Rasmiy munosabat

Ijtimoiy tarmoqlarda "Sirdaryoda ruhiy nosog‘lom ayol masxara qilindi" sarlavha bilan tarqalgan videolavha bo‘yicha quyidagilarni maʼlum qilamiz:

O‘zbekiston Respublikasi Prezidenti huzuridagi Ijtimoiy himoya milliy agentligi Sirdaryo viloyati boshqarmasi tomonidan mazkur holatni o‘rganish uchun tuzilgan ishchi guruh aʼzolari surishtiruvi natijasida maʼlum bo‘lishicha, ushbu videolavha 2024 yilning 26-aprel kuni taxminan soat 17:30dan 18:00lar atrofida Sirdaryo tumani nogironligi bo‘lgan shaxslar uchun ayollar “Muruvvat” internat uyi oshxonasida “Innovation-Outsorsing-Service” MCHJ ishchilari O.Sh. va M.X.lar tomonidan tasvirga olingan. Ular muassasa hududida erkin sayr qilib yurgan S.Ya. ni shifokor, hamshira va kichik tibbiy xodimlar (enaga) ruxsatisiz oshxona binosiga olib kirib, ruhiy holatini bila turib mazax qilishgan. Mazkur olingan videolavha oshxonada ishlovchi xodimlarning Telegram‘dagi guruhiga tashlangan.

Maʼlumot o‘rnida, o‘tkazilgan tender tanlovlari asosida MCHJ tomonidan mazkur “Muruvvat” internat uyiga outsorsing xizmatlari ko‘rsatilib kelinadi. S.Ya. da aqli zaiflikning og‘ir darajasi sababli xulq atvor buzilishi bilan kechuvchi ruhiy holat tez-tez kuzatiladi (yaʼni doimiy ravishda yaqin qarindoshlarini eslab uyimga jo‘nating yoki chaqirib bering deb yig‘lash holatlari yuzaga keladi).

Aniqlangan holat bo‘yicha firma rahbari Iskandar Salimovga o‘z vaqtida xabar berilib chaqirtirildi va ishchi xodimlar yig‘ilib, majlis o‘tkazildi. 2024 yil 17-may kuni mazkur holat yuzasidan tuman IIBga murojaat qilinib, autsorsing xodimlari O.Sh. va M.X.larning xatti-harakatiga O‘zbekiston Respublikasining “Nogironligi bo‘lgan shaxslarning huquqlari to‘g‘risidagi” Qonuning 3 va 4-moddalari yuzasidan qonuniy chora ko‘rishlik bo‘yicha murojaat qilingan.

Shundan so‘ng, O.Sh. va M.X.lar bilan tuzilgan mehnat shartnomasi bekor qilingan va ular vazifasidan ozod qilingan. Sirdaryo tumani IIB tomonidan holat yuzasidan surishtiruv ishlari yakunlanib, MCHJ ishchilari O.Sh. va M.X.larga nisbatan O‘zbekiston Respublikasining 202/2 moddasi 1-MJTK moddasi 1-qismiga muvofiq, eng kam ish xaqqining 10 barobari miqdorida jarima to‘lash jazosi belgilangan. Shuningdek, “Innovation-Outsorsing-Service” MCHJ firmasi bilan tuzilgan shartnomani bekor qilish uchun firma rahbari Iskandar Salimov nomiga ogohlantirish xati chiqarildi.

Taʼkidlash lozimki, aholining ijtimoiy himoyaga muhtoj qatlamlarining huquqlarini himoya qilish, ularga davlat tomonidan ko‘rsatilayotgan kafolatlangan ijtimoiy xizmatlarni o‘z vaqtida va sifatli tashkil etish yuzasidan “Muruvvat” uyi xodimlari o‘rtasida bu kabi holatlarning takrorlanmasligi bo‘yicha tushuntirish ishlari o‘tkazildi.