#Кундаликдан

Фаросат ишлатилса, эскириб қолмайди. Қўрқмай ишлатавериш керак.

@oriftolib

#Кечки_мутолаа

Балта

Одам ўн беш-йигирма йил кўришмаса, таниган-билганларининг, ҳатто синфдошларининг ҳам юз тузилишини унутиб юборар экан. Ҳа, одамзот унутувчан. Лекин бу қоида доим ҳам ишлайвермайди. Уста Золтанни кўрмаганимга, мана, ўттиз йилдан ошди, аммо унинг нурли сиймоси шундоқ кўз ўнгимда, ўша воқеани эсласам, юрагим илийди, қондош-жондош бир туйғунинг тафтини ҳис этаман...

Соғинч ва тил муҳаббати ҳақида қисқагина ҳикоя.

👉 Тўлиқ ўқиш

Фикр-мулоҳазаларингизни изоҳларда қолдиришингиз мумкин.

@oriftolib

​#Ёш_ижодкорларга_маслаҳат

“Ҳам санга ташвиш озроқ бўлур ва ҳам ўқуғучиға”

Заҳириддин Муҳаммад Бобур:

...Бу хатларингни битибсен ва ўқумайсен, не учунким, агар ўқур хаёл қилсанг эди, ўқуйолмас эдинг. Ўқуйолмагандин сўнг албатта тағйир берур эдинг. Хатингни худ ташвиш била ўқуса бўладур, вале асру муғлақтур. Насри муаммо ҳеч киши кўрган эмас.

Имлонг ёмон эмас. Агарчи хили рост эмас, илтифотни “то” била битибсен. Қулунжни “ё” била битибсен. Хатингни худ ҳар тавр қилиб ўқуса бўладур, вале бу муғлақ алфозингдин мақсуд тамом мафҳум бўлмайдур.

Ғолибо хат битирда қоҳиллиғинг ҳам ушбу жиҳаттиндур. Такаллуф қилай дейсен, ул жиҳаттин муғлақ бўладур. Бундин нари бетакаллуф ва равшан ва пок алфоз била бити; ҳам санга ташвиш озроқ бўлур ва ҳам ўқуғучиға.

Бобур бу кўрсатмаларни ўғли Ҳумоюнга ёзган хатида айтиб ўтган. Гарчи ўғлига хоссатан айтган бўлса-да, улуғ адибнинг тавсиялари ижод ва фикр аҳли учун бирдай фойдали. Имлога эътиборли бўлиш, фикрни равон ифода эта олиш ўқимишли кишининг ажралмас сифати бўлиши керак.

Юқорида айтилган тартиб-қоидаларга Бобурнинг ўзи биринчи галда амал қилган. “Бобурнома”ни ўқиган киши бунга албатта амин бўлади.

Маслаҳатнинг табдили:

Ёзган хатларингни ўзинг ўқимайсан, ўқимоқчи бўлганингда ҳам ўқиёлмас эдинг. Ўқиёлмагандан кейин эса ўзгартирардинг. Хатингни ўқиш қийин, чунки жуда чалкаш. Одам насрни ўқиганда бундай машаққат чекмаслиги керак.

Имлонг ёмон эмас. Лекин хатолари бор, “илтифот” сўзини “то” билан, “қулунж” сўзини “ё” билан ёзибсан. Хатингни бир илож қилиб ўқиса бўлади, лекин чалкаш сўзларингдан мақсадингни англаш қийин.

Мактубларни ора-сира, кам ёзишинг ҳам шундан бўлса керак. Такаллуф қилай дейсан-у, гапинг тушунарсиз чиқади. Бундан кейин такаллуфсиз, содда ва самимий сўзлар билан ёз. Ҳам сенга ташвиш кам бўлади, ҳам хатингни ўқувчига.

@oriftolib

Қайтага ва қайтанга

Қайтага сўзи ўзбек тилида икки хил маънода ишлатилади:

1️⃣ Аксинча, билъакс.
2️⃣ Яхшиси, ундан кўра.

Қайтага сўзи сўзлашув тилида қайтанга шаклида ҳам ишлатилади. Бу шакл луғатларга киритилган. Демак, бу шаклда қўллаш тўғри.

