Башҡортостандың Үҙәк һайлау комиссияһы рәйесе комиссия ағзалары халыҡ-ара күҙәтеүселәр менән осрашты

Башҡортостандың Үҙәк һайлау комиссияһы рәйесе Азат Ғәлимханов, комиссия ағзалары халыҡ-ара күҙәтеүселәр менән осрашты. Эксперттар иртәнге сәғәт 8-ҙән баш ҡала һәм райондарының бер нисә һайлау участкаһында булды, йәмәғәт ҡабул итеү бүлмәһе эшмәкәрлеге менән танышты, мөһим сәйәси ваҡиға барышын күҙәтте. Осрашыу барышында эксперттар тәҫьораттары менән бүлешеп, тауыш биреүҙә етешһеҙлектәр булмауын белдерҙе.

Республикала станоктар эшләү буйынса Бөтә Рәсәй белем биреү үҙәге булдырылыуы ихтимал

Был турала Стәрлетамаҡ ҡалаһында үткән урта һөнәри белем биреүҙе үҫтереү мәсьәләләре буйынса күсмә кәңәшмәлә әйтелде. Фекер алышыуҙа республика башлығы, колледж һәм предприятие етәкселәре, шулай уҡ «Ростех» дәүләт корпорацияһы вәкилдәре ҡатнашты. Радий Хәбиров колледж етәкселәренә киләһе йылдан ил президенты иғлан иткән урта һөнәри белем биреү системаһын яңыртыу буйынса федераль программаға ҡушылырға саҡырҙы. Шул иҫәптән, буласаҡ үҙәк өсөн яңы кадрҙар әҙерләү мәсьәләһе күтәрелде.

Республика халҡы Рәсәй Президентын һайлауҙа әүҙем ҡатнаша

Бергә беҙ көс, Рәсәй өсөн тауыш бирәбеҙ! Быйыл һайлауҙа ошондай рәсми лозунгтар ҡулланыла. Башҡортостанда мөһим һәм яуаплы ваҡиға Рәсәй Президентын һайлауҙа өс көнлөк тауыш биреүҙең бөгөн тәүге көнө. Республика район-ҡалаларында тауыш биреүҙең нисек үтеүе тураһында киләһе яҙмала.

Юлаевсылар республика райондары һәм ҡалалары буйлап сәфәргә сыҡты

Хоккейсылар халыҡ менән осраша, балалар өсөн оҫталыҡ дәрестәре үткәрә. “Салауат Юлаев” командаһы Октябрьскиҙа булды. Бөгөн Өфөлә көйәрмәндәр менән осрашыу ҡаралған, иртәгә Ишембайға баралар. Быға тиклем хоккейсылар Ҡырмыҫҡалы, Благовар райондары һәм Благовещен ҡалаһында осрашыуҙар үткәрҙе.

Башҡортостан халҡы йәмәғәт биләмәләрен төҙөкләндереү өсөн тауыш бирә

Президент һайлау барышында “Уңайлы ҡала мөхите булдырыу” федераль программаһы буйынса проекттар тәҡдим ителә. Халыҡ киләһе йылда төҙөкләндереләсәк объекттарҙы һайлай. Бының өсөн 16 меңдән ашыу волонтер йәлеп ителгән. Исемлектә 216 проект күрһәтелгән. Иң күп тауыш йыйған 120 йәмәғәт биләмәһе 2024 йылда тәртипкә килтерелә.

Бюлеттенде боҙоусыларға 12 йылға тиклем төрмә янай

Президент һайлауы барышында провокациялар ойошторорға маташҡан кешеләр енәйәт яуаплылығына тарттырыла. Илдең ҡайһы бер төбәктәрендә ошондай осраҡтар теркәлгән. Башҡортостанда бындай хәлдәр юҡ.

