#ЕвангелиеДня

Въ тó врéмя и́де Иисýсъ въ суббóты сквозѣ́ сѣ́янiя: ученицы́ же егó взалкáша и начáша востерзáти клáсы и я́сти. Фарисéе же ви́дѣвше рѣ́ша емý: сé, ученицы́ твои́ творя́тъ, егóже не достóитъ твори́ти въ суббóту. О́нъ же речé и́мъ: нѣ́сте ли чли́, чтó сотвори́ Дави́дъ, егдá взалкá сáмъ и сýщiи съ ни́мъ? кáко вни́де въ хрáмъ Бóжiй и хлѣ́бы предложéнiя снѣдé, и́хже не достóйно бѣ́ емý я́сти, ни сýщымъ съ ни́мъ, тóкмо иерéемъ еди́нымъ? или́ нѣ́сте чли́ въ закóнѣ, я́ко въ суббóты свящéнницы въ цéркви суббóты скверня́тъ и непови́нни сýть? глагóлю же вáмъ, я́ко цéркве бóлѣ éсть здѣ́: áще ли бы́сте вѣ́дали, чтó éсть: ми́лости хощý, а не жéртвы, николи́же ýбо бы́сте осуждáли непови́нныхъ: госпóдь бо éсть и суббóты Сы́нъ человѣ́ческiй.

От Матфея святое благовествование, глава 12.

#ЕвангелиеДня 
 
И пришéдъ Иисýсъ въ дóмъ Петрóвъ, ви́дѣ тéщу егó лежáщу и огнéмъ жегóму, и прикоснýся руцѣ́ ея́, и остáви ю́ óгнь: и востá и служáше емý. Пóздѣ же бы́вшу, приведóша къ немý бѣ́сны мнóги: и изгнá дýхи слóвомъ и вся́ боля́щыя исцѣли́: да сбýдется рѣчéнное Исáiемъ прорóкомъ, глагóлющимъ: тóй недýги нáшя прiя́тъ и болѣ́зни понесé. Ви́дѣвъ же Иисýсъ мнóги нарóды о́крестъ себé, повелѣ́ ученикóмъ ити́ на о́нъ пóлъ. И пристýпль еди́нъ кни́жникъ, речé емý: учи́телю, идý по тебѣ́, áможе áще и́деши. Глагóла емý Иисýсъ: ли́си я́звины и́мутъ, и пти́цы небéсныя гнѣ́зда: Сы́нъ же человѣ́ческiй не и́мать гдѣ́ главы́ подклони́ти. Другíй же от учени́къ егó речé емý: Гóсподи, повели́ ми прéжде ити́ и погребсти́ отцá моегó. Иисýсъ же речé емý: гряди́ по мнѣ́ и остáви мéртвыхъ погребсти́ своя́ мертвецы́. И влѣ́зшу емý въ корáбль, по нéмъ идóша ученицы́ егó.
 
От Матфея святое благовествование, глава 8.

#ЕвангелиеДня

Вшéдшу же емý въ капернаýмъ, приступи́ къ немý сóтникъ, моля́ егó и глагóля: Гóсподи, óтрокъ мóй лежи́тъ въ домý разслáбленъ, лю́тѣ страждá. И глагóла емý Иисýсъ: áзъ пришéдъ исцѣлю́ егó. И отвѣщáвъ сóтникъ, речé емý: Гóсподи, нѣ́смь достóинъ, да подъ крóвъ мóй вни́деши: но тóкмо рцы́ слóво, и исцѣлѣ́етъ óтрокъ мóй: и́бо áзъ человѣ́къ éсмь подъ влáстiю, имы́й подъ собóю вóины: и глагóлю семý: иди́, и и́детъ: и другóму: прiиди́, и прихóдитъ: и рабý моемý: сотвори́ сié, и сотвори́тъ. Слы́шавъ же Иисýсъ, удиви́ся, и речé грядýщымъ по нéмъ: ами́нь глагóлю вáмъ: ни во Изрáили толи́ки вѣ́ры обрѣтóхъ...

От Матфея святое благовествование, глава 8.

