انقلابـــــ روژآوا

⏫
ڕاسی یەسە ک لە دین ئێزدی (هە چۊ دین یاری(یارسان)) لە هۊچ کام لە سەرچاوەیل ئایینی نەهاتیە ک سەران و ڕێبەر ئایینی، حەق حکوومەتکردن دێرن یا تەنانەت وەزیفەێ سیاسی دێرن ک وەپێیان ئەی ئجازە دەێت ک خوەیان جوور نەمایەندەێ سیاسی مریدەیل و توودەێ مەردم بزانن. سەرچاوەی دخاڵەتکردن ڕێبەرەیل ئایینی لە کێشەیل سیاسی و وە نەمایەندەێ گەل زانین میر و شێخ و باوە و پیر و دەلیل، باوەرەیل ئسلام سیاسییە کە وەداخوە ئایینەیل ئێزدی و یاری(یارسان) لە ژێر کاریگەری خوەێ خستیە و کارێگ کردیە ک بڕێگ لە ڕێبەرەیل ئایینی دەست وە کێبڕکی وەگەرد مەلا و موفتی و ئاخونەیل بیەن و یا لە حاڵەتەیل خراوتر وەردیان هاوکاری بکەن و وەێ شێوە ئایینەیل ئێزدی و یارسان تۊش کەژچین و تەحریف بکەن.
وەلێ «میر حازم» لە کاتێگ ڕەسییەسە هاز کە کوومەڵگاێ ئێزدی دی چۊ جاران لە سیاسەت بێ نەمایەندە نییە و دی وەزعییەت وە شێوەێگ گووڕیاس ک گەل ئێزدی لانکەم لە سەردەم فەرمان ٧٣ەم و کوومەڵکوژی وە دەس «داعش» ک لە ئاکام خیانەت «پارتی» قومیا، ئەڕاێ دیاریکردن چارەنۊس خوەی دەس وە کار بۊیە. گەل ئێزدی وە دامەزراندن ڕێکخریاگەیل نزامی جوور «یەکینەگان واوەسەێ شنگال» (یەبەشە) و «هازەیل پاراستن ئێزدخان» (هەپەئێ) و هەروەها «یەکینەگان ژنەیل ئێزدخان» (یەژەئێ) نیشان داس ک وەشێوەێ سەروەخوە، خوەێ پارێزنێد و نیازێگ وە هازەیل دەوڵەتی کە وە ئامانج وەکارگردن ئێزدییەگان ئەڕاێ سوود خوەیان لەی ناوچە حزوور نزامی دێرن، نەێرێد. هەلەێوا «مەجلس سەروەخوەێ شنگال» دامەزریاس ک نیشان دەێد گەل ئێزدی، واتە توودەێ مریدەیل بێ دەسەڵاتێگ ک لە ئاگۆست ٢٠١٤ قوروانی سیاسەتبازییەیل میرەیل ئایینی و هاوکاریان وەرد سیاسەتمەدارەیل بۊنە و لە وەر هەڵاماتەیل خۊنمژەیل «داعش» وە تەنیا جێ هیلیان، دی ناتوان وە شێوەێ «مرید و مرادی» وەرد سیاسەت ڕۊوەڕۊ بوون؛ بەڵکە توان لە پێناو ژیانێگ ئازاد خوەیان دەسەڵات بگرنە دەس و چارەنۊسیان دیاری بکەن. دەرەنجام هاوکارییەیل میر پێشین ئێزدی ک وە جێ ئەنجام داێن کارەیل ئایینی، خوەی خستە ناو پەیوەندییەیل سیاسی و وەکار گرتن مەردمەگە ئەڕاێ ئامانجەیل سیاسەتمەدارەیل، چشتێگ نزیل وە ٥ هەزار کوژریاێ و ٥ هەزار ئاوارە و ٥ هەزار ژن و دۊیەت دیلگرتی بۊ و ئیرەنگە نزیک وە ٧٠ لەسەد خەڵق شنگال هێمانی ئاوارەس؛ ئەسە خەڵق ئێزدی باتە وە ئەێ بێ دەسەڵاتییە کووتایی بیەێت و وە جیا کردن وەزیفەیل سیاسی و ئایینی یەی کەڕەت ئەڕاێ هەمیشە وە میر تازە نیشان بیەن ک تەنیا وەزیفەێ رێبەرایەتی ئایینی گەلە، خەڵق کورد ئێزدی لە مەیدان سیاسەت هۊچ نیازێگ وە نەمایەندە نەیرێد، بەڵکە خۆی نەمایەندەێ خۆیە و لە کۆمۆنەیل ئازاد و دێموکراتیک، ژیانێگ ئازاد و بەرابەر ئەڕاێ خوەی وە دی تیەرێد.

1.9K views15:20