Башҡортостанда ирекле батальондар төҙөү буйынса үҙәк штабына - 9 ай

Тыуған илгә һөйөү, хөрмәт һәм хәрби бурысҡа тоғролоҡ. Махсус хәрби операцияла ҡатнашыусыларҙы ошондай сифаттар берләштерә.
Быйыл февралдә Башҡортостанда ирекле батальондар төҙөү буйынса үҙәк штаб ойошторолдо. Тәүге булып Даян Мурзин исемендәге батальонға ир-егеттәр ҡабул ителә башланды. Һуңғараҡ башҡа исемле батальондарҙы ла ойошторорға команда килде. 9 ай эсендә штаб коллективы бер нисә мең кешене йыйып, оборона министрлығына һәм Росгвардияға оҙата.

Зубов ауылы «Белем» мәғариф үҙәге хеҙмәткәрҙәре яугирҙарға «Нива» оҙатырға әҙерләнә

Өфө районы яугирҙарҙы ҡеүәтләй. Зубов ауылы «Белем» мәғариф үҙәге хеҙмәткәрҙәре махсус хәрби операция биләмәһенә «Нива» машинаһын оҙатырға әҙерләнә. Техниканы учреждение директоры интернет киңлектәрендә табып, һатып алған. Ирекмәндәр машинаны ремонтлап, буятҡан. Ошо көндәрҙә уға махсус наклейкалар ҙа йәбештерелгән. Машина декабрҙә Өфө районынан гуманитар конвой сафында Украиналағы хәрби бәрелештәр биләмәһенә оҙатыласаҡ.

Мәктәпкәсә белем биреү учреждениеларында үткәрелгән төҙөкләндереү эштәре тикшерелде

Балалар баҡсаһына сират кәмене. Башҡортостан буйынса баш федераль инспектор Алексей Касьянов мәктәпкәсә белем биреү учреждениеларында үткәрелгән төҙөкләндереү эштәре һөҙөмтәһе менән танышты. Тикшереү Волга буйы федераль округында Рәсәй президентының тулы хоҡуҡлы вәкиле Игорь Комаров ҡушыуы буйынса үткәрелде. Мәктәпкәсә белем биреү системаһын модернизациялау дәүләт программаһы Өфөнөң 144-се балалар баҡсаһында дүрт, 324-се балалар баҡсаһында ике төркөм асыу мөмкинлеге бирҙе.

Өфөлә Халыҡ-ара эшҡыуарлыҡ аҙналығы үтә

Форумда Рәсәй төбәктәренән һәм 21 илдән делегациялар ҡатнаша. Эшлекле йыйында бизнесҡа дәүләт ярҙамы саралары, төҙөлөштөң һанлы киләсәге, электрон сауҙа, заман шарттарында эшҡыуарлыҡты яҡлау ҡарала.Рәсәйҙең Төркиәләге сауҙа вәкиллегендә Башҡортостан вәкиле Марат Танһыҡҡужин белдереүенсә, йыл башында логистика һәм аҡса әйләнешендә ҡатмарлыҡ булып алған. Элек сауҙа долларҙа алып барылһа, хәҙер төрөк лираһы һәм Рәсәй һумы менән иҫәпләнә.

Башҡортостанда сит ил студенттары һаны артыуы көтөлә

Был турала Өфөлә Халыҡ-ара бизнес аҙналығында белдерелде. Евразия халыҡтары ассамблеяһы эксперттары фаразлауынса киләсәктә башҡа төбәктәрҙән һәм илдәрҙән белем алырға килеүселәр һаны биш тапҡырға артыуы мөмкин. - Евразия фәнни-мәғариф үҙәгенең студентар кампусын булдырыу студенттар йәлеп итеүгә ҡеүәт бирәсәк, - тип белдерҙе Республика мәғариф һәм фән министры Илдар Мәүлетбирҙин.

Дәүләкән районы Ивановка ауылы янында юл төҙөкләндерелде

Ремонт "Хәүефһеҙ сифатлы юлдар" милли проекты буйынса башҡарылды. Бүздәк-Дәүләкән трассаһының 3 километры тәртипкә килтерелде. Быйыл милли проект буйынса 74 километр төҙөкләндерелергә тейеш, тип хәбәр итәләр Транспорт һәм юл хужалығы министрлығынан.

Теләге булғандар хәрби операцияла ҡатнашыу өсөн контракт төҙөй ала

Республика хәрби комиссариатында буласаҡ яугирҙарға хәрби хеҙмәткә инеү тәртибен, льготалар һәм түләүҙәр тураһында консультация бирә, ниндәй документтар кәрәклеген аңлата. Контракт төҙөүгә запастағы граждандар, яңы хәрби хеҙмәтен тултырыусылар, шулай уҡ хәрби хеҙмәттә булмаған, әммә юғары йәки урта һөнәри белем алған ир-егеттәр хоҡуҡлы, ти контракт буйынса хәрби хеҙмәткә һайлап алыу пункты инспекторы Азамат Шәрәфетдинов.