#ЕвангелиеДня

Понéже ýбо мнóзи начáша чини́ти пóвѣсть о извѣ́ствованныхъ въ нáсъ вещéхъ, я́коже предáша нáмъ, и́же испéрва самови́дцы и слýги бы́вшiи словесé: извóлися и мнѣ́ послѣ́довавшу вы́ше вся́ испы́тно, поря́ду писáти тебѣ́, держáвный Ѳеофи́ле, да разумѣ́еши, о ни́хже научи́лся еси́ словесѣ́хъ утверждéнiе. Бы́сть во дни́ И́рода царя́ Иудéйска, иерéй нѣ́кiй, и́менемъ захáрiа, от дневны́я чреды́ Авiáни: и женá егó от дщéрей Аарóновѣхъ, и и́мя éй Елисавéтъ...

От Луки святое благовестование, глава 12.

#ЕвангелиеДня

И прешéдъ оттýду, прiи́де на сóнмище и́хъ. И сé, человѣ́къ бѣ́ тý, рýку имы́й сýху. И вопроси́ша егó, глагóлюще: áще достóитъ въ суббóты цѣли́ти? да на негó возглагóлютъ. О́нъ же речé и́мъ: ктó éсть от вáсъ человѣ́къ, и́же и́мать овчá еди́но, и áще впадéтъ сié въ суббóты въ я́му, не и́метъ ли é и и́зметъ? кольми́ ýбо лýчши éсть человѣ́къ овчáте? тѣ́мже достóитъ въ суббóты добрó твори́ти. Тогдá глагóла человѣ́ку: простри́ рýку твою́. И прострé: и утверди́ся цѣлá я́ко другáя.

От Матфея святое благовествование, глава 12.

#ЕвангелиеДня

Тогда́ отвѣща́ша нѣ́цыи от кни́жникъ и фарисе́й, глаго́люще: Учи́телю, хо́щемъ от Тебе́ зна́менiе ви́дѣти. О́нъ же отвѣща́въ рече́ и́мъ: ро́дъ лука́въ и прелюбодѣ́й зна́менiя и́щетъ, и зна́менiе не да́стся ему́, то́кмо зна́менiе Ио́ны проро́ка: я́коже бо бѣ́ Ио́на во чре́вѣ ки́товѣ три́ дни́ и три́ но́щы, та́ко бу́детъ и Сы́нъ Человѣ́ческiй въ се́рдцы земли́ три́ дни́ и три́ но́щы. Му́жiе Ниневи́тстiи воста́нутъ на су́дъ съ ро́домъ си́мъ и осу́дятъ его́, я́ко пока́яшася про́повѣдiю Ио́ниною: и се́, бо́лѣ Ио́ны здѣ́. Цари́ца ю́жская воста́нетъ на су́дъ съ ро́домъ си́мъ и осу́дитъ и́, я́ко прiи́де от коне́цъ земли́ слы́шати прему́дрость Соломо́нову: и се́, бо́лѣ Соломо́на здѣ́. Егда́ же нечи́стый ду́хъ изы́детъ от человѣ́ка, прехо́дитъ сквозѣ́ безво́дная мѣ́ста, ищя́ поко́я, и не обрѣта́етъ: тогда́ рече́тъ: возвращу́ся въ до́мъ мо́й, отню́дуже изыдо́хъ...

От Матфея святое благовествование, глава 12.

#ЕвангелиеДня

Ещé же емý глагóлющу къ нарóдомъ, сé, Мáти егó и брáтiя егó стоя́ху внѣ́, и́щуще глагóлати емý. Речé же нѣ́кiй емý: сé, Мáти твоя́ и брáтiя твоя́ внѣ́ стоя́тъ, хотя́ще глагóлати тебѣ́. О́нъ же отвѣщáвъ речé ко глагóлющему емý: ктó éсть Мáти моя́, и ктó сýть брáтiя моя́? И простéръ рýку свою́ на ученики́ своя́, речé: сé, Мáти моя́ и брáтiя моя́: и́же бо áще сотвори́тъ вóлю Отцá моегó, и́же éсть на небесѣ́хъ, тóй брáтъ мóй, и сестрá, и Мáти ми́ éсть. Въ дéнь же тóй изшéдъ Иисýсъ изъ дóму, сѣдя́ше при мóри. И собрáшася къ немý нарóди мнóзи, я́коже емý въ корáбль влѣ́зти и сѣ́сти: и вéсь нарóдъ на брéзѣ стоя́ше. И глагóла и́мъ при́тчами мнóго, глагóля: сé, изы́де сѣ́яй, да сѣ́етъ.

