Радий Хәбиров "Патриот"тың ашханаһында булды

Бөгөн Республика Башлығы Радий Хәбиров - Шишмә районында. Ул "Патриот" паркында яңы ашхана бинаһында булды, Башҡортостанда "Аванград" уҡытыу-методика үҙәге селтәрен ойоштороу буйынса кәңәшмә уҙғарҙы. Ашхана бер юлы 250 кешене хеҙмәтләндерә ала. Бинала шулай уҡ лекция залы һәм кинотеатр урынлаштырыу мөмкинлеге бар. Киләсәктә "Аванград" уҡытыу-методика үҙәге филиалдарын Баймаҡ, Ҡыйғы һәм Стәрлебаш райондарында асыу планлаштырыла.

Бәләбәй районы Приют ҡасабаһында күп фатирлы йорт ихаталары тәртипкә килтерелде

Һүҙ Беренсе Май, Карл Маркс, Тыныслыҡ Бульвары һәм ВЛКСМ-дың 50 йыллығы урамындағы йорттар тураһында бара. Ихатала асфальт яңыртылды, тротуар һәм һуҡмаҡтарға таш түшәлде, яҡтыртыу ҡоролмалары ҡуйылды. Балалар һәм спорт майҙансыҡтарына йомшаҡ резина йәйелде, тип хәбәр итәләр Торлаҡ-коммуналь хужалыҡ министрлығынан. Быйыл республикала 200-ҙән ашыу ихата төҙөкләндерелде. Программаны тормошҡа ашырыу өсөн 1 миллиард һумдан ашыу аҡса бүленгән.

Башҡортостанда айырыуса һаҡланған яңы тәбиғәт биләмәләре барлыҡҡа килә

Дәүләт Йыйылышы – Ҡоролтайҙан хәбәр итеүҙәренсә, экологияға бәйле закон проекты әҙерләнә. Уға ярашлы урындағы үҙидара органдары айырыуса һаҡланған тәбиғәт биләмәләре булдыра ала. Улар туристик-рекреацион урын һәм тәбиғәт резерваты тип атала. Закон проекты тирә-яҡты һаҡлау һәм туризмды үҫтереү маҡсатынан ҡабул ителә. Документ киләһе аҙнала парламенттың пленар ултырышында ҡарала.

Башҡортостан халҡы география буйынса белемен тикшерә ала

Халыҡ-ара акция иртәгә башлана. Баш ҡала китапханаларында 20 майҙансыҡ булдырыла. Тесты онлайн да үтергә мөмкин. Һорауҙар “Кеше һәм география” темаһы буйынса төҙөлгән. Диктант илдә иғлан ителгән Педагог һәм остаз йылына арнала. Былтыр Башҡортостан акцияға ҡушылыусылар һаны буйынса беренсе урынға сыҡты. Республиканан география диктантында 30 меңдән ашыу кеше ҡатнашҡан.

«Патриот» хәрби-патриотик паркында Рус география йәмғиәтенең Башҡортостан бүлексәһе ултырышы үтте

Шишмә районындағы «Патриот» хәрби-патриотик паркында Рус география йәмғиәтенең Башҡортостан бүлексәһе ултырышы үтте. Республика башлығы Радий Хәбиров етәкселегендә уҙған сарала төбәк туризмын үҫтереүгә булышлыҡ иткән телевизион проект авторҙары бүләкләнде. БСТ каналында сыҡҡан «Башҡорт каникулдары» тапшырыуы ла юғары баһаланды. Ултырышта республика тризмы менән бәйле киләһе йылға яңы маҡсаттар ҡуйылды.

Радий Хәбиров «Патриот» хәрби-патриотик паркында студенттар менән осрашты

Башҡортостан башлығы Радий Хәбиров Шишмә районындағы «Патриот» хәрби-патриотик паркында студенттар менән осрашты. Республика етәксеһе әүҙем ҡарашлы йәштәр, ирекмәндәр менән аралашып, уларҙың һорауҙарына яуап бирҙе. Радий Хәбиров Башҡортостан үҫешенең төп йүнәлештәре, төбәктә белемле студенттар киләсәге өсөн ойошторолған мөмкинлектәр тураһында һөйләне.

