#ЕвангелиеДня

О́нъ же рече́: блюди́те, да не прельще́ни бу́дете: мно́зи бо прiи́дутъ во и́мя Мое́, глаго́люще, я́ко А́зъ е́смь: и вре́мя прибли́жися. Не изы́дите у́бо вослѣ́дъ и́хъ. Егда́ же услы́шите бра́ни и нестрое́нiя, не убо́йтеся: подоба́етъ бо си́мъ бы́ти пре́жде: но не у́ а́бiе кончи́на. И бýдутъ знáменiя въ сóлнцѣ и лунѣ́ и звѣздáхъ: и на земли́ тугá язы́комъ от нечáянiя, шýма морскáго и возмущéнiя, издыхáющымъ человѣ́комъ от стрáха и чáянiя грядýщихъ на вселéнную: си́лы бо небéсныя подви́гнутся...

От Луки святое благовествование, глава 21

#ЕвангелиеДня

Егда́ же прiи́детъ Сы́нъ Человѣ́ческiй въ сла́вѣ Свое́й и вси́ святі́и А́нгели съ Ни́мъ, тогда́ ся́детъ на престо́лѣ сла́вы Своея́, и соберу́тся предъ Ни́мъ вси́ язы́цы: и разлучи́тъ и́хъ дру́гъ от дру́га, я́коже па́стырь разлуча́етъ о́вцы от ко́злищъ: и поста́витъ о́вцы одесну́ю Себе́, а ко́злища ошу́юю. Тогда́ рече́тъ Ца́рь су́щымъ одесну́ю Его́: прiиди́те, благослове́ннiи Отца́ Моего́, наслѣ́дуйте угото́ванное ва́мъ Ца́рствiе от сложе́нiя мíра: взалка́хся бо, и да́сте Ми́ я́сти: возжада́хся, и напои́сте Мя́: стра́ненъ бѣ́хъ, и введо́сте Мене́: на́гъ, и одѣ́ясте Мя́: бо́ленъ, и посѣти́сте Мене́: въ темни́цѣ бѣ́хъ, и прiидо́сте ко Мнѣ́...

От Матфея святое благовествование, глава 25

#ЕвангелиеДня

И бы́сть я́ко прибли́жися въ Виѳсфагíю и Виѳáнiю, къ горѣ́ нарицáемѣй Елеóнъ, послá двá учени́къ свои́хъ, глагóля: иди́та въ пря́мную вéсь: и въ ню́же входя́ща обря́щета жребя́ привя́зано, на нéже никтóже николи́же от человѣ́къ всѣ́де: отрѣ́шша é приведи́та. И áще ктó вы́ вопрошáетъ: почтó отрѣшáета, си́це рцы́та емý, я́ко Госпóдь егó трéбуетъ. Шéдша же пóсланная обрѣтóста, я́коже речé и́ма. Отрѣшáющема же и́ма жребя́, рекóша госпóдiе егó къ ни́ма: чтó отрѣшáета жребя́? О́на же рекóста, я́ко Госпóдь егó трéбуетъ. И приведóста é ко Иисýсови: и возвéргше ри́зы своя́ на жребя́, всади́ша Иисýса. Идýщу же емý, постилáху ри́зы своя́ по пути́.

От Луки святое благовествование, глава 19, 22

#ЕвангелиеДня

И изшéдъ и́де по обы́чаю въ гóру Елеóнскую: по нéмъ же идóша ученицы́ егó. Бы́въ же на мѣ́стѣ, речé и́мъ: моли́теся, да не вни́дете въ напáсть. И сáмъ отступи́ от ни́хъ я́ко вержéнiемъ кáмене, и поклóнь колѣ́на моля́шеся, глагóля: óтче, áще вóлиши мимонести́ чáшу сiю́ от менé: обáче не моя́ вóля, но твоя́ да бýдетъ. И востáвъ от моли́твы и пришéдъ ко ученикóмъ, обрѣ́те и́хъ спя́щихъ от печáли и речé и́мъ: чтó спитé? востáвше моли́теся, да не вни́дете въ напáсть.

Ещé же емý глагóлющу, сé нарóдъ, и нарицáемый Иýда, еди́нъ от обоюнáдесяте, идя́ше предъ ни́ми, и приступи́ ко Иисýсови цѣловáти егó. Сié бо бѣ́ знáменiе дáлъ и́мъ: егóже áще лобжý, тóй éсть. Иисýсъ же речé емý: Иýдо, лобзáнiемъ ли Сы́на человѣ́ческаго предаéши? Ви́дѣвше же, и́же бѣ́ху съ ни́мъ, бывáемое, рѣ́ша емý: Гóсподи, áще удáримъ ножéмъ?...

