Ҡырмыҫҡалы батыры дүрт дәүләт наградаһына лайыҡ булған

Махсус хәрби операцияла ҡатнашҡан “Таһир” ҡушаматлы яугир Ҡаһарманлыҡ ордены, “Георгий Жуков”, “Хәрби ҡаҙаныштары өсөн” һәм “Хәрби хеҙмәттәшлекте нығытыу өсөн” миҙалдары менән бүләкләнгән. Ҡырмыҫҡалы район хакимиәтенән хәбәр итеүҙәренсә, яугир 10 йыл элек Оборона министрлығы менән контрактҡа ҡул ҡуйған, махсус хәрби операция биләмәһендә алыштар башланғандан алып хеҙмәт итә. Өйҙә батырҙы ҡатыны һәм улы көтә.

Башҡортостандың ике ауылында янғын һүндереү депоһы төҙөлә

Республика Хөкүмәтендә ошо турала белдерелде. Яңы биналар Красноусол һәм Ишембай районы Һайран ауылдарында урынлаша. Красноусолда төҙөлөш тамамланыу алдында. Һайранда эштәр быйыл йәй башланған. Депо киләһе йыл аҙағында файҙаланыуға тапшырылырға тейеш, тип хәбәр итәләр Ғәҙәттән тыш хәлдәр буйынса дәүләт комитетынан.

Өфөлә Радий Хәбиров менән Тура бәйләнешкә әҙерлек барышы менән таныштырҙылар

Меңдән ашыу һорау һәм йөҙҙән ашыу видеомөрәжәғәт ҡабул ителгән. Бөгөн Башҡортостан Башлығы Радий Хәбиров менән Тура бәйләнеш ойошторола. Уға әҙерлек нисек бара? Яуап видеояҙмала.

Өфөлә башҡорт халыҡ әкиәте яңы һүрәтләнештә донъя күрҙе

Зәйнәб Биишева исемендәге «Китап» нәшриәтендә башҡорт халыҡ әкиәте яңы һүрәтләнештә донъя күрҙе. Бынан ары балалар әҙәби әҫәр уҡыу менән бергә, махсус һылтанма аша уйынға ла күсә ала. Яңы мультимедиалы китаптың исем туйы бөгөн Өфөнөң Фатима Мостафина исемендәге 20-се ҡала башҡорт гимназияһында үтте.

Өфөнән Көнсығыш юл төҙөлөшө 80 процентҡа әҙер

Был турала социаль селтәрҙә Транспорт һәм юл хужалығы министры Александр Клебанов хәбәр итә. - Эштәрҙең төп өлөшөн киләһе йылдың беренсе кварталында тамамлау көтөлә. Транспорт йөрөшө асыла, юл, тоннель һәм юл айырсалары файҙаланыуға тапшырыла. Трассаның тирә-яғын тәртипкә килтереүҙе лә киләһе йылда башҡарып сығыу планы ҡуйылған, -тине министр.

Илдә мутлашыусылар әүҙемлешкән

Рәсәй банкынан хәбәр итеүҙәренсә, быйыл өсөнсө кварталда йәғни июль, август һәм сентябрҙә клиенттар иҫәбенә 11 миллионға яҡын киберһөжүм яһалған. Мутлашыусылар алдаҡ юл менән 3,6 миллиард һум үҙләштерә алған. Шул уҡ ваҡытта банктар 1,7 триллион һумлыҡ клиент аҡсаһын һаҡлап алып ҡалған. Өс айҙа 142 мең шикле телефон номеры ғәмәлдән сығарылған.

Өфөлә ВУЗ-ара кампустың тәүге өлөшө тиҙҙән файҙаланыуға тапшырыла

Бөгөн был объектта премьер-министр Андрей Назаров булды. Инженер селтәрҙәре үткәрелгән, бина йылытыла. Көн һайын 3 смена менән 600-ҙән ашыу кеше эшләй. Кампустың тәүге өлөшө быйыл декабрҙә тапшырылырға тейеш. Икенсе өлөшөн киләһе йыл башында төҙөй башлау планлаштырыла.

Ағиҙел йылғаһы атамаһын самолет алды

"Азимут" авиакомпанияһы лайнерҙарының береһе Башҡортостандағы иң ҙур йылға хөрмәтенә "Белая" тип аталды. Республика транспорт һәм юл хужалығы министрлығынан хәбәр итеүҙәренсә, был компанияла хәҙер инде 17 самолетҡа Рәсәй йылғалары исеме бирелгән. Пассажирҙар үҙебеҙҙә сығарылған "Сухой Суперджет" лайнерҙары менән оса.

Радий Хәбиров:"Халыҡтан килгән һорауҙарҙың барыһы ла контролгә алына"

"Тура бәйләнеш" халыҡ проблемаларын яҡындан аңлау өсөн кәрәк. Бөгөн Радий Хәбиров шулай тип белдерҙе. - Һорауҙарҙың ҡайһы берәүҙәрен ҡарап сыҡтым. Хәл итерлек мәсьәләләр. Кемгәлер утын, кемгәлер ихата, газ, юл үткәрергә . Ябай мәсьәләләр тиҙ арала хәл ителә, ҡатмарлыраҡтары контролгә алына, - тине Радий Хәбиров бөгөн "Тура бәйләнеш" барышында.

