She'riyat bekati

KAʼBADAGI DUO

Kaʼba tegrasida aylanar olam,
Aylanar gunohlar, armonlar, vohlar...
Aylanadi boshin etganicha xam,
Miskinlar, g‘aniylar, darveshlar, shohlar...

Ijobat diyori – Yerning maʼnosi,
Koinot sarvarin oyoq izi bor.
Ulug‘ bir nur oqib kirdi ruhimga,
Ko‘zimdan shukronam tinmas – shashqator.

Ollohning uyi bu – najot manzili,
Buyuk kuch shavqidan sel bo‘lar yoshim.
Bunda berkitilgan Xudoning siri,
Anglaganim sayin ketar bardoshim.

...Ming turli olomon – yolvorar Haqqa,
Birov gunohiga ajr tilaydi.
“Qarzimdan qutqar” deb yukinar biri,
Boshqa biri, farzand ber, deb yig‘laydi.

Bizning hamrohlar ham qildilar duo,
Shayton kirolmagan maʼvoda ul dam:
– Ahli musulmonga ro‘shnolik bergil,
Falastinga zafar yuborgil, Egam!

Bir hasrat o‘radi ko‘ksimni noxos,
Duoga qo‘shildim biroz parishon.
Garchi, ezgulikdan kuch olgan qonim,
Albatta istayman – tinch bo‘lsin jahon!

Albatta istayman, moʻminga iqbol,
Istayman, odamga sharaf, ziyoni.
Navoiy yetmagan joydan tilarman –
Ko‘zyoshsiz, qon yuqi ketgan dunyoni...

Ammo dil tubidan ko‘chdi bir nido,
Yurak! Boringcha bo‘l, qo‘shma yolg‘onni!
Garchi, musulmonman... Lekin, avvalo,
Tangrim! Asra, dedim O‘zbekistonni!

✍Shodmonqul Salom
O‘zbekiston Yozuvchilar uyushmasi a'zosi, shoir.

👇Bizni kuzatishda davom eting
👉@ima_myim

Qaysi asarni o‘qiymiz?

Muhammad Yusuf nomidagi ijod maktabi kitobxonlikni targ‘ib etish maqsadida yangi loyihani boshladi — «Qaysi asarni o‘qiymiz?».

Eng sara asarlar, o‘qilishi shart 10 kitob haqida adabiyotshunos olimlar, yozuvchi-shoir, tarjimon va jamoat faollarining tavsiyasini sizga yetkazamiz.

O‘quvchi yoshlar qiziqarli badiiy adabiyotlarni o‘qib, o‘z dunyo qarashlarini kengaytirishlari uchun eng yaxshi kitoblarni qanday tanlash mumkin? Bu borada Muhammad Yusuf nomidagi ijod maktabi direktori Shohistaxon Nurmatova o‘z tavsiyalarini o‘rtoqlashadi.

1. "O‘tkan kunlar" Abdulla Qodiriy
2. "Alvido bolalik" Toxir Malik
3. "Ruhlar isyoni" Erkin Vohidov
4. "Dunyoning ishlari" O‘tkir Hoshimov
5. "Yulduzli tunlar" Pirimqul Qodirov
6. "Muhammad Yusuf zamondoshlari xotirasida"
7. "Boburiynoma" Xayriddin Sultonov
8. "Chol va dengiz" Ernest Xemenguey
9. "Molxona" Jorj Oruell
10. "Oq so‘yloq" Jek London

Muhammad Yusuf nomidagi ijod maktabi axborot xizmati

👇Bizni kuzatishda davom eting
👉@ima_myim

#Nazm_bekati

YOG‘AYOTGAN OPPOQ QORLAR TINDIMI

Yuragimga qorparchalar qo‘ngandi,
Qor ostida boychechaklar ungandi,
Kiprigimga pok zarralar ingandi,
Ko‘ngil chalgan ishq rubobi sindimi,
Yog‘ayotgan oppoq qorlar tindimi?

Garchi oftob ko‘rinmas ko‘p samoda,
Lekin tafti yurakdagi ma’voda,
Yupanch yo‘qdur sevgi degan samoda
Aytgil, ey yor, ishq rubobi sindimi,
Yog‘ayotgan oppoq qorlar tindimi?