От Луки святое благовествование, глава 22, 23

#ЕвангелиеДня

И воста́вше все́ мно́жество и́хъ, ведо́ша его́ къ пила́ту. Нача́ша же на́нь ва́дити, глаго́люще: сего́ обрѣто́хомъ развраща́юща язы́къ на́шъ и возбраня́юща ке́сареви да́нь дая́ти, глаго́люща себе́ Христа́ Царя́ бы́ти. Пила́тъ же вопроси́ его́, глаго́ля: ты́ ли еси́ Ца́рь Иуде́омъ? О́нъ же отвѣща́въ рече́ ему́: ты́ глаго́леши. Пила́тъ же рече́ ко архiере́омъ и наро́ду: нико́еяже обрѣта́ю вины́ въ человѣ́цѣ се́мъ. Они́ же крѣпля́хуся глаго́люще, я́ко развраща́етъ лю́ди, учя́ по все́и Иуде́и, наче́нъ от Галиле́и до здѣ́. Пила́тъ же слы́шавъ Галиле́ю, вопроси́, а́ще человѣ́къ Галиле́анинъ е́сть? И разумѣ́въ, я́ко от о́бласти И́родовы е́сть, посла́ его́ ко И́роду, су́щу и тому́ во Иерусали́мѣ въ ты́я дни́...

От Луки святое благовествование, глава 23

#ЕвангелиеДня

Внемли́те ми́лостыни вáшея не твори́ти предъ человѣ́ки, да ви́дими бýдете и́ми: áще ли же ни́, мзды́ не и́мате от Отцá вáшего, и́же éсть на небесѣ́хъ. Егдá ýбо твори́ши ми́лостыню, не воструби́ предъ собóю, я́коже лицемѣ́ри творя́тъ въ сóнмищихъ и въ стóгнахъ, я́ко да прослáвятся от человѣ́къ. Ами́нь глагóлю вáмъ, воспрiéмлютъ мздý свою́. Тебѣ́ же творя́щу ми́лостыню, да не увѣ́сть шýйца твоя́, чтó твори́тъ десни́ца твоя́, я́ко да бýдетъ ми́лостыня твоя́ въ тáйнѣ: и Отéцъ твóй, ви́дяй въ тáйнѣ, тóй воздáстъ тебѣ́ я́вѣ. И егдá мóлишися, не бýди я́коже лицемѣ́ри, я́ко лю́бятъ въ сóнмищихъ и въ стóгнахъ путíй стоя́ще моли́тися, я́ко да явя́тся человѣ́комъ. Ами́нь глагóлю вáмъ, я́ко воспрiéмлютъ мздý свою́. Ты́ же, егдá мóлишися, вни́ди въ клѣ́ть твою́, и затвори́въ двéри твоя́, помоли́ся Отцý твоемý, и́же въ тáйнѣ: и Отéцъ твóй, ви́дяй въ тáйнѣ, воздáстъ тебѣ́ я́вѣ...

От Матфея святое благовествование, глава 6

#ЕвангелиеДня

А́ще бо отпущáете человѣ́комъ согрѣшéнiя и́хъ, отпýститъ и вáмъ Отéцъ вáшъ небéсный: áще ли не отпущáете человѣ́комъ согрѣшéнiя и́хъ, ни Отéцъ вáшъ отпýститъ вáмъ согрѣшéнiй вáшихъ. Егдá же поститéся, не бýдите я́коже лицемѣ́ри сѣ́тующе: помрачáютъ бо ли́ца своя́, я́ко да явя́тся человѣ́комъ постя́щеся. Ами́нь глагóлю вáмъ, я́ко воспрiéмлютъ мздý свою́. Ты́ же постя́ся помáжи главý твою́, и лицé твоé умы́й, я́ко да не яви́шися человѣ́комъ постя́ся, но Отцý твоемý, и́же въ тáйнѣ: и Отéцъ твóй, ви́дяй въ тáйнѣ, воздáстъ тебѣ́ я́вѣ. Не скрывáйте себѣ́ сокрóвищъ на земли́, идѣ́же чéрвь и тля́ тли́тъ, и идѣ́же тáтiе подкóпываютъ и крáдутъ: скрывáйте же себѣ́ сокрóвище на небеси́, идѣ́же ни чéрвь, ни тля́ тли́тъ, и идѣ́же тáтiе не подкóпываютъ, ни крáдутъ: идѣ́же бо éсть сокрóвище вáше, тý бýдетъ и сéрдце вáше.

