Башҡортостандан Донбасҡа сираттағы 115-се гуманитарылау юлға сыҡты

Колонна 9 йөк машинаһынан тора, уларға 53 кубометр ағас материалдары, утын, һыу, медикаменттар һәм яугирҙарға посылкалар тейәлгән. Гуманитар ярҙам Рәсәйҙең яңы 4 субъектында урынлашҡан хәрби подразделениеларға тәғәйенләнгән. Йөк туплауҙа 8 муниципалитет, республика халҡы, ойошмалар һәм йәмәғәт берекмәләре әүҙем ҡатнашҡан. Башҡортостанда махсус хәрби операция яугирҙарына гуманитар ярҙам даими рәүештә республика башлығының шәхси контролендә ойошторола.

Рәсәй Президентын һайлауға 22 тонна бюллетень сығарылған

Уларҙың бер өлөшө башҡорт телендә. Илдең иң ҙур сәйәси сараһына тиклем һанаулы ғына көндәр ҡалды. Яуаплы кампанияға бөтә республика әүҙем әҙерләнә. Ошо көндәрҙә бюллетендәр һайлау участкаларына таратыласаҡ.

🔞 Еңел машина ғаилә парын төкөгән

Бәләбәй районының Приют ҡасабаһында еңел машина юғары тиҙлектә ирле-ҡатынлылар — 51 йәшлек Владимирҙы һәм 46 йәшлек Еленаны бәрҙергән. Уларҙы ашығыс ярҙам машинаһы алып киткән: икеһенең дә баш һөйәге йәрәхәтләнгән, ирҙең аяғы һынған, ҡатындың яурыны имгәнгән.

Яҡынса мәғлүмәттәр буйынса, водитель иҫерек булған.

Башҡортостанда ялға ҡайтҡан яугир ғаилә ҡорған

Бәләбәй ЗАГС-ы бүлегендә «Бурый» позывнойлы махсус хәрби операция яугире һәм уның һөйгән ҡыҙы өйләнешкән. Был хаҡта район хакимиәте башлығы Азат Сәхәбиев социаль селтәрҙә яҙған.
Яҡташыбыҙ – взвод командиры, кадр офицеры, Ҡазан хәрби танк училищеһын тамамлаған, ә ҡатыны сығышы менән Аксаков ауылынан.

«Тыйнаҡ, ябай егеттәр, тап шундай кешеләр илебеҙҙең яҙмышын билдәләй. Улар – ҡыйыулыҡ, ҡаһарманлыҡ һәм илһөйәрлек өлгөһө. Йәштәр үҙ тормошондағы ҡыуаныслы ваҡиғаны туғандары һәм яҡындары менән билдәләне. Тиҙҙән ҡыҫҡа ваҡытлы отпуск тамамлана һәм яҡташыбыҙ йәнә алғы һыҙыҡҡа юллана. Мөхәббәтегеҙҙе, бер-берегеҙҙе һаҡлағыҙ, ҡорған ғаиләгеҙ ныҡлы булһын!» - тип яҙған район етәксеһе.

Радий Хәбиров Мәскәүҙә «Ростех» дәүләт корпорацияһы етәксеһе Сергей Чемезов менән осрашты

Көн тәртибендә - яҡтар араһында эшмәкәрлекте нығытыу һәм «Ростех» төркөмөнә ингән сәнәғәт предприятиеларын үҫтереү. Фекер алышыу барышында республика предприятиеларының бер нисә перспективалы проекты тикшерелде. Башҡортостан башлығы билдәләүенсә, Стәрлетамаҡта станоктар эшләү кластерын үҫтереү планлаштырыла.

Радий Хәбиров оператив кәңәшмәлә һайлауҙы лайыҡлы кимәлдә үткәрергә тигән бурыс ҡуйҙы

15 марттан 17-һенә тиклем Рәсәйҙә ил президентын һайлау үтәсәк. Тауыш биреүҙең ике төп формаһы ҡулланыла - махсус билдәләнгән һайлау участкаларында һәм өйҙә тауыш биреү мөмкин. Дистанцион электрон һәм ваҡытынан алда тауыш биреү Башҡортостанда ҡулланылмай. Республика башлығы Радий Хәбиров аҙналыҡ оператив кәңәшмәлә мөһим сәйәси ваҡиғаны лайыҡлы кимәлдә үткәрергә тигән бурыс ҡуйҙы. Шулай уҡ онлайн форматта үткән кәңәшмәлә республикала башҡорт дәүләт ҡурайсылар ансамблен булдырыу, төбәк мәктәптәрендә туҡланыу системаһын камиллаштырыу, йәмәғәт транспортын яңыртыу кеүек һорауҙар ҡаралды.

