БАҲОР АЙЁМИ

(Бобур ғазалига мухаммас)

Муҳаббат аҳлининг дил жандаси оҳу фиғонидур,
Садоқат гулларин гулбарги чин ошиқни қонидур!
Ишқ олий эрур, аммо ҳавас – ҳис завқи фонийдур,
Баҳор айёмидур доғи йигитликнинг авонидур,
Кетур, соқий, шароби нобким, ишрат замонидур.

Гаҳи кўк узра ой дастонидин саргаштаи мажнун,
Гаҳи сеҳру саховатдин замин парвонаи мамнун,
Гаҳи раъно тикони – хори заҳмидин тўкилмиш хун,
Гаҳи саҳро узори лола шаклидин эрур гулгун,
Гаҳи саҳни чаман гул чеҳрасидин арғувонийдур.

Наҳот олам нурафшонлиғ топур вайрона диллардин?
Таашшуқларға минг таъқибу дашном ўнгу сўллардин!
Васлдин шодланиб унгай жинон гулзори чўллардин,
Яна саҳни чаман бўлди мунаққаш ранги гуллардин,
Магарким сунънинг наққошиға ранг имтихонидур.

Тажарруд кўйида ўлсам нетай кўнгулни хунхори?
Не ғамким, сен анинг ёри, анингким кўк қадар зори!
Вужуд сандин йироқдир, руҳ-юракда ишқ зуннори,
Юзунг, эй сарв, жоним гулшанининг тоза гулзори,
Қадинг, эй гул, ҳаётим боғининг сарви равонидур.

Калом – мумидду муовин эрур ул аввал-охирнинг,
Муҳаббат – мулки олам, туҳфаи Аллоҳи қодирнинг,
Фазиҳат ўлмағай, Хуршида кўнгли ишқи соҳирнинг.
Не ерда бўлсанг, эй гул, андадур чун жони Бобурнинг,
Ғарибингға тараҳҳум айлагилким, андижонийдур.

____
Мумидду муовин – мадад берувчи ва ёрдамчи
Фазиҳат – расво, ёмон отлиқ

✍Хуршида ВАҲОБЖОН қизи.
Ўзбекистон Ёзувчилар уюшмаси аъзоси

Taklifnoma

Hurmatli andjonliklar va shahrimiz mehmonlari. Sizlarni Zahiriddin Muhammad Bobur tavalludining 540 yilligi munosabati bilan 2023 yil 14 fevral kuni soat 08:30 da Andijon shahridagi Bobur maydonida bo‘lib o‘tadigan viloyat tadbiriga taklif etamiz.
Tadbirda davlat va jamoat tashkilotlari vakillari, taniqli yozuvchilar, shoirlar, adabiyotshunoslar, qator davlatlardan tashrif buyurgan Boburshunos olimlar hamda talaba yoshlar, adabiyot ixlosmandlari ishtirok etadi.

Manzill: Andijon temir yo‘l bekati.

O‘zbekiston Yozuvchilar uyushmasi Andijon viloyati bo‘limi

Bobur nidosi

Yuragimda hijron olur zoʻr alanga,
Oh, Andijon, firogʻingda qalb qiylanar.
Hoki-poyim borurmikan oʻz Vatanga?
Sogʻinchim ayt ona yurtga,ey turnalar.

Axsikentning dalasida ungan urugʼ
Chirsillashi eshitilar qulogʻimga.
Oʻz yurtimdan kelgan barcha neʼmat ulugʻ,
Qovunining taʼmi turar dimogʻimda.

Ikki koʻzim suvdir va lek koʻnglimda oʻt,
Hind yurtida shoxman biroq koʻnglim gʻarib.
Urush degan choxdin oʻtdim oʻynatib ot,
Lek Vatanga qaytolmadim yurt axtarib.

Boburingman, oʻzga yurtda shox oʻgʻloning,
Sogʻinch mening koʻz yoshlarim qildi alvon.
Koʻzga surtib oʻlsam edi zar tuprogʻing,
"Anda jonim" qolib ketgan jon Andijon!

✍Roʻzimannopova Rohilaxon
Muhammad Yusuf nomidagi ijod maktabi 7-sinf oʻquvchisi

Bobur armoni

✍Shahlo Hamidova
O‘zbekiston Yozuvchilar uyushmasi a'zosi, Muhammad Yusuf nomidagi ijod maktabining o‘qituvchisi

Bobur sog'inchi

Devona bo'ldimmi sog'inchli dildan?
Boburni so'radim Andajonimdan.
Ko'z yoshlarim meni tanimasin deb...
Baland qasr qurdim qorong'u tundan...

Men o'sha bamisli qudratli malak,
Olis manzillardan keltirgin darak.
Muhammad Boburni yod olmoq uchun
Quvonchim bo'l endi yulduzli falak.

