Республикала йылғаларында йәнә һыу күтәрелә

Бындай күренештәр Инйәр йылғаһы буйында урынлашҡан Баҫыутамаҡ менән Асы ауылдарында, Ишембай һәм Салауат ҡалаһы эргәһенән аҡҡан Ағиҙел йылғаһында күҙәтелә. Быға Башҡортостанда дауам иткән ҡойма ямғырҙар сәбәпсе. Һыуһаҡлағыстарҙы күҙәтеү дауам итә, тип хәбәр итә республиканың Ғәҙәттән тыш хәлдәр буйынса дәүләт комитеты.

Ғафури районының бер юлы өс ауылында яңы модулле фельдшер-акушерлыҡ пункты асылды

Хәҙер төбәктә улар иҫәбе 12-гә етте. Биналарҙың барыһы ла кәрәкле, беренсе медицина ярҙамы ҡоролмалары менән йыһазландырылған.

Кушнаренко районы хакимиәте хеҙмәткәрҙәре яугирҙарыбыҙ өсөн маскировка селтәрҙәре үрә

Бының өсөн Мәҙәниәт йортонда махсус майҙансыҡ ойошторолған. Эш ҡатмарлы булмаһа ла, ваҡыт һәм көс талап ителә, ти ирекмәндәр. Шулай уҡ бында зип-пакеттарға йыуыныу кәрәк-яраҡтары тултырыла, паракордтан беләҙектәр бәйләй, изге эшкә ауыл халҡы ла ҡушылған. Яҡын арала Кушнаренко районы башлығы һалдаттарға гуманитар ярҙам алып барасаҡ. Яугирҙар өсөн шәхси посылкаларға башҡорт балы ла һалына.

Ҡырмыҫҡалы районы Ҡолош ауылына зәңгәр яғыулыҡ үтте

Ҡырмыҫҡалы районы Ҡолош ауылы халҡы өсөн күптән көтөп алынған ваҡиға - биләмәгә зәңгәр яғыулыҡ үтте. Бөгөн унда ҡасаба-ара һәм ҡасаба эсендәге газ үткәргестәр сафҡа индерелде. Тантанала «Берҙәм Рәсәй» партияһының Генераль советы секретары вазифаһын ваҡытлыса башҡарыусы, Рәсәй президентының Урал федераль округындағы тулы хоҡуҡлы вәкиле Владимир Якушев, Радий Хәбиров һәм «Газпром Межрегионгаз» яуаплылығы сикләнгән йәмғиәттең генераль директоры Сергей Густов ҡатнашты.

Владимир Якушев Өфөлә студенттар кампусында булды

«Берҙәм Рәсәй» партияһының Генераль советы секретары вазифаһын ваҡытлыса башҡарыусы, Рәсәй президентының Урал федераль округындағы тулы хоҡуҡлы вәкиле Владимир Якушев Өфөлә студенттар кампусында ла булды.
Радий Хәбиров менән бергә Владимир Якушев кампустағы юғары уҡыу йорттары лабораториялары һәм инновацион майҙансыҡтар эше менән танышты. Улар иҫәбендә - Алдынғы ҡорамалдарҙа эшләү күнекмәләрен үҙләштереү һәм төрлө патологияларҙы дауалау өсөн Башҡорт дәүләт медицина университетының уҡыу кластары, шулай уҡ «Киләсәк медицинаһы» кабинеты, Өфө фән һәм технологиялар университетының Берлога киберфизик платформаһы оҫтаханаһы, пилотһыҙ осоу аппараттарын йыйыу, программалау һәм эксплуатациялау зонаһы тора.

Өфөнән 130-сы гуманитар ылау юлға сыҡты

130-сы гуманитар ылау юлға сыҡты. Конвойҙың бер өлөшө Курск өлкәһендә зыян күреүселәргә, икенсеһе - махсус хәрби операцияла ҡатнашыусы Башҡортостан яугирҙарына тәғәйенләнгән. Уны оҙатыу сараһында «Берҙәм Рәсәй» партияһының Генераль советы секретары вазифаһын ваҡытлыса башҡарыусы, Рәсәй президентының Урал федераль округындағы тулы хоҡуҡлы вәкиле Владимир Якушев менән Радий Хәбиров ҡатнашты.

