Рингта башҡорт егетенә тиңдәр юҡ!

Башҡорт бокс мәктәбе тағы бер ҙур еңеү яуланы. Өфөнән Артур Собханҡолов IBА версияһы буйынса Европа чемпионы исеменә лайыҡ булды!🥇

Шулай уҡ Башҡортостандан Денис Ғабдрафиҡов һәм Бекхан Исраилов юғары һөҙөмтә күрһәтте.

Һөҙөмтә – өс алыштан өс еңеү! Егеттәрҙе уңышлы сығыш яһауы менән ҡотлайбыҙ!🔥

Денис Мантуров Ташкентта Башҡортостан экспозицияһы менән танышты

Рәсәй Хөкүмәте рәйесе урынбаҫары - Сәнәғәт һәм сауҙа министры Денис Мантуров Ташкентта Башҡортостан экспозицияһы менән танышты. «Иннопром. Үҙәк Азия» халыҡ-ара күргәҙмәһендә республика стенды бик күп видеоэкрандарҙан эшләнгән, уларҙың һәр береһе, айырым алғанда, Башҡортостан сәнәғәтенең мөһим этаптарын сағылдыра: нефть химияһы, машиналар эшләү, еңел һәм аграр сәнәғәт. Бөгөн 60-тан ашыу төбәк Үзбәкстан менән хеҙмәттәшлек итә һәм Башҡортостан иң әүҙемдәрҙең береһе, тип билдәләне федераль вице-премьер.

Хәрби хеҙмәткә яҙғы саҡырылыштың тәүге составы бөгөн юлға сыҡты

Әрме хеҙмәтенә егеттәрҙе Башҡортостан Хөкүмәте, Хәрби комиссариат етәкселеге, дин әһелдәре изге теләктәр менән оҙатты.
Рәсәй Ҡораллы көстәр сафына яҙғы саҡырылышта Башҡортостандан 5 меңдән ашыу ир-егет алына. Бөгөн юлға сыҡҡан тәүге эшелонда 140 яҡташыбыҙ, улар һауа-космос, милли гвардия, ҡоро ер ғәскәрҙәрендә хеҙмәт итәсәк.

Республика баҫыуҙарында сәсеү эштәре старт алды

Яуаплы миҙгел. Республика баҫыуҙарында сәсеү эштәре старт алды. 2 миллион гектарҙан ашыу майҙанда бөртөклө һәм ҡуҙаҡлылар, арпа, һоло, борсаҡ, көнбағыш, шәкәр сөгөлдөрө һәм башҡа культуралар сәсеү көтөлә. Әле баҫыуҙарҙа дым ҡаплау, тупраҡты әҙерләү эштәре бара һәм ошо көндәрҙә сәсеү кампанияһына барлыҡ хужалыҡтар ҙа дәррәү ҡушылыр тип күҙаллана. Благовещен районы ауыл хужалығы эшселәре тәүгеләрҙән булып баҫыу эштәренә төштө.

Бөрйәндә туризмды үҫтереү өҫтөнлөклө йүнәлештәрҙең береһе

Сәйәхәтселәр ағымы халыҡ кәсебе, сувенир продукцияһын һатыуға, хеҙмәттәр күрһәтеүгә киң юлдар аса. Хозур тәбиғәтле Бөрйәндә туризмды үҫтереү юлдарын хаҡында тулыраҡ киләһе яҙмала.

Башҡортостан йәнә «Китапханалар төнө» Бөтә Рәсәй акцияһына ҡушылды

Әхмәтзәки Вәлиди исемендәге Милли китапханаға килеүселәр ҡулъяҙмалар һәм һирәк осраған баҫмалар менән танышты, концерт программаһын ҡараны.
Йыл һайын китапхана хеҙмәткәрҙәре социаль-мәҙәни сараны төрлө яҡлап байытырға тырыша. Быйыл улар Ғаилә йылына арнап махсус майҙансыҡтар булдырған.

Башҡортостанға йәшенле ямғырҙар килә

Башҡортостанда аномаль эҫе көндәргә алмашҡа ямғырҙар һәм йәшен килә. Башгидрометүҙәк хәбәр итеүенсә, бөгөн, 23 апрелдә, төбәктә урыны менән ҡыҫҡа ваҡытлы ямғыр, йәшен, көндөҙ урыны менән боҙ-борсаҡ яуыуы фаразлана. Ел көньяҡ-көнсығыштан талғын, көндөҙ урыны менән көсәйеүе мөмкин. Һауа температураһы +23, +28°.