От Матфея святое благовествование, главы 12,13.

#ЕвангелиеДня

И глаго́ла и́мъ при́тчами мно́го, глаго́ля: се́, изы́де сѣ́яй, да сѣ́етъ: и сѣ́ющу ему́, о́ва падо́ша при пути́, и прiидо́ша пти́цы и позоба́ша я́: друга́я же падо́ша на ка́менныхъ, идѣ́же не имѣ́яху земли́ мно́ги, и а́бiе прозябо́ша, зане́ не имѣ́яху глубины́ земли́: со́лнцу же возсiя́вшу присвя́нуша, и зане́ не имѣ́яху коре́нiя, изсхо́ша: друга́я же падо́ша въ те́рнiи, и взы́де те́рнiе и подави́ и́хъ: друга́я же падо́ша на земли́ до́брѣй и дая́ху пло́дъ, о́во у́бо сто́, о́во же шестьдеся́тъ, о́во же три́десять: имѣ́яй у́шы слы́шати да слы́шитъ.

От Матфея святое благовествование, глава 13.

#ЕвангелиеДня

Пришéдъ же Иисýсъ во страны‌ кесарíи Фили‌пповы, вопрошáше ученики‌ своя‌, глагóля: когó мя глагóлютъ человѣ‌цы бы‌ти, Сы‌на человѣ‌ческаго? Они‌ же рѣ‌ша: óви ýбо Иоáнна крести‌теля, инíи же илiю‌, друзíи же иеремíю или‌ еди‌наго от прорóкъ. Глагóла и‌мъ Иисýсъ: вы‌ же когó мя глагóлете бы‌ти? Отвѣщáвъ же Си‌монъ пéтръ речé: ты‌ еси‌ Христóсъ, Сы‌нъ Бóга живáго. И отвѣщáвъ Иисýсъ речé емý: блажéнъ еси‌, Си‌моне, вáръ Иóна, я‌ко плóть и крóвь не яви‌ тебѣ‌, но Отéцъ мóй, и‌же на небесѣ‌хъ: и а‌зъ же тебѣ‌ глаго‌лю, я‌ко ты‌ еси‌ пе‌тръ, и на се‌мъ ка‌мени сози‌жду це‌рковь мою‌, и врата‌ а‌дова не одолѣ‌ютъ е‌й: и да‌мъ ти‌ ключи‌ ца‌рства небе‌снаго: и е‌же а‌ще свя‌жеши на земли‌, бу‌детъ свя‌зано на небесѣ‌хъ: и е‌же а‌ще разрѣши‌ши на земли‌, бу‌детъ разрѣше‌но на небесѣ‌хъ.

От Матфея святое благовествование, глава 10.

#ЕвангелиеДня

И пришéдшу емý на о́нъ пóлъ, въ странý гергеси́нскую, срѣтóста егó двá бѣ́сна от грóбъ исходя́ща, лю́та зѣлó, я́ко не мощи́ никомý минýти путéмъ тѣ́мъ. И сé, возопи́ста глагóлюща: чтó нáма и тебѣ́, Иисýсе Сы́не Бóжiй? пришéлъ еси́ сѣ́мо прéжде врéмене мýчити нáсъ. Бя́ше же далéче от нею́ стáдо свинíй мнóго пасóмо. Бѣ́си же моля́ху егó, глагóлюще: áще изгóниши ны́, повели́ нáмъ ити́ въ стáдо свинóе. И речé и́мъ: иди́те. Они́ же изшéдше идóша въ стáдо свинóе: и сé, áбiе устреми́ся стáдо всé по брéгу въ мóре, и утопóша въ водáхъ. Пасýщiи же бѣжáша, и шéдше во грáдъ, возвѣсти́ша вся́, и о бѣснóю. И сé, вéсь грáдъ изы́де въ срѣ́тенiе Иисýсови: и ви́дѣвше егó, моли́ша, я́ко дабы́ прешéлъ от предѣ́лъ и́хъ.

И влѣ́зъ въ корáбль, прéйде и прiи́де во свóй грáдъ.

От Матфея святое благовествование, глава 8, 9.

