Пахта хом ашёси ва ип-калавани қайта ишлашни тизимли ташкил этиш учун Бош вазир ўринбосари С.Умурзоқов бошчилигида Республика комиссияси тузилиши белгиланди.

Комиссиянинг асосий вазифаси юқорида айтиб ўтилган 9 миллиард долларлик маҳсулот ишлаб чиқариш режасини ҳар бир вилоят, туман ва шаҳар, қолаверса, кластер кесимида белгилаш ва ижросини ташкил этиш ҳисобланади.

Кластерлар пахтадан ип-калавагача ишлаб чиқариш занжирини жорий этишга масъул бўлади.

Агар кластернинг ўзида хоҳиш бўлса, бемалол ўзи қайта ишлашни тўлиқ циклда амалга ошириши мумкин.

Бундан буён, алоҳида индустриал зоналар ташкил қилиниб, уларда тайёр маҳсулот ишлаб чиқарувчилар учун барча шароитлар яратиб берилади.

Комиссия элчилар ва кластерлар билан бирга бу индустриал зоналар бошқарувига чет эл компанияларини жалб қилиб, нуфузли брендларни олиб келади.

“Ўзбек пахтасига бойкот бекор қилинганидан сўнг, хорижий бренд ва йирик компаниялар маҳаллий корхоналар билан ҳамкорлик қилишга, миллий маҳсулотларимизга катта қизиқиш билдирмоқдалар.

Лекин, очиқ айтиш керак, тўқимачилик саноатини ташқи бозорларга олиб чиқиш, брендлар ва йирик корхоналарни жалб қилишда элчихоналар ишламаяпти.

Мисол учун, биздаги Туркия, Хитой, Германия каби бошқа давлатлар элчилари ўз мамлакати тадбиркорларининг манфаатини ҳимоя қилиш учун вазир, ҳоким, ҳатто корхонагача боришдан чарчамайди.

Лекин, бизнинг элчиларда бундай ташаббус ҳали йўқ!”, деди Президент.

Шу муносабат билан йил якунига қадар:

- Испания, Германия ва Швеция, Буюк Британия, Франция, Италия, Польша, Япония, Туркия, АҚШдаги элчилар билан бирга 50 та хорижий брендларни юртимизга олиб келиш;

- халқаро кўргазмаларда камида 30 та ўзбекистонлик ишлаб чиқарувчи маҳсулотини олиб чиқиб, 50 миллион доллардан буюртма олишни таъминлаш топширилди.

Шунингдек, брендларни жалб қилишга:

- бўялган трикотаж мато ва газлама экспорт қилувчиларга 10 фоизгача миқдорда субсидия берилади;

- хорижий брендлар ва уларга тайёр маҳсулот етказиб бераётган маҳаллий корхоналарнинг буюртмаларига асосан алоҳида авиа-рейслар йўлга қўйилади.

Шу билан бирга, брендлар учун зарур бўлган фурнитураларнинг 90 фоизи импорт қилинмоқда.

Шунинг учун, мутасаддиларга:

- бир ой муддатда фурнитура ва аксессуарлар ишлаб чиқариш дастурини ишлаб чиқиш;

- Андижон, Наманган ва Тошкент вилоятларида йил якунига қадар 4 тадан фурнитура корхоналарини ишга тушириш топширилди.

Президент тайёр маҳсулот ишлаб чиқарувчи корхоналарнинг Аксессуар ва фурнитура ишлаб чиқарувчилар уюшмасини ташкил этиш ташаббусини қўллаб-қувватлади.

Президент экспортчиларни қўллаб-қувватлаш механизмлари янада кенгайтирилишини таъкидлади.

Жумладан, Экспорт агентлиги томонидан:

- экспорт қилувчи корхоналарга 5 миллион долларгача айланма маблағ учун ресурслар уларнинг экспорт ҳажмидан келиб чиқиб ажратилади;

- корхоналарнинг хорижда омборхоналарни ижарага олиш харажатларини қоплаб бериш учун чекланган майдон 100 квадрат метрдан 500 квадрат метрга оширилади.

