Башҡортостан хужалыҡтары һөт етештереүҙе арттырған

Быйыл 738 мең тонна продукция етештерелгән. Был уҙған йылдың ошо осорондағынан 29 меңгә күберәк, тип хәбәр итәләр Ауыл хужалығы министрлығынан. Саҡмағош, Илеш һәм Ауырғазы хужалыҡтары яҡшы күрһәткестәргә ирешкән.

Яңы йыл байрамдарында поликлиникалар ял көндәре графигы буйынса эшләйәсәк

Байрам итергә, әммә саманан аштырмаҫҡа. Был хаҡта бөгөн аҙналыҡ оператив кәңәшмәлә әйтелде. Башҡортостан башлығы Радий Хәбиров Джефф Монсон менән Дмитрий Дудкоға дәүләт наградалары тапшырҙы. Республикалағы көнүҙәк темалар хаҡында киләһе яҙмала.

2023 йыл аҙағына тиклем алданған өлөшсөләр хоҡуҡтарын тергеҙеү планлаштырыла

2023 йыл аҙағына тиклем Башҡортостанда бөтә проблемалы объекттар буйынса өлөшләтә төҙөлөштә ҡатнашыусыларҙың хоҡуҡтарын тергеҙеү планлаштырыла. Был хаҡта Төҙөлөш һәм архитектура министрының беренсе урынбаҫары Артем Ковшов «Төҙөлөш сәғәте» кәңәшмәһендә белдерҙе.

Башҡортостандың баш ҡалаһында температура рекорды ҡуйылды

Бөгөн төндә Башҡортостандың баш ҡалаһында температура рекорды ҡуйылды. Өфө-Дим метеостанцияһында 30,9 градусҡаса һыуытты. Быға тиклемге температура рекорды 70 йыл дауамында 29,6 градусты тәшкил иткән. Бындай аномаль күренеш ҡала халҡы, бөтә махсус хеҙмәттәр өсөн дә һынау булды.

«Яңылыҡтар» хеҙмәтенең сығарылыш мөхәррире махсус хәрби операция биләмәһенә юллана

«Яңылыҡтар» хеҙмәтенең сығарылыш мөхәррире, үткер ҡәләмле, тәрән фекерле журналист Рафиҡ Әхмәтшин махсус хәрби операция биләмәһенә юллана. Был эш буйынса сираттағы командировка түгел, хеҙмәттәшебеҙ үҙ теләге менән контракт төҙөп, алғы һыҙыҡҡа бара. Оҙатыу минуттары киләһе яҙмала.

Бөрйән районы Яуымбай ауылынан Мырҙағоловтарҙың ике улы ла алғы һыҙыҡта

Ил-именлеге-ир-егеттәр иңендә. Бөрйән районы Яуымбай ауылынан Мырҙағоловтарҙың ике улы ла алғы һыҙыҡта. Егеттәрҙең береһе Шайморатов исемендәге батальонда, икенсеһе «Ватан» отрядында хеҙмәт итә. Махсус хәрби операцияға үҙ теләге менән юлландылар, иҫән-һау, еңеп әйләнеп ҡайтһындар, ти яугирҙарҙың ата-әсәһе.

Баймаҡ ҡалаһы уҡыусылары «Һалдатҡа хат» акцияһында ҡатнашты

«Һалдатҡа хат». Баймаҡ ҡалаһы уҡыусылары ла был акцияла ҡатнашып, махсус хәрби операциялағы яугирҙарға сәләм юллай. Балаларҙың яҙған хаттары иғтибарһыҙ ҡалмай, һалдаттар тыуған яҡтарына ҡайтҡанда улар менән осрашып рәхмәт һүҙҙәрен еткерә.

Ғафури районы Яугилде ауылы «Айыҡ ауыл» республика конкурсында ҡатнаша

Ғафури районы Бурлы ауыл биләмәһенә ҡараған Яугилде ауылы «Айыҡ ауыл» республика конкурсында ҡатнаша. Сәләмәт йәшәү рәүешен һайлаусылар күмәк көс менән хәрби-патриотик, мәҙәни саралар үткәрә, халыҡ йолаларын, ғөрөф-ғәҙәттәрен һаҡлай. Айыҡ һәм сәләмәт йәшәү рәүешен һайлаған ауыл кешеләренең тормошо хаҡында репортаж.

