«Қараөзек» аўыл пуқаралар жыйыны абат мәнзиллердиң бирине айланбақта

Қараөзек районында бүгин «Қараөзек» аўыл пуқаралар жыйыны аймағын кең көлемли абаданластырыў, аймақта қурылыс-оңлаў жумысларын алып барыў, мәҳәлледеги барлық көшелерди тәртипке келтириў ҳәм үлгили аўыл өлшеми тийкарында көлемли дөретиўшилик жумысларын алып барыў бойынша ушырасыў өткерилди.

Онда Қарақалпақстан Республикасы Жоқарғы Кеңесиниң Баслығы Аманбай Орынбаев шығып сөйлеп, ҳәр бир басшы өзлериниң тараўы бойынша аймақты абаданластырыў жумысларына үлес қосыўы керек екенлиги, ең баслысы, усындай аўыр шараяттағы, шетки аўыллар пуқараларының турмысын абат етиўдей ийгиликли жумыслар еле де кең көлемли түрде даўам еттирилетуғынлығын атап өтти.

Ушырасыўда Өзбекстан Республикасы Президентиниң Кеңесгөйи Т.Худайбергенов, Қарақалпақстан Республикасы Министрлер Кеңесиниң Баслығы Ф.Эрманов, Республика прокуроры Э.Таджиев, Ишки ислер министри Б.Торебеков ҳәм басқа да бир қатар жуўапкерлер қатнасты.

Атап өтиў орынлы, ҳүрметли Президентимиздиң тапсырмасы менен халқымызға мүнәсип шараят жаратыў, олардың абадан турмысын тәмийинлеў бағдарында Тахтакөпир районының алыс Белтаў аўылы, Төрткүл районының Қумбасқан аўылы сыяқлы ең шетки, алыс аймақлардан баслап, Нөкис қаласының «Жаңа базар», «Шымбай гүзары», «Алтын жағыс» сыяқлы мәҳәллелеринде де кең көлемли дөретиўшилик жумыслары алып барылды. Усы жумыслардың даўамы сыпатында бүгин Қараөзек районындағы «Қараөзек» АПЖ аймағында жумыслар баслап жиберилген.

Аймақтың инфраструктурасы, атап айтқанда, ишки жол, электр ҳәм таза ишимлик суў тармақларын жақсылаў, көшелерди абат етиў, жәрдемге мүтәж шаңарақлардың турақ жайларын оңлаў, төбеси бастырылмаған жайларды шиферлап, авариялық жағдайдағыларын жаңадан қурып бериў сыяқлы қатар ўазыйпалар белгилеп алынды.


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter

Жерди бақсаң, жер сени бағады

Жоқарғы Кеңес Баслығы Аманбай Орынбаев Қараөзек районы «Қараөзек» аўыл пуқаралар жыйыны аймағындағы қыйтақ жерден нәтийжели пайдаланып атырған Ақулов Қуўандықтың шаңарағында болды.

Республиканың бир қатар жуўапкерлери ҳәм тараў басшылары, сондай-ақ, депутатлар да шаңарақта әмелге асырылып атырған жумыслар менен жақыннан танысты.

Қуўандық Ақулов суў тамтарыслығы дәўиринде бир неше жылдан берли үй алдындағы 20 сотих қыйтақ жеринен нәтийжели пайдаланып, шаңарағы дәраматына үлес қосып келмекте. Жер майданында мийўе-палыз, баў-бақша өнимлерин егип, бағ дөреткен ҳәм өним алып келмекте. Артқаны аўыл турғынларына ҳәм базарға алып шығылып, дәраматына дәрамат қосылып атыр. Қуўандық Ақулов суў тамтарыс ўақытлары артезиан қудық арқалы атызларын суўғарып келген. Буннан тысқары, суў турақлы жеткерип берилиўин тәмийинлеў мақсетинде артезиан қудық қазып берилмекте.

Быйылғы жылда республикамызда суўдың әдил бөлистирилип, қадағалаўға алыныўы менен ең шетки, алыс аймақларға шекем ағын суў жетип барды. Нәтийжеде, «Қараөзек» аўыл пуқаралар жыйыны да суў менен тәмийинленди.

Соның менен бирге қахарманымыз қыстада қарап отырмай ыссыханасында нәл жетистириў мененде шуғылланады. Ыссыханада жетистирген нәллерин ерте бәҳәрде базарға алып шығады, оннан қалаберди қыйтақ жерине де өзи жетистирген нәллерден егеди.

Жер менен тиллескен Қуўандық қыйтақ жерине екинши егинди егип оннанда өним алып баслағанын мақтаныш етеди.

Жоқарғы Кеңес Баслығы Қ.Ақуловтың бағында болып, жерден өнимли пайдаланыўда оның тәжирийбесинен ҳәр қандай шаңарақ үлги алыўы кереклигин атап өтти.

Толық мағлыўмат


Қарақалпақстан Республикасы Жоқарғы Кеңесиниң Мәлимлеме хызмети

Каналға ағза болыў: @joqargikenes

✉Telegram 🌐Website 📱Instagram 📱Facebook 📱Twitter