêdayî hikûmeta veguhêz ên Şamê bi her cûre çekan û rêbazên hovane êrîşî taxên Eşrefiyê û Şêx Meqsûd kirin. Çeteyên girêdayî Şamê bi alîkariya dewleta Tirk ve bi her cûre çekên hewayî û bejahî êrîşên giran li ser gelê me pêk anîn.
Li hemberî van êrîşan, gelê me yê berxwedêr û hêzên ewlekariya herdû taxan dest bi têkoşînê kir û derbên giran li çeteyan dan. Gelek tang û seyarên zirxî yên dijmin hatin rûxandin. Di her çalakiyekê de gelek çeteyên girêdayî Şamê hatin bêbandorkirin. Hevalê Şervan jî ji mêj ve li taxa xwe di nav xebatan de cih digirt. Ji kêliyên destpêkê ve li nav şerê li Taxa Eşrefiyê de cih girt. Ji bo gelê xwe çi ji dest hat pêk anî û derbên giran li çeteyên dijmin da. Kedakarê hêzên Ewlekariya Hundrîn rêheval Şervan Rojvan, bi berxwedaniya xwe ya dîrokî navê xwe li nav têkoşîna azadiyê da neqişandin.
Hevalê me Şervan Rojvan ku endamê Hêzên Ewlekariya Hundirîn bû; bi eslê xwe ji navçeya Raco ya bi ser Efrînê ye. Di sala 1998’an de li Raco’yê di nav malbateke welatparêz de jidayîk dibe. Di malbatê de bi giştî 5 bira û xwişkek in. Hevalê me Şervan Rojvan, zewicî bû û zarokekî xwe hebû. Ruxmî berpirsiyariyên xwe yên malbatî, her dem rizgariya gel û welatê xwe esas girt û bi vê bîr û baweriyê di sala 2022’an de li nav xebat û têkoşîna Helebê de cihê xwe girt. Rêheval Şervan Rojvan, ji sala 2022’yan heta kêliya şahadeta xwe; bi ked û fedakariya xwe pêşengî kir. Di berxwedaniya Eşrefiyê ya li kêleka taxa Suryan de cih girt û derbên giran li çeteyên HTŞ’ê û Tirkan da. Rêhaval Şervan, li hemberî hemû gef û xeteriyên li ser gelê xwe heta kêliyên dawî jî bi welatparêziyeke rastîn têkoşiya. Rêheval Şervan Rojvan, aramiya malbata xwe, di rizgarkirina welatê xwe de didît û her dem di asta herî jor de tevlî hemû xebatên parastina gelê xwe bû. Em rêhevalê xwe Şervan Rojvan ku bi kesayeta xwe ya aram, xwînsar û dilpola derdiket pêş, bi rêz û minetdarî bi bîr tînin.
Ji ber şahadeta hevalê Şervan Rojvan em ji malbat û hemû gelê xwe yê welatparêz ê Kurdistanê sersaxiyê dixwazin. Di şexsê hevalê xwe de soz û girêdayîna xwe ya bi şehîdan re dubare dikin.

Nasnav: Şervan Rojvan
Nav û Paşnav: Dilxwaz Loqman Bekir
Navê Dayik: Hiyam
Navê Bav: Loqman
Cih û Dîroka Şahadetê: Heleb/Eşrefiyê - 07 Çile 2026

Fermandariya Asayîşa Şêx Meqsûd û Eşrefiyê
13.01.2026

Rojava FM

❤3

1.42K views14:15