От Матфея святое благовествование, глава 6

#ЕвангелиеДня

И бы́сть мимоходи́ти ему́ въ суббо́ты сквозѣ́ сѣ́янiя, и нача́ша ученицы́ его́ пу́ть твори́ти, востерза́юще кла́сы. И фарисе́е глаго́лаху ему́: ви́ждь, что́ творя́тъ въ суббо́ты, его́же не досто́итъ? И то́й глаго́лаше и́мъ: нѣ́сте ли николи́же чли́, что́ сотвори́ Дави́дъ, егда́ тре́бованiе имѣ́ и взалка́ са́мъ и и́же съ ни́мъ? ка́ко вни́де въ до́мъ Бо́жiй при Авiаѳа́рѣ архiере́и, и хлѣ́бы предложе́нiя снѣде́, и́хже не достоя́ше я́сти то́кмо иере́емъ, и даде́ и су́щымъ съ ни́мъ? И глаго́лаше и́мъ: суббо́та человѣ́ка ра́ди бы́сть, а не человѣ́къ суббо́ты ра́ди: тѣ́мже госпо́дь е́сть Сы́нъ человѣ́ческiй и суббо́тѣ. И вни́де па́ки въ со́нмище: и бѣ́ та́мо человѣ́къ, су́ху имы́й ру́ку...

От Марка святое Благовествование, глава 2,3

#ЕвангелиеДня

Во у́трiй же восхотѣ́ изы́ти въ Галиле́ю: и обрѣ́те Фили́ппа и глаго́ла ему́: гряди́ по мнѣ́. Бѣ́ же Фили́ппъ от Виѳсаи́ды, от гра́да Андре́ова и Петро́ва. Обрѣ́те Фили́ппъ наѳана́ила и глаго́ла ему́: его́же писа́ Моисе́й въ зако́нѣ и проро́цы, обрѣто́хомъ Иису́са Сы́на Ио́сифова, и́же от назаре́та. И глаго́ла ему́ наѳана́илъ: от назаре́та мо́жетъ ли что́ добро́ бы́ти? Глаго́ла ему́ Фили́ппъ: прiиди́ и ви́ждь. Ви́дѣ же Иису́съ наѳана́ила гряду́ща къ себѣ́ и глаго́ла о не́мъ: се́, вои́стинну Изра́илтянинъ, въ не́мже льсти́ нѣ́сть. Глаго́ла ему́ наѳана́илъ: ка́ко мя́ зна́еши? Отвѣща́ Иису́съ и рече́ ему́: пре́жде да́же не возгласи́ тебе́ Фили́ппъ, су́ща тя́ подъ смоко́вницею ви́дѣхъ тя́...

От Иоанна святое благовествование, глава 1

#ЕвангелиеДня

И у́тро, но́щи су́щей зѣло́, воста́въ изы́де, и и́де въ пу́сто мѣ́сто, и ту́ моли́тву дѣ́яше. И гна́ша его́ Си́монъ и и́же съ ни́мъ: и обрѣ́тше его́, глаго́лаша ему́, я́ко вси́ тебе́ и́щутъ. И глаго́ла и́мъ: и́демъ въ бли́жнiя ве́си и гра́ды, да и та́мо проповѣ́мъ: на сiе́ бо изыдо́хъ. И бѣ́ проповѣ́дая на со́нмищихъ и́хъ, во все́й Галиле́и, и бѣ́сы изгоня́. И прiи́де къ нему́ прокаже́нъ, моля́ его́ и на колѣ́ну припада́я предъ ни́мъ, и глаго́ля ему́, я́ко, а́ще хо́щеши, мо́жеши мя́ очи́стити. Иису́съ же милосе́рдовавъ, просте́ръ ру́ку, косну́ся его́, и глаго́ла ему́: хощу́, очи́стися. И ре́кшу ему́, а́бiе отъи́де от него́ прокаже́нiе, и чи́стъ бы́сть. И запре́щь ему́, а́бiе изгна́ его́: и глаго́ла ему́: блюди́, никому́же ничесо́же рцы́: но ше́дъ покажи́ся иере́еви и принеси́ за очище́нiе твое́, я́же повелѣ́ Моисе́й, во свидѣ́телство и́мъ.