Башҡортостанда МХО-ла ҡатнашыусылар һәм уларҙың ғаилә ағзалары бушлай ҡайтанан уҡый ала

Башҡортостанда махсус хәрби операцияла ҡатнашыусылар һәм уларҙың ғаилә ағзалары мәшғүллек үҙәге аша бушлай ҡайтанан уҡый йәки квалификацияһын күтәрә ала. Бының өсөн уларға 50 мең һумға тиклем номиналдағы сертификаттар бирелә. Махсус операцияның элекке ҡатнашыусыһы Андрей Татаринов мөмкинлек менән бер нисә тапҡыр файҙаланған. Ул өҫтәмә һөнәри белем алыуҙы тамамлау тураһында ике сертификатҡа эйә булып эшкә урынлашҡан. Был хаҡта тулыраҡ киләһе яҙмала.

Махсус хәрби операция яугирҙары тураһында музыкаль клип төшөргөн яҡташыбыҙ көрәшеүселәр сафына баҫҡан

Йыр йәшәргә һәм еңергә ярҙам итә. Махсус хәрби операция яугирҙары тураһында музыкаль клип төшөргөн яҡташыбыҙ үҙе лә ҡулына ҡорал алып, ил азатлығы өсөн көрәшеүселәр сафына баҫҡан. Ҡыйыу аҙымын «Певец» ҡушаматлы яугир берҙән-бер дөрөҫ ҡарар тип иҫәпләй. Ул әйтеүенсә, яуҙа Башҡортостан егеттәре берҙәмлеге менән айырылып тора. Улар тыуған ерҙән алыҫта ла республика ярҙамын тойоп хеҙмәт итә.

БСТ каналында «Ватанды һаҡлаусылар» тапшырыуы эфирға сыға башланы

Бөгөн республиканың төп телеканалында өр-яңы проект эфирға сыға башланы. Һәр шаршамбы «Ватанды һаҡлаусылар» тип исемләнгән тапшырыу яугирҙарҙың ғаиләләре тураһында бәйән итә. Махсус хәрби операцияла ҡатнашыусыларға һәм уларҙың яҡындарына мәғлүмәт ярҙам күрһәтеү маҡсатында тормошҡа ашырылған проект хаҡында киләһе сюжетта.

Күмертауҙа Ҡала көнө үткәрелмәй

Был турала ҡала хакимиәте башлығы Олег Астахов хәбәр итте. Тантана ошо шәмбе уҙғарылырға тейеш ине. “Курск өлкәһендәге ваҡиғаларға бәйле байрам ойошторуҙан баш тарттыҡ. Ундағы халыҡҡа һәм махсус хәрби операция яугирҙәренә ярҙам итергә ниәтләйбеҙ”, - тигән Олег Астахов.

Нефтекаманан ир телефон номерын алмаштырып миллион ярым һум аҡсаһын юғалтҡан

Ул мутлашыусы тоҙағына эләккән. Пенсионер банк ҡушымтаһына беркетелгән иҫке номерҙы ғәмәлдән сығарыу тураһында белмәгән. Тиҙҙән, банктан кредит өсөн аҡса талабы алынған. Ир кеше финанс учреждениеға барғас, уның банк ҡушымтаһына беркетелгән иҫке номеры ярҙамында 800 мең һум кредит алыуҙарын асыҡлаған. Шулай уҡ картаһында булған 640 мең һум юҡҡа сыҡҡан. Әле был хәлде полиция тикшерә.

Беҙ – башҡорттар, беҙ – рустар, беҙ – татарҙар... Беҙ – башҡортостанлылар. Беҙҙең менән Аллаһ!

Доға – ул ябай ғына һүҙ түгел, ә ҡеүәтле көс. Көслө бул, беҙҙең менән бул, үҙебеҙҙекеләргә ҡушыл!

Тулыраҡ мәғлүмәт 122 һәм +7(347) 248-29-31 телефон һандары буйынса һәм башбат.рф сайтында.

🔹 Рәсәй Оборона министрлығы.

Баймаҡ районында «Башҡорт аты» фестивале старт алды

Баймаҡ районының Граф күле буйында «Башҡорт аты» Халыҡ-ара башҡорт тоҡомло аттар фестивале старт алды. Өсөнсөгә уҙғарылған сара йәнә ат спортын һөйөүселәрҙе, йылҡысылыҡ менән шөғөлләнеүселәрҙе, ғалимдарҙы берләштерҙе. Фестивалдең эшлекле программаһына ярашлы, бөгөн «Евразия аттарының абориген тоҡомдарын һаҡлау һәм үҫтереү» темаһына ғилми-ғәмәли конференция, «Ат спортында башҡорт аттарын ҡулланыуҙа яңы үҫеш этабы»на арналған семинар үтә.

