“Рәсәй” халыҡ-ара күргәҙмәһендә Башҡортостан шыршыһы ҡуйылды

Урман ҡунағы милли ҡурсаҡтар, алтын сармат боландары, башҡорт милли уйын ҡоралдары, милли биҙәүестәр менән биҙәлгән. “Рәсәй шыршылары” проекты буйынса Мәскәүҙә 89 яңы йыл шыршыһы урынлаштырыла. Улар Халыҡ хужалығы ҡаҙаныштары күргәҙмәһе биләмәһенең төп аллеяһында ҡуйыла. 3 декабрҙә форумда Башҡортостан көнө үтә.

Өфөлә үткән Рәсәй һәм Белоруссия төбәктәренең унынсы форумына йомғаҡ яһалды

Федерация советында быйыл июндә Өфөлә үткән Рәсәй һәм Белоруссия төбәктәренең унынсы форумына йомғаҡ яһалды. Кәңәшмәлә Башҡортостан башлығы Радий Хәбиров ҡатнашты. Ил парламентының юғары палатаһы рәйесе Валентина Матвиенко республиканың башҡарған эшен юғары баһаланы. Майҙансыҡтарҙа Рәсәй менән Белоруссия төбәктәре һәм компаниялары араһында рекордлы һанда килешеүҙәр төҙөлгән.

Башҡортостан Фәләстанды ташлап китергә мәжбүр булған граждандарҙы ҡабул итергә әҙер

Башҡортостан башлығы Радий Хәбиров Фәләстанды ташлап китергә мәжбүр булған граждандар өсөн ваҡытлыса урынлашыу пункттарын ойошторорға ҡушты. Рәсәйҙең Ғәҙәттән тыш хәлдәр министры Александр Куренков сил ил ҡасаҡтарын урынлаштырыу мәсьәләһе буйынса кәңәшмә үткәрҙе. Ултырышта 250-гә яҡын кешене Башҡортостанға ебәреү мөмкинлеге ҡаралды.

Тыуған яғына ялға ҡайтҡан яугирҙар отпусктан һуң махсус хәрби операцияға юлланды

Мобилизацияланған яҡташтарыбыҙҙы алғы һыҙыҡҡа оҙатырға Башҡортостан Хөкүмәте Премьер-министры урынбаҫары Ирек Сәғитов, егеттәрҙең яҡындары, дуҫтары килде. Егеттәр махсус хәрби операция биләмәһендә бер йылдан ашыу, ошо ваҡыт эсендә улар икенсе тапҡыр ялға ҡайтҡан. Ҡыҫҡа ваҡытлы отпуск мәлендә яугирҙар туғандары, дуҫтары янында булған, балалар, студенттар менән осрашыуҙарҙа ҡатнашҡан.

Өфөлә «Ватан һаҡсылары кубогы» төбәк-ара комплекслы физкультура сараһы башланды

Өфөлә махсус хәрби операция ветерандары араһында «Ватан һаҡсылары кубогы» төбәк-ара комплекслы физкультура сараһы башланды. Турнир Рима Батталова исемендәге спорт әҙерлеге үҙәгендә ике көн дауамында барасаҡ. Унда Волга буйы һәм Урал федераль округтарынан тиҫтәләрсә ветеран ҡатнаша. Башҡортостан намыҫын 14 яугир яҡлаясаҡ.

Өфө-Инйәр-Белорет трассаһында төҙөкләндереү эштәре тамамланды

Өфө-Инйәр-Белорет трассаһында төҙөкләндерелгәндән һуң Ҡамайылға аша күпер транспорт хәрәкәтенә асылды. Объектта эш «Хәүефһеҙ һәм сифатлы юлдар» милли проекты буйынса башҡарылды.

Медицина өлкәһе заманса ҡоролмалар менән байытыла

Республикала пациенттар көнкүрешен еңелләштереү өсөн төрлө саралар күрелә. Әйтәйек, Ҡырмыҫҡалы районында «Беренсел звеноны модернизациялау» федераль проекты сиктәрендә фельдшер-акушерлыҡ пункттарына һәм үҙәк район дауаханаһына заманса ҡоролмалар ҡуйылған.

