Хитой марказий телевидениеси илк маротаба узоқ қишлоқлик дехқонни ўз студиясига суҳбат учун таклиф қилди.

Дехқоннинг ўғли Хитойнинг энг нуфузли Шингхуа университетига юқори кўрсаткич билан ўқишга киргани махсус интервьюга сабаб бўлди.

Тўғри-да, ўзига тўқ хонадонлар йиллар мобайнида энг зўр ўқитувчиларни ёллаб, фарзандларини бўлажак жиддий синовга тайёрласалару, узоқ қишлоқдаги камбағалнинг ўғли улоқни илиб кетса. Ноёб ҳолда..! Лекин, қандай қилиб?

Нахотки, ҳаминқадар қишлоқ мактабида ўқиб шундай натижага эришиш мумкин бўлса?!

Журналист: "Ўғлингизнинг муваффақиятини нима билан боғлайсиз?"

Ота: "Бу ундаги ҳаракатнинг натижаси. Ўғлим болалигидан талаба бўлиш орзуси билан яшар эди".

Журналист: "Бу орзу ҳаммада бор. Хитойдаги кучли рақобатда биринчи бўлиш мисоли мўъжиза. Ундаги кучли қизиқишда оиладаги муҳитнинг ҳам ўрни бор. Фарзанд вояга етказишда бирор ўзига хос усулингиз борми?"

Ота: "Менинг бирор усулим йўқ. Ўзим қашшоқ оилада ўсдим. Отамда менинг саводимни чиқариш учун ҳам ортиқча маблағ бўлмаган. Ўғлим мактабга кузатган илк кун ундан яхши ўқишини, нимаики ўрганса менга ҳам ўргатишини сўрадим.

У ҳар куни мактабдан қайтиб, ўқитувчисидан ўрганганларини менга катта ҳаяжон билан тушунтирар эди.

Кечки маҳал биргаликда дарс қилиш, ўғлимни тинглаш кундалик машғулотимга айланди.

Ўқиш-ёзишни ўргандим, шундай бўлса ҳам дарсларимиз тўхтаб қолмади: юқори мактабнинг сўнгги кунига қадар ўғлим менга устозлик қилди.

Эҳтимол шу воқеа унинг муваффақиятига сабаб бўлгандир.

Ўғлим бошида азбаройи менинг олдимдаги масъулиятни деб ўқишга жиддий қараган бўлса, бора-бора унда илмга бўлган иштиёқ бўй кўрсатди.

Тўғрисини айтсам, унинг учун қўшимча дарслар учун репититор ёллашга қурбим етмаган..."

Бу суҳбат кўплаб хитойлик қашшоқларни илҳомлантирди, бу иродали ота миллионлаб ота-оналар учун ибратга айланди.

➖➖ 🖼️ ➖➖

✅  https://t.iss.one/Yunusbek01