#ЕвангелиеДня 

И приступи́вше ученицы́ егó рекóша емý: почтó при́тчами глагóлеши и́мъ? О́нъ же отвѣщáвъ речé и́мъ: я́ко вáмъ данó éсть разумѣ́ти тáйны цáрствiя небéснаго, о́нѣмъ же не данó éсть: и́же бо и́мать, дáстся емý и преизбýдетъ емý: а и́же не и́мать, и éже и́мать, вóзмется от негó: сегó рáди въ при́тчахъ глагóлю и́мъ, я́ко ви́дяще не ви́дятъ, и слы́шаще не слы́шатъ, ни разумѣ́ютъ: и сбывáется въ ни́хъ прорóчество Исáiино, глагóлющее: слýхомъ услы́шите, и не и́мате разумѣ́ти: и зря́ще ýзрите, и не и́мате ви́дѣти: отолстѣ́ бо сéрдце людíй си́хъ, и уши́ма тя́жко слы́шаша...

От Матфея святое благовествование, глава 13.

#ЕвангелиеДня

И́ну при́тчу предложи́ и́мъ, глагóля: уподóбися цáрствiе небéсное человѣ́ку, сѣ́явшу дóброе сѣ́мя на селѣ́ своéмъ: спя́щымъ же человѣ́комъ, прiи́де врáгъ егó и всѣ́я плéвелы посредѣ́ пшени́цы и отъи́де: егдá же прозябé травá и плóдъ сотвори́, тогдá яви́шася и плéвелiе. Пришéдше же раби́ господи́на, рѣ́ша емý: гóсподи, не дóброе ли сѣ́мя сѣ́ялъ еси́ на селѣ́ твоéмъ? откýду ýбо и́мать плéвелы? О́нъ же речé и́мъ: врáгъ человѣ́къ сié сотвори́. Раби́ же рѣ́ша емý: хóщеши ли ýбо, да шéдше исплевéмъ я́? О́нъ же речé и́мъ: ни́: да не когдá восторгáюще плéвелы, востóргнете кýпно съ ни́ми и пшени́цу: остáвите расти́ обоé кýпно до жáтвы: и во врéмя жáтвы рекý жáтелемъ: собери́те пéрвѣе плéвелы и свяжи́те и́хъ въ снопы́, я́ко сожещи́ я́: а пшени́цу собери́те въ жи́тницу мою́.

От Матфея святое благовествование, глава 13.

#ЕвангелиеДня

И́ну при́тчу предложи́ и́мъ, глаго́ля: подо́бно е́сть Ца́рствiе Небе́сное зе́рну гору́шичну, е́же взе́мъ человѣ́къ всѣ́я на селѣ́ свое́мъ, е́же ма́лѣйше у́бо е́сть от всѣ́хъ сѣ́менъ: егда́ же возрасте́тъ, бо́лѣе всѣ́хъ зе́лiй е́сть и быва́етъ дре́во, я́ко прiити́ пти́цамъ небе́снымъ и вита́ти на вѣ́твехъ его́. И́ну при́тчу глаго́ла и́мъ: подо́бно е́сть Ца́рствiе Небе́сное ква́су, его́же взе́мши жена́ скры́ въ са́тѣхъ трiе́хъ муки́, до́ндеже вскисо́ша вся́. Сiя́ вся́ глаго́ла Иису́съ въ при́тчахъ наро́домъ, и безъ при́тчи ничесо́же глаго́лаше къ ни́мъ: я́ко да сбу́дется рече́нное проро́комъ, глаго́лющимъ: отве́рзу въ при́тчахъ уста́ Моя́: отры́гну сокрове́нная от сложе́нiя мíра. Тогда́ оста́вль наро́ды, прiи́де въ до́мъ Иису́съ. И приступи́ша къ Нему́ ученицы́ Его́, глаго́люще: скажи́ на́мъ при́тчу пле́велъ се́лныхъ.

От Матфея святое благовествование, глава 13.

#ЕвангелиеДня

Тогдá остáвль нарóды, прiи́де въ дóмъ Иисýсъ. И приступи́ша къ немý ученицы́ егó, глагóлюще: скажи́ нáмъ при́тчу плéвелъ сéлныхъ. О́нъ же отвѣщáвъ речé и́мъ: сѣ́явый дóброе сѣ́мя éсть Сы́нъ человѣ́ческiй: а селó éсть мíръ: дóброе же сѣ́мя, сíи сýть сы́нове цáрствiя, а плéвелiе сýть сы́нове непрiя́зненнiи: а врáгъ всѣ́явый и́хъ éсть дiáволъ: а жáтва кончи́на вѣ́ка éсть: а жáтели áнгели сýть...