Башҡортостанда контракт буйынса хәрби хеҙмәткә туплау дауам итә

Хәрби хеҙмәткә һайлап алыу пункттарына 65 йәшкә тиклем ир-егеттәр һәм 45 йәшкәсә ҡатын-ҡыҙҙарға мөрәжәғәт итә ала. Алғы һыҙыҡта ҡатын-ҡыҙҙар медицина хеҙмәткәре, элемтәсе, ашнаҡсы булараҡ ярҙам күрһәтә. Бынан тыш, хәрби юл үтеү теләге булғанда Башҡортостанда формалашҡан исемле батальондарға ҡушылырға мөмкин
Контракт буйынса хәрби хеҙмәткә барырға теләүселәр 117 һандары буйынса шылтырата, военкоматтарға мөрәжәғәт итә ала.

Радий Хәбиров Башҡортостан халҡына яугирҙәргә ярҙам өсөн рәхмәт белдерҙе

"Тылдағылар ҙа ҡаһарманлыҡ ҡыла. Был беҙҙең тыл армияһы. Бөгөн Башҡортостандың бөтә халҡына ярҙам өсөн рәхмәт әйтергә теләйем. Өлкәндәр, йәш ҡыҙҙар маскировка селтәрҙәре үрә. Бындай селтәр беҙҙең яугирҙәргә һәр ваҡыт кәрәк. Гуманитар йөк ташыу ҙа яҡшы ойошторолған. Красный Луч ҡалаһындағы келәт һаҡлана. Бөтә йөк теркәлгән. Беҙҙең бурыс йөктө алып барып еткереү, подразделение командирҙарына хәбәр итеү. Гуманитар йөк оҙатыу махсус операция тамамланғансы дауам итәсәк", -тине Радий Хәбиров бөгөн "Тура бәйләнеш" барышында.

Радий Хәбиров баҡса юлдарын төҙөкләндереүҙе дауам итергә ҡушты

Бөгөн "Тура бәйләнеш" барышында Иглин районында йәшәүсе Елена Калтаева юлдар төҙөлөшө буйынса һорау бирҙе. "Аҡса юлдарҙы тәртиптә тотоу, электр менән тәьмин итеү, сүп-сар сығарыу өсөн тотонола башланы. Баҡса - ул шөғөл урыны, шулай уҡ аҙыҡ--түлек әҙерләү. Баҡсасылар юл һорай. Киләһе йылда бюджетта сығымдар ҡаралған. Ҡаҙна ҙурайһа, тағы өҫтәрбеҙ. Әммә баҡса ширкәттәрендә һайланған етәксе, документтар теүәлләге, тәртип булырға тейеш", -тине Радий Хәбиров.

Туристик объекттарға илткән юлдарҙы ремонтлау программаһы булдырыла

-Күп туристик объекттарға яҡшы юлдар төҙөлә, - тине Радий Хәбиров бөгөн Тура бәйләнеш барышында. - Быйыл Ишембай районында Верхоторҙан Мәләүез районы Воскресенк ауылына тиклем юлды тәртипкә килтерә башланыҡ. Һыуһаҡлағысҡа туристарҙың бер өлөшө ошонан үтә. Туризм министрлығы туристик объекттарға юлдарҙы төҙөкләндереү буйынса программа булдырырға тәҡдим итә. Салауат районында уникаль паркка илткән 4 километр юлда эш алып барыла. Киләһе йылда асабыҙ. Ишембай районында Ҡуҡрауыҡ шарлауығына ла юл төҙөлө. Шүлгәнташҡа ла юл юҡ ине. Хәҙер юл һалынды, интернет бар, газ үткәрәбеҙ, -тине Радий Хәбиров.

"Рәсәй - спорт державаһы" форумын киләһе йылдың көҙөндә уҙғарыу көтөлә

Радий Хәбиров "Тура бәйләнеш" барышында Башҡортостандың "Рәсәй - спорт державаһы" форумын 2024 йылдың октябрендә Өфөлә уҙғарыуҙы тәҡдим итеүе тураһында белдерҙе. "Аныҡ ҡарарҙы Рәсәй Президенты хакимиәте ҡабул итә. Ни өсөн октябрь? Август аҙағында Көрәш һарайын төҙөп бөтөргә планлаштырабыҙ. Форумды шунда уҙғарырға мөмкин. Был спорт һәм физкультура үҫешен анализлау, һөҙөмтәләрҙе барлау буйынса төп форум", - тине Радий Хәбиров.

