Мотоциклда сәйәхәт иткән Баймаҡ егете Индонезияға барып еткән

Баймаҡ районының Әбделкәрим ауылынан Ғәзим Мөхәмәтйәновтың мотоцикл менән донъя буйлап сәйәхәткә юлланыуы тураһында яҙғайныҡ. Ул Мәскәү политехник университетын тамамлаған, инженер булып эшләй.

Бынан алда Ғәзим Рәсәйҙән Һиндостанға тиклем араны мотоцикл менән үтте. Унан инде ул самолет менән Таиландҡа осҡан. Әлбиттә, транспортын осороу бер аҙ мәшәҡәттәр тыуҙырған, бының өсөн 110 мең һум сығым киткән. Бөгөн иһә ул карап менән Индонезияға барып еткән.

— Индонезия буйлап сәйәхәт дауам итә, бәлки, Австралияға етеп, кенгуруны күреп тә ҡайтырмын, — ти Ғәзим.

Хәйерле сәфәр теләйбеҙ яҡташыбыҙға!
Фотоһүрәттә Ғәзим Таиландтағы мотосәйәхәтселәр менән.

Башҡортостанға Белгород өлкәһенән 498 бала килде

Үҙебеҙҙекеләрҙе ташламайбыҙ. Башҡортостанға Белгород өлкәһенән 498 бала килде. Бындай ҡарарҙы өлкә губернаторы менән һөйләшкәндән һуң Радий Хәбиров ҡабул итте. Өлкән класс уҡыусылары уҡыу йылын республикала тамамлай. Оператив кәңәшмәлә республика башлығы балаларҙы ҡабул итеүсе район башлыҡтарына туҡланыу, мәктәпкә йөрөтөү кеүек етди һорауҙарҙы хәл итергә ҡушты. Республика менән идара итеү үҙәгендә шулай уҡ Башҡортостанда индерелгән янғынға ҡаршы махсус режим, ҡыштан һуң урамдарҙы тәртипкә килтереү, яҙғы ташҡынға бәйле хәл тураһында һүҙ барҙы. Оператив кәңәшмәнән репортаж.

Башҡортостан башлығы хөкүмәттә һәм хакимиәттә кадрҙар алмашыныуы тураһында хәбәр итте

Махсус хәрби операция биләмәһенән ҡайтҡан һәм быға тиклем Башҡортостан премьер-министрының беренсе урынбаҫары вазифаһын биләгән Азат Бадранов Башҡортостан башлығы хакимиәте етәксеһенең беренсе урынбаҫары итеп тәғәйенләнде. Урал Килсенбаев Башҡортостан премьер-министрының беренсе урынбаҫары итеп билдәләнде. Был турала Башҡортостан Башлығы Радий Хәбиров оператив кәңәшмәлә белдерҙе.

Радий Хәбиров Миәкә районына эш сәфәре менән барҙы

Беҙ бизнесҡа ярҙам итеү инфраструктураһы үҫешенең эволюция этабындабыҙ. Маҡсат- был йүнәлештәге эшмәкәрлекте тағы ла әүҙемләштереү, тине Радий Хәбиров Миәкә районына эш сәфәре барышында. Республика етәксеһе Ҡырғыҙ-Миәкәлә эшҡыуарлыҡ объектары, коммуналь хужалыҡ учреждениеларын ҡараны, урындағы халыҡ менән әңгәмәләште.

Стәрлетамаҡ районында ауыл эшсәндәре баҫыуҙарға минераль ашламаларҙы индереүгә төшкән

Стәрлетамаҡ районының иң эре хужалыҡтарының береһендә яҙғы-сәсеү кампанияһына әҙерлек 30 процентҡа теүәлләнгән. Ауыл эшсәндәре бөгөн баҫыуҙарға минераль ашламаларҙы индереүгә төшкән. Һәм эште ике өс көндә тамамларға иҫәп тота.

Өфөлә йәшәүсе Бөйөк Ватан һуғышы ветераны 105 йәшлек юбилейын билдәләне

9 май алдынан «Яңылыҡтар» хеҙмәте Бөйөк Ватан һуғышы ветерандары тураһында яҙмалар циклын башлай. Киләһе сюжет геройы - Өфөлә йәшәгән Лидия Баженова. Бөгөн ветеран 105 йәшлек юбилейын билдәләй. Ханымдың яҙмышы ябай түгел.

🤬 Нефтекамала «шумахер» юғары тиҙлектә үткәүелдән сығып барған ҡыҙҙы төкөгән

Фажиғә Ленин урамында булған. Водитель юлдағы сикләүҙәргә ҡарамаҫтан, юғары тиҙлектә үткәүел аша сығып барған ҡыҙҙы төкөгән. Әлеге ваҡытта зыян күреүсе реанимация бүлегендә.