Quvinchim yomg'ir-la yerga ulashgim
Ko'z yoshim ko'rganda mendan adashgin
Men yetmoq istagan manzilni ko'rgan
Ona tuprog'imdan mehr ulashgin


Bu kecha qog'ozni sirdoshim bildim,
Yolg'onchi she'rimni bitib ovundim.
Hayotdan, hayoldan,yurakdan bir so'z
Muhammad Boburni juda sog'indim.

✍Rahmatullayeva Odina
Muhammad Yusuf nomidagi ijod maktabining 10-sinf o'quvchisi

ШОҲ БОБУР

Бунча узун оҳ тортдингиз, оҳ Бобур,
Муттаҳамлар дунёсида шоҳ Бобур.

Андижону Ҳинду — етти иқлимда
Топилмади Сизга бир додхоҳ, Бобур.

Оллоҳимнинг даргоҳлари кенг, лекин
Сиғдирмади Сизни бу даргоҳ, Бобур.

Кеча узун, манзил олис, йўл узоқ,
Сизга фақат ёлғиз ой ҳамроҳ, Бобур.

Нонкўр беклар, беоқибат мирзолар,
Кимлар Сизга қазмадилар чоҳ, Бобур.

Ғурбат бўлди охир тожу тахтингиз,
Подшоҳлар ҳам йиғларкан-да, воҳ Бобур!

Қисмат қаттиқ, алам бисёр, эл ғофил,
Бу дунёда борми бир дилхоҳ, Бобур?

Умри отда ўтган буюк мусофир,
Давлат надир асли, надир жоҳ, Бобур?

Шоирлиги шоҳлигидан улуғроқ,
Шоҳлиги ҳам шеъридай огоҳ, Бобур.

Алишербек дейсиз, назм султони,
Сиз ҳам шунда топдингиз паноҳ, Бобур.

Шамширингиз янглиғ Жайҳун ярқирар,
Кўкда моҳ ҳам Сизнинг мангу оҳ, Бобур.

✍Сирожиддин Саййид
Ўзбекистон халқ шоири

Z.M.BOBUR G‘AZALLARI | 13.02.2023 YIL

🎙Gulyuz Abdumalikova
Muhammad Yusuf nomidagi ijod maktabi o‘quvchisi

https://t.iss.one/Andijon_TRK

Z.M.BOBUR G‘AZALLARI | 13.02.2023 YIL

🎙Madinabonu Botirova&Sanjar Abdulhayev
Muhammad Yusuf nomidagi ijod maktabi o‘quvchilari

https://t.iss.one/Andijon_TRK

VATAN XAYOLI

Uchib ketdi olamga Oqsaroydan oq xatlar,
Oq xatlar emas ular, sog'inch, firoq, hasratlar,
Ruhu jonimga tutash mulki so'ngsiz sarhadlar,
Hazrat Sohibqironning toza niholi – Bobur.

Bori elga yaxshilik qilmoq nadir, bildik biz,
Siz Hind sori ketdingiz, siz sorig'a yeldik biz,
Siz Vatanga keldingiz, siz tomonga keldik biz,
Oh, bunchalar yorug'dir Vatan xayoli, Bobur.

Vatandan mujda kelsa, ayting qanda jon qoldi –
Shirin qovun ta'midan na-da tanda jon qoldi,
Samarqandda dil qoldi, Andijonda jon qoldi,
Bir mard yurt deb yig'lasa tutgay uvoli, Bobur.

Kishi g'arib ko'nglini tushungaydir g'urbatda,
G'urbat – bu g'ariblikdir, g'am-anduhdir, albatta,
Inson bilmas ne sir bor, dunyo degan turbatda,
Idrok etdim, bu kimning javob-savoli, Bobur.

To'xtamaydi Jayxunday so'zi – hayot kitobi,
Har ko'ngilda mavj urar, uning shiddat, shitobi,
Mahshargacha yangragay haq yo'lida xitobi,
Shundan doim balanddir dardu iqboli, Bobur.

Aytgan bilan tugamas, jon-jonimning jon so'zi,
Vatanim, millatimning har o'g'loni, har qizi,
Hazrat bobolarimning qutlug', muborak izi,
Humoyun ham Gulbadan, Komron, Hindoli Bobur.

Manim yonib aytganim bir xatti jahon bo'lgay,
Bo'yi ko'kka yetgan sarv, tik qaddi jahon bo'lgay,
Poydevori mustahkam, zo'r saddi jahon bo'lgay,
Jannatlardan xush nasim – yurtim shamoli, Bobur.

Uchib ketdi olamga Oqsaroydan oq xatlar,
Oq xatlar emas ular, sog'inch, firoq, oh xatlar,
Ruhu jonimga tutash mulki so'ngsiz sarhadlar,
Hazrat Sohibqironning toza niholi – Bobur.

G‘ayrat Majid

•┈┈• ❀ 🌷☘️🌷 ❀ •┈┈•
Kanalimizga a'zo bo‘ling va do‘stlaringizga ulashing. 👇👇👇
t.iss.one/gayratmajidijodi
•┈┈• ❀ 🌷☘️🌷 ❀ •┈┈•