От Матфея святое благовествование, глава 13.

#ЕвангелиеДня

Пáки подóбно éсть цáрствiе небéсное сокрóвищу сокровéну на селѣ́, éже обрѣ́тъ человѣ́къ скры́, и от рáдости егó и́детъ, и вся́, ели́ка и́мать, продаéтъ, и купýетъ селó тó. Пáки подóбно éсть цáрствiе небéсное человѣ́ку купцý, и́щущу дóбрыхъ би́серей, и́же обрѣ́тъ еди́нъ многоцѣ́ненъ би́серъ, шéдъ продадé вся́, ели́ка имя́ше, и купи́ егó. Пáки подóбно éсть цáрствiе небéсное нéводу ввéржену въ мóре и от вся́каго рóда собрáвшу, и́же егдá испóлнися, извлекóша и́ на крáй, и сѣ́дше избрáша дóбрыя въ сосýды, а злы́я извергóша вóнъ. Тáко бýдетъ въ скончáнiе вѣ́ка: изы́дутъ áнгели, и отлучáтъ злы́я от среды́ прáведныхъ, и ввéргутъ и́хъ въ пéщь óгненную: тý бýдетъ плáчь и скрéжетъ зубóмъ. Глагóла и́мъ Иисýсъ: разумѣ́сте ли сiя́ вся́? Глагóлаша емý: éй, Гóсподи. О́нъ же речé и́мъ: сегó рáди вся́къ кни́жникъ, научи́вся цáрствiю небéсному, подóбенъ éсть человѣ́ку домови́ту, и́же изнóситъ от сокрóвища своегó нóвая и вéтхая.

От Матфея святое благовествование, глава 13.

#ЕвангелиеДня

Сiя́ емý глагóлющу къ ни́мъ, сé, кня́зь нѣ́кiй пришéдъ клáняшеся емý, глагóля, я́ко дщи́ моя́ ны́нѣ ýмре: но пришéдъ возложи́ на ню́ рýку твою́, и оживéтъ. И востáвъ Иисýсъ по нéмъ и́де, и ученицы́ егó. И сé, женá кровоточи́ва дванáдесяте лѣ́тъ, пристýпльши созади́, прикоснýся воскри́лiю ри́зы егó, глагóлаше бо въ себѣ́: áще тóкмо прикоснýся ри́зѣ егó, спасéна бýду. Иисýсъ же обрáщься и ви́дѣвъ ю́, речé: дерзáй, дщи́, вѣ́ра твоя́ спасé тя. И спасéна бы́сть женá от часá тогó. И пришéдъ Иисýсъ въ дóмъ кня́жь, и ви́дѣвъ сопцы́ и нарóдъ мóлвящь, глагóла и́мъ: отиди́те, не ýмре бо дѣви́ца, но спи́тъ. И ругáхуся емý. Егдá же изгнáнъ бы́сть нарóдъ, вшéдъ я́тъ ю́ за рýку: и востá дѣви́ца. И изы́де вѣ́сть сiя́ по всéй земли́ тóй.

От Матфея святое благовествование, глава 9.

#ЕвангелиеДня

И влѣ́зъ въ корáбль, прéйде и прiи́де во свóй грáдъ. И сé, принесóша емý разслáблена жи́лами, на одрѣ́ лежáща: и ви́дѣвъ Иисýсъ вѣ́ру и́хъ, речé разслáбленному: дерзáй, чáдо, отпущáются ти́ грѣси́ твои́. И сé, нѣ́цыи от кни́жникъ рѣ́ша въ себѣ́: сéй хýлитъ. И ви́дѣвъ Иисýсъ помышлéнiя и́хъ, речé: вскýю вы́ мы́слите лукáвая въ сердцáхъ свои́хъ? чтó бо éсть удóбѣе рещи́: отпущáются ти́ грѣси́: или́ рещи́: востáни и ходи́? но да увѣ́сте, я́ко влáсть и́мать Сы́нъ человѣ́ческiй на земли́ отпущáти грѣхи́: тогдá глагóла разслáбленному: востáни, возми́ твóй óдръ и иди́ въ дóмъ твóй. И востáвъ, взéмъ óдръ свóй, и́де въ дóмъ свóй. Ви́дѣвше же нарóди чуди́шася и прослáвиша Бóга, дáвшаго влáсть таковýю человѣ́комъ.