Башҡортостан вәкилдәре Бөтә донъя күсмә халыҡтар уйындарында ҡатнаша

Республика Башлығы Радий Хәбиров ҡул ҡуйған бойороҡҡа ярашлы, халыҡ-ара турнирға әҙерләнеү өсөн ойоштороу комитеты булдырыла. Бөтә донъя күсмә халыҡтар уйындары Ҡаҙағстандың баш ҡалаһы Астанала быйыл сентябрҙә үтә. Унда ат сабышы, милли көрәш, уҡ атыу, ҡош сөйөү, халыҡ уйындары һәм башҡа ярыштар була. Сарала 100-ҙән ашыу илдән 4 мең кеше ҡатнашыуы көтөлә.

Ил Президентын һайлау көнө - байрам

Быны республикабыҙҙың төрлө төбәктәренән килгән фото-видео хәбәрҙәр ҙә дәлилләй. Бик күптәр һайлау участкаларына зауыҡлы милли биҙәүестәрҙә , ә ҡайһы берҙәр милли кейемдәрен кейеп килә.

Өфө ҡалаһының Октябрь районында йәшәгән Фәриҙә һәм Рауил ғаиләһе менән Башҡорт милли кейемендә килеп, барыһын да хайран иткән. "Беҙҙең өсөн мәҙәниәтегеҙҙе һәм тарихығыҙҙы яратыуығыҙ, һәм шул уҡ ваҡытта һайлау кеүек мөһим ваҡиғаны онотмауығыҙ үтә ҡиммәтле!" - тип яҙа Октябрь районы хакимиәте матбуғат хеҙмәте.

Башҡортостан депутаттары мәктәптә мобиль телефондарҙы тыйырға ниәтләй

Дәүләт Йыйылышы–Ҡоролтайҙа мәғарифкә бәйле законға үҙгәреш әҙерләнгән. Ҡанун проектына ярашлы, мәктәптә дәрес ваҡытында мобиль телефон менән ҡулланыу сикләнә. Тәнәфес ваҡытында йәки айырым осраҡтарҙа гаджет менән файҙаланырға була. Закон проекты мартта пленар ултырышта беренсе уҡыуҙа ҡарала.

Йылайырҙан 100 йәшлек Тыл һәм хеҙмәт ветераны Орҡоя Таһирова ла ил президентын һайлауҙа ҡатнашты

Эфир 18:30 сәғәттә.

Баш ҡаланың «Родина» кинотеатрында үҙенсәлекле фотопроект асылды

Герой ҡатыны, герой әсәһе. Баш ҡаланың «Родина» кинотеатрында үҙенсәлекле фотопроект асылды. Күргәҙмәлә махсус хәрби операцияла ҡатнашыусы ир-егеттәрҙең әсәләре, ҡатындары ҡатнашҡан. Яугирҙарҙың яҡындары һалдат кителен кейеп, фотоға төшкән. Хәрби форма гүзәл заттар иңенә йөк һәм яуаплылыҡ өҫтәй, шул уҡ ваҡытта ул йылыта. 2022 йылда Һамар ҡалаһында башланған проектты республикала ла күтәреп алғандар. Тәүҙә унда 9 ҡатын-ҡыҙ ҡатнашһа, бөгөн улар 2 меңдән артҡан. Күргәҙмәлә әле хеҙмәт иткән һәм яуҙа һәләк булған яугирҙарҙың яҡындары ҡатнаша.

Яугир һайлау көнөндә өйләнгән һәм үҙенең тауыш биргән

Ейәнсура районынан «Печник» позывнойлы һалдат ялға ҡайтҡан. Уны өйҙә кәләше һәм ҡыҙы көтөп алған.

Ялының тәүге көнөндә үк хәрби ғаиләһен законлаштырған. ЗАГС-ҡа юлда йәштәр һайлау участкаһына инеп сыҡҡан һәм үҙҙәренең тауышын биргән.

Яңы тыуған ғаиләгә бүләктәр һәм «Рәхмәт» акцияһына билет тапшырылған.

Бөгөн Рәсәй Президентын һайлауҙың икенсе көнө уҙҙы

Республика халҡының бер миллион ярымы гражданлыҡ бурысын үтәгән. Был тауыш биреүселәрҙең 51 проценттан ашыуы. Был «Рәсәй президентын һайлау-2024» йәмәғәт матбуғат үҙәгендә алынған һуңғы мәғлүмәт. Башҡортостандың үҙәк һайлау комиссияһы ағзалары белдереүенсә, ҡалалар араһында айырыуса Ағиҙел һәм Күмертау халҡы сәйәси әүҙемлек күрһәтә.

