‏تدرون من اغلا بشر في حياتي
امي ورب البيت ماحد سواها
ولو يسألوني ايش اعز امنياتي
لاقول تبقى امي وابقى معاها
ياناس اعشقها من اعماق ذاتي
وارخص لعين امي حياتي فداها
امي الوحيده من تلملم شتاتي
ولاحد من العالم يساوي غلاها

و‏تدري متى تندم على فزعة الطيب
لاشفت مردود الجماله نذاله

مايذكر المعروف غير الاصاحيب
ومايجحد المعروف غير الحثاله

‏يطيح واقف راعي الطيب لو طاح
طيبه رصيده فالشدايد يشيله

يموت راع الطيب و الطيب ماراح
يبقى مع الأجيال لو راح جيله

‏اليوم انا صامت ولا عندي اخبار
ضاع الكلام وضاع معه القوافي
ساكت وضاعت داخلي كل الافكار
والصمت تعبيرالسبب والخوافي
لاحول منك يا زماني والاقدار
حملتني مالا تطيقه كتافي
ماعادلي طاقه ترى الحمل بي جار
هذه حقيقة واقعي واعترافي

‏احرقت اعصابي بكثرة برودك
ياليت تعرف وايش فيني ومااخفيه

أرتاح واستبشر بحالي ردودك
واللي خفاه الصدر لعيونك ابديه

راجع في الايام ماضي عهودك
واتذكر الوعد الذي منك واقضيه

واحذر تبادلني بقسوة صدودك
قلبي ترى منك لقي مايكفيه

قلبي على سيد المزايين محروق
وهو مكلفني بحبه وعشقه

ولا رثى لي كامل العطف والذوق
ما عاد به رحمه ولا فيه رقّه

ما صدق انه صار للقلب معشوق
وانه رمى سهمه وصوّب بدقّه

يلاطفك بأسلوب حالي ومرموق
وان جيت له يا قلب لقّاك شِقّه

وينام في عينه وانا مكتوي شوق
اتخيله وان الخيالات حِقّه

حالي عسل جذاب عنده لي حقوق
ما دمت من عشاقه المستحِقّه.

‏تغيب وتغيب السعادة والأفراح
وترجع وترجع فرحتي في ثواني

انشهد إن الشوق قتال الأرواح
وبُعدك عليا شي يدمر كياني

ياما بك اتونس وياما بك ارتاح
وياما بك انسى معضلات الزماني

ويامااحبك موت واهواك ياصاح
وقربك حياتي غايتي وامتناني❤️❤️❤️

‏ياحسرتي في داخل الصدر خفي
مافايده والياس كفى ووفى

الوقت عيا لايوقف بصفي
والحظ مدري مات ولا توفى

وايش السبب ياحظ عني مقفي
وادعيك تقبل وانت عني تخفى

كنك تعاندني ترى ارميك خلفي
وانساك ياحظي ولا قول تكفى

بتحمل الدنيا بجهدي وكتفي
ولاطبعي ارجي من تولى وقفى
😔😔💔💔

‏قولوا لاعز الحبايب يحذر الغيره
لا يشغل البال بالتفكير طوالي

والله والله مالي في البشر غيره
لو جابوا الفين مايطرين في بالي

يا ساجي الطرف بالله فضها سيره
نبـرة عتابك تضيق كامل أحوالي

والله احبك وحبك صعب تفسيره
وانت الوحيد الذي دايم على بالي

اللَّهُمَّ أَنْتَ رَبِّي لاَ إِلَهَ إِلاَّ أَنْتَ، خَلَقْتَنِي وَأَنَا عَبْدُكَ، وَأَنَا عَلَى عَهْدِكَ وَوَعْدِكَ مَا اسْتَطَعْتُ، أَعُوذُ بِكَ مِنْ شَرِّ مَا صَنَعْتُ، أَبُوءُ لَكَ بِنِعْمَتِكَ عَلَيَّ، وَأَبُوءُ لَكَ بِذَنْبِي فَاغْفِرْ لِي، إِنَّهُ لاَ يَغْفِرُ الذُّنُوبَ إِلاَّ أَنْتَ