Ilm va ijod bellashuvi

Bugun Yozuvchilar uyushmasida “Zakovat” intellektual o‘yinlarining “Adabiyot maydonida” bellashuvi bo‘lib o‘tdi. Uni klub aʼzosi Sherzod Olimov olib bordi.
Tadbir avvalida uyushma raisining birinchi o‘rinbosari Minhojiddin Mirzo so‘zga chiqib, ilm o‘rganishni, izlanishning, o‘z ustida ishlash va tajriba oshirishning inson hayotida o‘rni katta ekanini taʼkidladi. Yoshlarga ulkan marralarni tiladi.
Bu gal Mudofaa vazirligi tizimida xizmat qilayotgan harbiy xizmatchilar, Qurolli Kuchlar akademiyasida tahsil olayotgan kursantlar hamda yosh ijodkorlar bellashuvga kirishdi.
Jarayonda jami sakkiz jamoa ishtirok etdi va ularning har birida olti nafardan ishtirokchi kitobxonlar qatnashdi. Shulardan 18 nafari harbiy xizmatchilardir. Bilimdonlar o‘yinida yosh ijodkorlarning “Sanduvoch”, “Hilol”, “Maroqand”, “Ko‘lanka”, Abdulla Qodiriy nomidagi ijod maktabining “Utopiya”, Mudofaa vazirligiga qarashli Havo xujumidan mudofaa qo‘shinlari harbiy xizmatchilari, Qurolli kuchlar akademiyasi, Toshkent harbiy akademiyasi kursantlaridan iborat “O‘zbegim”, “Sarkarda” “Jasorat” jamoalari bilimlar maydonida kuch sinashdi. Yakunda “Jasorat” jamoasi 1-o‘rinni egalladi.
G‘olib jamoalar va ishtirokchilar uyushmaning esdalik sovg‘alari bilan taqdirlandi. Ayni damda yoshlar davrasi "Xiyobon oqshomlari" mushoira kechasi bilan davom etmoqda.

Zulayho Ahmadjonova