В централној Россији уже настал 2025, а в друге словјанске крајины он буде пријдти в нєколико часин.

2024 рок был добры за меджусловјанскы језык, он достал официалны ISO-код, појавила се прва авторска книга, написана на меджусловјанском, были отворјене Викисловник и инкубатор меджусловјанского раздєла Википедије. Такоже мы јесмо активизовали додавање новых слов в словник, але о том будемо разказати в близке дње.

Хчемо поблагожелати да бы в новом году всакы достал то, что јему јест највыше потрєбно. Нехај хворы буде оздравити се, самотны — достати близкых људиј, амбициозны — изполнити своју мечту, а шчестливы — не изгубити и умножити своје шчестје.

Не знамо, буде ли наступны год шчестливым, але абсолутноју увєрјеностју можемо сказати, же он буде интересны. Честитамо вас с Новым Годом, меджусловјани! Немного послє буде малы подарок од нас.

V centralnoj Rossiji uže nastal 2025, a v druge slovjanske krajiny on bude prijdti v několiko časin.

2024 rok byl dobry za medžuslovjansky jezyk, on dostal oficialny ISO-kod, pojavila se prva avtorska kniga, napisana na medžuslovjanskom, byli otvorjene Wikislovnik i inkubator medžuslovjanskogo razděla Wikipedije. Takože my jesmo aktivizovali dodavanje novyh slov v slovnik, ale o tom budemo razkazati v blizke dnje.

Hčemo poblagoželati da by v novom godu vsaky dostal to, čto jemu jest najvyše potrěbno. Nehaj hvory bude ozdraviti se, samotny — dostati blizkyh ljudij, ambiciozny — izpolniti svoju mečtu, a ščestlivy — ne izgubiti i umnožiti svoje ščestje.

Ne znamo, bude li nastupny god ščestlivym, ale absolutnoju uvěrjenostju možemo skazati, že on bude interesny. Čestitamo vas s Novym Godom, medžuslovjani! Nemnogo poslě bude maly podarok od nas.

​​Anton rěšil prěměniti šum megapolisa na tišinu sibirskoj tajgy. Lovjenje ryby, večera bliz ognja, stvorjeny svojimi rukami dom... Ale vrěme ne jest možlivo zastanoviti. Za dva lěta jego žitja v lěsu svět ušel daleko naprěd. Tam, kde razvoj tehnologij imaje nevěrojetnu, fascinujuču skorost.

Medžuslovjansky imaje malo avtorskyh tekstov, i ješče menje — avtorskyh tekstov v žanru naučnoj fantastiky. Jesm poproboval popraviti toj nedostatok i takože osmysliti ideju Tehnologičnoj Singularnosti, pogleděti, kako by ona mogla izgledati za člověka iz našej epohy. "Rezervat/Заповедник" jest imenno o tom.

Želam vam interesnogo čitanja, prijatelji!

Povědka na latinici — https://teletype.in/@mashine_of_goodness/rezervat_latin
Povědka na kirilici — https://teletype.in/@mashine_of_goodness/rezervat_cyr
Povědka na russkom — https://author.today/work/403579
Blagodariti avtora — https://pay.cloudtips.ru/p/9bb0556c

​​Антон рєшил прємєнити шум мегаполиса на тишину сибирској тајгы. Ловјење рыбы, вечера близ огња, створјены својими руками дом... Але врєме не јест можливо застановити. За два лєта јего житја в лєсу свєт ушел далеко напрєд. Там, кде развој технологиј имаје невєројетну, фасцинујучу скорост.

Меджусловјанскы имаје мало авторскых текстов, и јешче мење — авторскых текстов в жанру научној фантастикы. Јесм попробовал поправити тој недостаток и такоже осмыслити идеју Технологичној Сингуларности, погледєти, како бы она могла изгледати за чловєка из нашеј епохы. "Резерват/Заповедник" јест именно о том.

Желам вам интересного читања, пријатељи!

