Prezident raisligida joriy yilda iqtisodiyotni rivojlantirish boʻyicha hukumat oldidagi ustuvor vazifalar yuzasidan videoselektor yigʻilishi boʻlib oʻtmoqda.

Yigʻilish avvalida iqtisodiy kompleks mavzusi birinchisi ekani, kelgusida barcha soha va tarmoqlar faoliyati tanqidiy koʻrib chiqilishi taʼkidlandi.

Oʻtgan yili iqtisodiy oʻsish 6 foizni tashkil qilgani, bu yil ham bu borada katta rejalar olingani qayd etildi. Ularni amalga oshirish uchun iqtisodiy kompleks juda qattiq ishlashi kerakligi koʻrsatib oʻtildi.

Iqtisodiy kompleksda jami 40 nafar rahbar oʻrinbosarlari bor. Lekin, hozir iqtisodiyotga masʼullarda zamonga munosib fikrlash, qaror qabul qilishda tezkorlik yetishmayapti. Ayrim rahbar oʻrinbosarlari oʻziga masʼuliyat olmasdan, mudrab oʻtirgani tanqid qilindi.

Bunda har bir tumanda, viloyatdagi iqtisodiy kompleksning rahbar va oʻrinbosarlari hamda 11 ta vazir va idora rahbari, oʻrinbosarlariga masʼuliyati va javobgarligi aniq belgilab beriladi. Soʻrov ham shunga yarasha qattiq boʻladi.

Iqtisodiy kompleks rahbarlariga oylik, choraklik va yillik samaradorlik koʻrsatkichlari (KPI) joriy etiladi. Ish haqi ham ularning ijrosiga bogʻlanadi.

Ushbu rahbarlar bir hafta muddatda xalqqa murojaat qilib, rejalarini oddiy tilda tushuntiradi hamda oʻziga katta masʼuliyat va javobgarlik oladi.

Endi vazir oʻrinbosarlarini 70 foiz ishi tumanda boʻlib, ular vazirlik uchun belgilangan KPI ijrosini joyida tashkil qiladi.

Belgilangan rejalarga erishish ustidan qatʼiy nazorat oʻrnatiladi: vazirlik va idora rahbarlarining hisoboti har haftada Hukumat rayosatida, har chorakda esa Oliy Majlisda koʻrib chiqiladi.

Telegram | Instagram | Facebook | YouTube

Yigʻilishda moliyaviy intizomni kuchaytirib, 2024-yilda byudjet defitsitini 4 foizdan oshirmaslik zarurligi taʼkidlandi.

Oʻtgan yili koʻplab davlat korxonalari dividend va soliq toʻlovlari boʻyicha byudjetga 8 trillion soʻm tushumni taʼminlay olmagani koʻrsatib oʻtildi.

Hududlar rahbarlari ajratilgan byudjet ssudalari qaytarilmayotgani holatlari boʻyicha qatʼiy choralar koʻrilishi haqida ogohlantirildi.

Sirdaryo va Jizzaxda soliq tushumlari 20 foiz oʻsgan boʻlsa, Xorazm, Buxoro va Qashqadaryoda bu koʻrsatkich 7 foizga ham yetmagani tanqid qilindi.

Masalan, yuridik shaxs maqomidagi 18 mingta ovqatlanish korxonasidan atigi 2 ming 300 tasi QQS toʻlovchi hisoblanadi. Sababi, ular tovar aylanmasini 1 milliard soʻmdan oshirmaslik uchun bitta oshxonaga 3-4 tadan firma ochib qoʻygan.

Bunday holatlar boʻyicha mahalladagi soliqchi, tuman soliq boshliqlari va oʻrinbosarlarining ishi sustligi koʻrsatib oʻtildi.

Telegram | Instagram | Facebook | YouTube

Umuman, soliq tizimi va soliqchilar faoliyatini tubdan qayta koʻrib chiqish vaqti kelgani taʼkidlandi.

Jumladan, 40 mingta byudjet tashkiloti bilan ishlash vazifasi tumandan Soliq qoʻmitasida yangi tashkil qilinadigan Byudjet tashkilotlari inspeksiyasiga oʻtkaziladi. Ushbu Inspeksiya toʻliq raqamlashgan boʻladi va Gʻaznachilik elektron tizimiga integratsiya qilinadi.

Shu kabi soliq qarzdorligi bilan ishlash boʻyicha ham qoʻmita qoshida Soliq qarzini undirish inspeksiyasi tashkil etiladi. Unga Majburiy ijro byurosida mavjud vakolatlar beriladi.

Buning hisobiga, tumanlardagi qoʻshimcha 200 nafar soliqchini “mahallabay” ishlash tizimiga oʻtkazish imkoni boʻladi.

Respublika soliq tushumining 50 foizini beradigan 80 ta eng yirik korxona va 35 ta tijorat banki bilan ishlaydigan alohida tizim boʻladi.

Buning uchun Yirik soliq toʻlovchilar boʻyicha inspeksiya tarkibida yangi tuzilma tashkil qilinib, Iqtisodiyot va moliya vazirligi bilan bevosita ishlaydi.

Telegram | Instagram | Facebook | YouTube

Prezident bojxonada ham bor imkoniyatlar toʻliq ishga solinmayotganini qayd etdi.

Masalan, oʻtgan yili import boʻlgan 20 milliard dollarlik tovarlarga salkam 60 trillion soʻmlik imtiyoz qoʻllangan.

Lekin ushbu imtiyozlarning qanchasi maqsadli va samarali qoʻllangani boʻyicha bojxonada tahlil yoʻqligi koʻrsatib oʻtildi.

Oʻtgan yili qoʻllangan imtiyozning bor-yoʻgʻi 3,2 trillion soʻmi oʻrganilganda, ularning 420 milliard soʻmi yoki 13 foizi maqsadsiz qoʻllangan boʻlib chiqdi.

Shu bois, Bojxona qoʻmitasiga imtiyoz bilan kirgan tovarlarni korxonabay oʻrganib chiqish topshirildi.

Umuman, bu yil qoʻshimcha manbalar hisobidan Soliq qoʻmitasi 40 trillion soʻm, Bojxona qoʻmitasi esa kamida 15 trillion soʻm tushumni taʼminlashi muhimligi taʼkidlandi.

Telegram | Instagram |Facebook | YouTube