Экспортёрлар номига очилган аккредитивларни кредит таъминоти сифатида қабул қилишга рухсат берилади. Яъни, корхона экспорт қилган кундан бошлаб ўз хизмат кўрсатувчи банкидан аккредитивнинг 80 фоизи миқдорида кредит олиши мумкин бўлади.

Кластер ва тўқимачилик корхоналарининг молиявий ҳисобот халқаро стандартларига ўтиши қўллаб-қувватланади.

Бундан буён молиявий ҳисоботнинг халқаро стандартларига ўтиш харажатларининг 50 фоизгача қисми Молия вазирлиги томонидан қоплаб берилади.

Йиғилишда тўқимачилик корхоналарини пахта толаси ва ип-калава билан узлуксиз таъминлаш зарурлиги таъкидланди.

Ички бозорда танқислик туфайли пахта толасининг нархи халқаро биржалардан юқори бўлиб, 1 тоннаси 37 миллион сўмгача етмоқда. Оқибатда 22 мингдан зиёд ходим ишлайдиган 59 та ип-йигирув корхонасига ойига 25 минг тонна тола етишмайди.

Шу боис, Комиссия назорати остида:

- Нью-Йорк биржасида пахта толаси нархи кескин ошса, тола маҳаллий биржага 10 фоиз чегирма билан қўйилади;

- кластерлар ўз эҳтиёжидан ортиқ толани ойма-ой мажбурий биржага чиқаради;

- барча ип-калава корхоналари ишлаб чиқарган маҳсулотнинг камида 30 фоизини биржа орқали сотади;

- биржада сотиб олинган ип-калава учун тўловни банк кафолати орқали 3 ойгача бўлиб-бўлиб тўлаш механизми жорий этилади;

- қайта ишлаш қувватларига эга бўлмаган кластерларга имтиёзли кредит 14 ойга берилади (ҳозир – 24 ой).

Соҳа учун солиқ ва божхона маъмурчилиги енгиллаштирилади.

Бунда, ҳудудлар ва саноат тармоқларининг экспорт салоҳиятини ошириш учун божхона ҳудудида қайта ишлаш тизими янада соддалаштирилади. Хусусан:

- тўқимачилик саноатида хом ашёни божхона ҳудудида қайта ишлашни божхона тўловлари бўйича таъминотсиз амалга оширишга рухсат берилади;

- олиб келинган хом ашёдан божхона ҳудудида қайта ишлаб чиқарилган товарни “экспорт” режимида олиб чиқиш мумкин бўлади.

Шунингдек, тўқимачилик саноати учун мамлакатимизда ишлаб чиқарилмайдиган совутиш ускунаси, йигирув “бочок”лари каби товарлар учун уч йил муддатга божхона имтиёзлари тақдим этилади.

Шу билан бирга, экспорт контрактлари бўйича келиб тушмаган маблағлар 5 фоиздан ошмаса, улар муддати ўтган қарздорлик сифатида ҳисобга олинмайди.

Йиғилишда тўқимачилик соҳасида мутахассислар тайёрлаш, илм ва изланиш бўйича Тўқимачилик ва енгил саноат институти ҳамда Ўзбекистон-Корея тўқимачилик технопарки яхлит тизим асосида ишлаши белгиланди.

Шунинг учун Тошкент тўқимачилик ва енгил саноат институтига Савдо-саноат палатаси раиси Даврон Вахобов ректор этиб тайинланди.

Институтда янги ўқув йилидан:

- 3 ва 4-курс талабаларини ўқитишда “дуал” таълим тизими жорий қилинади.

Энди, улар ҳафтанинг уч кунида институтда назарий дарслар, қолган уч кунида тўқимачилик технопарки ва корхоналарда амалий ўқув машғулотлар асосида ўқитилади;

- нуфузли хорижий тўқимачилик олийгоҳлари билан ҳамкорликда камида 6 та йўналишда талабалар алмашиш дастури йўлга қўйилади.

Мутасаддиларга элчилар билан бирга йил якунига қадар Туркия, Корея ва Ҳиндистон каби илғор тажрибага эга мамлакатлардан 40 нафар малакали ўқитувчиларни олиб келиш топширилди.

Шу билан бирга, Тўқимачилик технопаркини соҳага янги тажриба ва инновацияни олиб кирадиган марказга айлантириш вазифаси қўйилди.