Баъзан қайтага сўзи ўрнида қайта сўзи ҳам ишлатилиши мумкин.

📌 Демак,

Қайтага, қайтанга ✅

👉 Тўлиқ ўқиш

@oriftolib

Луғат бойлигини қандай ошириш мумкин?

🔹 Китоблар, мақолалар ва бадиий адабиётларни кўп ўқинг. Энг муҳими, уларнинг маъно-мазмунига жиддий назар ташланг. Ўқиганларингизни касбдошларингиз ёки қизиққанларга айтиб беринг.

🔹 Матнда тушунарсиз сўзга дуч келсангиз, гапнинг умумий мазмунидан маъносини чақиб оламан деманг. Изоҳли луғатни очиб, сўзнинг асл маъносини ўрганинг. Хаёлингизда шу сўз қатнашган гаплар тузинг.

🔹 Ўзингизни қизиқтирган соҳага оид сўзларни луғатдан кўчириб, қайд қоғозларга ёзиб чиқинг. Қайдварақчани ҳамиша ўзингиз билан олиб юринг. Чунки бўш вақтларда унга қараб, сўзларни эсга олиш, ёдлаш мумкин.

🔹 Янги ўрганилган сўзларни қофияга солиб кўринг, улар иштирокида гаплар тузинг. У англатадиган маънони тасаввурингизда шакллантиришга ҳаракат қилинг.

🔹 Бирор-бир сўзни ўзлаштиргандан кейин қайдқоғозни янгисига алмаштиринг. Янги сўзни ўрганишга киришинг.

🔹 Ишингиз самарали бўлишини истасангиз, бирданига кўп сўзни ёдлашга киришманг. Бошида кунига 7-8 та сўз кифоя. Кейинроқ қанча сўзни ўзлаштиришга қурбингиз етиши ўз-ўзидан ойдинлашади.

🔹 Ўрганилган сўзларни амалда қўллаб кўринг. Шунда улар хотирада мустаҳкам ўрнашиб қолади.

👉 Тўлиқ ўқиш

@oriftolib

Словен халқ мақолларидан

Словенлар – жанубий славян гуруҳига мансуб халқ. Словениянинг асосий аҳолиси. АҚШ, Италия, Канада, Аргентина, Австрия, Германия ва бошқа мамлакатларда ҳам яшайди. Словен тилида сўзлашади. Умумий адади – 2,5 миллион атрофида.

🔹 Асраб қолинган тухум еб юборилган ҳўкиздан афзал.
🔹 Бориш ва ўрганишдан кўра ишониб қўя қолган осон.
🔹 Керагича меҳнат қилмаган одам ишининг мевасини тотишга ҳақсиз.
🔹 Тез қурилган нарса тез бузилади.
🔹 Ўз тилини ерга урган одам онасини ҳам ерга уради.
🔹 Ҳақиқатни айтмай туришдан оғирроқ юк йўқ.
🔹 Энг катта тоғ – уйингнинг остонаси.

@oriftolib

​Қонун ҳужжатлари тили: “ўзгартиш”ми ёки “ўзгартириш”

Қонун, қарор, фармон, буйруқ ва бошқа меъёрий-ҳуқуқий ҳужжатларда сўз қўллаш ва имло билан боғлиқ турличаликлар, чалкашликлар учраб туради. Улар қанча тез тузатилиб, чалкашликларга аниқлик киритилса, фақат фойда бўлади.

Бугун замонавий ўзбек тилида меъёрий ҳужжатлар сабабли оммалашган сўз – ўзгартиш ҳақида кичик изланиш ўтказамиз.

-тир ва -т орттирма нисбат қўшимчаларидир. Улар баъзан ўринма-ўрин, маънодош ҳолатда ҳам ишлатилиши мумкин. Жумладан, ўзгармоқ феълида. Ушбу сўзнинг орттирма нисбати ўзгартир ёки ўзгарт бўлади. Тўғри, “ўзгарт” шакли замонавий ўзбек тилида ишлатилмайди ҳисоб. Лекин хато эмас.

“Ўзгартиш” сўзи ана шу ўзгарт шаклидан ясалган ҳаракат номидир. У қонунчилик матнларида тамоман отлашган ҳолатда қўлланяпти, алоҳида сўзга айланиб улгурди. Уни изоҳли луғатга алоҳида сўз сифатида киритса ҳам бўлади.