Иртәгә, 24 апрелдә, төндә урыны менән ҡыҫҡа ваҡытлы ямғыр, көндөҙ ҡыҫҡа ваҡытлы ямғыр, урыны менән йәшен, ҡойма ямғыр, боҙ-борсаҡ. Ел көньяҡ-көнсығыштан талғын, урыны менән көсәйеүсән. Һауа температураһы төндә +10, +15°,төньяҡта +5°, көндөҙ +15, +20°, төньяҡ-көнсығышта +10° тиклем.

Өфөлә тағы бер хәрби самолет урынлаштырыла

УМПО янында МиГ-29 истребителен ҡуялар. Постамент әҙер, самолетты урынлаштырыу эштәре бара. Истребитель двигателе Өфө предприятиеһында етештерелә. Быға тиклем УМПО биләмәһендә Су-25 һәм Су-27 самолеттары урынлаштырылды.

⚡Дыуан егете махсус операция биләмәһендә һөйгәнен осратҡан

⚡«Хонда» 2022 йылдың сентябрендә СВО-ға юллана. Хәрби бәрелештәр биләмәһендә ул буласаҡ кәләшен осрата. Ошо көндәрҙә йәштәр мөхәббәтен законлаштырған.

🔥Ҡыҙ Донецк ҡалаһынан, хәрби ҡушаматы - «Лена». 2014 йылда Донецк Халыҡ Республикаһы көстәре сафына баҫҡан.

Дауаханалар ял көндәрендә эшләйәсәк

Яҡынлашып килгән байрам көндәрендә медицина учреждениеларының эш тәртибе билдәле булды. Травпункттар бөтә ҡала һәм райондарҙа тәүлек әйләнәһенә эшләй. Табипты өйгә көндөҙгө сәғәт 4-кә тиклем саҡыртырға була. Поликлиникалар иртәнге 8-ҙән сәғәт 5-кә тиклем ҡабул итә. Был көндәрҙә шулай уҡ диспансеризация үтергә мөмкин. Быйыл Яҙ һәм Хеҙмәт байрамы уңайынан 28,29,30 апрель һәм 1 май ял була. Еңеү көнөндә, 9-ынан 12-еһенә тиклем ял ҡаралған.

Өфөлә 3 көн эсендә 9 фонтан урғыла башлай

25 апрелдә Профсоюздар йорто янындағы, Совет, Орджоникидзе майҙандарындағы ҡоролмалар, "Ете ҡыҙ", "Ҡурай", "Сәғәттәр" фонтандары асыла. Уларҙан һуң "Ҡашҡаҙан" һәм "Беренсе Май" парктарындағы ҡоролмаларға һыу бирелә. Өфөлә 21 фонтан бар.

👏Башҡорт егете Рәсәй эстрадаһын яулай

Яҡташыбыҙ, танылған йырсы Элвин Грей (Радик Юлъяҡшин) Рәсәйҙең халыҡ артисы Олег Газманов менән берлектә патриотик йыр яҙҙырған. Урал Рәшитов һүҙҙәре һәм көйө.

- Был - беҙҙең Ватаныбыҙға һөйөү һәм тоғролоҡ билдәһе, күңелебеҙҙәге илһөйәрлек осҡоно, - тип яҙған Элвин Грей.
Йыр һеҙгә оҡшанымы?

Дәүләт Йыйылышы-Ҡоролтайҙың пленар ултырышында 30-ҙан ашыу мәсьәлә тикшерелде

Юл фондын яңы килем сығанаҡтары менән тулыландырыу, Экология кодексына үҙгәрештәр, төнгө сәғәттәрҙә граждандарҙың тыныс шарттарға хоҡуғын тәьмин итеү. Дәүләт Йыйылышы-Ҡоролтайҙың бөгөнгө пленар ултырышында 30-ҙан ашыу мәсьәлә тикшерелде. Парламент депутаттары ҡануни документтарҙы тикшереүҙән тыш, Контроль-иҫәп палатаһының, Эшҡыуарҙар хоҡуҡтарын яҡлау буйынса вәкилдең 2023 йылдағы эшмәкәрлеге буйынса отчет докладын тыңланы.

