QOŃÍRAT HÁKIMLIGI |Rásmiy kanal|

Қызығыўшаң қоңсының ҳәрекети өзине қымбатқа түсти

Ерте дәўирлерде мусылман ҳалықларында таң намазын минара төбесинде оқыйтуғын моллаларды илажы барынша даўысы тынық ҳәм анық шығатуғын моллалардан қойған, және бир қызықлы факт, усы таң намазын минара төбесинде оқыйтуғын моллалар “көзли”, яғный көзлери әззи болған. Буның себеби минара төбесинде болған адамға әтираптағы ҳәмме нәрсе көрингенлиги себепли, таң намазын оқып атырған молланың ерте таңда үй жумысларын, атыз жумысларын ислеп атырған нәмәҳрем ҳаял-қызларға нәзери түспеўи ушын усындай әдет жолға қойылған ҳәм бул әдет тек ғана мусылман ҳалықларына тән болған унамлы әдет есапланады.
Спиртли ишимлик ишиў нәтийжесинде мусылманларға тән болған қәсийетлерди умытып кетип атырған заманласларымыз арамызда азда болса ушырасады.
Cудланыўшы 1963-жылы туўылған Сапарбай 2020-жылдың 4-март күни саат 23:15лерде қоңсысы 1952-жылы туўылған Гулсара апаның үйниң айналарына атызы төриндеги дийўалдың үстинен өз үй тәрепинде турып фонарик жақтысын түсирип турғанында, үй ийеси Гулсара апа қызы 1989-жылы туўылған Мухаббат пенен үйинен далаға шығып «кимсең, уялмайсаңба, ярым түнде биреўдиң айнасына фонарик жақтысын түсирип ойнап турыўға» деп айтқанында, олар менен өз-ара жаман сөзлерди айтысып сөгип еки үй ортасындағы дийўалдың еки тәрепинде турып жәнжеллесип атырғанларында, Сапарбай Гулсара апаның басының оң көз тәрепине ағаш саплы белдиң жалпақ темириниң дүмпешиги менен бир мәрте урып дене жарақатын жеткерген.
Суд-медициналык экспертизасының жуўмағына көре, жәбирлениўши Гулсараның ден-саўлығының қысқа мүддетке бузылыўына алып келген «жеңил» дәрежедеги дене жарақаты жеткизилгенлиги анықланған.
Суд мәжилисинде судланыўшы Сапарбайдың айыбы өзиниң, жәбирлениўшиниң, гүўалардың ҳәм жынаят исинде топланған бирнеше дәлийллер менен өз тастыйғын тапты.
Сапарбайдың не мақсетте бундай исти қылғанлығы тек ғана өзине аян, бирақ жасы бир жерге барып қалған ҳәм басқа жасларға ақыл нәсият айтып, өрнек болыўдың орнына бундай ислерди қылыўы кеширип болмайтуғын ҳәрекет.
Суд, судланыўшы Сапарбайға жаза тайынлағанда жасаў жеринен унамлы минезлемеге ийе екенин, алдын жынайый жуўапкершиликке тартылмағанын ҳәм судланбағанын жазасын жеңиллестириўши тәреплери деп, ал оның спиртли ишимлик ишкен мәс ҳалда жынаят ислегенин жазасын аўырластырыўшы тәреплери деп таўып, оған ӨзР ЖКниң 109-статьясы 2-бөлими менен айлық ис ҳақысының 10% мәмлекет дәраматына услаў жолы менен 1 (бир) жыл мүддетке дүзетиў иси жазасы тайынланды.

К.Хожалепесов
Жынаят ислери бойынша Қоңырат
районы судының судья жәрдемшиси

https://t.iss.one/qongiratrkuz