Президент “тонировка” масаласига тўхталди.

“Ҳар бир ислоҳотимиз, таклиф ва ташаббусларимиз, бу – энг аввало инсон қадри учун.

Шу боис, халқимизга қандай енгилликлар берсак, у биздан рози бўлади, деган савол барча раҳбарларни ҳар куни, ҳар дақиқа ўйлантириши керак.

Ҳар гал жойларга чиққанимда оддий-оддий одамлар билан учрашиб, муаммоларини эшитаман, яна қанча аҳолимизда шундай муаммолар борлиги ҳақида ўйлайман ва унга ечим қидираман.

Оммавий ахборот воситалари, ижтимоий тармоқларда кўтарилаётган масалалардан ҳам хабардорман.

Мана, бугунги кунда мамлакатимизда енгил автомашиналар сони 3,5 миллиондан ошди. Ҳайдовчиларимизда ҳам кўплаб эътирозлар тўпланиб қолган.

Шу боис, бугун ҳайдовчилар ва йўловчилар анчадан бери кутган, уларнинг кайфиятини кўтарадиган қарорни имзоладим”, деди Президент.

Президент таъкидлаганидек, 1 июлдан бошлаб:

- автомобилнинг орқа ён ойналарини қорайтириш тўловлари бекор қилинади, яъни бепул бўлади;

- олд ва орқа ён ойналарни тўлиқ қорайтириш тўловлари 6 баробаргача арзонлаштирилади;

- ишлаб чиқарилганига 10 йилдан кўп бўлмаган енгил машиналарни мажбурий техник кўрикдан ўтказиш тартиби бекор бўлади.

Энди, 10 йилдан 15 йилгача бўлган енгил машиналар – икки йилда, 15 йилдан ортиқ бўлганлари эса бир йилда бир марта техник кўрикдан ўтказилади.

"Бу ҳали бошланиши. Мен Президент маслаҳатчилари, Бош вазир ўринбосарлари ва вазирларга топшириқ берганман.

Одамларимизни қийнаётган, аҳамиятини йўқотган тартиб ва чекловларни бекор қилиш бўйича Ишчи гуруҳи барча йўналишларда мунтазам ишлаяпти.

Жойлардан тушган асосланган таклифлар ва ечимлар бўйича доимий тарзда халқимизнинг фойдасига хизмат қиладиган қарорлар қабул қилиб борилади”, деди Президент йиғилиш якунида.

#Фуқаролар_қабули_Чилонзорда

Чилонзор тумани аҳолиси учун турли ташкилот ва идоралар масъулларининг фуқаролар қабули ўтказиб келинмоқда.Жумладан, куни кеча Тошкент шаҳар ИИББ бошлиғи генерал-майор Азиз Ташпулатовнинг туман аҳолиси учун сайёр қабули бўлиб ўтди. Тумандаги 8-сонли мусиқа ва санъат мактаби биносида ўтказилган қабул жараёнларида 100 нафардан ортиқ мурожаатчилар иштирок этди.

ИИББ бошлиғи ва туман ҳокими фуқароларнинг муаммоларини ўрганиб, ҳал этиш чораларини кўришди. Саломатлигини тиклаш, моддий ёрдам, уй таъмири масалаларида мурожаат қилган фуқароларга ижтимоий аҳволига қараб “Темир дафтар”, “Аёллар дафтари”, “Ёшлар дафтари” рўйхатига киритиш ва тегишли жамғармалардан иаблағлар ажратишни ташкиллаштириш каби ёрдамлар берилди.

Айрим муддат талаб қиладиган муаммоларни бартараф этиш юзасидан масъулларга муддат белгиланган ҳода қатъий топшириқлар берилиб, ижроси назоратга олинди.

👉👉👉Лавҳамизда қабул жараёнлари

#Ободонлаштириш

Ёз чилласининг жазирама иссиғи давом этаётган ҳозирги даврда бирон юмуш билан кўчага бирров чиқиб келсангиз ҳам иссиқнинг таъсиридан ўзингизни қўярга жой топмай қоласиз. Лекин шу ноқулай об-ҳаво шароитида ҳам куннинг тиғида соатлаб, баъзан кун бўйи Ободонлаштириш соҳаси ишчилари кўчаларни тозалаб, супириб-сидириб, чиқиндиларни ташиб юрганини кўришимиз мумкин.

