Өфөлә Радий Хәбиров менән Батырбәк Ҡайыпбиргәновтың осрашыуы үтте

Башҡортостан башлығы Радий Хәбиров Ҡарағалпаҡстан республикаһының Юғары белем, фән һәм инновациялар министры Батырбәк Ҡайыпбиргәнов менән осрашты. Үзбәкстан составындағы туғандаш республика вәкилдәре Башҡортостанға Евразия фәнни-мәғариф үҙәгенең «Фән һәм индустрия, стратегия 2030» тип исемләнгән форумда ҡатнашырға килгән. Киңәйтелгән ғилми делегация ике көн дауамында Өфөнөң юғары уҡыу йорттары, һөнәри белем биреү учреждениелары эшмәкәрлеге, фәнни үҙәктәр мөмкинлектәре менән танышҡан, мәғариф өлкәһендә хеҙмәттәшлек юлдарын барлаған.

Өфөлә «Ватан яугирҙары ғаиләләре» комитеты форумы үтте

Фекер алышыуҙа Рәсәй төбәктәренән йыйылған комитет ағзалары уртаҡ проблемаларҙы хәл итеү юлдарын билдәләп, тәжрибә уртаҡлашты. 200-ҙән ашыу кешене берләштергән форумда ирекмәндән бүләкләнде, махсус хәрби операцияға бағышланған күргәҙмә ойошторолдо.

Көҙгө саҡырылыш кампанияһы старт алды

Баймаҡ һәм Йылайыр райондарынан, Баймаҡ ҡалаһынан 15 егет тәүгеләрҙән булып әрме сафына оҙатылды.

Баҫыуға ҡош тиҙәге түгеп, халыҡта ризаһыҙлыҡ тыуҙырған Туймазы ҡош фабрикаһына рәсми иҫкәртеү яһалды

Хәтерегеҙгә төшөрәбеҙ, сентябрь урталарында Туймазы ҡалаһы һәм уға яҡын урынлашҡан бер нисә ауыл халҡының һауалағы киҫкен еҫкә зарланған видеолары интернет селтәрендә таралды. Мәсьәлә буйынса инициатив төркөм ил етәкселегенә үк барып етә. Проблема республиканың Ауыл хужалығы министрлығы, урындағы ауыл советтары вәкилдәре, күҙәтеү органдары һәм предприятие етәкселеге ҡатнашлығындағы ултырышта ҡаралды.

Алты көнлөк эш аҙнаһы башланды

4 ноябрҙә, Халыҡтар берҙәмлеге көнө уңайынан 2 ноябрҙә аҙнаһына биш көн эшләгәндәр өсөн эш көнө була. Шәмбе эш көнө бер сәғәткә ҡыҫҡара. 4 ноябрҙә, байрам көнөндә, эшкә сыҡҡан осраҡта хеҙмәт хаҡы икеләтә түләнергә тейеш. Йыллыҡ түләүле отпуск алғанда ялдың календарь көндәре иҫәбенә индерелмәй - отпуск бер көнгә оҙайтыла, тип белдерәләр Ғаилә, хеҙмәт һәм халыҡты социаль яҡлау министрлығынан.

Радий Хәбиров Өфө районындағы күп функциялы юл яны комплексында булды

“Ирбис-РБ” яғыулыҡ компанияһы төҙөгән обьектҡа 250 миллион һумлыҡ инвестиция йүнәлтелгән, 30 эш урыны булдырылған. Ғәҙәти яғыулыҡ төрҙәренән тыш, электромобилдәр өсөн зарядка алыу ҡоролмалары ҡуйылған. Шулай уҡ комплекста кафе, магазин, балалар өсөн уйын майҙансығы, ғибәҙәт ҡылыу бүлмәһе , водителдәр һәм пассажирҙар өсөн ял комнатаһы бар, ҡунаҡхана төҙөү планлаштырыла. Компания Өфө һәм Өфө районында тағы 10 яғыулыҡ ҡойоу станцияһы һәм күп функциялы юл яны комплекстары төҙөргә ниәтләй. “Программа үҙ маҡсаттарына иреште. Өс йыл эсендә 900-ҙән ашыу обьект төҙөлдө, 10 миллиард һумдан ашыу инвестиция йәлеп ителде. Юл яны сервисы- иҡтисадтың мөһим өлөшө, бында кешеләр аҡса эшләй, һалым да түләй. Шуның өсөн был программаны 2030 йылға тиклем яңыртыу буйынса эшләүҙе ҡарар иттек”,- тине Радий Хәбиров.