Повєдка на кирилици — https://teletype.in/@mashine_of_goodness/rezervat_cyr
Повєдка на латиници — https://teletype.in/@mashine_of_goodness/rezervat_latin
Повєдка на русском  — https://author.today/work/403579
Благодарити автора — https://pay.cloudtips.ru/p/9bb0556c

Поздрав, имамо поправјенја в меджусловјанском словнику

Меджусловјанскы:
• "vlěžti" -> "vlězti"
• "sȯobčeńje" -> "sȯobćeńje"
• "klicati" (в значенју "click") -> "klikati"
• слово "kadȯlb" јест одмєчено како кандидат к удаљенју
• В "sȯglåsiti sę, sųglåsiti sę" чест рєчи глагола јест измєњена на совршену (было imperfect, тутчас јест perfect)
• "hirugičny" -> "hirurgičny"
• "hirugija" -> "hirurgija"

Англијскы 🇬🇧:
• isv "tykati" "thou, tutoyer, adress with «ty»" -> "thou, tutoyer, address with «ty»"

Македонскы 🇲🇰:
• isv "staroslovjansky", "стерословенски" -> "старословенски"
• isv "Sěverna Makedonija", mk "Македонија (една и единствена)" -> "Македонија"

Србскы 🇷🇸:
• isv "mozg", sr "мозск" -> "мозак"
• isv "svęź", sr "позезаност, веза, однос" -> "повезаност, веза, однос"

Бєлорусскы 🇧🇾:
• к словам "prošedšesť", "prošlosť", "minųlosť" јест доданы синоним "мінуўшчына"

Чешскы 🇨🇿:
• isv "pozdråv", cs "Buď zdáv" -> "Buď zdráv"
• isv "najemnica", cs "najtá žena" -> "najatá žena"
• isv "glupėc", cs "krtén" -> "kretén"

В боту @mashina_slovnik_bot измєњенја сут уже видне, а на сајту словника будут видне заутра.

Pozdrav, imamo popravjenja v medžuslovjanskom slovniku

Medžuslovjansky:
• "vlěžti" -> "vlězti"
• "sȯobčeńje" -> "sȯobćeńje"
• "klicati" (v značenju "click") -> "klikati"
• slovo "kadȯlb" jest odměčeno kako kandidat k udaljenju
• V "sȯglåsiti sę, sųglåsiti sę" čest rěči glagola jest izměnjena na sovršenu (bylo imperfect, tutčas jest perfect)
• "hirugičny" -> "hirurgičny"
• "hirugija" -> "hirurgija"

Anglijsky 🇬🇧:
• isv "tykati" "thou, tutoyer, adress with «ty»" -> "thou, tutoyer, address with «ty»"

Makedonsky 🇲🇰:
• isv "staroslovjansky", "стерословенски" -> "старословенски"
• isv "Sěverna Makedonija", mk "Македонија (една и единствена)" -> "Македонија"

Srbsky 🇷🇸:
• isv "mozg", sr "мозск" -> "мозак"
• isv "svęź", sr "позезаност, веза, однос" -> "повезаност, веза, однос"

Bělorussky 🇧🇾:
• k slovam "prošedšesť", "prošlosť", "minųlosť" jest dodany sinonim "мінуўшчына"

Češsky 🇨🇿:
• isv "pozdråv", cs "Buď zdáv" -> "Buď zdráv"
• isv "najemnica", cs "najtá žena" -> "najatá žena"
• isv "glupėc", cs "krtén" -> "kretén"

V botu @mashina_slovnik_bot izměnjenja sut uže vidne, a na sajtu slovnika budut vidne zautra.

В столици Перу, Лимє, полицијник, облачены како капибара, 14 дне второго мєсеца је задржал подзрєваного в тргованју наркотиком.

Јест было изјавјено выше неж 1700 опаковок кокаина и марихуаны.

Перуанска полиција често користаје карнавалове костјумы в часу светков, таковых како Ден светого Валентина, Хелоуин (Halloween) и Родженје; в особливости, полицијники ранєје сут облачали се како Чловєк-павук, Капитан Америка, Тор и Чрна вдова в врємену налетов против трговцам наркотиком.

