Башҡортостанда юл-транспорт ваҡиғаларында ете бала ғүмере өҙөлгән. Республика буйынса дәүләт автоинспекцияһынан белдереүҙәренсә, быйыл 6 айҙа бәлиғ булмағандар ҡатнашлығында 135 автомобиль аварияһы теркәлгән. Унда 143 бала йәрәхәтләнгән. Үҫмерҙәр үҙҙәре лә юл-транспорт ваҡиғаһы сәбәпсеһе була. Бөгөнгә 16 йәшкәсә 800-гә яҡын водитель тотолған. Рулгә рөхсәтһеҙ ултырған балалар арҡаһында өс юл-транспорт ваҡиғаһы теркәлгән. Бындай аварияларҙа өс үҫмер йәрәхәтләнгән. Әле республикала “Хәүефһеҙ йәй” тигән социаль кампания бара. Ул балалар араһында юл-транспорт ваҡиғаларын иҫкәртеү маҡсатынан үткәрелә.

Әбйәлил районына дауыл эҙемтәләрен бөтөрөүҙә ярҙам күрһәтелә

Радий Хәбиров хөкүмәттә үткән оператив кәңәшмәлә шул турала белдерҙе. Уҙған шәмбе көслө ел Йәнгел ауылы мәктәбе бинаһының ҡыйығын алып ташланы, шулай уҡ йорттар зыян күрҙе. Северный ауылында ете йорт өлөшләтә ҡыйыҡһыҙ ҡалды. Озерный ауылында ҡойма ямғыр сәбәпле ике шәхси йортто һәм 76 ихатаны һыу баҫты. Район хакимиәте башлығы Илдар Нафиҡов дауыл эҙемтәләрен бөтөрөүгә ярҙам һорап мөрәжәғәт итте.
Радий Хәбиров вице-премьер Алан Марзаевҡа мәсьәләне шәхси контролгә алырға һәм хәл итергә ҡушты.
Синоптиктар хәбәр итеүенсә, бөгөн дә республикала урыны менән көслө ел сығыуы, ямғыр яуыуы көтөлә. Халыҡҡа уяу булырға кәңәш ителә.

Башҡортостан вәкилдәре БРИКС илдәре Спорт уйындарында 20 миҙал яуланы

Радий Хәбиров бөгөн хөкүмәттә үткән оператив кәңәшмәлә Спорт министры Руслан Хәбибовҡа мөрәжәғәт итте. Республика Башлығы турнир еңеүселәре һәм призерҙары менән осрашыу ойошторорға ҡушты.
БРИКС илдәре Спорт уйындары Ҡазан ҡалаһында үтте. Унда Башҡортостан спортсылары 12 алтын, 7 көмөш һәм 1 бронза миҙал яуланы.

Радий Хәбиров аҙналыҡ оператив кәңәшмәлә дауыл эҙемтәләрен тиҙ арала бөтөрөргә ҡушты

Ямғыр һәм дауыл эҙемтәләрен тиҙ арала бөтөрөргә, юлдарҙа авариялар һанын кәметергә. Башҡортостан башлығы Радий Хәбиров яуаплы ведомстволарға дауылдан килгән зыянды бөтөрөү маҡсатын ҡуйҙы. Бынан тыш, төбәк юлдарында үлемесле авариялар мәсьәләһе иғтибарға алынды. Быйыл уҙған йыл менән сағыштырғанда, 42 кешегә күберәк үлем осрағы теркәлгән. Төбәк башлығы муниципалитет етәкселәренә махсус хәрби операцияла ҡатнашып ҡайтҡан яугирҙарҙы йәмәғәт тормошона әүҙемерәк йәлеп итергә ҡушты.

«Сибай - Аҡъяр» трассаһы тәртипкә килтерелә башланды

«Сибай - Аҡъяр» трассаһын төҙөкләндереүҙә тотҡарланған ваҡытты ҡыуып етеү өсөн юлсыларға ике йыл эшләргә тура киләсәк. Эш дөрөҫ ойошторолмаған һәм быны танырға кәрәк, тине Радий Хәбиров. Республика башлығы ремонт тамамланыу ваҡытын урындағы халыҡҡа хәбәр итергә ҡушты. Һәм эш барышына бәйле контролде көсәйтеүҙе талап итте. Төбәк етәксеһе әйтеүенсә, юл оҙон һәм ныҡ емерелгән, шуға ла уны этапҡа бүлеп тәртипкә килтереү күҙаллана. Беҙҙең ижади төркөм мәсьәләне асыҡлау өсөн Көньяҡ Урал райондарға юлланды.