Oppoq edi go‘yo bu jumla jahon,
Har zarradan o‘qir edim bir doston,
Nahot erib ketsa bu oppoq bo‘ston,
Ko‘ngil chalgan ishq rubobi sindimi,
Yog‘ayotgan oppoq qorlar tindimi?

Qorparchalar oshiq qalbim yog‘dusi,
Oyog‘ingni o‘pib yo‘lda qolg‘usi,
Erisa ham yuragingga tomg‘usi,
Aytgil, ey yor, ishq rubobi sindimi,
Yog‘ayotgan oppoq qorlar tindimi?

✍Minhojiddin MIRZO
Respublika Ma'naviyat va ma'rifat markazi rahbari, senator.
O‘zbekiston Yozuvchilar uyushmasi a'zosi

👇Bizni kuzatishda davom eting

SHAYTANAT

Hayot-gulzor, deya, kezdim, tikonlari chiqdi yoʻldan,
Na-da tikonlari, turfa ilonlari chiqdi yoʻldan.

Tilindi qalb, shilindi til, baloi nafs boʻldi gʻolib,
Qimorga boy berildi or, pushmonlari chiqdi yoʻldan.

Koʻngil berdim yora nogoh, axtarib men tasallolar,
Zaharxanda qildi agʻyor, yomonlari chiqdi yoʻldan.

Zamon Haqqa tegishli, deb necha fursat qildim sabr,
Chektirib oh, necha sohibzamonlari chiqdi yoʻldan.

Bu bir qismat, dedim, balki peshonamga yozilgani,
Xudo urgan Shaytanatning shaytonlari chiqdi yoʻldan.

Bormi biror hayrixohim va yo hamdard? Muhabbatning
Tohir Malik, Shukurdayin qurbonlari chiqdi yoʻldan.

✍Shukur Qurbon
Oʻzbekiston Yozuvchilar uyushmasi aʼzosi, shoir.

Shoir 1951 yil Andijon viloyati Baliqchi tumanida tug‘ilgan. 1968-1973 yillarda Oʻzbekiston Milliy universitetining filologiya fakultetida tahsil olgan. «Sharq yulduzi» jurnali tahririyatida ish faoliyatini boshlagan. Hozirda Alisher Navoiy nomidagi Oʻzbekiston Milliy kutubxonasi nashriyotining boʻlim mudiri.

#Retro

🎼“Shaytanat”
✍Shukur Qurbon
🎙Azim Mullaxonov

👇Bizni kuzatishda davom eting
👉@ima_myim

OʻSHAL DAMLAR

Qani ul sen bilan oʻtgan oʻshal damlar, oʻshal damlar,
Faqat qolganga oʻxshaydi u damlardan alam-gʻamlar.

Oʻshal damlarni hozir eslasam tushdek erur shirin,
Meni chorlaydi bagʻriga hamon keng davra, odamlar.

Hamon men sen bilan birga, hamon birga qadrdonlar,
Hamon qutlaydi goʻyo ikkimizni joʻra-hamdamlar.

Ogʻir holat toʻlar koʻnglimga, horgʻin entikarman jim
Toʻlib “evoh” desam, evoh, soʻzi bu kiprigim namlar.

Oʻshal damdan faqat orzu, xayol meros bu kun menga,
Shu orzu, shu xayol borki, bilinmas baʼzi bir kamlar.

Hamisha qaytsa tayyorman, Farid, jonimni bermoqqa,
Agar bir lahza, bir fursat oʻshal damlar, oʻshal damlar.

✍ Farid USMON,
Oʻzbekiston Yozuvchilar uyushmasi aʼzosi, "Doʻstlik" ordeni sohibi

Shoir 1946 yil 1 avgustda Andijon shahrida tug‘ilgan. Andijon davlat universiteti filologiya fakulteti hamda Moskva oliy adabiyot institutini tamomlagan. 40 dan ortiq kitoblar muallifi.

👇Bizni kuzatishda davom eting
👉@ima_myim

#Retro

🎼“O‘shal damlar”
✍Farid Usmon
🎙Yahyobek Mo‘minov

👇Bizni kuzatishda davom eting
👉@ima_myim