#КК_Поэзия

ОҔО СААҺЫ ЭРГИТИЭХХЭ
Ааптар: Мария Поскачина

Оҕо сааһы саппыт быыһы
Үргүппэккэ сэгэтиэххэ,
Быдан ыраах хаалбыт кэми
Санааҕа эргитиэххэ.
Онно баара үрдүк халлаан
Былыта суох суһума
Онно эрэ түһэрэ
Күн мөһүүрэ утаҕа...
Онно баара сылаас долгун
Куоталаһар үҥкүүтэ,
Оҕо-аймах чомполонор
Сөтүө кэмин үөрүүтэ.
Онно баара күнтэн күн
Тупсан иһэр айылҕа,
Өрүү маннык буолуоҕун
Түстүүр үтүө сарсыарда.
Онно эрэ күнүскүнү
Күөрэгэй киэргэтэрэ,
Кэрии тыаҕа кэҕэбит
Тохтообокко этэрэ...
Онно баар кэрэ көстүү
Өрүү сүппэт сүрэхтэн,
Саната турар өрүһүспүттүү
Ааспыт кэми эргитэн.
Оҕо сааспыт аптаах аанын
Аргыый аҕай сэгэтиэххэ,
Омун-төлөн оҕо сааска
Төннө түһэн ылыахха.
Кыра кэмҥэ кыбыстыбакка
Оҕо буолан ылыахха,
Уонна кырдьары билиммэккэ
Олоҕу омуннаахтык олоруохха.

📍https://t.iss.one/kiin_kyorat_gazeta

#КК_Поэзия

Олус да кэрэ,
Олох диэн, дьиҥэ!

Саас хаар ирэрэ,
Көтөр кэлэрэ,
Yрэх сүүрдэрэ,
Өрүс эстэрэ -
Олус да кэрэ!

Тыҥмыт хатара,
Күммүт тахсара,
Тыа5а, аларга,
Күнүс буолара -
Олус да кэрэ!

Этиҥ этэрэ,
Ардах түhэрэ,
Кэйэ, тэтэрэ,
Дьэдьэн үүнэрэ -
Олус да кэрэ!

Нарын кулуhун
Солко суугуна,
Саха хомуhун
Тохтор тойуга -
Олус да кэрэ!

Сырдык сэбэрэ,
Сүрэх сэгэрэ
Yҥкүү тэбэрэ,
Yрдүү тэйэрэ -
Олус да кэрэ!

Ахтар алааhым,
Аҥнар сылааhа,
Ыраах далааhын,
Ыра ырааhа -
Олус да кэрэ!

О5о күлэрэ,
О5о билэрэ,
Ийэ үөрэрэ,
Ирэ иэйэрэ -
Олус да кэрэ!

Өрүү үтүө5э,
Өрүү үрдүккэ
Өрө күүрэр өй,
Өлбөт өрөгөй -
Олус да кэрэ!

Олох диэн, дьиҥэ,
Олус да кэрэ!

Күннүк Уурастыырап "Олох" хоhооно.

https://t.iss.one/kiin_kyorat_gazeta

#КК_Поэзия

🏵🏵🏵

Арыылаах алаадьы курдук,минньигэс,
Ийэтин илгэтин үүтүнүү дэлэгэй,
Сахалыы саҥабыт сайаҕас,
Сахалыы көрүүбүт эйэҕэс.
Сахалыы саҥарар саҥабыт,
Байҕал уутунуу бараммат,
Өлүөнэ уутунуу субуллар,
Үрэхпит уутунуу сыыйыллар.

Сахалыы баай тыллаах буоламмыт,
Барҕара үүнэбит,сайдабыт,
Сахалыы саҥарар буоламмыт,
Аар саарга аатыра сылдьабыт.

Сахабыт оһуора,уйгута
Сахабыт оҕуруо киэргэлэ,
Сахалыы таҥаспыт аатырда,
Киэҥ сиргэ,сураҕа тарҕанна.

Сахабыт быһаҕа,туһаҕа,
Мандар уус оһуора,ойуута,
Көмүс уус,киэргэлэ,симэҕэ,
Алтан уус харысхал бэлиэтэ,
Сүүһүнэн омугу сөхтөрдө.