Уҡыу йылы башынан республика мәктәптәрендә 30 стоматология кабинеты асылған

Бөгөн баш ҡаланың тағы бер мәғариф учреждениеһы махсус кабинетлы булды. Уны төҙөү һәм йыһазландырыу «Ҡанатлан» мәғариф проектының «Сәләмәт йылмайыу» модуле сиктәрендә башҡарыла. Әйткәндәй, былтырғы уҡыу йылында 130 меңгә яҡын бала һәм 5 мең уҡытыусы теш табибы ярҙамы алған.

Кушнаренко районында Илвир Ғәлләмовҡа бюст асылды

Кушнаренко районы Ҡалтай ауылында махсус хәрби операцияның тәүге көндәрендә үк һәләк булған Илвир Ғәлләмовҡа бюст асылды, самбо һәм билбау көрәше буйынса асыҡ турнир үтте. Өлкән лейтенант Илвир Ғәлләмов хәрби офицер, танк взводы командиры була. Башҡортостан башлығы Радий Хәбиров ҡаһарман яҡташыбыҙҙы һуңғы юлға оҙатҡанда яугирҙың исемен мәңгеләштереү бурысын ҡуйғайны. Ҡалтай мәктәбендә мемориаль таҡтаташ, музейҙа стенд, класында Герой партаһы асылған.

Башҡортостан һәм Үзбәкстан араһында тауар әйләнеше 17 процентҡа артҡан

Тышҡы иҡтисади бәйләнештәр һәм конгресс эшмәкәрлеге министрлығынан хәбәр итеүҙәренсә, сит илгә экспорт та күбәйә. Үзбәкстанға минераль ашлама, ағас, ҡағыҙ, металл, туҡыма, аяҡ кейеме, аҙыҡ-түлек оҙатыла. Декабрҙә сит илгә бизнес-сәфәр ойошторола. Үзбәкстанға барырға теләгән эшҡыуарҙар һәм компаниялар министрлыҡҡа мөрәжәғәт итә ала.

Өфөлә “Аҫыл таштар симфонияһы” тигән күргәҙмә эшләй

Ул Силәбе өлкәһенең Илмән ҡурсаулығын ойоштороусы академик, ғалим Александр Ферсмандың тыуыуына 140 йыл тулыуға арналған. “Аҫыл таштар симфонияһы” күргәҙмәһе менән археология һәм этнография музейында 10 февралгә тиклем танышырға була.

Рәсәй мәктәптәрендә мобиль телефон ҡулланыу тыйыла һәм хеҙмәт дәрестәре индерелә

Дәүләт Думаһы депутаттары беренсе уҡыуҙа мәғарифҡә бәйле законға үҙгәреш ҡабул итте. Уға ярашлы, дәрестә мобиль телефондарҙы ҡулланыу сикләнә, ғәҙәттән тыш хәлдәр ваҡытында ғына шылтыратырға рөхсәт ителә. Бынан тыш, бөтә мәктәптәрҙә лә мотлаҡ хеҙмәт дәресе индерелә. Хеҙмәт тәрбиәһе эшһөйәрлеккә өйрәтә һәм бала үҫеше өсөн яҡшы нигеҙ булып тора, тип белдерә депутаттар.

Республика халҡы макулатураны әүҙем йыя

Тәбиғәттән файҙаланыу һәм экология министрлығынан хәбәр итеүҙәренсә, “БумБатл” акцияһы барышында 128 тонна ҡағыҙ тапшырылған. Был күрһәткес буйынса Башҡортостан илдә алдынғы 10 төбәк исемлегенә ингән. Экоакция ай дауамында барҙы. Унда 2,5 миллион кеше ҡатнашҡан һәм 100 мең тоннанан ашыу макулатура йыйылған.

Быйыл республикала 1 меңдән ашыу пилотһыҙ осҡос сығарылған

Улар махсус хәрби операция биләмәһенә ебәрелә. Башҡортостан Сәнәғәт, энергетика һәм инновациялар министры Александр Шельдяев ошо турала хәбәр итте. Бөгөн беҙҙә радиоэлектроника технопаркы төҙөлә. 2025 йылда пилотһыҙ осҡостар ғилми-етештереү үҙәге һалына башлай.

Башҡортостанда йыл башынан 2 миллион 600 мең квадрат метр торлаҡ сафҡа индерелгән

Уның 862 мең квадрат метры күп ҡатлы йорттарға, миллион ярым квадрат метрҙан ашыуы шәхси секторға тура килә. 2022 йыл менән сағыштырғанда, күрһәткес яҡынса 5,5 процентҡа күберәк. Был һандар бөгөн Республика менән идара итеү үҙәгендә үткән аҙналыҡ оператив кәңәшмәлә иғлан ителде.