Радий Хәбиров Башҡортостан Хөкүмәт структураһы тураһындағы указға ҡул ҡуйҙы

Төбәк башлығы бөгөнгө оператив кәңәшмәлә яҡын киләсәктә Дәүләт Йыйылышы-Ҡоролтайға кадрҙар буйынса аныҡ тәҡдимдәр индереләсәк, тип билдәләне. Федераль ҡануниәткә ярашлы, республиканың ҡайһы бер тармаҡ министрлыҡтары етәкселәре федераль тармаҡ министрлыҡтары менән килешеп эш итергә тейеш. Улар төҙөлөш, мәғариф һәм башҡа министрлыҡтар. Ҡайһы бер етәкселәр буйынса килешеүҙәр килде, ҡайһы берҙәре буйынса беҙ көтәбеҙ, тине Радий Хәбиров.

Башҡортостанда Юл буйы сервисын үҫтереү концепцияһы 2030 йылға тиклем оҙайтыла

Модулле электр-яғыулыҡ ҡойоу станциялары төҙөлөшө планлаштырыла. Төбәк башлығы Радий Хәбиров Өфө районы Михайловка ауылында урынлашҡан күп функциялы яңы комплекс эшмәкәрлеге менән танышып, юл буйы сервисы - иҡтисадтың мөһим өлөшө булыуын билдәләне. Инвестициялар йәлеп ителеү менән бер рәттән эш урындары ла булдырыла.

Республика яугирҙарының сираттағы төркөмө ҡыҫҡа ваҡытлы ялдан һуң йәнә махсус хәрби операцияға юлланды

Уларҙы оҙатыу сараһы «Өфө-Арена» спорт комплексы алдындағы майҙанда үтте. Хәрбиҙәр тыуған яғында ике аҙна ял иткән. Ир-егеттәрҙе ғаиләләре, дуҫтары, хәрби комиссариат вәкилдәре һәм Ирек Сәғитов оҙатты

Республикала 9 айҙа балалар ҡатнашлығында 360-тан ашыу авария теркәлгән

9 малай һәм ҡыҙ һәләк булған, имгәнгәнгәндәр - 400-гә яҡын. Башҡортостан юл полицияһы һәм Мәғариф министрлығы бөгөн “Иғтибар, балалар” акцияһын иғлан итте. “Тиҙлекте арттырмағыҙ, юл билдәләренә һәм светофорға иғтибарлы булығыҙ. Автомобилдә балаларҙы креслола йөрөтөгөҙ. Ҡараңғы төшкәс балаларҙың кейеменә яҡтыртҡыс тамғалар беркетергә кәрәк”, - ти автоинспектор Ленар Зиннуров.
“Иғтибар, балалар” акцияһы барышында мәктәп уҡыусылары “Бала саҡтың имен юлы” тигән республика КВН уйынының финалында ҡатнаша ала. Ҡыҙҙар һәм малайҙар өсөн Бөтә Рәсәй “Йәш инспектор һөнәре”, “Йәш инспектор медиаһы” тигән социаль-мәғариф проекттары ойошторола. Профилактик акция 15 ноябрҙә тамамлана.

Башҡортостан ҡышҡы туристик миҙгелгә әҙер

Эшҡыуарлыҡ һәм туризм министрлығынан хәбәр итеүҙәренсә, 14 тау саңғыһы үҙәге эшләйәсәк. Уларҙа төрлө ҡатмарлыҡтағы һәм оҙонлоҡтағы 60 трасса була. Тау саңғыһы үҙәктәрендә техник хеҙмәтләндереү булған, бер нисәүһендә яңы трассалар асылырға тейеш.

Радий Хәбиров Хөкүмәт кәңәшмәһендә күперҙе ябыу менән бәйле проблеманы тиҙ арала хәл итергә ҡушты

Шаҡша күпере, госпиталдәргә ирекмәндәр, яңы башлыҡтар. Радий Хәбиров рәйеслегендә уҙған бөгөнгө Хөкүмәт кәңәшмәһе яңылыҡтарға, бойороҡтарға бай булды. Махсус хәрби операцияла ҡатнашыусылар һәм уларҙың ғаиләләренә ярҙам саралары, туристик миҙгел, уҡыу йорттарына ҡабул итеү һөҙәмтәләренән тыш башҡа мөһим темалар ҙа ҡаралды.