Башҡортостан йәмәғәтселеге Башҡортостандың халыҡ шағиры Рәшит Шәкүрҙе һуңғы юлға оҙатты

Башҡортостан йәмәғәтселеге Башҡортостандың халыҡ шағиры, күренекле ғалим, Рәсәйҙең һәм Башҡортостандың журналистар һәм яҙыусылар союзы ағзаһы, филология фәндәре докторы, профессор Рәшит Закир улы Шәкүрҙе һуңғы юлға оҙатты. Ил ағаһына 87 йәш ине. Мәтам сараһы Хөсәйен Әхмәтов исемендәге Башҡорт дәүләт филармонияһында уҙҙы. Шәхес менән хушлашырға туғандары, яҡындары, ҡәләмдәштәре, Башҡортостан башлығы һәм башҡа дәүләт эшмәкәрҙәре килде. Сарала ил ағаһының исеме мәңгеләштерелеү, баҫылмаған әҫәрҙәрен нәшер итеү тураһында белдерелде.

Ғафури районында «Ер ҡото» фестивале үтте

«Ер ҡото» фестивале Ғафури районында. Өсөнсө тапҡыр ойошторолған этномәҙәни, патриотик сара был юлы йәмле Еҙем буйында, данлыҡлы Уҡлыҡая янында урынлашҡан «Башҡортостан йөрәге» этнокомплексында үтте. Фестиваль эшлекле һөйләшеүҙәргә лә, милли-мәҙәни хазиналарыбыҙҙы, фольклорҙы һаҡлауға йүнәлтелгән сараларға ла бай булды.

Ейәнсура районында «Үҫәргән тәүарихы» байрамы үтте

Ейәнсура районы Байыш ауылында - «Үҫәргән тәүарихы». Байыш ауылында районда уҙғарылған бренд саралары конкурсы сиктәрендә, «Үҫәргән тәүарихы» байрамы үтте.

Башҡортостанда халыҡтан миллиард һумдан ашыу аҡса урлаған ике кешегә хөкөм ҡарары сығарылды

Өфө ҡалаһының Орджоникидзе районы судында ултырыш үтте. Унда мутлашыу статьяһы буйынса енәйәт эше ҡаралды. 2015 йылда ике кеше “Инвестсоцвклад” тигән ҡулланыусылар кооперативы булдыра һәм халыҡтан аҡса йыя. Финанс пирамида булдырған мутлашыусылар 4 йыл дауамында 4 мең 300-ҙән ашыу кешенән алдаҡ юл менән 1,7 миллиард һум алған. Суд ҡарары буйынса енәйәтселәрҙең береһе 9 йыл да 10 ай, икенсеһе 4 йылға иркенән мәхрүм ителде.

Башҡортостанда махсус хәрби операция тураһында фильм төшөрөлә

Әмир Абдразаҡов исемендәге «Башҡортостан» киностудияһында махсус хәрби операция темаһына ҡыҫҡа метражлы уйын фильмы өҫтөндә эш башланды. Әлегә фильмдың исеме — «Бетеү».

Режиссеры һәм идея авторы иһә тамашасыларға «Өс хат», «Кластан тыш дәрес» фильмдары, «Күршеләр» сериалы менән билдәле булған Руслан Юлтаев.

Киностудияның матбуғат хеҙмәтендә белдереүҙәренсә, сюжет буйынса героиня берҙән-бер ейәнен махсус хәрби операцияға хеҙмәт итергә ебәрергә теләмәй. Уны туҡтатыу өсөн ул бетеүҙе алып ҡала. Үҙенең хатаһын аңлағас, бетеүҙе гуманитар ылау менән тапшырырға тырыша, әммә был еңелдән булмай.

Ижади команданың бер өлөшө локациялар эҙләргә юлланған. Фильм күркәм тәбиғәт ҡосағында урынлашҡан Ишембай районында һәм унда йәшәгән халыҡтың өйҙәрендә төшөрөлә.

Эстонияла милли батырыбыҙ Салауат Юлаевтың хәтерен хөрмәтләп һаҡлайҙар

7 - 9 июндә Эстонияла Иҫке Таллин ҡалаһы көндәре үткән. Ошонда тыуып үҫкән башҡорт егете, табип Илнур Хәйруллин эстон телендә сара ҡунаҡтарына Салауат Юлаев хаҡында һөйләгән.