Радий Хәбиров МХО-ла ҡатнашыусы яугирҙарҙы бүләкләне

Эшләйбеҙ, туғандар! Башҡортостан полкы яугирҙары шулай тип белдерә. Уларҙың дөйөм фекерен, бөгөн Республика менән идара итеү үҙәгендә үткән оператив кәңәшмәлә, Әсән ҡушаматлы яугир-Радик Динәхмәтов еткерҙе. Бөгөн ялға ҡайтҡан һалдатҡа Башҡортостандың халыҡ артисы исеме бирелде.

Радий Хәбиров махсус хәрби операцияла ҡаты яраланған яугирҙар менән осрашты

Башҡортостан башлығы Радий Хәбиров махсус хәрби операцияла ҡаты яраланған яугирҙар менән осрашты. Республика етәксеһе Ватан һаҡсылары менән аралашып, уларҙың теләктәрен, борсоған һорауҙарын тыңланы. Башҡортостанда яугирҙар өсөн 37 ярҙам сараһы ойошторолған. Радий Хәбиров, яраланып аяҡ-ҡулдарын юғалтҡан, контузияланған яҡташтарыбыҙҙың һәр береһенә ярҙам күрһәтеләсәк тип белдерҙе.

Республика 101-се гуманитар ылау ебәрергә әҙерләнә

Уның составында Бүздәк районы халҡы йыйған ярҙам да оҙатыласаҡ. Төбәктә волонтерҙар штабы һәм яңыраҡ асылған «Бергә беҙ көс» патриотик клубы эшләй.

Өфөнән Көнсығыш сығыу юлы киләһе йылдың башында файҙаланыуға тапшырыласаҡ

Өфөнөң Зинин ауылы эргәһендә юл үткәргес төҙөү буйынса эш 12-17 декабрҙә тамамланырға тейеш. Был турала бөгөн Башҡортостан юлдаш телевидениеһында ойошторолған брифингта хәбәр ителде. Ҡышҡы шарттарҙа бетон менән эшләү өсөн электр йылытыуы кәрәк, әгәр һауа торошо йылыраҡ булһа, объект тиҙерәк тапшырыласаҡ, һыуыҡтар процесты бер аҙ тотҡарлауы мөмкин. Әле подрядсылар яңы һәм булған подъезд юлдарын тоташтырыу буйынса эште тамамлай. Өфөнән Көнсығыш сығыу юлына килгәндә, күләмле объект киләһе йылдың ғинуар-февралендә файҙаланыуға тапшырыласаҡ. Эш темпының бер аҙ әкренәйеүе финанслау динамикаһына бәйле.

Өфөлә Нияз Мәжитов иҫтәлегенә өсөнсө «Мәжитов уҡыуҙары» башланды

Өфөлә башҡорт археологияһына нигеҙ һалыусы ғалим, тарих фәндәре докторы, академик, Башҡортостандың атҡаҙанған фән эшмәкәре Нияз Абдулхаҡ улы иҫтәлегенә өсөнсө «Мәжитов уҡыуҙары» башланды. Ғилми конференция «Боронғо һәм урта быуаттарҙа үҙәк Евразияның күсмә донъяһы» тип атала. Халыҡ-ара кимәлдә уҙғарылған форумда тарих, археология, мәҙәни мираҫ объекттарын һаҡлау һәм өйрәнеү өлкәләрендә эшләгән йөҙҙән ашыу белгес, шул иҫәптән Ҡаҙағстан, Үзбәкстан, Әзербайжан, Төркиә ғалимдары ҡатнаша. Пленар ултырышта ҡатнашыусыларҙы республика етәксеһе Радий Хәбиров тәбрикләне.

Өфөлә «Байыҡ» республика телевизион конкурсы еңеүселәре билдәләнде

Республиканың иң яҡшы бейеүселәре бер сәхнәлә. Өфөлә «Байыҡ» республика телевизион конкурсы еңеүселәре билдәләнде. Йылдағыса гала-концерт яңы исемдәр асты. Йолаға ярашлы, быйыл да иң яҡшы хореографҡа 100 мең һумлыҡ сертификат тапшырылды.