Халықаралық таңлаў жеңимпазлары бүгин анықланады

Сырдәрья ўәлаяты Гүлистан қаласында өткерилип атырған III халықаралық бақсышылық көркем өнери фестивалының халықаралық таңлаўы жеңимпазлары бүгин анықланады.

Сырдәрья ўәлаяты музыкалы драма театрында болып өткен халықаралық таңлаўда Түркия, Армения, Япония, Словения, Греция, Корея, Қырғызстан, Қазақстан сыяқлы жәми 32 мәмлекеттен 64 қатнасыўшы өз талантын сыннан өткерди. Усы таңлаўға республикамыздан Өзбекстан халық бақсысы, сазенде Ғайратдин Өтемуратов қарақалпақ халық сазы “Қара дәли” ҳәм өзиниң авторлығындағы “Кеўил наласы” сазы менен, “Ниҳол” мәмлекетлик сыйлығының лауреаты, жыраў Саламат Аяпов“Едиге” дәстанынан үзинди ҳәм “Жаңа Өзбекстан жулдызлары” миллий сыйлығының ийеси, бақсы қыз Улдәўлет Сәрсенбаева“Дәўлетиярбек” дәстанынан үзинди атқарып, таңлаўда қатнасты.

Гүлистан қаласындағы орайлық амфитеатрда концерт бағдарламасы болып өтти. Онда Өзбекстан мәмлекетлик филармониясы Қарақалпақстан Республикасы бөлиминиң “Мухаллес” дуўтаршылар ансамбли фестиваль қатнасыўшылары ҳәм мийманларға қарақалпақ миллий қосықларынан ибарат концерт бағдарламасын усынды.
Фестивал шеңберинде “Заманагөй бақсышылық көркем өнери: алтын мийрастың жаңа сазалары” атамасындағы халықаралық илимий-әмелий конференцияда болып өтти.

Усы конференцияда Нөкис қалалық 22-санлы балалар музыка ҳәм көркем өнер мектебиниң муғаллими, Қарақалпақстан Республикасына мийнети сиңген мәденият хызметкери Жолдасбай Турдымуратов “Әмет бақсы қарақалпақ дәстаншылық көркем өнериниң тулғасы” атлы баянаты менен табыслы қатнасып, шөлкемлестириўшилер тәрепинен сыйлықланды.

III халықаралық бақсышылық көркем өнери фестивалының халықаралық таңлаўы жеңимпазлары бүгин анықланады.


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter