Радий Хәбиров һалҡындарҙа һаҡ булырға кәңәш итте

Республика Башлығы Радий Хәбиров һалҡындар ваҡытында бөтә хеҙмәттәрҙең көсәйтелгән тәртиптә эшләүе тураһында хәбәр итте. Ярҙам кәрәк булһа "112" һандарына шылтыратырға була. - Халыҡҡа һаҡ һәм иғтибарлы булырға, водителдәргә алыҫ юл алдынан бөтә хәүефте иҫәпкә алырға кәңәш итәм, - тине Радий Хәбиров. Башҡортостанда алдағы көндәрҙә һауа температураһының әкренләп күтәрелеүе көтөлә.

Радий Хәбиров Яңы йылды билдәләү тураһында указға ҡул ҡуйҙы

Документҡа ярашлы, байрамды ойоштороу комитеты булдырыла. Республика шыршы байрамы 27 декабрҙә уҙғарыла. Уға уҡыу алдынғылары, олимпиадалар һәм спорт ярыштары еңеүселәре, фестиваль лауреаттары, һәләк булған хәрбиҙәрҙең һәм аҙ тәьмин ителгән ишле ғаиләләрҙән балалар, етемдәр, шулай уҡ һаулыҡ мөмкинлектәре сикләнгәндәр саҡырыла. Балалар өсөн өс көнлөк ял ойошторола. Һәр береһенә бүләктәр тапшырыла. Яңы йыл каникулында бөтә республикала мәҙәни саралар уҙғарыла. Улар барышында тейешле хеҙмәттәр дежур итә.

Радий Хәбиров район һәм ҡала башлыҡтарына яңы йылға бәйле мөрәжәғәт менән сыҡты

Башҡортостан Башлығы Хөкүмәттә оператив кәңәшмәлә һәр муниципалитет етәксеһенә үҙенсәлекле балалар, етемдәр һәм махсус хәрби операция яугирҙәре балалары ҡатнашҡан яңы йыл байрамдарына шәхсән килеп ҡотларға ҡушты. Бынан тыш, Радий Хәбиров Транспорт һәм юл хужалығы министрлығына көслө ҡар яуыуға һәр саҡ әҙер булыу талабын ҡуйҙы.

Башҡортостанда “Абҙаҡ” тау саңғыһы үҙәген киңәйтеүгә 700 миллион һум тотонола

Республика Хөкүмәтенән хәбәр итеүҙәренсә, инвестиция проекты өҫтөнлөклөләр исемлегенә индерелде. Курортта 75 урынға иҫәпләнгән өс ҡатлы ҡунаҡхана төҙөлә. Ул 2026 йылда асылырға тейеш. Тау саңғыһы үҙәген ҙурайтыу мәсьәләһе Республика Башлығы Радий Хәбиров үткәргән “Инвестиция сәғәте” ултырышында ҡаралғайны. Әле инвестор менән килешеүгә ҡул ҡуйыу өсөн документтар әҙерләнә. Туристик проект инвестицияларҙы хуплау һәм яҡлау программаһына индерелде.

Йырсы Әнүәр Нурғәлиев юлда бәләгә тарыған водителде ҡотҡарған

Йырсы үҙенең командаһы менән Бөгөлмәгә концертҡа юл тотҡан. Трасса буйында боҙолоп торған машинаны күргәс, йырсы командаһы менән туҡтарға ҡарар иткән. Артист боҙоҡ «Пежо» микроавтобусын тағып алып, кәрәкле урынға илтеп ҡалдырған.

«Дуҫтар, сит бәләгә битараф булмағыҙ. Айырыуса ошондай һыуыҡ көндәрҙә. Һәр кемебеҙ бындай хәлдә ҡалырға мөмкин», - тип яҙған социаль селтәрҙә йырсы.

Радий Хәбиров тышҡы иҡтисади эшмәкәрлекте үҫтереү буйынса стратегик сессияла ҡатнашты

Башҡортостан Башлығы Радий Хәбиров видеобәйләнеш режимында тышҡы иҡтисади эшмәкәрлекте үҫтереү буйынса стратегик сессияла ҡатнашты. Кәңәшмәнә Рәсәй Хөкүмәте рәйесе Михаил Мишустин үткәрҙе. Сит ил партнерҙары менән һөҙөмтәле үҙ-ара эш итеү Рәсәйҙәге күп кенә процестарға, шул иҫәптән инвестициялар йәлеп итеүгә, сәнәғәтте үҫтереү динамикаһына, инновациялар индереү темптарына, халыҡтың килеменә йоғонто яһай, тине премьер-министр.

Радий Хәбиров «Башҡортостан» дәүләт телерадиокомпанияһының яңы студияһын асыуҙа ҡатнашты

Республика Башлығы Радий Хәбиров «Башҡортостан» дәүләт телерадиокомпанияһының яңы студияһын асыуҙа ҡатнашты. Капиталь төҙөкләндереүҙән һуң файҙаланыуға тапшырылған телевизион майҙансыҡты асыу тантанаһына Бөтә Рәсәй дәүләт телерадиотапшырыуҙар компанияһы генераль директоры урынбаҫары Рифат Сабитов та килде.

Яҙыусы Миләүшә Ҡаһарманова СВО-ла

Был хаҡта тулыраҡ.

Бөрйән районы ауылдары урындағы башланғыстарҙы хуплау программаһында ҡатнаша

Бөрйән районында урындағы башланғыстарҙы хуплау программаһына ярашлы 11 проектты тормошҡа ашырыу ҡарала. Әле ауыл биләмәләренда конкурс талаптары буйынса документтар әҙерләнә, халыҡ менән осрашыуҙар үткәрелә.

Башҡорт теле көнөндә гранттар һәм премиялар тапшырыла

Республика Башлығы Радий Хәбиров Указы менән 2019 йылдан 14 декабрҙә Башҡорт теле көнө билдәләнә. Быйыл ул Рәсәйҙең алты төбәгендә үткәрелә. Өфөлә төп саралар 15 декабрҙә “Торатау” Конгресс-холында ойошторола. Унда Бөтә донъя башҡорттары ҡоролтайы иғлан иткән Фән һәм мәғрифәт йылына йомғаҡ яһала, Сосланбәк Тавасиев премияһы тапшырыла, башҡорт телен үҫтереүгә йүнәлтелгән шәхси грант еңеүселәрен бүләкләү була, шулай уҡ иң яҡшы башҡорт теле кабинетына мультимедия комплексы тапшырыла. Башҡорт телен һаҡлау һәм үҫтереү фонды етәксеһе Гөлназ Йосопова әйтеүенсә, халыҡ өсөн социаль селтәрҙәрҙә төрлө саралар һәм конкурстар уҙғарыла.

Башҡортостанда иң яҡшы табиптар билдәләнде

Быйыл исемлектә 200-ҙән ашыу кеше. Йылдың иң яҡшы белгестәре медицинаның төрлө йүнәлеше - онкология, психиатрия, хирургия, гинекология һәм башҡа өлкәләрҙә билдәләнде. Йыл һайын ойошторолған оҫталыҡ бәйгеһендә ҡатнашыусылар республика һәм федераль кимәлдә көсөн һынай. Башта табиптар үҙ медицина ойошмаһында баһалана, артабан абруйлы исем өсөн республика кимәлендә көрәшә. Ә беренсе урын алыусылар ил кимәлендә Башҡортостан данын яҡлай.

Башҡортостанда хеҙмәттәр сифатына бәйле йыш теркәлгән дәғүәләр аталды

Республика буйынса Ҡулланыусылар хоҡуҡтарын күҙәтеү хеҙмәтенән хәбәр итеүҙәренсә, ваҡлап һатыу өлкәһенә халыҡтан күп ялыуҙар теркәлгән. Аҙыҡ-түлек, банк һәм страховка хеҙмәттәре, торлаҡ-коммуналь хужалыҡ һәм көнкүреш хеҙмәтләндереү, йәмәғәт туҡланыу сифатына дәғүә белдергәндәр. Башҡортостанда “Ҡулланыусылар хоҡуҡтарын яҡлау” программаһы ҡабул ителгән. Уның буйынса алдағы биш йылда 1,12 миллиард һум бүленә.

Өфөнөң йәш граждандарына тәүге рәсми документ тапшырылды.

Өфөнөң йәш граждандарына тәүге рәсми документ - Рәсәй гражданины паспорты тапшырылды. Рәсәй Конституцияһын ҡабул итеү көнө уңайынан уҙғарылған тантана баш ҡаланың һәр районында ойошторолдо.