Юридик тилда хилмахилликдан қочган афзал. Қонун ва қарорлар матнида ҳам биттасини: ёки ўзгартириш, ёки ўзгартиш вариантини танлаган афзал. Баъзида ҳатто битта қарор доирасида ҳам бир ўринда ўзгартириш, бошқа ўринда ўзгартиш қўлланган ҳолатлар бор.

Албатта, қонунлар ишлаб чиқилиш жараёнида бир неча чиғириқлардан ўтади, муҳокамалар қилинади. Аммо депутатлар орасида тилшунослар, муҳаррир ва мусаҳҳиҳлар ҳамиша ҳам топилавермаса керак. Менимча, қонунлар ва бошқа муҳим меъёрий-ҳуқуқий ҳужжатлар қабул қилинишидан олдин тажрибали муҳаррирлар назаридан ўтказилса, тил ва имло билан боғлиқ саволли ўринлар анчагина камаяди.

📌 Демак, сўзнинг ўзгартириш шакли ҳам, ўзгартиш шакли ҳам тўғри. Бироқ расмий-ҳуқуқий матнларда – ҳеч бўлмаса битта ҳужжат доирасида – ҳархилликка йўл қўймаслик, улардан фақат биттасини ишлатиш афзалдир.

@oriftolib

#Ёш_ижодкорларга_маслаҳат

Рей Бредбери:

Яхши ҳикояларнинг эътиборли жиҳатларини тадқиқ қилинг.

Рей Бредбери Роалд Дал, Ги де Мопассан, Найжел Нил, Жон Коллиер сингари адибларининг асарларини ўрганган.

Мутолаа жараёнида шунчаки ўқиб кетманг. Ёзувчи қандай сўзларни ишлатаётгани, ҳолатни қай йўсинда тасвирлаётгани, қайси деталларга эътибор бераётгани каби жиҳатларга диққат қилинг. Ифода усулидаги ўзингизга маъқул ўринларни ўзлаштириб олинг. Кейинги ижодий ишларингизда ўрганганларингизни қўллаб кўринг.

@oriftolib

“Kashf” va “ixtiro”: farqi nimada?

Baʼzi soʻzlar mazmun jihatidan bir-biriga yaqin boʻlsa-da, maʼno nozikliklari bilan bir-biridan farq qiladi. Kashf va ixtiro soʻzlari ham xuddi shunday.

Izohli lugʻat ikki soʻzni maʼnodosh sifatida sharhlabdi. Ammo milliy ensiklopediya ikki tushunchani farqlagan:

Kashfiyot bilan ixtironi bir-biridan farqlay bilish kerak. Kashfiyot natijasida muayyan qonuniyatlar yaratiladi, ixtiro natijasida esa muhim yangiliklar yaratilishi mumkin.

Macalan, Arximedning suv chiqarish vinti oʻta yangilik boʻlsa ham, u ixtiro hisoblanadi, Nyutonning butun olam tortishish qonuni esa olamshumul kashfiyotdir.

Har qanday ixtiro kashfiyot boʻla olmaydi, lekin ixtiro kashfiyotga suyangan holda qilinadi.

📌 Demak, kashfiyot deganda yangi qonuniyatlar, ilmiy gʻoya va ilmiy asosga ega farazlar, andaza va sxemalar tushuniladi. Ixtiro esa amalga oshirib koʻrilgan ilmiy yangilik yoki texnik yechim, kashfiyotning moddiylashgan shakli.

Yangi qonuniyat kashf etildi, Yerning Quyosh atrofida aylanishi kashf qilindi, qora tuynuklar haqidagi kashfiyot; raketa ixtiro qilindi, ichki yonuv dvigatelining ixtiro qilinishi, ketma-ket yaratilgan ixtirolar sanoatni birdaniga rivojlantirdi kabilar ✅

Yangi qonuniyat ixtiro etildi, Yerning Quyosh atrofida aylanishi ixtiro qilindi, qora tuynuklar haqidagi ixtiro; raketa kashf qilindi, ichki yonuv dvigatelining kashf qilinishi, ketma-ket yaratilgan kashfiyotlar sanoatni birdaniga rivojlantirdi kabilar ❌

👉 Toʻliq oʻqish

@oriftolib

Ёлғончига берилган жазо унга бошқалар ишонмай қўйгани эмас, у бошқаларга ортиқ ишона олмаслигидир.