Сахалыы баай тылбыт сатараан,
Аан дойду дьонугар хайҕанна,
Оһуохай,олоҥхо тыллара,
Толору хааһахтан хостонно.

Туймаада хочотун үрдүнэн,
Хоһооммут,ырыабыт дуорайда,
Сахалыы санаалаах сайыннын
Сахалыы толкуйдаах астыннын!

Истиэхтэн кэрэтик иһиллэр,
Сахалыы оһуохай тыллара,
Этиэхтэн кэрэтик этиллэр,
Эһиэкэй эриэккэс тыллара.

Киэн туттуом,сахалыы тылбынан,
Сааһылаан,сахалыы саҥарыам,
Мин ийэм иһирэх тылынан,
Мин аҕам амарах тылынан!

Сайыннын,сахалыы,мин тылым,
Аар саарга аатыра туруохтун,
Аан дойду дьоннорун сөхтөрөн,
Аартыга аһаҕас буолуохтун!

Ааптар: Раиса, 13/02-2020

📍https://t.iss.one/kiin_kyorat_gazeta

#КК_Поэзия

БҮГҮН CAAC
🖋Ааптар: Николай Винокуров-Урсун

Саас буолан, чалбахтар
Күөҕүнэн көрдүлэр;
Ыаммыт үөл талахха
Үнүгэс түүлэнэр.

Турабын. Күөх халлаан.
Долгутар күн, Кавказ.
Күрүлгэн, суһумнаа
Сүрэхпэр — күөх алаас

«Чии-чии-чии» аттыбар
Чыычаахтар көтөллөр.
Оттон мин санныбар
Очуос таас өйөнөр.

Мин Дойдум барахсан
Итиэннэ бу Кавказ
Биир курдук кутуллан,—
Бүгүн саас, бүгүн саас!

📍https://t.iss.one/kiin_kyorat_gazeta

#КК_Поэзия

🌼НЬУРГУҺУН
Ааптар: Сайа

Сир ийэ долгуйар иэйиитэ,
Сандал саас дьиктилээх мичээрэ,
Ньургуһун симииргэ дылы ээ,
Кырдалы буолбатах - олоҕу!
 
Киниэхэ тапталын эппэтэх,
Сүрэҕэр чугастык туппатах
Суох буолуо сахалыы саҥалаах,
Күн өркөн ууһуттан төрүттээх.
 
Маҥнайгы тапталбыт - ньургуһун,
Кыыс оҕо кэрэтэ - ньургуһун,
Бэл, хорсун санаабыт - ньургуһун,
Дьулуурбут, тулуурбут - ньургуһун!
 
Кыһыммыт тыйыһын иһин дуу
Сүрэхтиин ууллуохтуу таптыыбыт,
Күн диэки үҥэрбит күүһэ дуу -
Халлаанныын хамсыахтыы ыллыыбыт...
 
Баҕардар, арҕааттан тыалырдын,
Хаҕыстык тымныынан хаарыйдын -
Хаһыҥныын хатыһа тылыннын
Хас биирдии сүрэххэ - ньургуһун...
 
Сир ийэ киэргэллээх иэйиитэ,
Сандал саас дьиктилээх мичээрэ,
Ньургуһун симииргэ дылы ээ,
Кырдалы буолбатах - олоҕу!

📍https://t.iss.one/kiin_kyorat_gazeta

#КК_Поэзия

🪶Ааптар: Иван Арбита

Атын дьоннор иккилии буолан
Хонуу күөҕэр хаамаллар.
Оттон тоҕо мин көртөн мунан
Соҕотоҕун хаалабын?

Иккилии буолан сиэттиспиттэр
Күөх сааска дьаарбайаллар,
Оттон тоҕо мин кэннибиттэн
Күлүгүм эрэ хаамар?

Ол аата — мин бэйэбин кытта
Быстыбат ситимнээхпин,
Биир туспа халлааннаах, былыттаах
Муҥура суох элбэхпин.

📍https://t.iss.one/kiin_kyorat_gazeta

#КК_Поэзия

Сэмэй саха сиэринэн
🪶Ааптар: Васильев Илья–Ылдьаа Хоточчу

Саараммаппын аакка-суолга
Сэмэй саха сиэринэн,
Таласпаппын ыраахха
Төрүт сиртэн тэлэһийэн.