Баш ҡалала «Арт-ҡоролтай» халыҡ-ара форумы үтте

Башҡортостан «Мәҙәниәт» милли проекты лидерҙары исемлегендә. Был турала бөгөн Рәсәйҙең мәҙәниәт министры Оьга Любимова «Арт-ҡоролтай» халыҡ-ара форумында белдерҙе. Республикала күләмле саралар ойошторола, мәҙәни үҙәктәр төҙөлә, ә «Пушкин картаһы»н файҙаланыусылар һаны буйынса республика илдә өсөнсө урында килә. Тулыраҡ киләһе яҙмала.

15 марттан 17-нә тиклем Башҡортостанда «Рәхмәт» акцияһы үтә

Бөтә ғаилә менән һайлауға! 15 марттан 17-нә тиклем Башҡортостанда «Рәхмәт» акцияһы үтә. Ата-әсәләр балалары менән бергә һайлау участкаларына килеп, магазиндарға ташлама, ҡиммәтле приздар ота ала.

Уҙған ял көндәрендә 235 водителдең руль артына эскән килеш ултырыуы асыҡланған

Уҙған оҙайлы ял көндәрендә республика юлдарында 235 водителдең руль артына эскән килеш ултырыуы асыҡланған. Өҫтәүенә, 8 март - байрам көнөндә автомобилгә эскән килеш ҡатын-ҡыҙҙар идара иткән осраҡтар ҙа теркәлгән. Тулыраҡ киләһе яҙмала.

Йәкшәмбе кис ҡояш байыу менән бөтә донъя мосолмандары изге Рамаҙан айына аяҡ баҫты

Изге ғәмәлдәр айы. Йәкшәмбе кис ҡояш байыу менән бөтә донъя мосолмандары изге Рамаҙан айына аяҡ баҫты. Быйыл ул 10 апрелгә тиклем дауам итә. Ай дауамында барлыҡ мосолмандар көндөҙ ашау-эсеүҙән тыйылып торорға тейеш. Әммә Рамаҙан айының мәғәнәһе бының менән генә сикләнмәй. Күңелдәрҙе сафландырған айҙа мөьминдәр изге эштәр ҡылырға, мохтаждарға күберәк ярҙам ҡулы һуҙырға бурыслы, ти диндарҙар.

Башҡортостанда ир-егеттәргә алимент түләнә

Дәүләт Йыйылышы–Ҡоролтай депутаттары Ғаилә кодексына үҙгәреш әҙерләне. Баланы яңғыҙы ҡараған атай суд аша әсә кешенән алимент түләтә ала. Ғәмәлдәге ҡануниәт буйынса ҡатын-ҡыҙҙар ғына шундай хоҡуҡҡа эйә. Ғаилә кодексына төҙәтмә баланы тәрбиәләгән атай һәм әсәйҙең алимент юллау өсөн мөмкинлектәрен тигеҙләй.

Республика аграрийҙары көнсығыш илдәр менән хеҙмәттәшлекте нығыта

Көнбағыш көнсығышҡа табан борола. Донъяуи баҙар шарттары үҙгәреү сәбәпле республика аграрийҙары ла көнсығыш илдәр менән хеҙмәттәшлекте нығыта. Шулай уҡ культуралар төрлөлөгө лә ҡайтанан ҡарала. Сөнки Ҡытай башлыса майлы, аҡһымға бай үҫемлектәргә, атап әйткәндә соя, борсаҡ, етенгә өҫтөнлөк бирә. Шуға күрә күп кенә хужалыҡтар иген майҙандарын кәметергә мәжбүр.

Өфөнө Рәсәйҙең яңы төбәктәре менән бәйләүсе автоуҙыш старт алды

Рус география йәмғиәте: үҙебеҙҙекеләрҙе ташламайбыҙ! Ошо исем аҫтында Өфөнө Рәсәйҙең яңы төбәктәре менән бәйләүсе автоуҙыш старт алды. Уның ҡатнашыусылары буш ҡул менән бармай. Автомобилдәргә яҡташ яугирҙарыбыҙ өсөн гуманитар йөк тә тейәлгән.

