Мирзачўл тумани аҳолиси миннатдор

Мирзачўл туманининг энг чекка ва оғир ҳудуди сифатида танлаб олинган ва кенг кўламли қурилиш, ободонлаштириш ишлари олиб борилаётган “Гулзор” маҳалласида вилоят ҳокими Эргаш Салиевнинг аҳоли билан навбатдаги оммавий қабули ташкил этилди.

Оммавий қабулда фуқароларга қулайлик яратиш ва иш жараёнини сифатли ва тезкор ўтказиш учун вилоят ҳокими ўринбосарлари, ташкилотлар ва бошқарма раҳбарларидан иборат 15 та ишчи гуруҳ тузулди ҳамда фаолият олиб борди.

Вилоят ҳокими Эргаш Салиевнинг иштирокидаги оммавий қабулда 78 нафар фуқароларнинг 88 та масалалари бўйича мурожаатлари тингланди. Шундан, 22 нафар фуқароларнинг мурожаатлари жойида ижобий ҳал этилди.

Оммавий қабул давомида вилоят ҳокими маҳаллалардаги ҳоким ёрдамчилари тавсиясига кўра ажратилган банк кредитлари ҳисобига фуқаролар томонидан ишлаб чиқарилаётган маҳсулотлар кўргазмаси билан танишар экан, тадбиркорликни янада ривожлантириш бўйича ўз тавсияларини берди ҳамда янгидан тадбиркорликни бошламоқчи бўлган бир гуруҳ ёшларга ажратилган кредит ва тикув машинкаларини топширди.

Шунингдек, оммавий қабул давомида вилоят ҳокимига шу ерлик оқсоқоллар, онахонлар, ёшлар вакиллари ҳамда “Ержар” маҳалласидан бир гуруҳ фуқаролар аҳолининг кўп йиллик долзарб муаммоларини ижобий ҳал қилиш, “Инсон қадри”ни улуғлаш мақсадида кўрсатилаётган катта амалий ёрдамлари, амалга оширилаётган туб ислоҳотлари учун муҳтарам Президентимизга ўзларининг самимий миннатдорчиликларини билдиришди.

Обод бўлаётган Мирзачўл

Мирзачўл туманида 2022 йилда амалга оширилаётган қурилиш – ободонлаштириш ишлари жойларда қандай бораётгани бўйича оммавий ахборот воситалари вакиллари ва ижтимоий тармоқ фаоллари учун пресс тур ташкил этилди.

Туман маҳаллаларида 2022 йилда 4 та дастурлар доирасида жами 52,4 млрд сўмлик ишлар амалга оширилиши кўзда тутилган.

Хусусан, инвестиция дастурига кўра 10 та объект учун жами 20,3 млрд. сўм маблағ ажратилган. Ушбу объектларда бугунги кунгача 19,9 млрд сўмлик қурилиш – таъмирлаш ишлари бажарилди ва 9,8 млрд сўмлик 7 та объект фойдаланишга топширилди.

Президентимизнинг 25 октябрдаги ПҚ 408 – сонли қарорига асосан туманда долзарб муаммо бўлган ичимлик суви таъминотини яхшилаш учун 4 та объектларга 20,4 млрд сўм маблағ ажратилиб, бугунги кунда ишлар бошлаб юборилган.

Вазирлар Маҳкамасининг қарорига асосан ичимлик суви, электр энергия, ички йўллар ва бошқа инфратузилма объектлари билан боғлиқ масалаларни ҳал этиш учун “Янгидала” ва “Ержар” маҳалларига ажратилган 4 млрд.сўм маблағлар ҳисобидан ишлар олиб борилмоқда.

Жумладан, пресс тур вакиллари дастлаб, “Ержар” маҳалласида олиб борилаётган ишлар билан яқиндан танишишди ва бу ердаги аҳоли фикрлари билан қизиқишди.

“Боғбон” маҳалласига борган иштирокчилар ҳоким ёрдамчиларининг ишлар билан танишишди.

Навбатдаги манзил “Ўзбекистон” маҳалласи бўлди, бугунги кунгача ушбу маҳаллада 2.1 км ички йўллар шағаллаштирилди. 16-боғчага қўшимча бино қуриш учун вилоят ҳокими томонидан 740 млн сўм маблағ ажратилди.

Сўнгги манзил, “Обод қишлоқ” дастури асосида обод бўлаётган “Гулзор” маҳалласи бўлди.

Мазкур маҳаллада жами 9,6 млрд сўм маблағ ажратилиб,бугунги кунгача дастур доирасида 9 млрд сўмлик қурилиш – таъмирлаш ишлари бажарилди.

Мирзачўл тумани мутасаддилари пресс тур вакилларига қурилиш – таъмирлаш ишлари давом эттирилаётгани ва уларнинг барчаси йил якунига қадар бажарилиши бўйича оммага маълумот беришларини айтиб ўтишди.