Радий Хәбиров Башҡортостандың төп транспорт проекттары менән таныштырҙы

Республика Башлығы етәкселегендә делегация Мәскәүҙә “Рәсәй транспорты” тигән халыҡ-ара форумда ҡатнаша. Башҡортостан айырым стенд әҙерләгән. Уны Рәсәй Хөкүмәте вице-премьеры Марат Хөснуллин ҡараны. Радий Хәбиров төп проекттар менән таныштырҙы. Республика Башлығы әйтеүенсә, Өфө – Ырымбур трассаһында Стәрлетамаҡтан Ергәнгә тиклем өлөшөн киңәйтеү ҡарала.
Форумда билдәләүҙәренсә, Рәсәй транспорт өлкәһендә сикләүҙәр мәсьәләһен хәл итә алды. Көнсығыш, Азов-Ҡара диңгеҙ һәм Төньяҡ-Көньяҡ транспорт коридорҙары аша 500 миллион тонна йөк ташылған. Президент Владимир Путин форумда ҡатнашҡандарға мөрәжәғәт итеп тармаҡты үҫтереү өсөн үҙебеҙҙә етештерелгән алдынғы технологияларҙы әүҙемерәк ҡулланырға саҡырҙы.

Күгәрсендәр хәрбиҙәргә ярҙам әҙерләй

“Хаттар яугирҙәрҙең кәйефен күтәрә, күстәнәстәр тыуған өй йылыһын алып килә”. Махсус хәрби операцияла ҡатнашыусылар шулай тип белдерә. Күгәрсен районы Мораҡ ауылындағы Мортаза Рәхимов исемендәге башҡорт гимназияһы алғы һыҙыҡҡа ебәреү өсөн ярҙам туплаған. “Акцияла олоһо ла, кесеһе лә ихлас ҡатнашты”, ти белем усағы директоры Фәйрүзә Ибраһимова.

Владимир Путин һайлау комиссиялары вәкилдәре менән осрашты

Сара Кремлдә уҙҙы. Быйыл илдә һайлау системаһы ойошторолоуға 30 йыл тула. Әле 900 меңгә яҡын кеше комиссия ағзаһы булып тора. Рәсәй Президенты әйтеүенсә, һайлау комиссиялары мөһим дәүләт институты иҫәпләнә һәм ҙур әһәмиәткә эйә.
Быйыл һайлауға бәйле федераль законға үҙгәреш индерелде. Уға ярашлы, һайлау комиссиялары ултырыштарына хеҙмәт килешеүе буйынса эшләгән журналистар ғына индерелә. Хәрби хәл ғәмәлдә булған төбәктәрҙә тауыш биреү айырым шарттарҙа ойошторола. Административ язаға тарттырылған кешеләр һайлау комиссияһында эшләй алмай.

Башҡортостанда Халыҡ-ара бизнес аҙналығында төрлө илдәрҙән эшҡыуарҙар ҡатнаша

Мәртәбәле сара Өфөлә киләһе аҙнала үтә. Рәсәй Сит ил эштәре министрлығының рәсми вәкиле Мария Захарова форумға ҡунаҡтар саҡырҙы. Быйыл унда санкциялар шарттарында эшмәкәрлек алып барыу, килемде арттырыу өсөн экспортта ниндәй алымдар ҡулланыу кеүек мәсьәләләр күтәрелә.

Донбасс өсөн алышта ҡатнашҡандар хәрби хәрәкәттәр ветераны исемен аласаҡ

Дәүләт Йыйылышы – Ҡоролтай закон проекты әҙерләй. Уға ярашлы, 2014 йылдан Донбасты яҡлауҙа ҡатнашҡан яугирҙәргә лә ветеран исеме бирелә. Документ ноябрҙәге пленар ултырышта ҡарала. Ғәмәлдәге ҡануниәткә ярашлы, махсус хәрби операцияла ҡатнашҡандар хәрби хәрәкәттәр ветераны йәки инвалиды статусын алырға хоҡуҡлы. Тиҙҙән Донбаста булған бөтә яугирҙәр ҙә тейешле льготалар менән файҙалана аласаҡ.

