Пісьменнік, партызан, грамадскі дзеяч Аляксей Карпюк (1920-1992) некаторы час працаваў у Гродзенскім абласным аддзяленні СП БССР.

Па ўспамінах гродзенскай паэткі Дануты Бічэль-Загнетавай, Аляксей Нічыпаравіч быў чалавекам з добрым пачуццём гумару і добра адносіўся да жартаў:
«Мы выступалі разам – Быкаў, Карпюк і я. Звычайна Карпюк любіў адказваць на пытанні, ды і ўмеў ён зацікавіць людзей выступленнем, яму прыходзіла з залы шмат цыдулачак. Ён любіў тэатр, пісаў п’есы і сцэнары па сваіх аповесцях, але партыйная цэнзура была да яго сцэнараў асабліва жорсткай. Яго выступленні перад слухачамі – гэта быў тэатр, у якім ён быў галоўным рэжысёрам і акторам, але ўся зала таксама пераўтваралася ў актораў.
Быкаў звычайна падаваў яму запісачку з пытаннем: хто яму болей падабаецца – бландынкі ці брунеткі… Карпюк чытаў пытанне ўголас, пасля паварочваўся да нас і казаў: «Гэта вашы штучкі!»

У літаратурным аддзеле нашага музея захоўваюцца запіскі з пытаннямі, якія чытачы перадавалі пісьменніку падчас літаратурных сустрэч.