Башҡортостанда ашлыҡ үҫтереү өсөн баҫыуҙар инвесторға сауҙа үткәрмәйенсә бирелә

Ер һәм мөлкәт мөнәсәбәттәре министрлығында аграр компанияһы менән килешеү төҙөлдө. Благовар районында 328 гектар биләмәлә бөртөклө һәм техник культуралар үҫтереү ҡарала. Бының өсөн 120 миллион һум инвестиция йәлеп ителә. Республика ҡануниәтенә ярашлы, фермерҙар ашлыҡ үҫтереү өсөн баҫыуҙарҙы сауҙа үткәрмәйенсә 5 йылға тиклем ҡуртымға алырға хоҡуҡлы. Быйыл 27 мең гектарҙа 225 ер биләмәһе ваҡытлыса файҙаланыуға тапшырылған.

Башҡортостанда йыл башынан 4 мең 200-ҙән ашыу социаль контракт төҙөлгән

Ғаилә, хеҙмәт һәм халыҡты социаль яҡлау министрлығынан хәбәр итеүҙәренсә, халыҡҡа 607 миллион һумлыҡ финанс ярҙам күрһәтелгән. Социаль контрактҡа ярашлы, аҡсаны үҙ ҡарамағыңа тотонорға ярамай. Уны эшҡыуарлыҡ менән шөғөлләнеү, ҡайтанан белем алыу, ярҙамсыл хужалыҡ булдырыу йәки башҡа йүнәлештәрҙә ҡулланырға кәрәк. Мәҫәлән, бизнес алып барыу өсөн 350 мең һум субсидия юлларға була.

🎖 «Унда минең улым»: Стәрлетамаҡ районынан уҙаман улы артынан махсус операцияға киткән

Стәрлетамаҡ районынан Николай исемле уҙаман быға тиклем эшҡыуарлыҡ менән шөғөлләнгән. Әммә көтмәгәндә килемле бизнесын ҡалдырған һәм үҙ теләге менән махсус операцияға киткән.

- 2022 йылдың сентябрендә кесе улымды алып киткәндәре бирле үҙемә урын таба алманым. Уны яу яланына оҙатыу бик ауыр булды. Урамдан үтергә лә уңайһыҙландым. Кешеләр, улы тегендә һуғыша, ә атаһы өйҙә ултыра, тиер кеүек ине. Үҙем дә ярҙамға барырға булдым. Унда минең улым, унда беҙҙең егеттәр - кемдәрҙең ғәзиз балалары. Ҡартатайым Бөйөк Ватан һуғышында ҡатнашҡан, хәбәрһеҙ юғалған. Ул саҡта атаһы артынан улы, әсәйемдең ағаһы, фронтҡа киткән. Бөтә яу юлын үтеп, тыуған яғына Еңеү менән ҡайтып төшкән. Беҙ еңеүселәрҙең вариҫтары. Шуға күрә мин үҙемдең ҡарарымда икеләнмәнем. Ғәҙәттәге тормошта ни эшләргә белмәнем. Үҙем генә йәшәйем, ҡатыным менән айрылышҡанбыҙ. Әммә ҡаты шарттарға яраҡлаша алырыма һәм һынауҙарҙы йырып сығырыма ышанысым ҙур ине, - ти яугир.

Наши на передовой.

Башкирский батальон им. М. Шаймуратова.

Привет от «Юлдаша»

Башҡортостанда яңы скверҙар һәм аллеялар барлыҡҡа килә

“Уңайлы ҡала мөхите булдырыу” федераль проектына ярашлы быйыл 123 йәмәғәт биләмәһе тәртипкә килтерелде. Торлаҡ-коммуналь хужалыҡ министрлығынан белдереүҙәренсә, парк һәм скверҙарҙа яҡтыртҡыстар ҡуйыла, юлға асфальт түшәлә, йәйәүлеләр һуҡмаҡтары барлыҡҡа килә, арт-объекттар урынлаштырыла. Мәҫәлән, Күгәрсен районы үҙәге – Мораҡ ауылында элекке баҙар майҙанында ял итеү урыны булдырылды. Бында юлға таш түшәлгән, балалар майҙансығы йыһазландырылған, газон ултыртылған һәм скейт-парк урынлаштырылған.

Башҡорт дәүләт ҡурсаҡ театрында төҙөлөш эштәре тамамланып килә

Ремонттан һуң 300 урынлыҡ ҙур һәм 135 урынлыҡ бәләкәй тамаша залы була. Йәш тамашасылар тәүге спектаклдәрҙе Яңы йыл байрамдары алдынан ҡарай ала. “Труппа яңы бинаға күсеүҙе түҙемһеҙлек менән көтә”, - ти театр директоры Альберт Имаметдинов. Төҙөкләндерелгәндән һуң театр бинаһының дөйөм майҙаны ике тапҡырға арта. Бынан тыш, театр янындағы биләмә тәртипкә килтерелә. Бында асыҡ һауалағы музей була.