Өфөлә йырсы-шағир Ғилман Иҙрисовтың яҡты иҫтәлегенә концерт үтте

Йырҙарым һеҙгә ҡала. Өфөлә йырсы-шағир Ғилман Иҙрисовтың яҡты иҫтәлегенә концерт үтте. «Юлдаш» радиоһы ойошторған кисә Ғилман Иҙрисовтың яҡындарын, ижадташ дуҫтарын, шулай уҡ уның йырҙарын яратып тыңлаған тамашасыларҙы бергә йыйҙы.

😱Хәйбулла районында Һаҡмар йылғаһында бер йәшлек сабый батып үлгән

Хәйбулла районының Йәнтеш ауылында аяныслы ваҡиға булған. Бөгөн кискә ҡарай Ғәҙәттән тыш хәлдәр министрлығына Йәнтеш ауылынан бер ҡатын шылтыратҡан. Ул Һаҡмар йылғаһы буйында уйнап йөрөгән бер йәшлек балаһы юғалыуы хаҡында хәбәр иткән.

Ҡотҡарыусылар сабыйҙы эҙләй башлаған. Бер аҙ ваҡыттан бала бер саҡрым алыҫлыҡта йылғала үле килеш табылған.

Оператив-тикшереү саралары башланған. Ҡот осҡос фажиғәнең сәбәптәре асыҡлана.

Башҡортостан Башлығы етәкселегендәге республика делегацияһы Дубайҙа халыҡ-ара бизнес форумда ҡатнаша

Уның барышында Радий Хәбиров Рәсәйҙең Берләшкән Ғәрәп Әмирлектәрендәге Ғәҙәттән тыш илсеһе Тимур Зәбиров менән осрашты.
Ике яҡ араһындағы осрашыуҙа республиканың ғәрәп дәүләте менән хеҙмәттәшлеге хаҡында һүҙ барҙы. Башҡортостан ғәрәп илдәре менән хеҙмәттәшлеккә әҙер. Яҡын Көнсығыш менән Африка илдәре баҙарына сығыу өсөн тауар әйләнешен үҫтерергә, берлектәге проекттарҙы тормошҡа ашырырға мөмкин.

Республикала «Сәләмәтлек поездары» йөрөй башланы

Республикала Башҡортостан Башлығы Радий Хәбиров ҡушыуы буйынса «Сәләмәтлек поездары» йөрөй башланы. Заманса күсмә мобиль комплекстар флюорограф, маммограф, диагностика үҙәктәре, стоматология кабинеттары менән йыһазландырылған. Халыҡта ҙур ихтыяж менән файҙаланған тәжрибәне Рәсәй һаулыҡ һаҡлау министрлығы башҡа төбәктәргә лә индерергә тәҡдим итә.

Башҡортостанда Белгородтан 498 бала ял итә

Был ҡарарҙы өлкә губернаторы менән һөйләшкәндән һуң төбәк башлығы Радий Хәбиров ҡабул иткәйне. Уҙған аҙнала мәктәп уҡыусылары ике төркөмгә бүленеп, Илеш һәм Әбйәлил райондарындағы һауыҡтырыу учреждениеларына урынлаштырылды. «Орленок» лагерында балалар өсөн булдырылған шарттар һәм төбәктәге мәғариф системаһы үҫеше менән Башҡортостан Хөкүмәте премьер-министрының беренсе урынбаҫары Урал Килсенбаев танышты.

Баш ҡалала Октябрь районы кадет кластары уҡыусылары ҡатнашлығында бал үтте

Өфө ҡыҫҡа ваҡытҡа Ренессанс заманына ҡайтты. Был нәфис фильм сценарийы түгел. Баш ҡалала Октябрь районы кадет кластары уҡыусылары ҡатнашлығында бал үтте. Йәш хәрбиҙәр тантанағы оҙаҡ әҙерләнгән.

Өфөлә Ғафури районының яҡташтар осрашыуы үтте

Мәжит Ғафури исемендәге Башҡорт академия драма театрында уҙған хәйриә концертында, яҡташтар ойошмаһының эшмәкәрлегенә йомғаҡ яһалды, киләсәккә маҡсаттар билдәләнде.