Башҡортостан тау саңғыһы комплекстары халыҡты ҡабул итергә әҙер

Был турала Радий Хәбиров социаль селтәрҙә хәбәр итә. Быйыл ошондай үҙәктәр янында туристик инфраструктураны яҡшырытыу өсөн 25 миллион һумдан ашыу грант аҡсаһы бүленгән. Ҡунаҡ йорттары, кемпингтар төҙөлә, ҡорамалдар яңыртыла, яңы туристик маршруттар әҙерләнә.

Башҡортостанда санитар авиация осоштары арттырыла

. Был тармаҡҡа өҫтәмә аҡса бүлеү буйынса Рәсәй һаулыҡ һаҡлау министрлығы менән килешеү төҙөү ҡарала. Ошо турала социаль селтәрҙә Республика башлығы Радий Хәбиров хәбәр итә. “Башҡортостанда 2020 йылдан 2 вертолет, ололарҙы һәм балаларҙы эвакуациялау өсөн 10, перинаталь үҙәктә 3 санитар автомобиль беркетелгән. Санавиация табиптары тәүлек әйләнәһенә дежурҙа, юлға сығырға, ситтән тороп консультация бирергә әҙер. Беҙ дауаханаларҙа вертолет майҙансыҡтарын булдырыу өҫтөндә эште дауам итәсәкбеҙ”-, тип яҙған Радий Хәбиров.

Йыл аҙағына тиклем Башҡортостанда ҡалалар янындағы 5 сүплек бөтөрөлә

Тәбиғәттән һаҡлау һәм экология министрлығынан белдереүҙәренсә, һүҙ Баймаҡ, Благовешен, Дәүләкән, Стәрлетамаҡ һәм Сибай тураһында бара. Сүп-сар булған урында рекультивация уҙғарыла, артабан был ер хужалыҡта файҙаланыу өсөн тәғәйенләнә. “Таҙа ил” федераль проекты буйынса эштәр киләһе йылда Күмертау эргәһендәге сүплектә башҡарыу ҡарала.

Бөгөн Рәсәй Конституцияһы көнө билдәләнә

Төп документты ҡабул итеүгә 30 йыл тула. Тормош талаптары йәки шарттарынан сығып, уға төҙәтмәләр индерелеп тора, әммә Конституцияның төп йөкмәткеһе үҙгәрешһеҙ ҡала. Тарих фәндәре кандидаты Нурислам Ҡалмантаев әйтеүенсә, документта яҙылғандарҙы һәр кем белергә тейеш.
Рәсәй Конституцияһы 1993 йылда ҡабул ителә. Документты әҙерләүҙә 1 меңдән ашыу белгес ҡатнаша. 2005 йылға тиклем 12 декабрь ял көнө иҫәпләнә. Конституцияла сит ил һүҙҙәре ҡулланылмаған. 2020 йылда Бөтә Рәсәй тауыш биреү һөҙөмтәһенә ярашлы төп документҡа ҡайһы бер үҙгәрештәр индерелә.

Башҡортостанда йыл аҙағынаса алданған өлөшсөләр мәсьәләһе хәл ителә

Республика Башлығы Радий Хәбиров үткәргән “Төҙөлөш сәғәте” ултырышында шулай тип белдерелде. Әле 22 проблемалы объект иҫәпләнә. Төҙөлөш һәм архитектура министрының беренсе урынбаҫары Артем Ковшов әйтеүенсә, йыл аҙағынаса Өфөлә Октябрь революцияһы урамындағы күп фатирлы йорт файҙаланыуға тапшырыла, 14 объект буйынса компенсация түләргә ҡарар ителгән. Бының өсөн Биләмәләрҙе үҫтереү фонды ярҙам итә. Бынан тыш, республика һәм төҙөлөш компаниялары көсө менән 6 йорттан фатир алған 300-ҙән ашыу алданған өлөшсө мәсьәләһе хәл ителә. Һуңғы 5 йылда республикала 68 проблемалы объект файҙаланыуға тапшырылды, 8,5 мең кеше алданған өлөшсө исемлегенән сығарылды.

БСТ хәбәрсеһе Оборона министрлығы менән контракт төҙөнө

Башҡортостан юлдаш телевидениеһының "Яңылыҡтар" хеҙмәте хәбәрсеһе Рафиҡ Әхмәтшин Рәсәйҙең Оборона министрлығы менән контракт төҙөп, бөгөн махсус хәрби операцияға юлланды. Ул хәрби хәбәрсе булараҡ, күп тапҡыр Донбасста булып ҡайтты, илебеҙгә ҡушылған төбәктәрҙең тормошон яҡтыртты, яҡташтарыбыҙ тураһында бик күп репортаждар әҙерләне. “Рәсәй Ҡораллы көстәре менән контракт төҙөп, хеҙмәткә алыныу - төплө уйланылған ҡарар”,- ти коллегабыҙ. Рафиҡ Әхмәтшин “Башҡортостан” мотоуҡсылар полкында хеҙмәт итәсәк.