Өфөлә башҡорт теленән халыҡ-ара диктант яҙыу майҙансыҡтары аталды

Быйыл акция өс көн бара. 27 апрелдә БСТ каналында тура эфир ойошторола. Баш ҡалала юғары һәм урта уҡыу йорттарында, Милли музей һәм китапханала, “Йәшлек House” йәштәр йортонда һәм башҡа урындарға килеп диктант яҙырға була. Бының өсөн сайтта алдан теркәлергә кәрәк. Ошонда уҡ майҙансыҡтар исемлеге менән танышырға мөмкин. Сарала 27 апрелдә ҡатнаша алмағандар, сайтҡа инеп яҙа ала. Бында 29 апрелгә тиклем тура эфир яҙмаһы һаҡлана.

Өфөлә сит ил боксерҙары ҡатнашлығында турнир ойошторола

Был аҙнала Спорт һарайында “Халыҡ-ара бокс ассоциацияһы чемпиондары төнө” тигән ярыш үтә. Унда Рәсәй, Румыния, Үзбәкстан һәм Америка Ҡушма Штаттарынан боксерҙар сығыш яһай. Башҡортостандан Артур Собханҡолов румын Джеймс Череджи менән Европа чемпионы исеме өсөн көрәшә. Тағы бер яҡташыбыҙ Данис Ғабдрафиҡов Азия чемпионы Үзбәкстандан Бобо-Усмон Батуров менән осраша. Рәсәйҙән Павел Суслов американ Питер Добсон менән рингҡа сыға.

Ейәнсура районында айыу малдарҙы баҫтырған

Һуңғы көндәрҙә Ейәнсура районында айыуҙарҙың әүҙемләшеүе күҙәтелә. Ҡарадигән, Юлдаш ауылдары янында урман хужаһы кешеләргә осраған. Әлеге видеояҙманан күренеүенсә, айыу ауыл малын баҫтыра.

Быйыл Мәрхүмдәрҙе иҫкә алыу көнө 28 апрелдә була

Ул йәкшәмбегә тура килә. Республика Башлығы ҡул ҡуйған документ менән рәсми мәғлүмәттәр порталында танышырға була. Был көндә халыҡ зыяраттарҙы тәртипкә килтерә, өмәләр ойошторола. 2020 йылда сыҡҡан указға ярашлы, Мәрхүмдәрҙе иҫкә алыу көнө 2 майға тәғәйенләнде.

Ҡырмыҫҡалы районында Ағиҙел ярында юғалған ҡатынды эҙләйҙәр

Кисә «Лиза Алерт» отряды ирекмәндәре Башҡортостанда бер ҡатындың ғәйеп булғаны тураһында хәбәр итте. Ҡырмыҫҡалы районының Һарт-Шишмә ауылында йәшәгән 40 йәшлек Реана Айытҡолова өйөнән 13 апрелдә сығып киткән һәм әлеге көнгәсә унан бер хәбәр ҙә юҡ.

Ҡатындың өйҙәше әйтеүенсә, улар 13 апрелдә Ағиҙел йылғаһы буйында хушлашҡан. Ҡатынды һуңғы тапҡыр тап шунда күргәндәр. Аҙағыраҡ яр буйында телефоны табылған. Ғәҙәттән тыш хәлдәр министрлығы хеҙмәткәрҙәре биләмәне ҡарап сыҡҡан, шул иҫәптән кәмәләр менән йылғаны иңләгән. Әлегә һөҙөмтә юҡ.

Билдәләре: буйы - 170 сантиметр, ябыҡ, сәстәре ҡыҙғылт-һары, күҙҙәре көрән төҫтә. Ҡара кофта, асыҡ күк төҫтәге джинсы, ҡара ботинкалар кейгән булған.

Телефон һандары: 8-800-700-54-52 йәки 112. Полиция: 8-999-74-111-75.

Тәүлек эсендә республиканың 112 системаһына һыу баҫыу тураһында 8 хәбәр килгән

Тәүлек эсендә республиканың 112 системаһы шылтыратыуҙарҙы эшкәртеү үҙәгенә һыу баҫыу тураһында 8 хәбәр килгән. Тәүлек эсендә Нуриман районында Өфө йылғаһы 44 сантиметрға артҡан. Мәләүез янында Ағиҙел йылғаһында һыу 36 сантиметрға күтәрелгән. Рәсәй Ғәҙәттән тыш хәлдәр министрлығының Башҡортостан буйынса баш идаралығы һыу баҫыуға бәйле 26 хәлде контролдә тота. Һүҙ 450 йорт алды ихатаһы, баҡса участкалары,,шулай уҡ юлдар һәм бәләкәй күперҙәр тураһында бара. Йомағужа һәм Павловка һыуһаҡлағыстары һыу тултырыу режимында эшләй. Нөгөштә һыу ташлау эштәре башҡарыла.