Бернард Шоу

@oriftolib

Muqarrar jazo

Bu voqea olis mamlakatlardan birida yuz bergan. Mast holatda mashina haydagani uchun Sofiya ismli ayolni dastlabki surishtiruvga olib kelishdi. 27 yoshli tantiq bu ayol qattiq sarxush edi, o‘ziga kelgunicha ancha vaqt aljirab o‘tirdi. Hushiga kelgach esa, gap nimadaligini to‘la-to‘kis anglab, o‘zini qo‘lga oldi. Uni og‘ir jazo kutib turardi. Shu sababli shaharning eng ko‘zga ko‘ringan advokatini yolladi. Huquqshunos bor bilim-mahoratini ishga solib, Sofiyani jazodan qutqarib qoldi.

Boshiga tushgan ishlardan kerakli xulosa chiqarmagan ayol g‘alabasini yuvish uchun barga kirdi. To‘yguncha ichib, mast bo‘ldi. So‘ng yana rulga o‘tirdi. Uni bu safar boshqa ko‘rgilik qarshi oldi. Yo‘lda kimnidir urib yubordi, nima bo‘layotganini yaxshi anglamay bechorani yigirma metrga qadar sudrab bordi. Ko‘rsatilgan tez tibbiy yordam foyda bermadi, kasalxonaga juda og‘ir holatda olib kelingan bemor hayot bilan vidolashdi.

Bu safar Sofiyani hech kim jazodan asrab qola olmadi. Ayol qamoqxonada ekanida bir gapni eshitdi: baxtsiz hodisada qurbon bo‘lgan kishi uni o‘tgan gal jazodan qutqarib qolgan advokat ekan.

“Ma’rifat”da chop etilgan.

@oriftolib

​“Oʻrta maxsus”mi yo “oʻrta-maxsus”?

Shu soʻzda koʻp xato qilinadi. Toʻgʻrisi – oʻrta maxsus. Chunki u juft soʻz emas. Oʻrta soʻzi ham, maxsus soʻzi ham alohida-alohida sifatlovchidir. Bu ikki soʻz taʼlimning turini ifodalashga xizmat qiladi. Umumiy oʻrta taʼlim degan tushuncha bor. Oʻrta maxsus taʼlim oʻrta taʼlimning maxsus koʻrinishidir.

“Taʼlim toʻgʻrisida”gi qonunga koʻra, yetti xil taʼlim turi bor. Shulardan biri – umumiy oʻrta va oʻrta maxsus taʼlim. Umumiy oʻrta va oʻrta maxsus taʼlim umumtaʼlim oʻquv dasturlarini, zarur bilim, malaka hamda koʻnikmalarni oʻzlashtirishga qaratilgan.

Shu qonunga koʻra, umumiy oʻrta taʼlim tushunchasi I–XI sinflar taʼlimini, oʻrta taʼlim tushunchasi esa X-XI sinflar taʼlimini anglatadi.

Oʻrta maxsus taʼlim akademik litseylarda toʻqqiz yillik tayanch oʻrta taʼlim asosida ikki yil mobaynida amalga oshiriladi.

Eʼtibor bergan boʻlsangiz, Oliy va oʻrta maxsus taʼlim vazirligi nomida ham oʻrta maxsus soʻzlari chiziqchasiz yozilgan va bu – toʻgʻri.

📌 Demak,

Oʻrta taʼlim, umumiy oʻrta taʼlim, oʻrta maxsus taʼlim ✅
Oʻrta-taʼlim, umumiy-oʻrta taʼlim, oʻrta-maxsus taʼlim ❌

@oriftolib

Яхши одамлар маҳалласи

Адҳамжон ишдан қайтаётганди. Кўп қаватли уйлари эшигига ёпиштирилган эълон диққатини тортди:

“Азизлар, кундуз 10:20 ларда шу ерда юз минг сўм пулим тушиб қолибди. Биласиз, якка-ёлғизман, фақат нафақа билан кун кўраман. Ким топса, тўртинчи қават, йигирма тўртинчи уйдаги Меҳри холага учрашсин”.