V stolici Peru, Limě, policijnik, oblačeny kako kapibara, 14 dne vtorogo měseca je zadržal podzrěvanogo v trgovanju narkotikom.

Jest bylo izjavjeno vyše než 1700 opakovok kokaina i marihuany.

Peruanska policija često koristaje karnavalove kostjumy v času svetkov, takovyh kako Den svetogo Valentina, Helouin (Halloween) i Rodženje; v osoblivosti, policijniki raněje sut oblačali se kako Člověk-pavuk, Kapitan Amerika, Tor i Črna vdova v vrěmenu naletov protiv trgovcam narkotikom.

Novosti projekta “Medžuslovjansky slovnik” (https://interslavic-dictionary.com)

V tečenju zimy i na početku vesny bylo sdělano nekoliko ulěpšenij v Medžuslovjanskom slovniku, o kojih byhmo htěli pověděti.
1. Obličje slovnika jest značno osovrěmenjeno. Izměnili jesmo font, kolory i dekorativne elementy dizajna. Izměny se dotknuli i světloj, i temnoj temy interfejsa. Kromě vněšnjego vida, byla udoskonaljena i vnutrnost aplikacije zaradi bystrosti dělanja i legkosti daljšego razvitja.

2. Povyšena jest stabilnost raboty bez internetnoj svezi. Nyněšnja versija ne trěbuje postojanno obnavjati bazu s servera. Daunlodovanje novyh danyh děje se samo togda, kogda koristnik imaje internet i kogda v bazě jestvujut izměny. Ako izměn nemaje ili že internet ne jest dostupny, slovnik rabotaje v oflajnovom režimu, daže ako vy jego zatvorili i otvarjajete iznova.

3. Do bazy vošlo mnogo novyh slov, označenyh 🌱 (zelenym rastkom). To sut slova-kandidati, ktore ješče ne sut oficialno prijete, ale mogut byti uživane. Prijmajemo prědloženja novyh slov, ako oni odpovědajut pravilam medžuslovjanskogo slovotvorjenja.

Kromě togo, někoje slova byli označene kako ⚠️ - malo razumlive i ⛔️ - prědložene do izključenja iz slovnika.

4. Logika sortovanja slov pri poiskanju uvažaje měru razumlivosti každogo varianta, itak budete viděti najdobre prěvody vyše, a potom, niže — vse ostale, menje koristne varianty.

5. Něktore dodatne glagolne formy – prosto minulo vrěme (imperfekt/aorist) i pluskvamperfekt – byli skryte na stranicah časovanja, ale koristniki mogut jih vključiti v nastrojkah.

6. Od nyně česti rěči v rezultatah iskanja sut pokazane v jezyku koristnika. Prědže oni byli v anglijskom jezyku (napriměr: n., adj., adv., v.tr. i t.d.), ale tutčas vse skračenja sut prěvedene i dopolnjene objasnjenjami. Aby uviděti razšifrovku vsakoj abreviatury, prosto kliknite ju lěvoju knopkoju myši (ili tknite prstom).

Imajmo naděju, že vse nazvane izměnjenja sdělajut vašu rabotu s slovnikom vyše udobnoju! Želajemo prijemnogo koriščenja!
P.S. Čekajemo dobrovoljcev do prěvodženja bulgarskogo i slovenskogo jezykov!

https://www.facebook.com/groups/287915484553597

Новости пројекта “Меджусловјанскы словник” (https://interslavic-dictionary.com)

В течењу зимы и на почетку весны было сдєлано неколико улєпшениј в Меджусловјанском словнику, о којих быхмо хтєли повєдєти.

1. Обличје словника јест значно осоврємењено. Измєнили јесмо фонт, колоры и декоративне елементы дизајна. Измєны се доткнули и свєтлој, и темној темы интерфејса. Кромє внєшњего вида, была удосконаљена и внутрност апликације заради быстрости дєлања и легкости даљшего развитја.