Фотоһүрәттә - Илнур Длинный Герман башняһы янында, Салауат Юлаев Рогервикҡа зинданға ябылыр алдынан тап ошонда 30 метр тәрәнлектә тотҡонлоҡта була. Был хаҡта мәғлүмәттәр Виктор Сидоровтың китаптарында бар.
Илнур Хәйруллиндың сығышы киләһе видеояҙмала: https://vk.com/video-19539250_456239993

Радий Хәбиров Ҡазанда үткән БРИКС уйындарында еңеү яулаған Башҡортостан вәкилдәре ҡотланы

Спортсыларыбыҙ 12 алтын, 7 көмөш һәм 1 бронза миҙал яуланы. Төбәк башлығы социаль селтәрҙә яҡташтарыбыҙҙың Рәсәй йыйылмаһының наградалар тупланмаһына ҙур өлөш индереүен билдәләне. Республика илдең иң ҙур спорт үҙәге булыуын тағы бер тапҡыр раҫланы. БРИКС илдәре уйындарында 90 илдән 4 меңдән ашыу кеше ҡатнаша. Рәсәй йыйылма командаһы составына 18 Башҡортостан спортсыһы инде. Улар бокс, бадминтон, көрәш, спорт көрәше, билбау көрәше, фехтование, каратэ, байдарка һәм каноэла ишеү кеүек спорт төрҙәрендә сығыш яһай.

Башҡортостан Парламенты яҙғы сессияны йомғаҡланы

Бөгөн Дәүләт Йыйылышы-Ҡоролтайҙың каникул алдынан һуңғы 12-се ултырышы үтте. Депутаттар бөтәһе 5 тиҫтәнән ашыу закон проектын ҡараны, Республикала ауыл хужалығын үҫтереү буйынса дәүләт программаһының үтәлеше тикшерелде. Пленар ултырышта Башҡортостан башлығы Радий Хәбиров ҡатнашты.

Стәрлетамаҡ халҡы махсус хәрби операция башланғандан алып 360 тонна самаһы гуманитар ярҙам йыған

Ошо көндәрҙә муниципалитет етәкселеге яҡташ яугирҙар хеҙмәт иткән илдең яңы төбәктәренә тағы ла бер конвой алып барҙы.
Йөк составында юғары үтеүсәнлектәге автомобилдәр, мотоциклдар, техника, радиоэлектрон көрәш саралары һәм коптерҙар, маскировка селтәрҙәре, интрументтар, запас частар һәм башҡа кәрәкле әйберҙәр. Барыһы ла яугирҙарҙың үҙ заказы буйынса.

БСТ телеканалы «Юлдаш» радиоһы менән берлектә МХО-ла ҡатнашыусы яугирҙарға ярҙам итеү өсөн аҡса йыя

Башҡортостан юлдаш телеканалы «Юлдаш» радиоһы менән берлектә махсус хәрби операция биләмәһендәге яугирҙарға ярҙам итеү өсөн аҡса йыйыу тураһында иғлан итә. Маҡсат - автомобиль өсөн дрондар баҫтырыу системаһын һатып алыу. Уны «Башҡортостан» полкы хәрбиҙәренә тапшырырға ниәтләйҙәр. Алығы һыҙыҡта репортаждар төшөргән ваҡытта журналист Гүзәл Хәмитова радиоэлектрон көрәш системаһының әһәмиәтен яҡшы аңлай. Бындай РЭБ һалдаттар ғүмерен ҡотҡара һәм дошман дрондарына ҡаршы тора. Шуға ла ярҙам итеү идеяһы барлыҡҡа килә. Аҡсаны: (5469 0600 2035 7783 ГҮЗӘЛ СУЛПАН ҠЫҘЫ Х.) карта номеры буйынса күсерергә мөмкин. Киләһе сәфәрендә журналист аппаратураны яугирҙарға тапшырырға ниәтләй.

Өфөлә «Урал батыр» эпосын башҡарыусы йәш сәсәндәрҙең XXVI Төбәк-ара конкурсы башланды

Баш ҡаланың 450 йыллығына арнап ойошторолған сараны тәүге тапҡыр Ғәзиз Әлмөхәмәтов исемендәге Республика гимназия-интернаты ҡабул итте. Фән докторҙары, педагог, фольклорсыларҙан торған жюри ағзалары эпосты яңғыҙ башҡарыусылар һәм коллектив сығыштарҙы айырым баһалаясаҡ.

