Джефф Монсон Өфөлә никах уҡытты

Билдәле спортсы, Дәүләт Йыйылышы-Ҡоролтай депутаты Джефф Монсон мосолман йолаһы буйынса өйләнде. Ул Өфөлә Туҡай урамындағы мәсеттә никах уҡытты. Туй иһә киләһе йылдың яҙында көтөлә. Ҡатнаш алыш оҫтаһы Джефф Монсон бер нисә йыл элек Рәсәй паспортын алды, унан һуң америка гражданлығынан баш тартты, ислам динен ҡабул итте.

Номерһыҙ машинала йөрөгән өсөн яза ҡәтғиләшә

Ил президенты Владимир Путин ошо турала законға ҡул ҡуйҙы. Документ рәсми мәғлүмәттәр порталында урынлаштырылған. Хәҙер номерһыҙ машинала йөрөгән, дәүләт номерын төрлө ысулдар менән ҡаплаған, йәшергән өсөн водитель танытмаһы бер йылдан йыл ярымға тиклем тартып алына. Әлегә тиклем 5 мең һум штраф, йә өс айға тиклем машина йөрөтөүҙән ситләтеү ҡаралғайны.

Республикала Шәһит Хоҙайбирҙин исемендәге премия лауреаттары асыҡланды

Премьер-министр вазифаһын башҡарыусы Андрей Назаров тейешле ҡарарға ҡул ҡуйған. Конкурста “Башҡортостан” телерадиокомпанияһы журналистар коллективының “Башҡорт каникулдары” проекты еңеү яулаған. Премия Ләйлә Владимирова, Виталий Ермаков, Марс Камалетдинов, Дмитрий Каретко, Альбина Ҡасимханова, Нурислам Хәйриев һәм Айҙар Шәриповҡа тапшырылды. Дәүләт бүләгенә шулай уҡ махсус хәрби опрация геройҙарына арналған мәҡәләләр шәлкеме өсөн “Ашҡаҙар” газетаһы баш мөхәррире Рәмил Мансуров һәм “Башинформ” агентлығы хәбәрсеһе Роман Якимчук лайыҡ булды. Ул конкурсҡа ижтимағи-сәйәси, социаль-иҡтисади темаға бағышланған яҙмалар ебәргән. Лауреаттарҙы бүләкләү сараһы Өфөлә Шәһит Хоҙайбирҙин йорт-музейында үтте. Быйыл премияның күләме 500 мең һум.

Башҡорт теле буйынса онлайн олимпиадала 41 мең 567 кеше ҡатнашҡан

Был акция 9-11 октябрҙә уҙғарылды. Ҡатнашыусыларға 45 минут эсендә 30 һорауға яуап бирергә тәҡдим ителде. Тест тамамланғас, һәр ҡатнашыусыға йыйылған балдар һаны менән сертификат тапшырылды. Олимпиаданы Башҡорт телен һаҡлау һәм үҫтереү ойошмаһы һәм «Мираҫ» йәштәрҙең башланғыстарына булышлыҡ итеү фонды үткәрҙе. Проект Башҡортостан Башлығы грантына тормошҡа ашырыла.2023 йылдың октябрендә олимпиада беренсе тапҡыр үтте. Унда Рәсәйҙең 67 төбәгенән һәм 23 төрлө илдән вәкилдәр ҡатнашты. Биш көн дауамында 27 меңдән ашыу кеше белемен тикшерҙе.

Бишбүләк районы халҡы «Урындағы башланғыстарға булышлыҡ итеү» программаһында әүҙем ҡатнаша

Йылбулаҡ-Матвеевка мәҙәниәт йортонда һәр ваҡыт йыр-моң яңғырап тора. Ауыл халҡы байрам һайын концерт ойоштора, район кимәлендәге сараларҙа ҡатнаша, яугирҙар өсөн маскировка селтәрҙәре үрә. 50 йыл элек төҙөлгән бинала быға тиклем бер ҡасан да ремонт яһалмаған. Үҙешмәкәр артистарҙы ҡыйыҡтан һыу ағыу мәсьәләһе борсой. Шуға күрә улар «Урындағы башланғыстарға булышлыҡ итеү» программаһында ҡатнашырға була.

Туймазы ҡалаһы эшҡыуарҙары яугирҙарға сираттағы гуманитар ярҙам әҙерләгән

Ватан һаҡсыларын хәстәрләп. Туймазы ҡалаһы эшҡыуарҙары махсус хәрби операцияла ҡатнашыусылар өсөн сираттағы гуманитар ярҙам әҙерләгән. УАЗ автомобилдәре, яңы дрондарҙы ирекмәндәр үҙ көсө менән һатып алып алғы һыҙыҡтағы яҡташтарға ебәрергә ниәтләй.

