Muhammad Yusuf 1954-yil 26-aprelda Andijon viloyatining Marhamat tumanidagi Qovunchi qishlog‘ida dehqon oilasida tug‘ildi. O‘rta maktabni tugatgach, Respublika Rus tili va adabiyoti institutida o‘qidi. Shoir “Toshkent oqshomi” gazetasida, G‘.G’ulom nomidagi Adabiyot va san’at nashriyotida, “O‘zbekiston ovozi” gazetasida, O‘zbekiston Yozuvchilar Uyushmasi raisi o‘rinbosari lavozimida ishladi. Shoirning “Tanish teraklar”, “Bulbulga bir gapim bor”, “Iltijo”, “Uyqudagi qiz”, “Halima enam allalari”, “Ishq kemasi”, “Ko‘nglimda bir yor”, “Bevafo ko‘p ekan”, “Erka kiyik”, “Osmonimga olib ketaman”, “Kumush”, “Kokilingni kim kesdi”, “Aldov”, “Turkman qiz”, “Yur, Muhammad, ketdik bu yerdan”, “Yolg‘onchi yor”, “Qora quyosh” kitoblari dunyo yuzini ko‘rdi. Muhammad Yusuf 1998-yil O‘zbekiston xalq shoiri unvoni bilan taqdirlandi.

✅Hamid G‘ulom 1919-yil 25-aprelda Toshkent viloyatida musiqa muallimi oilasida tug‘ildi. U “Literaturnaya gazeta”ning O‘zbekistondagi maxsus muxbiri, O‘zbekiston Yozuvchilar uyushmasining kotibi, “Sharq yulduzi” jurnalining bosh muharriri va G‘afur G‘ulom nomidagi Adabiyot va san’at nashriyotining direktori lavozimlarida ishladi.
Hamid G‘ulom adabiyotga o‘ttizinchi yillarning boshlarida “Bizning lager”, “Odam”, “Quyosh kabi charog‘on” she’rlari bilan kirib keldi. U vatanparvarlik, dushmanga nafrat ruhi ifodalangan “Qasosim bor”, “Katerina”, “Ukraina yellari” kabi she’r va balladalarini urush yillarida yaratgan.
Hamid G‘ulomning keyinchalik yozilgan “Qo‘shiqlarim”, “Dnepr bo‘yida”, “G‘alaba yo‘lida” asarlarida xalqimizning fashizmga qarshi kurashidagi qahramonliklari tasvirlangan. U musiqali drama teatri uchun “Fargʻona hikoyasi”, ‘O‘g‘il uylantirish”, ”Dil ko‘zgusi”, “Toshbolta oshiq”, “Ajab savdolar”, “Muhabbat navosi” pyesalarini yozdi.