Өфөлә этноруризм форумы үтә

Башҡортостанға быйыл 900 мең турист килгән. Был хаҡта бөгөн «Торатау» конгресс- холында барған дүртенсе халыҡ- ара этноруризм форумында әйтелде. Сарала Йыл маршруты -2024 11-се турист премияһы билдәләнә. Форумда Радий Хәбиров ҡатнашып туриндустрия вәкилдәре менән аралашты.

Иглин районында махсус операцияла ҡатнашыусы яугир «ТвориДобро» хәрәкәте ирекмәндәре менән осрашты

Улар Советтар Союзы Геройы Виктор Бесценный исемендәге беренсе Иглин мәктәбе активистары. Осрашыу тарих һәм крайҙы өйрәнеү музейында дуҫтарса йылы шарттарҙа үтте. «Рэд» ҡушаматлы яугир хәрби хеҙмәт үҙенсәлектәре, яуҙағы берҙәмлек хаҡында һөйләне. Үҫмерҙәрҙең һорауҙарына яуап бирҙе. Мәктәп уҡыусыларынан тыш осрашыуҙа ҡатнашҡан өлкәндәр ҙә яугир менән патриотик тәрбиә темаһына әңгәмәләште.

Башҡортостандың тәүге президенты исемен йөрөткән гимназия 65 йыллыҡ юбилейын билдәләнде

антана айҡанлы Күмертау ҡалаһында урынлашҡан 3-сө башҡорт гимназия- интернатына ветерандар уҡытыусылар, сығарылыш уҡыусылары, мәртәбәле ҡунаҡтар йыйылды. Уҡытыусылар һәм тәрбиәселәр дәүләт наградалары менән бүләкләнде.

Радий Хәбиров Башҡортостан Хөкүмәт структураһы тураһындағы указға ҡул ҡуйҙы

Төбәк етәксеһе Хөкүмәт эшмәкәрлеге һәм Хөкүмәт ағзалары менән идара итәсәк. Хөкүмәт Премьер-министры Хөкүмәттең эш йүнәлештәрен бойомға ашырыуҙы ойоштора. Был органдың составында туғыҙ премьер-министр урынбаҫары, шул иҫәптән ике беренсе урынбаҫар буласаҡ.
Радий Хәбиров оператив кәңәшмәлә тиҙҙән Дәүләт Йыйылышы-Ҡоролтайға кадрҙар буйынса аныҡ тәҡдимдәр индереләсәк, тип билдәләне.

Өфөнөң «Аҡсарлаҡ» балалар лагерында «Етегән» тип исемләнгән полилингваль слет башланды

Проект Республика башлығы грантына, Башҡортостандың дәүләт һәм халыҡтар телдәрен һаҡлау, үҫтереү программаһын тормошҡа ашырыу маҡсатында өсөнсө тапҡыр үтә. Быйыл сара республиканың 9 полилингваль мәктәп һәм 2 полилингваль кабинеттары ҡатнашлығында ойошторолған.

Башҡортостан ветерандары самбо буйынса халыҡ-ара турнирҙа миҙалдар яуланы

Турнир Тажикстанда үтте. Спортсылар 8 йәш категорияһында көс һынашты. 55-59 йәшлектәр араһында Башҡортостандан Илдар Ҡотлоғужин еңеп сыҡты. 45-49 йәш категорияһында Илгиз Шәһиев көмөш миҙалға лайыҡ булды. 60-64 йәшлектәр араһында Илшат Дусҡаев шулай уҡ икенсе урын алды.

Башҡортостанда "Орлан" поезы миллион ярым пассажирҙы хеҙмәтләндергән

Транспорт һәм юл хужалығы министрлығынан хәбәр итеүҙәренсә, был состав 133 кешегә иҫәпләнгән. Ул Өфө-Күмертау-Ырымбур маршруты буйлап йөрөй. Тәүге тапҡыр 2021 йылдың сентябрендә юлға сыҡты. Поезд вагондары заманса йыһазландырылған, бында интернетҡа тоташыу мөминлеге бар.

Башҡортостанда браконьер 430 мең һумлыҡ ҡыҫала аулаған

Дүртөйлө район-ара прокуратураһы енәйәт эше буйынса ғәйепләү актын раҫланы. Уға ярашлы, 2023 йылда бер ир 4 меңдән ашыу ҡыҫала тотҡан. Уны тәртип һаҡсылары ҡулға алған. Браконьер ғәйебен таныған. Хәҙер был хәл буйынса суд ҡарары көтөлә.