VATAN VA ONA

Vatan ko‘ksim ichida
Bir qush mangu sayroqdir.
Ruhimning mehrobiga
Xudo yoqqan chiroqdir.
Har cho‘pi o‘zi hikmat,
Har zarrasi bir hadis.
Qubbalar o‘qir oyat,
Ustunlari mudarris.
Bolasiday erkalar
Quchog‘i arg‘imchoqdir.
Chuchmomolar o‘pkalar,
Sog‘inchi qizg‘aldoqdir.
Shohimardon tog‘ida
O‘ynoqlaydi ohular.
Ilinar bulog‘idan
Menga farishta suvlar.
Oqib kelar qiqirlab,
Yalpiz, momoqaymoqlar,
Jannat ariqlaridan
Gul, qalampirmunchoqlar.
Beshigimning boshiga
Haq qo‘ygan nurli kitob.
Vatan tun-kun qoshimda
Charaqlab turgan oftob.
Ko‘z yummas, duolardan,
Mehridan palak tikar.
Bu notinch dunyolarga
Tinchlikdan ko‘ylak tikar.
Jonining tupchagidan
Yoqqan qora o‘choqdir –
Dunyo onam yurakda
Qovurgan oq bodroqdir.
Tandirlari uzatar
Shirmoy noni qaymoqday,
Vatan yorug‘ surating
Onam ochgan quchoqday!

Enaxon Siddiqova