Бөгөн - Бөтә донъя телевидение көнө

1996 йылдан билдәләнгән дата алыҫтан сигнал тапшырыу өлкәһендәге алдынғы технологияның барлыҡҡа килеүе менән бәйле түгел. Ә телевидениеның глобаль әһәмиәтен һәм уның мөмкинлектәрен һыҙыҡ өҫтөнә алыу.
Һөнәри байрамы айҡанлы «Башҡортостан» телерадиокомпанияһында юбилярҙар һәм телевидение эшмәкәрлегенә тос өлөш индергән хеҙмәткәрҙәр тәбрикләнде.

Башҡорт дәүләт ҡурсаҡ театрында төҙөлөш эштәре тамамланыу алдында

Реконструкциянан һуң уның 300 урынлыҡ ҙур һәм 135 урынлыҡ бәләкәй тамаша залы буласаҡ. Тулыраҡ киләһе яҙмала.

Мәскәүҙә “Башҡорт иле” тигән беренсе Бөтә Рәсәй фестивале үткәрелә

Башҡорт мәҙәниәте байрамы 30 ноябрҙә була. Уны баш ҡалалағы “Аҡ тирмә” үҙәге ойоштора. Проект милли мәҙәниәтте һаҡлау, традицияларҙы һәм телде танытыу, кәсепселек һәм халыҡ ижадын үҫтереү маҡсатын ҡуя. Фестивалдә түңәрәк өҫтәл, оҫталыҡ дәрестәре, башҡорт балы күргәҙмәһе һәм концерт программаһы ҡаралған.

Республикала Бөрө–Таҙтүбә–Һатҡы юлын төҙөкләндереү тамамлана

Юлсылар Дыуан һәм Ҡариҙел районындағы юл өлөшөн яңырта. Ноябрҙә асфальт һалынған, юл ситенә таш түшәлгән. Объектта 100 берәмек техника һәм 300-гә яҡын хеҙмәткәр эшләй. Трасса “Хәүефһеҙ сифатлы юлдар” милли проекты буйынса төҙөкләндерелә. Ремонтты йыл аҙағында теүәлләү көтөлә.

Башҡортостан Ҡытайға ауыл хужалығы тауарҙары һатыуҙы арттыра

Республика ауыл хужалығы министрлығы һәм Ҡытайҙың халыҡ-ара бизнес үҫеше үҙәге ошо турала килешеү төҙөргә ниәтләй. Документҡа Өфөлә Халыҡ-ара бизнес аҙналығында ҡул ҡуйыу көтөлә. - Ҡытай ауыл хужалығы продукцияһын экспортлау өсөн өҫтөнлөклө йүнәлеш. Республика был дәүләт менән сауҙа итә. Тауар әйләнешен тағы арттырыу мөмкинлеге бар, - тине вице-премьер-Ауыл хужалығы министры Илшат Фәзрахманов. Халыҡ-ара бизнес аҙналығы бөгөн башлана.

Башҡортостан йорттарҙы ремонтлау буйынса алдынғы төбәктәр исемлегендә

Рәсәй хөкүмәте рәйесе урынбаҫары Марат Хөснуллин белдереүенсә, быйыл илдә 98 миллион ярым квадрат метр торлаҡ төҙөкләндерелгән. Алдынғы төбәктәр рәтендә Башҡортостан да аталды. Беҙҙең республикала 738 йорт ремонтланған.

Башҡортостан он экспортлауҙы арттырған

Быйыл республика предприятиелары сит илдәргә 6 мең 300 тонна тауар оҙатҡан. Башҡортостан онон Әрмәнстан, Грузия Ҡаҙағстан, Төркмәнстан һәм Үзбәкстан алған. Сит илдәргә сығарылған продукция фитосанитар тикшереү үткән, сифат талаптарына тулыһынса яуап бирә, тип хәбәр итәләр Ауыл хужалығын күҙәтеү хеҙмәтенән.

