Туймазы районы ирекмәндәре махсус хәрби операция биләмәһенә ярҙам туплауҙа әүҙем ҡатнаша

Бөтәһе лә еңеү өсөн! Туймазы районы «Еңеү ептәрен үрәбеҙ» ирекмәндәр клубы махсус хәрби операция биләмәһенә ярҙам туплауҙа әүҙем ҡатнаша. Былтыр эшләй башлаған ойошма алғы һыҙыҡҡа 1500-ҙән ашыу окоп шәме, 120 нашлемник, 85 маскировка селтәре һәм 25 костюм оҙатҡан. Ирекмәндәр әйтеүенсә, ҡыҫҡа ваҡытлы ялға ҡайтҡан хәрбиҙәр рәхмәт һүҙҙәре әйтеп, кәрәк әйберҙәрҙе үҙҙәре менән алып китә.

Белорет районындағы предприятие Рәсәйҙә тәүгеләрҙән булып йүгереү тренажерын етештереүгә тотондо

Спорт инвентары уңышлы һынау үткән. Шунлыҡтан Ватан ҡорамалына заказдар ҙа бер-нисә йыл алдан ҡабул ителә башлаған. Фитнес-клубтарҙы төрлө ҡорамалдар менән йыһазландыра алған Сермән ауылындағы завод тураһында тулыраҡ киләһе яҙмала.

Өфөнөң почетлы гражданы Рәшит Баҙыҡов 92 йәшендә лә ул егеттәрсә йүгереп йөрөй

Яңылыҡтарҙы Өфө ҡалаһының 450 йыллығына баш ҡаланың почетлы граждандары тураһында видеояҙмалар циклы дауам итә.
Ҡатмарлы, яман сирҙән меңәрләгән ҡотҡарылған ғүмерҙәр өсөн, гүйә уның үҙенең ғүмере лә оҙоная ғына. 92 йәшендә лә ул егеттәрсә ныҡ баҫып, йүгереп йөрөй. Совет һәм Рәсәй табип-хирург-онкологы, медицина фәндәре докторы, Башҡорт АССР-ның атҡаҙанған табибы, Салауат Юлаев ордены кавалеры, Өфөнөң почетлы гражданы Рәшит Баҙыҡов тураһында сюжет.

Мәскәүҙә Өфөләге 1991 йылда техноген фажиғәгә юл ҡуймаусы геройҙарға дәүләт наградалары тапшырылды

Мәскәүҙә 32 йыл элек Өфө нефть эшкәртеү заводында ғәҙәттән тыш хәлде иҫкәртеүселәргә республиканың юғары наградалары тапшырылды. Улар 1991 йылда Өфө нефть эшкәртеү заводында ҡыйшая башлаған 150 метр бейеклектәге сәнәғәт торбаһын шартлатып дөрөҫ йүнәлештә ауҙара. Шул рәүешле улар техноген фажиғәгә һәм сәнәғәт предприятиеһы юҡҡа сығыуына юл ҡуймай. Был ваҡиға хатта Гиннес рекордтар китабына индерелә. Бөгөн ҡотҡарыусылар эше уҡытыу методикаһында ла ҡулланыла.

Ғафури районы Красноусол ауылында уҡытыусыға һәйкәл асылды

Педагогтарҙың фиҙаҡәр хеҙмәтен данлаған баҡыр һәйкәлде асыу тантанаһына урындағы халыҡ, уҡытыусылар, депутаттар , йәмәғәт эшмәкәрҙәре йыйылды. Сарала тиҫтә йылдар мәктәптәрҙә эшләгән, мәғариф системаһында яҡшы һөҙөмтәләргә ирешкән тәжрибәле белгестәр тәбрикләнде.

Балалар һәм инвалидтарҙы йәмәғәт транспортынан төшөрөп ҡалдырған өсөн штраф була

Дәүләт Думаһы Административ хоҡуҡ боҙоуҙар кодексына үҙгәреш индерҙе. Бәлиғ булмағандар һәм мөмкинлектәре сикләнгәндәр юл хаҡын түләй алмаған осраҡта, автобустан төшөргән өсөн водителгә – 5 мең, транспорт компанияһы хужаһына 30 мең һумғаса штраф һалына. Закон 1 сентябрҙән көсөнә инә.