Башҡортостанға Санкт-Петербург ҡалаһынан махсус экспедиция килде

Башҡорт һәм мари халыҡтарының күңел торошон тикшереү маҡсатында Башҡортостанға Санкт-Петербург ҡалаһынан махсус экспедиция килде. Борис Карвасарский исемендәге психотерапия һәм медицина психологияһы институты белгестәре ике халыҡтың фольклоры, аш-һыуҙары менән яҡындан танышты. Ғафури районында үткән сара хаҡында киләһе яҙмала.

Өфөлә Миңлеғәле Шайморатовтың тыуыуына 125 йыл тулыуға арналған күсмә күргәҙмә асылды

Өфөлә Рәсәй Геройы Миңлеғәле Шайморатовтың тыуыуына 125 йыл тулыуға арналған күсмә күргәҙмә асылды. Күргәҙмәлә башҡорт һыбайлыларының хәрби ҡаҙаныштары, генералдың ҡаһарманлығы хаҡында бәйән ителә.

Шишмә районында мең ырыуы вәкилдәре йыйыны уҙҙы

«Мең ырыуы Турахан ерлегендә». Шишмә районында күсмә цивилизациялар музейы «Турахан» визит үҙәгендә мең ырыуы вәкилдәре йыйыны уҙҙы. Мең ырыуы кәңәшселәр ҡоро ағзалары, Әлшәй, Дәүләкән, Шишмә, Өфө райондары делегациялары ҡатнашлығындағы сара хаҡында тулыраҡ киләһе яҙмала.

Өфөлә Динә Гаврилова «Пуся Югорская һәм уның дуҫтары» әҫәрен тәҡдим итте

Август айын дуҫтар менән. Әҙәби кисә Әхмәтзәки Вәлиди исемендәге Милли китапханала үтте. Өфөлә билдәле яҙыусы Динә Гаврилова - Надежда Григоренко уҡыусылары менән осрашты. Был юлы Динә Гаврилова китап уҡыусылар иғтибарына «Пуся Югорская һәм уның дуҫтары» тигән яңы әҫәрен тәҡдим итте.

Башҡортостанда ҡышҡылыҡҡа мал аҙығының яртыһы әҙерләнгән

Ауыл хужалығы министрлығынан хәбәр итеүҙәренсә, бөгөнгә һәр малға 13 центнер запас бар. Был - пландың 52 проценты. 382 мең тонна бесән әҙерләнгән, миллион тонна сенаж һалынған. Саҡмағош, Илеш һәм Ауырғазы хужалыҡтары яҡшы аҙыҡ запасы туплаған.

Р-240 автомобиль юлында капиталь ремонтҡа әҙерлек башлана

Бөгөн Стәрлетамаҡта «Росавтодор» федераль юл агентлығы етәксеһе Роман Новиков менән Радий Хәбиров Башҡортостанда федераль автомобиль юлдарын үҫтереү буйынса килешеүгә ҡул ҡуйҙы. Документ Стәрлетамаҡ эргәһендә Өфө-Ырымбур автомобиль юлын капиталь төҙөкләндереүҙе лә күҙ уңында тота. Ҡаланы урап үткән 24 саҡрым юлды дүрт һыҙатҡа тиклем киңәйтәләр.

Радий Хәбиров Красноусол шифаханаһының юбилей тантанаһында ҡатнашты

Красноусол шифаханаһы асылыуға бер быуат! 1924 йылда БАССР-ҙың һаулыҡ һаҡлау Халыҡ Комиссариаты Красноусолдың минераль сығанаҡтары янында бер-нисә ағас йорт төҙөтә. Тәбиғәт шифаһынан дауа алырға килеүселәрҙе бер табип ҡабул итә башлай. 1944 йылда тәжрибә бальнеология станцияһы шифаханаға әйләндерелә. Ул ваҡытта йөҙ койка менән асылған дауалау учреждениеһы 100 йыллығын билдәләй.
Радий Хәбиров бөгөн Ғафури районында Красноусол шифаханаһының юбилей тантанаһында ҡатнашты. Һуңғы ике йылда дауалау учреждениеһы модернизация осорон кисерә. Корпустар йылы коридорҙар менән тоташтырасаҡ. Койкалар урыны күбәйтелә, ял итеүселәрҙең ваҡытын файҙалы үткәреү өсөн шарттар булдырыла.