Башҡортостан һәм Ҡырғыҙстан мәғариф өлкәһендә бәйләнештәрҙе нығыта

Бөгөн Мифтахетдин Аҡмулла исемендәге Башҡорт дәүләт педагогия университетында сит ил делегацияһы менән осрашыу булды. Өфө һәм Бишкәк ҡалаһы юғары уҡыу йорттары араһында хеҙмәттәшлек итеү тураһында килешеү төҙөлдө. “Манас - Урал” кабинетын асыу тантанаһы үтте. “Киләһе йылда Башҡортостан уҡытыусыларын Ҡырғыҙстанға эшкә саҡырырға ниәтләйбеҙ”, - тип белдерҙе Иссык-күл дәүләт университеты ректоры Асҡарбәк Иманбаев.
”Манас - Урал” кабинеты ике туғандаш халыҡтың дуҫлығын сағылдыра”, - тип белдерҙе Башҡорт дәүләт педагогия университеты ректоры Салауат Сәғитов.
Бөгөн Башҡортостан университеттарында 150-гә яҡын ҡырғыҙ студенты белем ала.

Халыҡ-ара бизнес аҙналығында эшҡыуарлыҡҡа дәүләт ярҙамы күрһәтеү саралары ҡарала

Мәртәбәле форум Өфөлә бөгөн башланды. Унда бизнес менән шөғөлләнеүҙә һанлы алымдарҙы ҡулланыу мөмкинлектәре күрһәтелә. Халыҡ-ара бизнес аҙналығында 15 илдән делегациялар ҡатнаша.

Башҡортостан Палестинанан мәжбүри күскенселәрҙе ҡабул итергә әҙер

Рәсәй Ғәҙәттән тыш хәлдәр министры Александр Куренков кәңәшмә үткәрҙе. Унда Палестинанан күскенселәрҙе ҡабул итеү мәсьәләһе ҡаралды. Беҙҙең республикаға 250 кеше ебәреү мөмкинлеге өйрәнелә. Радий Хәбиров Республика Хөкүмәтенә ваҡытлыса йәшәү урындары әҙерләргә ҡушты. Быға тиклем Башҡортостан Башлығы диндарҙарҙың Палестина халҡына гуманитар ярҙам күрһәтеү башланғысын хупланы. Бының өсөн берҙәм логистика үҙәге майҙансығы тәҡдим ителде. Башҡортостан мосолмандары Диниә назараты рәйесе Айнур Бирғәлин әйтеүенсә, республика халҡы ауыр тормош хәлендә ҡалғандарға һәр ваҡыт ярҙам күрһәтә.

Рәсәйҙә киләһе йылда әсәлек капиталы икенсе бала өсөн 834 мең һумға етә

Башҡортостан буйынса Социаль фондтан хәбәр итеүҙәренсә, 1 февралдән түләү 7,5 процентҡа арта. Әсәлек капиталын балаға белем биреү, йәшәү шарттарын яҡшыртыу, әсә кешенең буласаҡ пенсияһы өсөн тотонорға була, шулай уҡ сабыйға өс йәш тулғансы ай һайын түләүҙәр алып барырға мөмкин.

Баш ҡалала халыҡ-ара эшҡыуарлыҡ аҙналығы асылды

Бөгөн Өфөлә «Иртәгәнән һуң. Эшҡыуарлыҡ күҙлегенән» тип аталған халыҡ-ара эшҡыуарлыҡ аҙналығы асылды. Ун алтынсы халыҡ-ара бизнес аҙналығы быйыл 4 меңдән ашыу кешене берләштерә. Сарала Рәсәй төбәктәренән һәм 21 илдән, шул иҫәптән Ҡытай, Ҡаҙағстан, Үзбәкстан, Белоруссия, Төркиә, Иран һәм башҡа илдәрҙән делегациялар ҡатнаша.

Башҡортостанда тағы 19 меңдән ашыу кеше таҙа эсәр һыу менән тәьмин ителде

“Торлаҡ һәм ҡала мөхите” милли проектына ярашлы, Әлшәй районы үҙәге – Раевка ауылында һыу таҙартыу ҡоролмалары төҙөү тамамланды. Торлаҡ-коммуналь хужалыҡ министрлығынан хәбәр итеүҙәренсә, киләһе йылда Бөрө, Туймазы, Шишмә, Ҡыйғы, Кушнаренко райондары һәм Өфө ҡалаһында һыу системаларын яңыртыла. Һуңғы биш йылда 23 объекта төҙөкләндереү үткәрелгән. Милли проектҡа ярашлы, 2024 йылда республика халҡының 91 проценты таҙа эсәр һыу менән тәьмин ителергә тейеш.