Баймаҡ районында Азамат Тажетдиновтың тыуыуына 85 йыл тулыуға арналған кисә үтте

Хәтер һәм ҡәҙер. «Уҡытыусы һәм остаз йылы» сиктәрендә Баймаҡ районы Икенсе Этҡол ауылы мәҙәниәт йортонда Рәсәйҙең мәғариф алдынғыһы, Башҡортостандың атҡаҙанған мәҙәниәт хеҙмәткәре, Батыр Вәлид исемендәге премия лауреаты Азамат Тажетдиновтың тыуыуына 85 йыл тулыуға арналған кисә үтте. Ул шәхестең рухын хөрмәтләүгә арналды.

Стәрлетамаҡ һәм Салауат|сәнәғәт ойошмалары һауаны бысратыуҙы кәметә

Тәбиғәттән файҙаланыу һәм экология министрлығынан хәбәр итеүҙәренсә, “Таҙа һауа” федераль проекты белгестәре менән осрашыу үткән. 2030 йылға тиклем төп сәнәғәт ойошмалары экологияны яҡшыртыу буйынса саралар күрергә ниәтләй. Таҙартыу ҡоролмаларын яңыртыу, етештереүҙе үҙгәртеп ҡороу өсөн 12 миллиард һум тотонола. Өфөлә быйыл апрелдә Экология форумы барышында сәнәғәт ҡалдыҡтарын һауаға сығарыуҙы кәметеү буйынса килешеүҙәргә ҡул ҡуйылды.

Башҡортостанда дүрт йылда 150 уҡытыусы 1 миллион һум алған

“Ауыл уҡытыусыһы” программаһы буйынса бәләкәй ҡалалар һәм ауылдарға эшкә барған педагогтарға грант бирелә. Киләһе йылда федераль программаның мөҙҙәте тамамлана. Республикала 2019 йылдан йәш уҡытыусыларҙы матди дәртләндереү программаһы эшләп килә. Уға ярашлы ауылға ҡайтҡан педагогтарға 690 мең һум бирелә. Быйылдан 150 кеше грантҡа дәғүә итә ала.

Башҡортостанда хәмер һатыусыларға контроль арта

Республика парламентына ошо турала документ әҙерләнә. Ҡайһы бер магазиндар үҙҙәрен кафе тип танытып тәүлек әйләнәһе спиртлы эсемлек һата. Яңы проект улар эшмәкәрлеген көйләргә тейеш. Закон ҡабул ителһә төбәктәр бындай учреждениелар эшмәкәрлеген үҙ аллы туҡтатыу хоҡуғын ала. Дәүләт Йыйылышы-Ҡоролтайҙан бындай эшҡыуарҙарға сикләүҙәр ҡабул ителгәнсе үк законлы бизнес башларға кәңәш итәләр.

"Юлдаш" радиоһы хеҙмәткәре махсус хәрби операцияға юллана

Коллегабыҙ Бәйтулла Фәтҡуллин илдең Ҡораллы көстәр сафына баҫты. Ул махсус хәрби операцияға юлланырға ҡарар иткән. Бәйтулла Фәтҡуллин 30 йылға яҡын журналистика өлкәһендә эшләй. Ул “Юлдаш” радиоһында “Асыҡ студия”, “Атайсал” тапшырыуҙарын алып барҙы, сәйәси күҙәтеүсе булды. “Коллегабыҙ менән ғорурланабыҙ”, - тип белдерҙе Башҡортостан Матбуғат һәм киң мәғлүмәт саралары агентлығы етәксеһе Максим Ульчев.

Әй йылғаһы янында йәйәүлеләр биләмәһе матурланды

Дыуан районы Мәсәғүт ауылында Әй йылғаһы янында йәйәүлеләр биләмәһе тәртипкә килтерелде. Был турала Торлаҡ-коммуналь хужалыҡ министрлығынан хәбәр итәләр. Эштәр "Торлаҡ һәм ҡала мөхите" милли проектына ярашлы алып барылған. Был проект ярҙамында ҡалаларҙа йәшәү шарттарын күпкә яҡшыртыу маҡсаты ҡуйыла.

Башҡортостанда мәктәптәр төҙөлә һәм төҙөкләндерелә

Бының өсөн федераль ҡаҙнанан беҙҙең республикаға өҫтәп 258 миллион һум бүленә. Документҡа премьер-министр Михаил Мишустин ҡул ҡуйҙы. Төҙөлөш һәм архитектура министрлығынан хәбәр итеүҙәренсә, киләһе йылда республикала дәүләт һәм шәхси партнерлыҡ ҡатнашлығында 6 мәктәп һалына. Уларҙың өсәүһе - Өфөлә, шулай уҡ Стәрлетамаҡ, Нефтекама ҡалаларында һәм Өфө районында яңы мәғариф учреждениелары була.