إسلوب حيااه🌻💛

‏ٱختاري رجلاً لا يجعل قلبك ينام باكياً ، يعتذر منك وإن كنتِ مخطئه ، ٱختاري الذي لا تهونين على قلبه❤️.

1.71K viewsأُمْنِيَّة., 00:16

- وانا نازل للجامعة ابوي قعد معي وقال لي أمك دي لمن اتزوجتها كانت صغيرة ورضت تسافر معي يعني ضحت بي شبابها وكمان استحملت غربة ماعشان شي غير انها حبتني وانا وقتها حسيت بالمسؤولية واشتغلت وتعبت لحدي م جيتو انتو وواصلنا تضحية انا وهي عشانكم انت واختك لكن هل انت تستاهل التضحية الضحينها دي؟! تخيلو كم المسؤولية الأنا شلتها بعد كلام ابوي ده .. يمكن اجتهدت في قرايتي شديد وكل ما اتذكر جملتو بتاعت هل انت تستاهل التضحية.. بلقى روحي بفتح الكتب وبقرا عشان اجيب تقدير كويس...

- كان عندنا مشاكل في الدفعة وفي متطلبات ناقصة والعميد كان بيتجاهل احتياجاتنا . احد الزملاء ولا الزميلات مامتزكر طرح لينا فكرة الاعتصام وانو حيجيب نتيجة ، الفكرة كانت زابطة واحنا اعتصمنا زي 3 ايام كده اليوم الرابع العميد جانا القاعة وهو زهجان مننا . لكن ادانا مغريات جميلة جدا وكان حينفذ كل متطلباتنا بس على شرط اننا نوريهو الناس الورتنا فكرة الاعتصام وقائد الاعتصام ده منو وإلا الدفعة كلها حتشيل شيلتها ، طبعا عارفين حيحصل شنو للطالب الحيعرفو انو السبب ... القاعة صانة والناس خايفة من الحيحصل لقينا صاحبنا محمود رفع يدو ووقف وقال هو رئيس الاعتصام مع انو كان غايب اصلا . بس كان عاوز دفعتو تتفادى العقاب ، بعدها خالد وقف وقال هو كان برضو سبب في الاعتصام ، وبعدو علي ، رهام ، ابتهال ، مزمل ، عبدالله ، إلهام لحدي مالقينا القاعة كلها واقفة وبتقول هي السبب العميد سكت وماعرف يعمل شنو .. لكن المطالب اتنفذت ومحمود كان الطالب المثالي في السنة ديك وعلمنا حاجة لو كان قرينا فوق قرايتنا عشرين سنة ماكان حنتعلمها #التضحية . محمود ضحى واحنا كنا قدر المسؤولية والثقة 💛

- في مرة من رجعاتي لي أهلي وبعد السلام والترحيب دخلت انوم لقيت اختي داخلة علي الغرفة وهي شايلة بت اللعاب حقتها وبتديني ليها .. سألتها ده شنو يارتاج؟! قالت لي دي بتي وانا بحبها بس هاك ليها انا اديتك ليها .. استغربت وسألتها من السبب ؟! قالت لي .. امي قالت البحب زول ممكن يديهو الحاجات ال هو بحبها وانا بحب بتي بس بحبك انت اكتر يارشاد عشان كده بديك بتي. بعد كلامها ده هونت علي تعب سفري مع انو عمرها كان 8 سنة بس كانت مدرسة لي . بس المتخلفة دي بعد كبرت كل ما ارفض ليها طلب تقعد تزكرني بي انها كانت عاوزة تضحي بي بت اللعاب عشاني .. خلونا منها كدي وشوفو دي👇👇👇

- مابحب المسلسلات ولابحضرها بس امي كانت مجننانا بي مسلسل كده فيهو بت بتحب ليها راجل متزوج طبعا انا كنت بستهجن النوع ده من الحب . البت دي لما عرفت انو الراجل البتحبو متشاكل مع مرتو ال هو اصلا بموت فيها مشت ليهو واتكلمت معاهو الصادم في المشهد انها مااغرتو وقالت ليهو خليها وشوف غير مرتك دي لا. بل العكس قالت ليهو انت لازم تستحمل مرتك وظروف وبتعدي وانتو بتحبو بعض الراجل اتصدم نفس صدمتي😂 وقال ليها مش انتي بتحبيني طيب لشنو قلتي كده؟! قالت ليهو انا بحبك صاااح بس كمان انا ماانانية انابشوفك مبسوط معاها وحرام علي اني اسرق سعادتك عشان حبي . قالت ليهو انا ممكن اضحي بي سعادتي عشان فرحتك .. الحب تضحية ما انانية وانا بحبك .. يااخ المشهد ده كرمش مشاعري عديل 💛

----------------------------------
الخلاصة
التضحية ماهينة ومسؤولية كبيرة كمان يعني انت عارف ابوك عمل شنو وضحى بشنو عشان يقدر يربيك فياريت تكون انت عندك مسؤولية وتحترم التضحية دي ..
انتي عارفة هو اتخلى عن زمنو وراحتو وطلعاتو ومرقاتو عشان يشتغل ويقدر يوفر حق شيلتك الود ضحى بي عمر عشان يلمك في سقف معروش فياريت تكوني قدر التضحية دي وماتخذلي مع اول مغترب يتقدم ليك..
شايف المدرسة والفصول دي نضيفة كيف يااخ حجة سكينة ضحت بي صحتها وشبابها عشان تلم منها كل ورقة اسكريم وتخليها نضيفة فياريت انت كطالب تتحمل مسؤولية التضحية دي وتبقى نضيف في ذاتك..
#التضحية فعل ناتج عن حب يعني انا لو مابحبك مابتخلى عن حاجة تخصني او عادتي عشانك . انا بضحي وانا خاتي كمية امل وعشم فيك انت مامتخيلها . يااخ انا بجازف وبراهن عليك وبتعشم فيك وبتلقاني ومن غير احساس بديك من غير ما احس بي نقصي . واقسم ليك من سعادتي مع اني غرقان في كومة حزن . وبقطع ليك من ستري وابقى جسد عاري مليان بالعيوب عشان اضاري على عورتك . ياااخ انا بديك كل ما املك . وممكن عادي اهبك مدينة في حين انا مابملك ولا شبر من ارض. بضحي بكل الفيني والعندي عشانك فهل انت تستاهل وقدر التضحية !؟
أنا مستعد اشيلكم في ضهري بس كم واحد منكم حيجي ويلز لي الكرسي المتحرك بعد ما انا ابقى مقعد..
خليك واثق في الناس البتضحي عشانها عشان مايخذلوك
وانت خليك قدر مسؤولية التضحية ورد الجميل..

#منقول
📸: مغربي
#صفاء

1.16K viewsأُمْنِيَّة., 00:22