От Марка святое Благовествование, глава 1

#ЕвангелиеДня

И вни́де па́ки въ капернау́мъ по дне́хъ: и слы́шано бы́сть, я́ко въ дому́ е́сть. И а́бiе собра́шася мно́зи, я́коже ктому́ не вмеща́тися ни при две́рехъ: и глаго́лаше и́мъ сло́во. И прiидо́ша къ нему́ нося́ще разсла́бленна жи́лами, носи́ма четы́рьми: и не могу́щымъ прибли́житися къ нему́ наро́да ра́ди, откры́ша покро́въ, идѣ́же бѣ́, и прокопа́вше свѣ́сиша о́дръ, на не́мже разсла́бленный лежа́ше. Ви́дѣвъ же Иису́съ вѣ́ру и́хъ, глаго́ла разсла́бленному: ча́до, отпуща́ются тебѣ́ грѣси́ твои́...

От Марка святое Благовествование, глава 2

#ЕвангелиеДня

И мимогря́дый ви́дѣ Леві́ю алфе́ова, сѣдя́ща на мы́тницѣ, и глаго́ла ему́: по мнѣ́ гряди́. И воста́въ вслѣ́дъ его́ и́де. И бы́сть возлежа́щу ему́ въ дому́ его́, и мно́зи мытари́ и грѣ́шницы возлежа́ху со Иису́сомъ и со ученики́ его́: бя́ху бо мно́зи, и по не́мъ идо́ша. И кни́жницы и фарисе́е, ви́дѣвше его́ яду́ща съ мытари́ и грѣ́шники, глаго́лаху ученико́мъ его́: что́ я́ко съ мытари́ и грѣ́шники я́стъ и пiе́тъ? И слы́шавъ Иису́съ глаго́ла и́мъ: не тре́буютъ здра́вiи врача́, но боля́щiи: не прiидо́хъ призва́ти пра́ведники, но грѣ́шники на покая́нiе.

От Марка святое Благовествование, глава 2

#ЕвангелиеДня

По мнѣ́ ити́, да отве́ржется себе́, и во́зметъ кре́стъ сво́й, и по мнѣ́ гряде́тъ: и́же бо а́ще хо́щетъ ду́шу свою́ спасти́, погуби́тъ ю́: а и́же погуби́тъ ду́шу свою́ мене́ ра́ди и ева́нгелiа, то́й спасе́тъ ю́: ка́я бо по́льза человѣ́ку, а́ще прiобря́щетъ мíръ ве́сь, и отщети́тъ ду́шу свою́? или́ что́ да́стъ человѣ́къ измѣ́ну на души́ свое́й? и́же бо а́ще постыди́тся мене́ и мои́хъ слове́съ въ ро́дѣ се́мъ прелюбодѣ́йнѣмъ и грѣ́шнѣмъ, и Сы́нъ человѣ́ческiй постыди́тся его́, егда́ прiи́детъ во сла́вѣ Отца́ своего́ со а́нгелы святы́ми. И глаго́лаше и́мъ: ами́нь глаго́лю ва́мъ, я́ко су́ть нѣ́цыи от здѣ́ стоя́щихъ, и́же не и́мутъ вкуси́ти сме́рти, до́ндеже ви́дятъ ца́рствiе Бо́жiе прише́дшее въ си́лѣ.

От Марка святое Благовествование, глава 8

#ЕвангелиеДня

И па́ки изше́дъ Иису́съ от предѣ́лъ ти́рскихъ и Сидо́нскихъ, прiи́де на мо́ре Галиле́йско, между́ предѣ́лы декапо́льски. И приведо́ша къ нему́ глу́ха и гугни́ва, и моля́ху его́, да возложи́тъ на́нь ру́ку. И пое́мь его́ от наро́да еди́наго, вложи́ пе́рсты своя́ во у́шы его́ и плю́нувъ косну́ся язы́ка его́: и воззрѣ́въ на не́бо, воздохну́ и глаго́ла ему́: Еффаѳа́, е́же е́сть разве́рзися...

От Марка святое Благовествование, глава 7

#ЕвангелиеДня

И отвѣща́въ еди́нъ от наро́да рече́: учи́телю, приведо́хъ сы́на моего́ къ тебѣ́, иму́ща ду́ха нѣ́ма: и идѣ́же коли́ждо и́метъ его́, разбива́етъ его́, и пѣ́ны тещи́тъ, и скреже́щетъ зубы́ свои́ми, и оцѣпенѣва́етъ: и рѣ́хъ ученико́мъ твои́мъ, да изжену́тъ его́, и не возмого́ша...

От Марка святое Благовествование, глава 9