Архангел районы Максим Горький ауылында махсус хәрби операция ғаиләләре клубы асылды

Ауыл хакимиәте бинаһында яугирҙарҙың ҡатындары һәм әсәләре өсөн махсус үҙәк тә төҙөлгән. Ойоштороусылар буш бүлмәне ремонтлап, өҫтәл, ултырғыстар ҡуйған. Ауыр тормош хәлендә ҡалған ҡатын-ҡыҙҙар бында аралаша, психолог менән әңгәмәләшеп, төрлө тематик саралар ойоштора ала. Бынан тыш, үҙәктә «Ватан һаҡсылары» ойошмаһы белгестәре менән осрашыуҙар планлаштырылған.

Башҡортостан кинематографистар берлеге бер юлы өс юбилярҙы тәбрикләне

Ваҡытында улар барыһы ла республикала кино һәм телевидение тармаҡтары үҫешенә тос өлөш индергән. Сара уңайынан Рәсәй телевидениеһы ветераны Марсэн Мөхәмәҙиевтың шәхси фотокүргәҙмәһе асылды.

Өфөләге Шаҡша күпере ябылыуға бәйле өҫтәмә электричкалар йөрөйәсәк

3 яңы поезд Дим-Шаҡша-Иглин маршрутына сыға, тип хәбәр итәләр Башҡортостан ҡала яны пассажирҙар компанияһынан. 21 октябрҙән Шаҡша күперендә машиналар йөрөшө бер айға тулыһынса туҡтатыла. Ошо ваҡытта Өфө агломерацияһында 54 ҡала яны поезы йөрөйәсәк. Күперҙә капиталь ремонт уҙған йылда башланды, эштәрҙе киләһе йылда тамамлау көтөлә.

Республикала һауа торошо һыуытыу менән автоһәүәҫкәрҙәр өсөн көҙгө мәшәҡәттәр башланды

Тәгәрмәсте алмаштырырға ваҡыт. Республикала һауа торошо һыуытыу менән автоһәүәҫкәрҙәр өсөн көҙгө мәшәҡәттәр башланды. Һауа температураһының үҙгәреүе боҙлауыҡҡа сәбәпсе була, бигерәк тә иртәнге һәм төнгө сәғәттәрҙә. Белгестәр нимә кәңәш итә? Тимер атты ҡышҡылыҡҡа әҙерләү өсөн тәгәрмәстәрҙе ҡасан алмаштырырға? Тулыраҡ киләһе репортажда.

Көнбағыш майҙандарының 47 проценты эшкәртелгән

Башҡортостанда майды культуралар урыу дауам итә. Быйыл ул 315 мең гектартҙа сәселгән. Стәрлетамаҡ районы хужалыҡтарының береһе көнбағыш урыуҙы тамамлау алдында. Йәй ямғырлы булыуға бәйле, майлы культура уңышы юғары . Ә шул уҡ ваҡытта иген һәм ҡуҙаҡлы культуралар ныҡ ҡына зыян күргән.

Башҡортостанда хәрби контрактты бер көн эсендә төҙөргә мөмкин

«Һаҡсы» тип аталған үҙәктә ир-егеттәр «берҙәм тәҙрә» ысулы буйынса медицина тикшереүе үтеп, банк картаһы асып, документтарҙы туплап алғы һыҙыҡҡа юллана ала. Ватан һаҡсыларына ике тәүлеккә тиклем бушлай йәшәү шарттары , өс тапҡыр туҡланыу ойошторолған. Быға тиклем контракт килешеүе төҙөү өсөн бер нисә адрес үтергә тура килһә хәҙер егеттәр өсөн бөтә уңайлыҡтар булдырылған.

Өфөлә Шәһит Хоҙайбирҙин исемендәге журналистар премияһы лауреаттары билдәләнде

Өфөлә Башҡортостан Хөкүмәтенең Шәһит Хоҙайбирҙин исемендәге журналистар премияһы лауреаттары билдәләнде. 2024 йыл өсөн абруйлы наградаға «Башҡортостан» телерадиокомпанияһының «Башҡорт каникулдары» проектының ижади төркөмө, «Ашҡаҙар» гәзите баш мөхәррире Рәмил Мансуров һәм «Башинформ» мәғлүмәт агентлығының махсус хәбәрсеһе Роман Якимчук лайыҡ булды. Шәһит Хоҙайбирҙиндың йорт-музейында ойошторолған тантанала БЮТ ижади төркөмө лә булды.