Бөгөн Башҡортостандың халыҡ шағиры Рауил Бикбаев тыуған көн

Уға 85 йәш тулыр ине. Рауил Бикбаев дәүер шағиры булараҡ танылды. Ул замандаштарын борсоған мәсьәләләрҙе ҡыйыу һәм тура итеп әйтә белде. “Бындай шәхестәрҙе халыҡтың алтын бағанаһы тип беләләр”, - ти “Ағиҙел” журналының баш мөхәррире Мөнир Ҡунафин.

Радий Хәбиров менән тура бәйләнеш иң рейтинглы телевизион тапшырыу булған

Башҡортостан Башлығы 29 ноябрҙә тура эфирҙа халыҡ һорауҙарына яуап бирҙе. Трансляция 5 телеканалда һәм ике радиола алып барылды. Башҡортостан юлдаш телевидениеһында тура бәйләнеште 900 меңгә яҡын кеше ҡараған. МедиаХиллс компанияһынан хәбәр итеүҙәренсә, был күрһәткес федераль каналдарҙа шул ваҡытта барған тапшырыуҙарҙан ике тапҡырға күберәк. Радий Хәбиров яҡынса дүрт сәғәт дауамында һорауҙарға яуап бирҙе. Эфирға әҙерлек барашында 4 мең 299 мөрәжәғәт ҡабул ителгән.

Нуриман районында мини-датчик ярҙамында күп балалы ғаилә янғындан ҡотолған

Башҡортостан Ғәҙәттән тыш хәлдәр буйынса дәүләт комитетынан хәбәр итеүҙәренсә, ваҡиға Бикмырҙа ауылында теркәлгән. Ут яғылған мейес ҡапҡасын асырға онотоу сәбәпле аш-һыу бүлмәһендә төтөн таралған. Янғынды иҫкәрткән мини-сирена тауышын ишетеп ҡалған ғаилә йортто елләтеп өлгөргән. Был ваҡытта өйҙә ике өлкән кеше һәм дүрт бала булған. Ғаиләгә мини-датчик республика ҡаҙнаһы иҫәбенән бушлай тапшырылған.

Радий Хәбиров һалҡындарҙа һаҡ булырға кәңәш итте

Республика Башлығы Радий Хәбиров һалҡындар ваҡытында бөтә хеҙмәттәрҙең көсәйтелгән тәртиптә эшләүе тураһында хәбәр итте. Ярҙам кәрәк булһа "112" һандарына шылтыратырға була. - Халыҡҡа һаҡ һәм иғтибарлы булырға, водителдәргә алыҫ юл алдынан бөтә хәүефте иҫәпкә алырға кәңәш итәм, - тине Радий Хәбиров. Башҡортостанда алдағы көндәрҙә һауа температураһының әкренләп күтәрелеүе көтөлә.

Радий Хәбиров Яңы йылды билдәләү тураһында указға ҡул ҡуйҙы

Документҡа ярашлы, байрамды ойоштороу комитеты булдырыла. Республика шыршы байрамы 27 декабрҙә уҙғарыла. Уға уҡыу алдынғылары, олимпиадалар һәм спорт ярыштары еңеүселәре, фестиваль лауреаттары, һәләк булған хәрбиҙәрҙең һәм аҙ тәьмин ителгән ишле ғаиләләрҙән балалар, етемдәр, шулай уҡ һаулыҡ мөмкинлектәре сикләнгәндәр саҡырыла. Балалар өсөн өс көнлөк ял ойошторола. Һәр береһенә бүләктәр тапшырыла. Яңы йыл каникулында бөтә республикала мәҙәни саралар уҙғарыла. Улар барышында тейешле хеҙмәттәр дежур итә.

Радий Хәбиров район һәм ҡала башлыҡтарына яңы йылға бәйле мөрәжәғәт менән сыҡты

Башҡортостан Башлығы Хөкүмәттә оператив кәңәшмәлә һәр муниципалитет етәксеһенә үҙенсәлекле балалар, етемдәр һәм махсус хәрби операция яугирҙәре балалары ҡатнашҡан яңы йыл байрамдарына шәхсән килеп ҡотларға ҡушты. Бынан тыш, Радий Хәбиров Транспорт һәм юл хужалығы министрлығына көслө ҡар яуыуға һәр саҡ әҙер булыу талабын ҡуйҙы.