Өфөлә төп яңы йыл ҡаласыҡтарын биҙәү үҙенсәлектәре асыҡланды

Баш ҡала хакимиәтенән хәбәр итеүҙәренсә, Конгресс-холл һәм Ҡала советы алдындағы майҙандарҙы байрамса биҙәү өсөн 41,5 миллион һум һалынған. Боҙ ҡаласыҡтары 22 декабргә әҙер булырға тейеш. Төп майҙандарҙа 32 метрлыҡ пиксель шыршылар ҡуйыла, Ҡыш Бабай һәм Ҡарһылыу һындары, төрлө боҙ скульптуралары ҡорола, гирляндалар эленә. Ҡала советы алдындағы майҙанда Ҡыш Бабай ихатаһы ла урынлаштырыла.

Өфөлә халыҡ-ара эшҡыуарлыҡ аҙналығы дауам итә

Өфөлә ун алтынсы халыҡ-ара эшҡыуарлыҡ аҙналығы дауам итә. Хәтерегеҙгә төшөрәбеҙ, форумда быйыл дүрт меңдән ашыу кеше ҡатнаша. Тармаҡ белгестәре иҡтисадта, бизнеста киләсәккә йүнәлештәр билдәләй.

«Башҡортостан» полкы яугирҙарының бер төркөмө йәнә МХО биләмәһенә юлланды

Ҡыҫҡа ваҡытлы ялдан һуң «Башҡортостан» мотоуҡсылар полкы яугирҙарының бер төркөмө йәнә махсус хәрби операция биләмәһенә юлланды.
Көс туплап, туғандары менән ваҡыт үткәргән яҡташтарыбыҙ Ватанды яҡларға әҙер. Хәрбиҙәре оҙатыу тантанаһы «Өфө-Арена» спорт һарайы алдында үтте.

Өфөлә Доставаловсыларға тиҙ ярҙам машинаһы оҙатты

Өфөнөң Шәһит Хоҙайбирҙин исемендәге ғаилә тәрбиәһенә булышлыҡ итеү үҙәге Доставалов исемендәге батальон яугирҙарына тиҙ ярҙам машинаһы оҙатты.
Үҙәктә әлеге ваҡыттта 5 тиҫтәгә яҡын етем һәм ата-әсә ҡарауынан мәхрүм ҡалған балалар йәшәй. Улар махсус хәрби операция башланғандан алып төрлө социаль проекттарҙа ҡатнаша, яугирҙарға хаттар яҙа, һүрәттәр төшөрә. Учреждениеға медицина техникаһы менән баш ҡалала йәшәүсе Александр Торосенко ярҙам иткән.

Благовар районы Иҫке Абзан ауылы халҡы дәүләт программаһында ҡатнаша

Благовар районы Иҫке Абзан ауылында йәшәүселәр урындағы зыяратты төҙөкләндермәксе. Биләмәне кәртәләү һәм ҡәберлектәрҙе тәртипкә килтереү маҡсатында ауыл халҡы «Урындағы башланғыстарға ярҙам» программаһына заявка тапшырған.

Юл яны сервисы менән шөғөлләнеүселәргә дәүләт ярҙамы күрһәтелә

Өфөлә Халыҡ-ара бизнес аҙналығында стратегик сессия барышында юлда хеҙмәтләндереү мәсьәләһе күтәрелде. Башҡортостан Хөкүмәте беренсе вице-премьеры – Иҡтисади үҫеш һәм инвестицион сәйәсәт министры Рөстәм Моратов әйтеүенсә, республикала тиҙ ҡорола торған модулле сервис үҙәктәрен төҙөү ҡарала. Әле республикала 1 мең 300-гә яҡын юл яны хеҙмәтләндереү объекты иҫәпләнә. Һуңғы өс йылда 40 процентҡа артҡан. Башҡортостанда Юл яны сервисын үҫтереү концепцияһы тормошҡа ашырыла.

🏠Бөгөндән Башҡортостанда хәләл ипотека алырға мөмкин

Рәсәйҙең ике төбәгендә - Башҡортостанда һәм Дағстанда ислам ипотекаһы булдырылды.

Шәриғәт ҡанундары буйынса фатирҙы төҙөлгән йә әле төҙөлөп ятҡан йорттан алырға мөмкин. Шәхси йорттар һәм таунхаустар һатып алыу рөхсәт ителмәй. Ипотекаға тәүге иғәнә 30 проценттан кәм булмаҫҡа тейеш. Максималь мөҙҙәте - 20 йыл. Фатирҙың хаҡы 300 меңдән алып 100 миллион һумға тиклем тәшкил итергә мөмкин.