Ҳа, бугун ҳам ҳаво қизигандан қизиди. Ер юзасидан атайин қиздирилган тандирдан чиқаётган ҳилдек иссиқ кўтарилмоқда. Шундай ҳавода, айниқса, темир йўл бўйлари янада қизиб кетади. Шунга қарамай, туманимиз Ободонлаштириш бошқармаси ходимлари айни шундай ҳудудларни, яъни темир йўлнинг туманимиз ҳудудидан ўтувчи Тошкент-Самарқанд йўналиши бўйларини чиқиндилардан тозалашди.

Шу ўринда, туманимиз тозалиги ва ободончилиги йўлида иссиқ кунларда ҳам тинимсиз хизматда бўлаётган туман ҳокимининг Уй-жой коммунал хизмат кўрсатиш ва ободонлаштириш масалалари бўйича ўринбосари Камол Ҳамроев бошчилигидаги соҳа ишчи ва ходимларига миннатдорчилик билдирган ҳолда туманимиз аҳолиси ва меҳмонларидан белгиланмаган жойга чиқинди ташламасликларини, ободонлаштириш соҳаси ишчиларининг заҳматли меҳнатларини ҳурмат қилишларини сўраб қоламиз.

🔵@chilonzor_tuman_hokimligi

#Фуқаролар_қабули_Чилонзорда

Хабар берганимиздек, куни кеча Тошкент шаҳар ИИББ бошлиғи генерал-майор Азиз Ташпулатовнинг туман аҳолиси учун сайёр қабули бўлиб ўтди. Тумандаги 8-сонли мусиқа ва санъат мактабида қабул жараёнлари тугагандан сўнг, тумандаги Олимпия заҳиралари коллежи биносининг ҳовлисида фуқаролар қабуллари давом эттирилди.

Айни манзилда ҳам сайёр қабулга мурожаатлар билан келган 70 нафардан зиёд фуқароларнинг муаммоларига ечим изланди. Аксарият муаммолар шу ернинг ўзида ҳал этилди. Муддат талаб қиладиган айрим муаммоларни бартараф этиш учун масъулларга қатъий топшириқлар берилди. Айрим мурожаатлар бўйича эса ҳуқуқий тушунтиришлар берилди.

👉👉👉Лавҳамизда қабул жараёнлари

#Эълон

#Сессия

📣📣📣Халқ депутатлари Чилонзор туман кенгашининг 61-сессияси 29- июнь куни соат 11-00 да бошланади

Сессия кун тартибида:

“Темир дафтар”га киритилган жарроҳлик амалиётига ва ижтимоий ҳимояга муҳтож оилаларга моддий ёрдам ажратиш ҳамда аҳволи яхшиланган оилаларни “Темир дафтар”дан чиқариш;

Чилонзор туманида 2022 йилнинг I-чорагида инвестиция лойиҳалари бўйича амалга оширилган ишлар;

Оилавий ажримларнинг олдини олиш борасида Чилонзор туманида амалга оширилаётган ишлар ва келгусидаги вазифалар;

“Аёллар дафтари”нинг 3-босқичига киритилган хотин-қизларни ижтимоий-иқтисодий муаммоларини ҳал этиш, ижтимоий ҳимояга муҳтож, турмуш шароити оғир, ишсиз ва касб-ҳунарга эга бўлмаган, ҳуқуқий ва маънавий-психологик қўллаб-қувватлаш зарурати бўлган хотин-қизларга давлат томонидан 2022 йил май-июнь ойларида манзилли кўрсатилган ёрдамлар;

Ёшлар ўртасида ҳуқуқбузарлик ва жиноятчиликни олдини олиш бўйича Чилонзор туманида амалга оширилаётган чора тадбирлар;

Туман ободонлаштириш бошқармаси 2022 йилнинг биринчи ярмида амалга оширилган ишлари тўғрисидаги масалалар кўриб чиқилиши режалаштирилган.


🔵@chilonzor_tuman_hokimligi