Радий Хәбиров Өфөлә Көрәш һарайы төҙөлөшө менән танышты. Спорт объекты баш ҡаланың Октябрь районында урынлашҡан. Ул Өфөнөң 450 йыллығы уңайынан төҙөлә. Бина бейек мәрмәр колонналары менән уратып алынған. Башҡортостан Башлығы буласаҡ тамаша залын ҡараны. Ул 3,4 мең урынға иҫәпләнгән. Көрәш һарайы быйыл көҙ Өфөлә үтәсәк “Рәсәй – спорт державаһы” халыҡ-ара форумының төп майҙансығы була. “Спорт объекты баш ҡаланың юбилейын билдәләгән көндә – 31 августа тантаналы асылырға тейеш”, - тине Радий Хәбиров.

Башҡортостанда сығарылыш кисәләре көнө иғлан ителде

Мәғариф һәм фән министры Илдар Мәүлитбирҙин әйтеүенсә, 9-сы кластар өсөн өлгөргәнлек аттестаттары – 28 июндә, 11-се кластарға – 29 июндә тапшырыла. Мәктәптәргә тантаналы сараларҙа бөтә именлек талаптарын теүәл үтәү бурысы ҡуйыла. Быйыл уҡыуҙа юғары күрһәткестәргә өлгәшкән егеттәр һәм ҡыҙҙарға алтын һәм көмөш миҙалдар ҙа тапшырыла. Республикала 9-сы класты – 50 мең, 11-класты – 15 мең ярым уҡыусы тамамлай.

Һөнәргә тоғролоҡ йәки «Яңылыҡтар» хеҙмәтендә үткән 30 йыл

«Башҡортостан» телерадиокомпанияһының монтаж режиссеры Гөлшат Вәлиеваның бар хеҙмәт юлы яңылыҡтар менән бәйле.
Гөлшат Нәғим ҡыҙы республиканың төп телеканалына 1994 йылдың 1 апрелендә осраҡлы рәүештә, үҙен һынап ҡарау өсөн килә. Әммә телевидение уның яҙмышына әйләнә. Гөлшат Вәлиева ошо йылдар эсендә үҙен яуаплы хеҙмәткәр, ышаныслы коллега итеп таныта, тырышлығы менән редакцияла абруй, хөрмәт ҡаҙана. Шуға ҡарамаҫтан, ҙуртәжрибә туплаған хеҙмәттәшебеҙ яҡын киләсәктә үҙен икенсе өлкәлә һынап ҡарарға уйлай.

Башҡортостан депутаттары төндә бәләкәй кибеттәрҙә алкоголь һатыуҙы тыйырға ниәтләй. Бөгөн Дәүләт Йыйылышы – Ҡоролтайҙың яҙғы сессиялағы аҙаҡҡы ултырышы үтте. Унда спиртлы эсемлектәр әйләнешенә бәйле законға үҙгәреш ҡаралды. Ҡанун проектына ярашлы торлаҡ йорттарҙың беренсе ҡатында асылған аҙыҡ-түлек магазиндарында төнгө ваҡытта алкоголь һатыу сикләнә. Профилле комитет рәйесе Рөстәм Ишмөхәмәтов аңлатма бирә.

“Был закон проекты спиртлы эсемлек ҡойоп һатҡан магазиндар проблемаһын хәл итергә мөмкинлек бирәсәк. Бындай урындар, ғәҙәттә, торлаҡ йорттарҙа урынлашҡан була Улар үҙҙәрен дөйөм туҡланыу урыны булараҡ күрһәтеп, алкоголь менән теләһә ҡайһы ваҡытта сауҙа итә. Унда эсергә яратыусылар килеп тула. Иҫерек кешеләр торлаҡ йорттарҙа йәшәүселәргә ныҡ ҡамасаулай. Федераль законға үҙгәрештәр был мәсьәләне хәл итеү хоҡуғын төбәктәргә бирҙе. Араҡы ҡойоп һата торған урындарға зарланыусылар күп, ялыуҙар даими килә. Уларҙы иҫәпкә алып, торлаҡ йорттар биләмәһендә төнгө ваҡытта хәмер һатыуҙы тыйырға тәҡдим итәбеҙ”.

Торлаҡ йорттарҙағы бәләкәй кибеттәрҙә төндә алкоголь һатыуҙы тыйған закон проекты быйыл көҙ икенсе һәм өсөнсө уҡыуҙа ҡарала.