Ҡәҙим Аралбаев Хәйбулла районында китап һөйөүселәр менән осрашты

Яҡташтар менән осрашыу. Башҡортостандың халыҡ шағиры, Салауат Юлаев исемендәге дәүләт премияһы лауреаты Ҡәҙим Аралбаев Хәйбулла районында китап һөйөүселәр менән осрашты. Аҡъяр үҙәк район китапханаһында һәм Яңы Ергән ауылында әҙип ижадына арналған саралар хаҡында киләһе яҙмала.

Башҡортостанда баҡсасылыҡ ширҡәттәренә илткән юлдарҙы ремонтлау дауам итә

Башҡортостан башлығы социаль селтәрҙә хәбәр итеүенсә, быйылға дөйөм оҙонлоғо 26 ярым километрлыҡ 20 юл һайлап алынған. «Был юлдар бик мөһим. Сөнки улар республиканың 6 муниципалитеты - Өфө, Күмертау ҡалалары, Бәләбәй, Иглин, Ҡырмыҫҡалы, Кушнаренко, Өфө һәм Шишмә райондарында 72 баҡсасылыҡ ширҡәтенә үтеүҙе тәьмин итә. Юлдарҙы ремонтлауға барлығы 150 миллион һум аҡсма бүленде. Бөтә объекттарҙа ла эш бара - ремонтты ҡышҡа тиклем тамамларға ниәтләйбеҙ» тип белдергән төбәк етәксеһе.

2 меңдән ашыу ирекмән «Рәсәй - спорт державаһы» халыҡ-ара форумында ҡатнашыуға ғариза биргән

Улар етди һайлап алыу үткән. Һөҙөмтәлә күләмле сараға 500 кеше йәлеп ителәсәк. Яңы төҙөлгән Көрәш һарайында волонтерҙар менән йомғаҡлау осрашыуы уҙҙы. Уларға форум ҡунаҡтарын ҡаршы аласаҡ фирма экипировкаһы тапшырылды. Билдәле булыуынса, 17-19 октябрҙә Өфө Рәсәйҙең спорт баш ҡалаһына әйләнә.

Дәүләт Йыйылышы - Ҡоролтайҙың 14-се пленар ултырышы 24 октябрҙә үтә

Был турала бөгөн Парламенттың Президиум ултырышында белдерелде. Депутаттар ҡарамағына 5 тиҫтәнән ашыу документ сығарылды. Закон проекттары араһында социаль йүнәлештәгеләр күп. Мәҫәлән, физик мөмкинлеге сикләнгәндәргә ярҙамға кеше беркетеү тураһында. Инвалидтың ярҙамға мохтажмы, юҡмы икәне Башҡортостандың Ғаилә, хеҙмәт һәм халыҡты социаль яҡлау министрлығы тарафынан билдәләнәсәк.

Бөрө районының «Бәрәкәтле ялан»да йәшәүселәр цивилизациянан ситтә ғүмер итеүгә өҫтөнлөк бирә

Ҡала шау-шыуынан урманға. Бөрө районында бынан 22 йыл элек барлыҡҡа килгән «Бәрәкәтле ялан» биләмәһендә йәшәүселәр ғаилә, тыуған ер кеүек ҡиммәтәрҙе һаҡлап ғүмер итә. Дәүләттән икешәр гектар ерҙе 49 йылға ҡуртымға алып улар цивилизациянан ситтә ғүмер итеүгә өҫтөнлөк бирә.

Иртәгә Өфөлә ике сәғәткә Совет майҙаны янында юлдар ябыла

Пушкин һәм Совет урамдарының айырым өлөштәрендә хәрәкәт сәғәт 12-нән сикләнә, тип хәбәр итәләр ҡала хакимиәтенән. Йәмәғәт транспорты йөрөшөндә лә үҙгәрештәр була. Сикләү "Рәсәй - спорт державаһы" форумын уҙғарыуға бәйле ҡабул ителә. Конгресс иртәгә башлана һәм 19 октябргә тиклем бара.

Төбәктә авария хәлендәге торлаҡты күсереүгә биләмәләрҙе комплекслы үҫтереү механизмы ярҙам итәсәк

Был хаҡта Радий Хәбиров үткәргән сираттағы «Төҙөлөш сәғәте» ндә һүҙ барҙы. Республиканың төҙөлөш һәм архитектура министры вазифаһын башҡарыусы Артем Ковшов хәбәр итеүенсә, быйыл октябргә Өфөлә, Нефтекамала, Туймазыла һәм Шишмәлә 40 мең квадрат метр авария хәлендәге торлаҡты күсереүҙе күҙ уңында тотҡан биләмәләрҙе комплекслы үҫтереүсе 10 килешеү төҙөлгән.