Иглин районында «Һуған традициялары» халыҡ байрамы үтте

Иглин районында «Айыҡ ауыл-2024» республика конкурсы сиктәрендә «Һуған традициялары» халыҡ байрамы үтте. Ғаилә йылында ойошторолған айыҡ сара хаҡында киләһе яҙмала.

Рәсимә Кәримованың тыуыуына - 85 йыл

Бөгөн Башҡортостан телевидениеһының тәүге дикторы, Башҡортостандың һәм Рәсәйҙең атҡаҙанған мәҙәниәт хеҙмәткәре Рәсимә Кәримованың тыуыуына 85 йыл. Тамашасы уны "Панорама", "Яңы йыл уттары", "Биш йыллыҡ аҙымдары", "Сәнғәт оҫталары", "Йыл миҙгелдәре", "Беҙҙең замандаш" тапшырыуҙарын, байрам тамашаларынан репортаждар алып барыусы булараҡ белә.

😰Башҡортостандан гуманитар ылау дрон һөжүменә эләккән

Өфөнән махсус хәрби операция биләмәһенә гуманитар ярҙам ташыған йөк машинаһын пилотһыҙ осҡос аппараты һөжүм иткән. Был хәл Донецк ҡалаһы янында булған. Һөҙөмтәлә автомобилдең кабинаһы емерелгән. Гуманитар ылауҙы Дәүләт Йыйылышы — Ҡоролтай депутаты Фәрит Ғүмәров оҙатып барған.

📣«Берҙәм көс менән фураны сығып алырбыҙ, тип уйлайым. Бер кем дә зыян күрмәне, имен-һаубыҙ. Машинаға бер аҙ ремонт эшләргә кәрәк буласаҡ. Уның менән Өфөгә ҡайтып етербеҙ тип ышанам», — тип хәбәр итә депутат.

Гуманитар ылауға ярҙамға Рәсәй хәрбиҙәре, шул иҫәптән Дәүләт Йыйылышы — Ҡоролтай депутаты Алексей Локотченко барған. Ул ғинуарҙа махсус хәрби операцияға юлланғайны. Депутаттың һүҙҙәренсә, гуманитар ярҙам хәрбиҙәргә икенсе транспортта алып барып еткереләсәк.

Был аҙнала мәктәп уҡыусылары өсөн өйҙә белем алыу ҡаралмаған

Уҡытыуҙа ҙур үҙгәрештәр булмай. Был турала Мәғариф һәм фән министры Илдар Мәүлетбирҙин белдерҙе. Ҡайһы бер һайлау участкалары мәктәптәрҙә урынлашҡан. Ошо сәбәпле, был йома айырым кластар өсөн дәрестәр теҙмәһе үҙгәрәсәк. Илдә президент һайлана. Тауыш биреү 15, 16 һәм 17 мартта ойошторола. Башҡортостанда 2019 йылдан мәктәптәр биш көнлөк уҡыу аҙнаһына күсерелде.

Республикала сығарылыш уҡыусыларының ата-әсәләре Берҙәм дәүләт имтиханын тапшыра

Федераль мәғариф һәм фәнде күҙәтеү хеҙмәте акция иғлан итте. Уның барышында Башҡортостанда киләһе аҙнала сығарылыш уҡыусыларының ата-әсәләренә тарих буйынса имтихан тапшырырға тәҡдим ителә. Быйыл был фәнде 2 меңдән ашыу егет һәм ҡыҙ һайлаған. “Бергәләп тапшырабыҙ” тигән акцияла власть вәкилдәре, артистар, блогерҙар һәм журналистар ҡатнаша ала. Бының өсөн алдан заявка ебәрергә кәрәк.

Республикала йорттарға газ үткәрелә

Илдә социаль газификация программаһы өсөн миллиард һум бүленде. Аҡса 57 төбәккә тәғәйенләнә, уның 60 миллион һумға яҡынын беҙҙең республика ала. Программала махсус хәрби операцияла ҡатнашыусылар һәм уларҙың ғаиләләре, Бөйөк Ватан һуғышы ветерандары, күп балалы һәм аҙ килемле ғаиләләр ҡатнаша. Субсидия суммаһы кәмендә 100 мең һум була.

Радий Хәбиров Мәскәүҙә Сергей Готье менән осрашты

Радий Хәбиров Мәскәүҙә академик Валерий Шумаков исемендәге трансплантология һәм яһалма органдар үҙәге етәксеһе Сергей Готье менән осрашты. Яҡтар Башҡортостанда медицинаның был мөһим йүнәлешен үҫтереү мәсьәләләрен тикшерҙе.