Мәскәүҙә «Рәсәй транспорты» халыҡ-ара форумы тамамланды

Өфө-Ырымбур трассаһының Стәрлетамаҡ эргәһенән алып Ергән ауылына тиклемге өлөшөн киңәйтеү киләһе йылдың яҙында башлана. Был турала Мәскәүҙә «Рәсәй транспорты» халыҡ-ара форумда белдерелде. Транспорт яңылыҡтары күргәҙмәһен үҙ эсенә алған форум бөгөн тамамланды. Һуңғы көндә Башҡортостан башлығы Радий Хәбиров бер нисә эшлекле осрашыу үткәрҙе. Фекер алышыуҙар барышында яңы юлдар һалыу, сафтан сыҡҡандарын тергеҙеү, Өфөнөң трамвай селтәрен яҡшыртыу, яңы юлдар төҙөү кеүек мәсьәләләр күтәрелде.

Шәһит Хоҙайбирҙин исемендәге журналистар премияһы лауреаттары бүләкләнде

Башҡортостан Хөкүмәтенең Шәһит Хоҙайбирҙин исемендәге журналистар премияһы лауреаттары бүләкләнде. 2023 йыл өсөн абруйлы премияға «Бер ғүмер етмәй икән» очеркы һәм «Ҡыҙарып сейә бешкән мәл ине» юлъяҙмалары өсөн «Ағиҙел» журналының баш мөхәррире Мөнир Ҡунафин, «Тәмле. Беҙ бергә!» проекты өсөн «Башҡортостан» телерадиокомпанияһы журналистары коллективы һәм «Үҙебеҙҙекеләрҙе ташламайбыҙ» мәҡәләләр циклы өсөн «Благоварские вести» гәзите редакцияһы журналистары лайыҡ булды.

Октябрьский ҡалаһы хакимиәте федераль конкурста еңеү яулаған

Урындағы власть «Халыҡ мөрәжәғәттәрен эшкәртеү» номинацияһында иң яҡшы 5 муниципалитет исемлегенә ингән. Йәмғеһе «Иң яҡшы муниципаль практикалар» конкурсына Рәсәйҙең 78 төбәгенән 1300 заявка ҡабул ителгән. Уңышлы тәжрибәләрҙең береһе - ҡалала төҙөкләндерелгән «башҡорт ихаталары».

Республика онкология диспансерында диагностика үткәреү мөмкинлектәре киңәйә

Эндоскопия бүлегенә алынған яңы видеоколоноскоп тура һәм йыуан эсәк лайлаһының торошон баһаларға, яман шеш процесын асыҡларға мөмкинлек бирә. Быйыл алынған заманса ҡорамалдарҙа йөҙҙән ашыу тикшереү һәм операциялар үткәрелгән

Баш ҡалала Z-быуыны үҫмерҙәр майҙаны асылды

Башҡортостандың патриотик тәрбиә биреү һәм хәрби хеҙмәткә әҙерлек үҙәгендә Z-быуыны үҫмерҙәр майҙаны асылды. Рәсәй Президенты грантына тормошҡа ашырыласаҡ проект хаҡында репортаж.

Өфөнөң Затон биҫтәһендә Яңы йыл шыршыһы ҡуйылды

«Тулҡын» мәҙәниәт һәм ял паркында байрам майҙансығын Затон биҫтәһендә үҫкән ҡупшыҡай биҙәй.

Башҡортостан халҡы географиянан белемен һынай

Халыҡ-ара акция 19 ноябрҙә башлана. География диктантын яҙыу өсөн Өфөлә 20 майҙансыҡ әҙерләнә. Ул ҡала китапханаларында урынлашҡан. 45 минут дауамында 40 һорауға яуап бирергә кәрәк. География буйынса тесты онлайн да үтергә була. Сайтта яуаптар 1 декабргә тиклем ҡабул ителә. География диктанты 2015 йылдан ойошторола. Былтыр беҙҙең республиканан 30 меңдән ашыу кеше ҡатнашҡан.

Башҡортостанда Халыҡ-ара бизнес аҙналығында эшҡыуарлыҡ киләсәге ҡарала

Мәртәбәле сара Өфөлә киләһе аҙнала ойошторола. Унда 15 илдән делегациялар ҡатнашыуы көтөлә. Эшлекле йыйында санкциялар шарттарында эшмәкәрлек алып барыу, килемде арттырыу өсөн экспортта ниндәй алымдар ҡулланыу кеүек мәсьәләләр күтәрелә.