Йылайыр районында 17 һайлау участкаһы ойошторолған

Йылайыр районында һайлаусылар исемлегендә ун меңгә яҡын кеше, уларҙың 161-е йәшәгән урынынан ситтә тауыш бирә. Шул уҡ ваҡытта Рәсәйҙең төрлө төбәктәренән эш буйынса командировкаға килеүселәр ҙә бар. Шулай уҡ сәйәси кампанияла хәрби операция биләмәһенән ҡыҫҡа ваҡытлы ялға ҡайтҡан яҡташтарыбыҙ ҙа әүҙем ҡатнаша.

Благовещен ҡалаһында тауыш биреүселәрҙе музыкаль бүләк менән ҡаршы алдылар

Бөгөн Рәсәй Президентын һайлауҙың икенсе көнө. Республиканың төрлө участкаларында йәшәүселәр гражданлыҡ бурысын лайыҡлы үтәй. Благовещен ҡалаһында тауыш биреүселәрҙе музыкаль бүләк менән ҡаршы алдылар. Ә Бөрөлә сәйәси кампанияла йәштәрҙең әүҙем ҡатнашыуы теркәлгән.

Шаран районында 107 йәшлек һайлаусы тауыш бирҙе

Дүртөйлө ауылынан йөҙйәшәр Татьяна Алексеева гражданлыҡ бурысын өйөндә үтәне. Участка комиссияһы ағзалары оло быуын вәкиле йәшәгән йортҡа килде. Татьяна Васильевна тыл хеҙмәтсәне. Бөйөк Ватан һуғышы йылдарында Энгельс исемендәге колхозда эшләй. Татьяна Алексеева бөгөн Башҡортостанда иң оҙаҡ йәшәгән кешеләрҙең береһе һанала.

Һайлау барышын Бойондороҡһоҙ дәүләттәр берләшмәһенең күҙәтеүселәр миссияһы тикшерә

Башҡортостанда 9 илдән тиҫтәләп вәкил эшләй. Халыҡ-ара күҙәтеүселәр менән һайлау участкаларына БЮТ ижади төркөмө лә сыҡты.

Башҡортостанда Белоруссиянан килтерелгән зубрҙар көтөүе үрсетелә

Улар ҡырыҫ Урал тәбиғәте шарттарында йәшәүгә яраҡлаша. Был хаҡта Башҡортостан Башлығы Радий Хәбиров социаль селтәрҙәге сәхифәһендә хәбәр итте. «Мораҙым тарлауығы» биләмәһендә урынлашҡан мөһабәт хайуандар көтөүен беҙҙең ижади төркөм барып күрҙе. Был хаҡта тулыраҡ киләһе яҙмала.

Өфөлә СВО геройы үҙенең тауышын бирҙе

Өфөлә «Колган» позывнойлы яугир үҙенең гражданлыҡ бурысын үтәне. Был хаҡта Октябрь районының матбуғат хеҙмәтенән хәбәр итәләр.

Герой махсус операция биләмәһенән ҡыҫҡа ваҡытлы отпускыға ҡайтҡан. Өйҙә саҡта ул тағы ла бер гражданлыҡ бурысын үтәү өсөн Рәсәй президентын һайларға килгән.

Башҡортостан халҡының 100 проценты тауышын биргән

Асҡын районы Башҡортостан ауылында йәшәүселәр һайлауҙа әүҙем ҡатнашҡан. Улар күрше Иҫке Ҡаҙансы ауылында урынлашҡан һайлау участкаһына дәррәү барған.
88 йәшлек хеҙмәт ветераны Сайма Зиннәтова ла һайлауҙа ҡатнашҡан. “Балалар һәм ейән-ейәнсәрҙәребеҙ көслө һәм матур илдә йәшәһен өсөн тауыш бирҙем. Президент булырға лайыҡлы кешене һайланым”,- ти ул.