Рәсәй һәм Ҡаҙағстан төбәктәре форумын Өфөлә уҙғарыу ҙур әһәмиәткә эйә

Республика Башлығы Радий Хәбиров бөгөн "Тура бәйләнеш" барышында Рәсәй һәм Ҡаҙағстан төбәктәре форумының Башҡортостанда уҙғарылыуы ҙур мәртәбә тип белдерҙе. Был йыйын киләһе йылда Өфөлә үтә. - Тышҡы иҡтисади эшмәкәрлек алып барған предприятиелар һөҙөмтәлерәк эшләй. Яңыртыу, хеҙмәт хаҡы түләү өсөн яңы мөмкинлектәр була. Бөгөн Беларусь, Ҡаҙағстан, Үзбәкстан менән авиабәйләнеш булдырылған. Беҙҙең күршеләр - мөһим сауҙа партнерҙары. Хеҙмәттәшлек яңы етештереү ҡеүәттәре асырға булышлыҡ итә, - тине Радий Хәбиров.

Радий Хәбиров Өфө ҡаласығы һәм "Әр-Рәхим" мәсете буйынса фекерен әйтте

Республика Башлығы "Тура бәйләнеш" барышында Өфө ҡаласығы буйынса һорауға яуап бирҙе. Уның әйтеүенсә, халыҡта борсолоу тыуҙырырға кәрәкмәй, бөгөн православ ҡорам төҙөлөшө туҡтатылған. - Андрей Назаров менән был мәсьәлә буйынса кәңәшләштек. Мосолмандар талабы ла ғәҙел, тағы бер ҡорам төҙөгәнсе, мәсетте төҙөп бөтөргә. Был проект менән шәхсән шөғөлләнәсәкмен. Ныҡлап тикшерәбеҙ. Бер манара көмбәҙе килеп төштө инде. Ҡарар ҡабул ителде, финанслау сығанаҡтары билдәле. Быйыл, йә киләһе йыл яҙ манараларҙа эш башлана. Ә ҡорам буйынса әүҙем ҡаршы сыҡтылар, ҡолаҡ һалырға кәрәк. Унда депозитарий була, - тине Радий Хәбиров.

Башҡортостан Палестинанан ҡасаҡтарҙы ҡабул итергә әҙер

Бөгөн Радий Хәбиров "Тура бәйләнеш" барышында Палестина халҡына ярҙам тураһында һорауға яуап бирҙе. - Беҙҙең төп байлыҡ - күп милләтле берҙәмлек. Беҙ һәр төрлө хәлгә әҙер булырға тейеш. Башҡортостанға мәғлүмәти яҡтан күпләп һөжүм итәләр. Милләт-ара татыулыҡты нығытырға кәрәк. Беҙ күпмелер кешене ҡабул итергә әҙер. Ундай мөмкинлек бар, -тине Радий Хәбиров. Палестина халҡына миллиард ярым һум ярҙам, 20 тонна йөк тупланған. Ылау ойошторолоуы көтөлә.

Юлай Ильясов доброволец булып махсус хәрби операцияға юллана

Көйөргәҙе район хакимиәте башлығы Юлай Ильясов махсус хәрби операцияла ҡатнашыу тураһында ҡарар ҡабул иткән. Был турала бөгөн "Тура бәйләнеш" барышында Радий Хәбиров белдерҙе. "Юлай Талха улы контракт төҙөнө. Ул еңел булмаған ҡарар ҡабул итте. Беҙҙең командала лайыҡлы кешеләр эшләй", - тине Радий Хәбиров.

Башҡортостан Башлығы тура эфирҙа Башҡортостан халҡы менән аралашты

Радий Хәбировҡа 4 меңдән ашыу һорау килде һәм 216 видеомөрәжәғәт әҙерләнгәйне. Аралашыу өс сәғәт ярымдан ашыу барҙы. Тура бәйләнештә республика етәксеһе көнүҙәк һорауҙарға яуап бирҙе. Махсус хәрби операция, торлаҡ-коммуналь хужалыҡ, социаль объекттарҙы төҙөкләндереү һәм юлдарҙы тәртипкә килтереү төп темалар иҫәбендә булды. Эфирға эләкмәй ҡалған һорауҙар ҙа иғтибарға алынды. Улар хәл ителеү өсөн төрлө ведомстволарға ебәрелә.

Радий Хәбиров менән тура бәйләнеш: халыҡты ниндәй мәсьәләләр борсой

Бөгөнгө тура бәйләнеш Радий Хәбиров өсөн бишенсеһе. Башҡортостан Башлығы 2018 йылдан алып халыҡтың һәм журналистарҙың һорауҙарына яуап бирә.
Йылдан-йыл республика етәксеһенә мөрәжәғәт итеү мөмкинлектәре арта, тура линияны трансляциялау даирәһе киңәйә. Был юлы Радий Хәбировҡа һорауҙарҙы социаль селтәрҙәр, Башҡортостан башлығының рәсми сайтында бирергә мөмкин ине. Тура бәйләнеш республиканың барлыҡ теле һәм радиоканалдары, социаль селтәрҙәр аша трансляцияланды.