Социаль өлкәгә сығымдар ҙур була

Башҡортостан бюджетына бәйле закон проекты парламентта ҡаралды.Республика Хөкүмәтенән хәбәр итеүҙәренсә, вице-премьер–Финанс министры Лира Иғтисамова Дәүләт Йыйылышы–Ҡоролтайҙың профилле комитеттары ултырыштарында сығыш яһаны. 2024 йылда төбәк ҡаҙнаһы 289 миллиард һумға тулылана, сығым 10 миллиард һумға күберәк. Аҙаҡ ике йылда бюджет дефицитһыҙ була. Ҡаҙна социаль йүнәлешле булып ҡала. Уның төп өлөшө мәғариф, һаулыҡ һаҡлау, социаль сәйәсәткә йүнәлтелә.

Башҡортостанда эшһеҙлек кәмей бара

Бөгөнгә 12 меңгә яҡын кеше халыҡ мәшғүллеге үҙәктәрендә иҫәптә тора. Ғаилә, хеҙмәт һәм халыҡты социаль яҡлау министры Ленара Иванова социаль селтәрҙә яҙыуынса, эшһеҙлек кимәле 2 процент менән баһалана. Бындай түбән күрһәткес булғаны юҡ ине. Шул уҡ ваҡытта хеҙмәт баҙарында эшсе һөнәрҙәргә ҙур ихтыяж күҙәтелә. Слесарь, тегенсе, токарь, электрик, иретеп йәбештереүсе талап ителә.

Радий Хәбиров “Рәсәй Транспорты” форумына йомғаҡ яһаны

Республика Башлығы етәкселегендәге делегация Мәскәүҙә мәртәбәле сарала ҡатнашты. Форумда транспорт өлкәһендә төп проекттар ҡаралды. Радий Хәбиров әйтеүенсә, Өфөлә Көнсығыш сығыу юлы киләһе йыл башында файҙаланыуға тапшырыла. Мәскәүҙә “Рәсәй транспорты” халыҡ-ара форумында Башҡортостан айырым стенд әҙерләне. Унда төп проекттар күрһәтелгән.

Башҡортостан Йәмәғәт палатаһының яңы составы раҫланды

Ултырышта төрлө йәмәғәт ойошмаларынан 10 кандидат һайлап алынды. Быға тиклем 20 кешене Дәүләт Йыйылышы – Ҡоролтай һәм Республика Башлығы тәҡдим итте. Йәмәғәт палатаһының етенсе составы декабрҙә эшләй башлай. Ул өс йылға тәғәйенләнә.

Өфөлә трамвайҙар селтәре яңыртыла

Республика Башлығы Радий Хәбиров Мәскәүҙә “Рәсәй транспорты” форумы барышында “Мовиста төркөмө” ойошмаһы директорҙар советы ағзаһы Михаил Хромов менән осрашты. Унда концессия шарттарында Өфөнөң көньяҡ өлөшөндә трамвай юлдарын төҙөкләндереү мәсьәләһе буйынса фекер алышыу булды. Бының өсөн 7 миллиард һум федераль грант йәлеп итеү ҡарала. Осрашыу барышында Республика Хөкүмәте һәм “Мовиста төркөмө” ойошмаһы араһында килешеүгә ҡул ҡуйылды. Өфөлә трамвай селтәрҙәре оҙонлоғо 86 километрға етә. Былтыр 8 миллионға яҡын кеше йөрөткән.

Башҡортостандың иң яҡшы хирургы асыҡланды

Башҡорт дәүләт медицина университетында “Алтын скальпель” премияһы тапшырыу сараһы уҙҙы. Ғүмәр Ҡыуатов исемендәге республика клиник дауаханаһы хирургия бүлегенең баш табибы урынбаҫары Антон Сафонов республиканың иң яҡшы хирургы тип танылды. Юғары награда табипҡа 56 йәшлек пациентҡа ҙур шеште алып ташлау буйынса үҙенсәлекле операция яһағаны өсөн тапшырылды. Республика Башлығы Хакимиәте Етәксеһе Максим Забелин был турала социаль селтәрҙә яҙып сыҡты. “Антон Сафонов – минең уҡыусым. Бергә эшләгәндә белем һәм тәжрибәм менән ихлас уртаҡлаштым, тип билдәләй Максим Забелин. Башҡортостан Хирургтар ассоциацияһы премияһы 1996 йылдан тапшырыла.

Рәсәйҙә полицияның участка уполномоченныйҙары бүлексәләре ойошторолоуға 100 йыл

Тарихи дата айҡанлы Өфөнөң Миңлеғәле Шайморатов һәйкәле янындағы майҙанда тантаналы митинг ойошторолдо, хеҙмәт алдынғылары бүләкләнде. Сарала ҡатнашыусыларҙы Башҡортостан башлығы Радий Хәбиров тәбрикләне.