2. Повышена јест стабилност работы без интернетној свези. Нынєшња версија не трєбује постојанно обнавјати базу с сервера. Даунлодовање новых даных дєје се само тогда, когда користник имаје интернет и когда в базє јествујут измєны. Ако измєн немаје или же интернет не јест доступны, словник работаје в офлајновом режиму, даже ако вы јего затворили и отварјајете изнова.

3. До базы вошло много новых слов, означеных 🌱 (зеленым растком). То сут слова-кандидати, кторе јешче не сут официално пријете, але могут быти уживане. Пријмајемо прєдложења новых слов, ако они одповєдајут правилам меджусловјанского словотворјења.

Кромє того, нєкоје слова были означене како ⚠️ - мало разумливе и ⛔️ - прєдложене до изкључења из словника.

4. Логика сортовања слов при поискању уважаје мєру разумливости каждого варианта, итак будете видєти најдобре прєводы выше, а потом, ниже — все остале, мење користне варианты.

5. Нєкторе додатне глаголне формы – просто минуло врєме (имперфект/аорист) и плусквамперфект – были скрыте на страницах часовања, але користники могут јих вкључити в настројках.

6. Од нынє чести рєчи в резултатах искања сут показане в језыку користника. Прєдже они были в англијском језыку (напримєр: n., adj., adv., v.tr. и т.д.), але тутчас все скрачења сут прєведене и дополњене објасњењами. Абы увидєти разшифровку всакој абревиатуры, просто кликните ју лєвоју кнопкоју мыши (или ткните прстом).

Имајмо надєју, же все назване измєњења сдєлајут вашу работу с словником выше удобноју! Желајемо пријемного коришчења!

П.С. Чекајемо добровољцев до прєводжења булгарского и словенского језыков!

https://www.facebook.com/groups/287915484553597

Pojavil se medžuslovjansky slovnik za iOS, avtor jest DmitryKanunnikoff

Ako li někto jego uže poproboval, pišite. Ima li někake prědnosti nad interslavic-dictionary.com?

Појавил се меджусловјанскы словник за iOS, автор јест DmitryKanunnikoff

Ако ли нєкто јего уже попробовал, пишите. Има ли нєкаке прєдности над interslavic-dictionary.com?

Меджусловјанска Сходка в кафе 03.05.2025, 11:00-13:00, Москва

Приходите в time-cafe практиковати меджусловјанскы језык! Будут придти људи из МС чатов и гост из Чехији!

Правила сходкы сут аналогичне правилам тутого чата и дискорда. Сама сходка јест безоплатна. Плата јест толико за time-cafe!

Адрес: Антикафе Сухарева Башня, Проспект Мира, д. 5 (выход из метро №3, минута от м Сухаревская)

Pozdrav k vsim!

Pogledajte raport s MS Dnja v Zagrebu!

https://www.youtube.com/watch?v=hZIJSP1cAxE&feature=youtu.be

Драги пријатељи и пријатељкы!

Тутдењ јест свєтлы дењ, затоже ја имају за вас много добру новост! Стрєчајте радио «Словјанскы глас» — прво меджусловјанско радио! Пројект јест безкористны. Контент јест в процесу додаванја, але уже можно слушати. Главны формат радиа јест музикалны, але, часом, там такоже ходет подкасты и декламованја авторској литературы на меджусловјанском језыку. Слушати радио јест можно в прєгледачу на тутој веб-страници:
https://77.232.131.208:8080/public/slovjansky_glas
Да бы слушати радио в плејеру (прєпоручају VLC), потрєбно додати до њего тутој линк:
https://77.232.131.208:8080/listen/slovjansky_glas/radio
Официална интернетна страница радиа јест тута:
https://fabula.top/glavna/radio_ms
Доброго слушанја!


Dragi prijatelji i prijateljky!