Эмэн саастыын эллэһэн
Эрэйдэнэр буолбаппын,
Кырдьар кэми билинэн
Курутуйа барбаппын.

Ыраас ыйдыын сэлэһэн,
Ымманыйа сырдыыбын,
Кэрэ түүлгэ бигэтэн,
Кутум иэйэн ыллыыбын.

Мин билэбин улуу дьолу
Маамыкталаан туппаппын,
Таптыырбыттан ордугу
Тымтыктанан булбаппын.

📍https://t.iss.one/kiin_kyorat_gazeta

#КК_Поэзия

🌼Ньургуһуҥҥа
Ааптар: Луиза Кобельянова-Сандаар Күн Сандаара

Саас аайы тыллаҕын
Эн, кэрэ ньургуһун.
Аан бастаан көрсөҕүн
Үрүҥ күн мичээрин.

Харалдьыт аайытын
Үүнэҕин киэркэйэ,
Дьон-сэргэ хараҕын
Үөрдэҕин манньыта.

Сиэдэрэй көрүҥүҥ –
Сандал саас бэлиэтэ.
Муус устан саҕалыа –
Дьикти сыт абылыа.

Эн араас өҥнөөххүн
Сир-дойду аайытын:
Күөх, кыһыл, саhархай –
Олус да сиэдэрэй.

Ньургуһун сибэкки,
Нарыҥҥын эрээри,
Тоҥ буору тобулар
Ураты күүстээххин!

📍https://t.iss.one/kiin_kyorat_gazeta

#КК_Поэзия

🌊Долгуннар
Ааптар: Луиза Кобельянова-Сандаар Күн
Сандаара

Айылҕа күүһүн көрөммүн
Хоhуйарга сананным.
Байхал уулаах Байкаал күөл
Долгуннарын үнкүүтүн.

Эчи кини кэрэтиэн,
Долгулдьуйар бэйэтиэн.
Ыраас уута күлүмнээн,
Сүүс араастыы ыhыллар.

Күүстээх бааллаах долгуннар
Эриллэ үөhээ көтөллөр.
Алмаас таастыы таммахтар
Күн уотугар оонньууллар.

Көрөн тэҥҥэ үнкүүлүөх,
Үөрүөх санааҕа ыллардым.
Бу хоhоону суруйан,
Бүгүҥҥү күммэр махтанным!

📍https://t.iss.one/kiin_kyorat_gazeta

#КК_Поэзия

🖼Дьикти хартыына
(Николай Рязанскай
хартыынатын дьүһүйүү)
Ааптар: Луиза Кобельянова- Сандаар Күн
Сандаара

Туох дьикти хартыыната
Мин иннибэр турарый?
Уол халлааҥҥа көппүтүн
Ким көрбүтэ баар этэй?

Илиилэрин саратан,
Көтөн иhэрдии туттубут.
Уол маҕан ырбаахыта
Салгыҥҥа тэлээрбит.

Кини үөрбүт сирэйэ
Сып-сырдыкка таласпыт.
Тугу эрэ кэрэни
Кини көрүөн баҕарбыт.

Түүл дуу бу? Илэ дуу?
Ыра санаа иэйиитэ дуу?
Уолчаан сырдык мөссүөнэ
Күҥҥэ тиийиэм диир курдук.

Аллараа хартыынаҕа
Икки киhи далбаатыыр.
Ийэтэ уонна балта,
Бадаҕа, турдахтара.

Ынахтар, олбуор иhэ
Былыргыны санатар.
Дэриэбинэ олоҕун
Худуоhунньук дьүhүйэр.

Ырыых-ыраах көстөллөр
Тыа, алаас, үрэх, мыраан.
Күн уота чаҕылыйа,
Тыгар сандаарыйа.

Бу олорон билбэккэ,
Бэйэм санааҕа түспүппүн.
Бу уол курдук ыраахха
Көтүөхпүн баҕарбыппын.

Үчүгэй да хартыына,
Илэ кэми суурайда.
Оҕо санааҕа уйдаран,
Чыычаах курдук көтүттэ.

📍https://t.iss.one/kiin_kyorat_gazeta