Өфөнөң 450 йыллығын байрам итеүҙең төп көнө 31 августҡа тәғәйенләгән

Был көндө концерт-күңел асыу программалары бер юлы өс майҙанда - Ленин, Машиналар эшләүселәр һәм «Ватан» этнопаркында ойошторола.
Юбилейға әҙерлек мәсьәләләре Башҡортостан башлығы Радий Хәбиров етәкселегендә үткән сираттағы кәңәшмәлә тикшерелде.

Учалы районында ер аҫты ҡаҙылма байлыҡтарын ҡулланыу мәсьәләләре буйынса комиссия ултырышы үтте

Учалы районында ер аҫты ҡаҙылма байлыҡтарын ҡулланыу мәсьәләләре буйынса ведомство-ара комиссия ултырышы ойошторолдо. Башҡортостан хөкүмәте премьер-министры урынбаҫары - хөкүмәт аппараты етәксеһе Азамат Абдрахманов ҡатнашлығында үткән сарала ер аҫты ҡаҙылма байлыҡтарын тәбиғәткә мөмкин тиклем аҙ йоғонто менән эшкәртеү мәсьәләләре иғтибар үҙәгендә булды.

«Ҡыҙыл пролетарий» предприятиеһынан оҙатылған тауар күләме 2 миллиард һумға етер тип көтөлә

Йыл аҙағына Стәрлетамаҡтағы «Ҡыҙыл пролетарий» предприятиеһынан оҙатылған тауар күләме 2 миллиард һумға етер тип көтөлә. Экспорт яҡынса 30 процентҡа артасаҡ. Пландар ҙур. Ҡасандыр ҡатмарлы иҡтисади хәлдә булған компанияның бөгөнгө үҫеш күрһәткестәре сәнәғәт производствоһы индексында ла сағылыш тапҡан. Импортты алмаштырыу йүнәлешендә уңышлы эшләгән предприятие мөмкинлектәре менән БЮТ ижади төркөмө лә танышты.

Республиканың 17 ҡалаһы уңайлы мөхит буйынса федераль рейтинг талаптарына яуап бирә

Рәсәй Президенты Указына ярашлы, 2030 йылға һәр бер төбәктә ҡалаларҙың кәмендә 80 проценты уңайлы мөхит рейтингы күҙлегенән ыңғай баһаланырға тейеш. Башҡортостан был маҡсатҡа 2023 йылда уҡ иреште. Әле республиканың 17 ҡалаһы уңайлы мөхит буйынса федераль рейтинг талаптарына яуап бирә. Сағыштырыу өсөн: 2018 йылда бары 4 ҡала ғына мөхит сифаты индексын үтәгән булған. Был күрһәткестәргә Башҡортостан башлығы Радий Хәбировтың төбәктә уңайлы мөхит булдырыу программалары үтәлешен шәхси контролгә алыуы һөҙөмтәһендә ирешелгән.

Башҡортостанда апрелдең өсөнсө йомаһында милли кейем көнө билдәләнә

Яҡынлашып килгән байрам уңайнынан «Торатау» Конгресс-холында түңәрәк өҫтәл ойошторолдо. Сарала ҡул оҫталары, ғалимдар, тарихсылар, яҙыусылар, йәмәғәт эшмәкәрҙәре башҡорт милли кейемдәрен һаҡлау, уны популярлаштырыу юлдары буйынса фекер алышты, милли образдың әҙәбиәттә, фольклорҙа әһәмиәтен билдәләне. Тулыраҡ мәғлүмәт киләһе яҙмала

Хәйбулла районы Аҡъяр ауылында күренекле педагог Роберт Арыҫлановты иҫкә алдылар

Остаз, комсомол лидеры, дәүләт эшмәкәре. Хәйбулла районы Аҡъяр ауылында күренекле педагог Роберт Арыҫлановты иҫкә алдылар. Хөрмәт һәм хәтер саралары «Почет билдәһе» һәм «Халыҡтар дуҫлығы» ордендары кавалеры, СССР-ҙың мәғариф алдынғыһының тыуыуына 90 йыл тулыу уңайынан ойошторолдо.

Рәмил Баҙамшин Баймаҡ ҡалаһында хәйриә концерты менән сығыш яһаны

Башҡортостандың атҡаҙанған артисы Рәмил Баҙамшин Баймаҡ ҡалаһында хәйриә концерты менән сығыш яһаны. Ижади проект махсус хәрби операция яугирҙарына арналған. Сәхнәлә ил һаҡсыларының ҡаһарманлығы, илһөйәрлек һәм мөхәббәт тураһында йырҙар яңғыраны. Тулыраҡ киләһе яҙмала.