Өфөлә велосипедсылар байрамында урамдар ябыла

"1 000 велосипедсы көнө" 2 июндә була. Ошоға бәйле Зәки Вәлиди, СССРҙың 50 йыллығы, Цюрупа урамдарының, Октябрь проспектының бер өлөшөндә машина йөрөшө туҡтатыла. Халыҡҡа иғтибарлы булырға кәңәш ителә.

Радий Хәбиров Стратегик үҫеш һәм милли проекттар буйынса федераль совет ултырышында ҡатнашты

Радий Хәбиров Рәсәй Президенты ҡарамағындағы Стратегик үҫеш һәм милли проекттар буйынса федераль совет ултырышында ҡатнашты. Кәңәшмәне Владимир Путин үткәрҙе. Төп тема - 2030 йылға һәм 2036 йылға тиклем илде үҫтереүҙең милли маҡсаттары тураһындағы указ положениеларын тормошҡа ашырыу. Был эштә төбәк һәм муниципаль командаларҙың тырышлығы ҙур роль уйнай, тип билдәләне дәүләт башлығы.

Башҡортостан башлығын һайлау 8 сентябрҙә үтә

Башҡортостан башлығын һайлау быйыл көҙ, 8 сентябрҙә үтә. Бөгөн Дәүләт Йыйылышы - Ҡоролтай депутаттары ошо туралағы закон проектын ҡабул итте. Ҡануни документ матбуғат баҫмаларында донъя күреү менән Республика башлығын һайлау буйынса кампания рәсми рәүештә башлана. Парламент ултырышында шулай уҡ ер мөнәсәбәттәрен көйләү, дәүләт наградалары һәм почетлы исемдәр, административ хоҡуҡ боҙоуҙар буйынса закон проекттары ҡаралды. Дәүләт Думаһына ҡануни башланғыстар ҡабул ителде.

Төклө аяғың менән, бәпес!

Хеҙмәттәшебеҙ, алып барыусы Шәүрә Абдуллина икенсегә әсәй булды.

Ихлас күңелдән ҡотлайбыҙ!
Бәпескә һәм уның яҡындарына сәләмәтлек, бәхетле, оҙон ғүмер теләйбеҙ!

Ауырғазы районында 20 ауылды хеҙмәтләндерәсәк яңы һыуүткәргес төҙөлә

20 ауылды хеҙмәтләндерәсәк яңы һыуүткәргес. Ауырғазы районында бер айҙан файҙаланыуға тапшырыласаҡ объект Ғафури районы ауылдарын да һыу менән тәьмин итәсәк. Шулай уҡ көнбайыш урау юлы ауыр тоннажлы автомобилдәр трафигын көйләп, Дәүләкәнгә тиҙерәк барыу етеү мөмкинлеген бирәсәк. Ғәмәлгә ашырылған мөһим проекттар хаҡында киләһе яҙмала.

Өфөлә «Был беҙҙең ғаиләләгесә» Бөтә Рәсәй конкурсы ярымфиналын асыу тантанаһы үтте

Бәйгелә Волга буйы федераль округының ғаилә командалары сығыш яһай. Улар киләһе ике көндә Мәскәүҙә уҙасаҡ финалға путевка өсөн ярыша.

Өфөлә һаулыҡ мөмкинлектәре сикләнгән балалар теплоходта сәйәхәт итте

Йолаға әйләнгән сара етеп килгән Халыҡ-ара балаларҙы яҡлау көнө һәм республикала иғлан ителгән Һаулыҡ мөмкинлектәре сикләнгән кешеләр тураһында хәстәрлек йылы сиктәрендә үтте. Малай-ҡыҙҙар өсөн ойошторолған сәфәрҙе БЮТ ижади төркөмө лә оҙатып барҙы.

Ҡазан предприятиеларында эвакуация иғлан ителгән

Бөгөн иртән Татарстан ҡалаларына йәнә пилотһыҙ осҡос һөжүм иткән. Ҡазан һәм Түбәнге Кама аэропорттары ябылған.

Ҡазандың ҡайһы бер предприятиеларында эвакуация башланған, тип хәбәр итә «РИА-Яңылыҡтар».

