ҒУЛУВ ВА ТАКФИРДАН ОГОҲЛАНТИРИШ

Динда ҳаддан ошишнинг кўринишларидан бири мусулмонларни ўзлари каби фикрламагани ёки уларга қўшилмагани учун кофирга чиқариш ҳолатларидир. Бу ҳолат Исломнинг аввалидан юзага келиб, ҳозирда ҳам айрим жойларда давом этаётгани катта мусибатлардан биридир. Бугунги такфирчи жамоатлар ҳам худди аввалгилари каби кўплаб мусулмонларни кофирга чиқаришяпти, уларнинг қонлари тўкилишини ҳалол санашяпти, уларга қарши уруш очиб, натижада мусулмонларнинг қонлари ноҳақ тўкилмоқда. Вақти-вақти билан ижтимоий тармоқларда ҳам уларнинг – яъни, бугунги хаворижларнинг – ғулувга йўғрилган турли фатволари тарқалиб турибди. ...
Имом Шотибий раҳматуллоҳи алайҳ хаворижлар ҳақида Ҳасан Басрий раҳматуллоҳи алайҳнинг ушбу сўзини келтиради: “Илмсиз амал қилувчи киши худди нотўғри йўлда юриб кетаётган кишига ўхшайди. Илмсиз амал қилувчи кишининг фойдасидан кўра зарари кўпроқ бўлади. Шундай экан, ибодатга халал бермайдиган илмни ва илмга халал бермайдиган ибодатни талаб қилинглар. Чунки бир қавм илмни тарк қилиб ибодат талабида бўлди, ҳатто Муҳаммад соллаллоҳу алайҳи васалламнинг умматига қилич кўтариб қарши чиқишди. Агар улар илм талаб қилганларида эди, илм уларни бу қилмишларига бошламаган бўларди”. У зот – валлоҳу аълам – бу сўзлари билан хаворижларни қасд қилган эди. Чунки хаворижлар қуйидаги ҳадисда ишора қилинган – Қуръон ўқийдиган, лекин уни англамайдиган қавм эди: “Улар Аллоҳнинг китобини нозил бўлган онидагидек ўқишади, бироқ у уларнинг бўғизидан нарига ўтмайди”. (Имом Бухорий ривоят қилган) [Ал-Эътисом, 3-жуз, 101-бет]
Абдуллоҳ ибн Масъуд розияллоҳу анҳудан ривоят қилинади: “Набий соллаллоҳу алайҳи васаллам: “Чуқур кетувчилар ҳалок бўлдилар”, дедилар. У зот бу гапни уч марта айтдилар”. (Имом Муслим ривоят қилган).

Қудратуллоҳ Сидиқметов
Кўкалдош ЎМИБЮ мударриси

@kukaldoshuz – диний-маърифий канал!

Kukaldosh.uz | YouTube | Facebook | Instagram