Tutdenj jest světly denj, zatože ja imaju za vas mnogo dobru novost! Strěčajte radio «Slovjansky glas» — prvo medžuslovjansko radio! Projekt jest bezkoristny. Kontent jest v procesu dodavanja, ale uže možno slušati. Glavny format radia jest muzikalny, ale, časom, tam takože hodet podkasty i deklamovanja avtorskoj literatury na medžuslovjanskom jezyku. Slušati radio jest možno v prěgledaču na tutoj veb-stranici:
https://77.232.131.208:8080/public/slovjansky_glas
Da by slušati radio v plejeru (prěporučaju VLC), potrěbno dodati do njego tutoj link:
https://77.232.131.208:8080/listen/slovjansky_glas/radio
Oficialna internetna stranica radia jest tuta:
https://fabula.top/glavna/radio_ms
Dobrogo slušanja!

​​Змија укусила чловєка из Загорја (Хрватија) и потом умрєла од алкохоличного отравјења.

Велика трагедија стала се в Доњих Вињанах в Имотској крајинє. Двулєтна змија умрєла од прєзмєрној концентрације алкохола в крви. Нешчестје стало се, когда змија погрєшно укусила Штефа Радиулича из Крапины, кторы был там случајно, ибо был на служебном путу.

Около 14:00 Штеф закончил своју бизнесну сустрєчу и одправил се обгледати околину. Ходечи по лєсној пєшинє, вєројетно он подшел прєблизко до змије, ктора просто одзвала се тако, како бы одзвала се всекака друга Хрватица, когда гости приходет без позвања.

— Неочекывано, ја јесм почул остры бољ в ногє и обратил се. Тутчасно јесм увидєл змију и сразумєл, что се стало. Помыслил јесм побєгти к лєкарју, але потом јесм примєтил, же нєчто је не тако со змијеју. Јеј очи были наполовину затворјене, она зачела се клатити и двукратно ударила се главоју о дрєво,— припоминаје Штеф.

Начелник Доњих Вињанов обєчал, же до почетка туристичного сезона будут поставјене острєжења змијам о проходєчих људах из Загорја.

Штеф сразумєл, же змија потрєбује помоч, схватил ју за шију и побєгл до пункта скорој лєкарској помочи. Але змија не имала никакого шанса.

Концентрација алкохола в крви Штефа оказала се смртељна за њу.

— Мєстне змије просто не сут привыкле к тому, же јих природна добыча/жртва имаје таку высоку концентрацију алкохола в крви — особливо в 14:00. Мы јесмо измєрили уравењ алкохола в крви змије на 5,1 г/кг, что мало каке живе створјења могут прєжити,— потврдил доктор Мате Дрнич.

Јест интересно, же јад змије вообче не имал вплыва на Штефа, зато что алкохол в јего крви моментално јего невтрализовал.

Штеф, шчестливы, вратил се до дома в Крапину и попросил лєкарја, да бы јему послал факсом објасњење, како алкохол спасл јего живот — да бы наконец имал чим утєшити своју жену.

Жрло: https://newsbar.hr/poskok-ugrizao-zagorca-pa-uginuo-zbog-previse-alkohola-u-krvi/

​​Zmija ukusila člověka iz Zagorja (Hrvatija) i potom umrěla od alkoholičnogo otravjenja.

Velika tragedija stala se v Donjih Vinjanah v Imotskoj krajině. Dvulětna zmija umrěla od prězměrnoj koncentracije alkohola v krvi. Neščestje stalo se, kogda zmija pogrěšno ukusila Štefa Radiulića iz Krapiny, ktory byl tam slučajno, ibo byl na služebnom putu.

Okolo 14:00 Štef zakončil svoju biznesnu sustrěču i odpravil se obgledati okolinu. Hodeči po lěsnoj pěšině, věrojetno on podšel prěblizko do zmije, ktora prosto odzvala se tako, kako by odzvala se vsekaka druga Hrvatica, kogda gosti prihodet bez pozvanja.