Ахир, бу уларнинг тепасидаги уйда турадиган аёл-ку. Адҳамжоннинг хотини ора-сира кампирнинг ҳолидан хабар олиб туради, овқат, нон-чой дегандай. Биргина улар эмас, бошқа қўни-қўшнилар ҳам аёлга ёлғизлигини билдиришмайди.

“Кўчада ётган бир даста пулни бирорта ўткинчи олиб кетган бўлиши ҳам мумкин. Кел, шу кампирга мендан ҳадя бўлсин. Пулингизни топиб олдим деб ўша юз минг сўмни эҳсон қила қолай”, деб ўйлади Адҳамжон. Тўртинчи қаватга кўтарилиб, эшик қўнғироғини босди.

Бироз ўтиб, ичкаридан олтмиш-олтмиш беш ёшлардаги истарали кампир чиқиб келди. Йигитнинг қўлидаги пулга кўзи тушиб, кўзларига ёш олди. Сўнг қўлини очиб узоқ дуо қилди. Адҳамжоннинг касб-корига барака тилади, тутгани олтин бўлишини, Аллоҳ унга ғойибидан етказишини сўради. Аммо пулни олмади. Уринишлар бесамар кетди. Аёл қатъий рад этди. Сўнг ўша эълонни олиб ташлаш учун пастга тушиб кетди.

Маълум бўлишича, Адҳамжон пулни “топиб олган”ларнинг еттинчиси экан.

“Ирфон”да чоп этилган.

@oriftolib

Исроф ва увол: фарқи нимада?

Маънодош, маъноси бир-бирига яқин сўзлар баъзи ўринларда фарқланиши тилда бор ҳодиса. Исроф ва увол сўзлари ҳам маъно жиҳатидан яқин, баъзида бир-бирининг ўрнида алмашлаб ҳам қўллаш мумкин. Бироқ айрим ҳолатларда иккиси икки хил мазмунни англатади.

Исроф сўзи арабчадан олинган, ўзбек тилида ҳам аслиятдагидек маънони билдиради: нест-нобуд қилиш; ўринсиз ёки ортиқча ишлатиш, йўқ қилиш.

Увол ҳам арабчадан, бугунги ўзбек тилида асосан фойдасиз ёки бевақт йўқ бўлиш, йўқолиш; нест-нобуд бўлиш маъносида ишлатилади. Бу маъноси билан исроф сўзига синоним саналади.

Энди маъно қирраларидаги фарққа келсак.

Дейлик, кечки овқат керагидан ортиқча тайёрланди ва ортиб қолди. Сақлашнинг иложи йўқ, эрталабга қолса, айнийди. Уни айнитиб қўйиш ҳам исроф, ҳам увол. Лекин сиз шу ортиқча қисмини бир амаллаб, истамасангиз ҳам едингиз. Мақсад – увол бўлмасин. Тўғри, бунда овқат увол бўлмади. Лекин барибир исроф бўлди.

Чунки унга кетган ортиқча масаллиқ олиб қўйилганда, эртага бошқа овқатга ишлатиларди. Керагидан ортиқ ейиш эса сизнинг соғлиғингизга, кайфиятингизга ҳам салбий таъсир кўрсатди. Соғлиқнинг ёмонлашиши кун келиб шифокор хизматига ёки дори-дармонларга пул сарфлашга, оворагарчиликларга сабаб бўлиши мумкин. Булар ҳам эҳтимолий ортиқча сарфлар, яъни исрофдир.

Исроф ҳам, увол ҳам баракани кетказадиган, одамни камбағаллаштирадиган одатдир. Ундан имкон қадар узоқ юриш керак.

👉 Тўлиқ ўқиш

@oriftolib

#Ёш_ижодкорларга_маслаҳат

Рей Бредбери:

Каллани билим билан тўлдиринг.

Бредбери ухлашдан олдин бирорта савияли ҳикоя ёки поэма; археология, биология, зоология, фалсафа, сиёсатшунослик ёки адабий танқидга оид бирор-бир илмий тадқиқот ўқишга одатланган эди.

Умуман, ижодкор билимдон одам бўлиши керак. Билим доираси кенгайган одамнинг фикрлаш доираси ҳам кенгаяди.

@oriftolib