Еңеү тылда сүкелә

Бөгөн "Башҡортостан" мотоуҡсылар полкы яугире Рафиҡ Әхмәтшин өсөн алынған дронды оҙаттыҡ. Квадрокоптер Башҡортостан Башлығының республика хәрбиҙәре менән бәйләнеш булдырыу буйынса кәңәшсеһе Алик Камалетдиновҡа тапшырылды. “Ҡошсоҡ” алыу өсөн аҡса йыйыуҙа ҡатнашыусыларҙың барыһына ла оло рәхмәтемде белдерәм. “Юлдаш” радиоһы коллективына, етәкселәрем, һөнәрҙәштәрем, ауылдаштарым, яҡташтарым, класташтарым, курсташтарым, депутаттар, туғандарым һәм тыңлаусыларыбыҙға ихлас рәхмәт һүҙҙәрен еткерәм. Бер айҙан әҙерәк ваҡыт эсендә 250 мең һум аҡса йыйылды. Ҙур сумма күсергән Прокуратура ветерандары һәм пенсионерҙары йәмәғәт ойошмаһының Башҡортостан бүлексәһенә, уның Советы рәйесе Наилә Хөрмәт ҡыҙы Абдрахмановаға, хеҙмәт ветераны Рафиҡ Ғилмулла улы Саҙрыевҡа, отставкалағы подполковник, яҙыусы Мәхмүт Сәлимовҡа, танылған блогер Эльвина Сибәғәтова һәм уның ғаиләһенә, Рәшит Хөснулла улы Хәйруллинға, ауылдашым Рәзит Хәйрислам улы Шәйхиевҡа, Белорет районы Тирлән урмансылығы хеҙмәткәрҙәренә, Белореттан Резедә Сайдарова һәм Эльза Мөхәмәҙиеваға, Мәскәүҙән Гөлсинә Батыршинаға һәм унда йәшәгән милләттәштәребеҙгә ысын йөрәктән сыҡҡан рәхмәттәрем барып етһен.

”Ҡошсоҡтоң” яугирҙәребеҙгә файҙаһы тейһен, оҙаҡ осһон. Бөгөнгө осрашыуҙа Алик Финзир улы Камалетдинов: “Еңеү тылда сүкелә”, - тине. Беҙгә ышана алаһығыҙ, тылығыҙ ныҡ, яугирҙәр! Һеҙҙе Еңеү менән көтәбеҙ!

Хеҙмәттәшебеҙ Рафиҡ Әхмәтшиндан рәхмәт һүҙҙәре

Ул «Башҡортостан» полкына һатып алынған ҡиммәтле дрон өсөн рәхмәтен белдерә. Имен-һау йөрөп ҡайтырға яҙһын, Рафиҡ Үзбәк улы!

Стәрлетамаҡ районында граждандарҙы шәхси мәсьәләләр буйынса күсмә ҡабул итеү ойошторолдо

Стәрлетамаҡ районында Республика Башлығы Радий Хәбиров ҡушыуы буйынса граждандарҙы шәхси мәсьәләләр буйынса күсмә ҡабул итеү ойошторолдо.
Сара төрлө министрлыҡ-ведомство етәкселәре, вәкилдәре ҡатнашлығында уҙҙы. Халыҡты ҡабул итеү барышында 80-гә яҡын кеше пенсия тәьминәте, төрлө социаль түләүҙәр, инвалидлыҡты рәсмиләштереү, маҡсатлы программалар буйынса торлаҡ шарттарын яҡшыртыу, юл төҙөлөшө, таҙартыу ҡоролмалары, һыу тәьминәте мәсьәләләре, һаулыҡ һаҡлау, мәғариф мәсьәләләренә ҡағылған һорауҙар менән мөрәжәғәт итте.

Рәсәй Эске эштәр министры Стәрлетамаҡтан Аслан Ҡәләмовты Почет грамотаһы менән бүләкләне

Рәсәй Эске эштәр министры Владимир Колокольцев Стәрлетамаҡтан Аслан Ҡәләмовты ведомствоның Почет грамотаһы менән бүләкләне. Үҫмергә ҡиммәтле бүләк тә тапшырылды. Илдең йәш геройҙарын бүләкләү тантанаһы онлайн-режимда үткән. Рәсәй Эске эштәр министрлығы етәксеһе балаларға рәхмәт әйтеп, уларҙың күрһәткән ҡыйыулығын юғары баһаланы.

Алғы һыҙҙыҡтағыларға йәнә бер квадрокоптер

Бер ай элек «Юлдаш» радиоһының «Яңылыҡтар» бүлеге етәксеһе Зөһрә Арсаева «Журналист» ҡушаматлы яугирға дрон һатып алыу башланғысы менән сыҡҡайны. Идеяны коллектив дәррәү күтәреп ала. Радио тыңлаусылар, битараф булмаған кешеләр ярҙамында тиҙ арала тейешле сумма - 250 мең һум йыйылған.