— Neočekyvano, ja jesm počul ostry bolj v nogě i obratil se. Tutčasno jesm uviděl zmiju i srazuměl, čto se stalo. Pomyslil jesm poběgti k lěkarju, ale potom jesm primětil, že něčto je ne tako so zmijeju. Jej oči byli napolovinu zatvorjene, ona začela se klatiti i dvukratno udarila se glavoju o drěvo,— pripominaje Štef.

Načelnik Donjih Vinjanov oběčal, že do početka turističnogo sezona budut postavjene ostrěženja zmijam o prohoděčih ljudah iz Zagorja.

Štef srazuměl, že zmija potrěbuje pomoč, shvatil ju za šiju i poběgl do punkta skoroj lěkarskoj pomoči. Ale zmija ne imala nikakogo šansa.

Koncentracija alkohola v krvi Štefa okazala se smrteljna za nju.

— Městne zmije prosto ne sut privykle k tomu, že jih prirodna dobyča/žrtva imaje taku vysoku koncentraciju alkohola v krvi — osoblivo v 14:00. My jesmo izměrili uravenj alkohola v krvi zmije na 5,1 g/kg, čto malo kake žive stvorjenja mogut prěžiti,— potvrdil doktor Mate Drnič.

Jest interesno, že jad zmije voobče ne imal vplyva na Štefa, zato čto alkohol v jego krvi momentalno jego nevtralizoval.

Štef, ščestlivy, vratil se do doma v Krapinu i poprosil lěkarja, da by jemu poslal faksom objasnjenje, kako alkohol spasl jego život — da by nakonec imal čim utěšiti svoju ženu.

Žrlo: https://newsbar.hr/poskok-ugrizao-zagorca-pa-uginuo-zbog-previse-alkohola-u-krvi/

Срдечно поздравјају вас, драги људи!

Јесм завршил своју книгу и тутдењ јест премиера новој меджусловјанској повєдкы "Тајны Благограда". То јест басњева повєдка о вєчных темах: борбє добра и зла, об исканју себе, изисканју новых смыслов, и, саморазумно, о љубви. Призывају вас тутчас одправити се в невєројетне пригоды заједно с херојами повєдкы!

Достати повєдку јест можно тут: https://fabula.top/glavna/tvorby_ms. За ваш комфорт сут двє версије: кирилична и латинична. Такоже јесм створил словник неофициалных слов из повєдкы: https://fabula.top/glavna/slovnik_ms. Ја рекомендују употрєбјати јего, ако ли вы не будете смогти најдти слово в официалном словнику меджусловјанского језыка.

Наконец, како додаток, пропонују вам послушати нєкторе пєсње из повєдкы тут: https://fabula.top/glavna/pesnje_ms.

Доброго читанја и слушанја!


Srdečno pozdravjaju vas, dragi ljudi!

Jesm završil svoju knigu i tutdenj jest premiera novoj medžuslovjanskoj povědky "Tajny Blagograda". To jest basnjeva povědka o věčnyh temah: borbě dobra i zla, ob iskanju sebe, iziskanju novyh smyslov, i, samorazumno, o ljubvi. Prizyvaju vas tutčas odpraviti se v nevěrojetne prigody zajedno s herojami povědky!

Dostati povědku jest možno tut: https://fabula.top/glavna/tvorby_ms. Za vaš komfort sut dvě versije: kirilična i latinična. Takože jesm stvoril slovnik neoficialnyh slov iz povědky: https://fabula.top/glavna/slovnik_ms. Ja rekomenduju upotrěbjati jego, ako li vy ne budete smogti najdti slovo v oficialnom slovniku medžuslovjanskogo jezyka.

Nakonec, kako dodatok, proponuju vam poslušati něktore pěsnje iz povědky tut: https://fabula.top/glavna/pesnje_ms.

Dobrogo čitanja i slušanja!

"Prodavalnja". Medžuslovjansko slovo ktoro ne jest. Ili jest? 💎 "Продавалња". Меджусловјанско слово кторо не јест. Или јест?

https://teletype.in/@flame-ice/rJwpGJLaZHa