От Матфея святое благовествование, глава 9.

#ЕвангелиеДня

Бы́сть же ходя́щымъ и́мъ, и сáмъ вни́де въ вéсь нѣ́кую: женá же нѣ́кая и́менемъ мáрѳа прiя́тъ егó въ дóмъ свóй. И сестрá éй бѣ́ нарицáемая Марíа, я́же и сѣ́дши при ногý Иисýсову, слы́шаше слóво егó. Мáрѳа же мóлвяше о мнóзѣ слýжбѣ, стáвши же речé: Гóсподи, не брежéши ли, я́ко сестрá моя́ еди́ну мя́ остáви служи́ти? рцы́ ýбо éй, да ми́ помóжетъ. Отвѣщáвъ же Иисýсъ речé éй: мáрѳо, мáрѳо, печéшися, и мóлвиши о мнóзѣ, еди́но же éсть на потрéбу: Марíа же благýю чáсть избрá, я́же не отъи́мется от нея́. Бы́сть же егдá глагóлаше сiя́, воздви́гши нѣ́кая женá глáсъ от нарóда, речé емý: блажéно чрéво носи́вшее тя́, и сосцá, я́же еси́ ссáлъ. О́нъ же речé: тѣ́мже ýбо блажéни слы́шащiи слóво Бóжiе и храня́щiи é.

От Луки святое благовествование, глава 10.

#ЕвангелиеДня

Въ тó врéмя услы́ша И́родъ четвертовлáстникъ слýхъ Иисýсовъ и речé отрокóмъ свои́мъ: сéй éсть Иоáннъ крести́тель: тóй воскрéсе от мéртвыхъ, и сегó рáди си́лы дѣ́ются о нéмъ. И́родъ бо éмь Иоáнна, связá егó и всади́ въ темни́цу, Иродiáды рáди жены́ Фили́ппа брáта своегó: глагóлаше бо емý Иоáннъ: не достóитъ ти́ имѣ́ти ея́. И хотя́щь егó уби́ти, убоя́ся нарóда, занé я́ко прорóка егó имѣ́яху. Дню́ же бы́вшу рождествá И́родова, плясá дщи́ Иродiáдина посредѣ́ и угоди́ И́родови: тѣ́мже и съ кля́твою изречé éй дáти, егóже áще воспрóситъ. Онá же навáждена мáтерiю своéю, дáждь ми́, речé, здѣ́ на блю́дѣ главý Иоáнна крести́теля. И печáленъ бы́сть цáрь: кля́твы же рáди и за возлежáщихъ съ ни́мъ, повелѣ́ дáти éй и послáвъ усѣ́кну Иоáнна въ темни́цѣ. И принесóша главý егó на блю́дѣ и дáша дѣви́цѣ: и отнесé мáтери своéй. И пристýпльше ученицы́ егó взя́ша тѣ́ло егó и погребóша é: и пришéдше возвѣсти́ша Иисýсови…

От Матфея святое благовествование, глава 14.

#ЕвангелиеДня 

И познáвше егó мýжiе мѣ́ста тогó, послáша во всю́ странý тý, и принесóша къ немý вся́ боля́щыя: и моля́ху егó, да тóкмо прикóснутся вскри́лiю ри́зы егó: и ели́цы прикоснýшася, спасéни бы́ша. Тогдá приступи́ша ко Иисýсови и́же от Иерусали́ма кни́жницы и фарисéе, глагóлюще: почтó ученицы́ твои́ преступáютъ предáнiе стáрецъ? не умывáютъ бо рýкъ свои́хъ, егдá хлѣ́бъ ядя́тъ. О́нъ же отвѣщáвъ речé и́мъ: почтó и вы́ преступáете зáповѣдь Бóжiю за предáнiе вáше? Бóгъ бо заповѣ́да, глагóля: чти́ отцá и мáтерь: и: и́же злослóвитъ отцá или́ мáтерь, смéртiю да ýмретъ. Вы́ же глагóлете: и́же áще речéтъ отцý или́ мáтери: дáръ, и́мже бы от менé пóльзовался еси́: и да не почти́тъ отцá своегó или́ мáтере: и разори́сте зáповѣдь Бóжiю за предáнiе вáше…

От Матфея святое благовествование, глава 19.