Бөгөн - шәкәр диабеты менән көрәш көнө

Был дата 1991 йылда булдырылды. Йыл һайын сиргә юл ҡуймауға йүнәлтелгән саралар уҙғарыла. Статистика буйынса диабет менән ауырыусылар һаны йыл һайын арта бара.

Башҡортостанда халыҡ мәшғүллеге үҙәктәре төҙөкләндерелә

Киләһе йылдан федераль проект тормошҡа ашырыла башлай. 68 кадрҙар үҙәген яңыртыу өсөн 760 миллион һум тотонола. Ғаилә, хеҙмәт һәм халыҡты социаль яҡлау министры Ленара Иванова әйтеүенсә, республикала тиҙ төҙөлгән модулле мәшғүллек үҙәктәре барлыҡҡа килә. Бындай проект илдә тәүгеләрҙән булып Башҡортостанда һынала.

Башҡортостанда берҙәм транспорт картаһы менән ҡулланыусылар арта

Йыл башынан 210 меңдән ашыу кеше “Алға” картаһын алған. Был күрһәткес былтырғынан 28 процентҡа күберәк, тип хәбәр итәләр Транспорт һәм юл хужалығы министрлығынан. “Алға” картаһы менән ҡулланыусылар өсөн төрлө льготалар ҡаралған. Өфөлә, мәҫәлән, бер сәғәт дауамында бер билет менән дәүләт автобустарында күсеп ултырып йөрөргә була. Яңы йылға тиклем мобиль телефон аша банк картаһы менән түләгәндәр ташлама менән файҙалана ала. Электричкалар өсөн дә льготалы тариф бар.

Башҡортостанда йыл башынан янғында 214 кешенең ғүмере өҙөлгән

Ял көндәрендә 7 кеше ут ҡорбаны булған. Бөгөн иртән Ауырғазы районы Кешәнне ауылында ағас йорт янған. Утта оло йәштәге ир үлгән. Ғәҙәттән тыш хәлдәр буйынса дәүләт комитетынан белдереүҙәренсә, быйыл 10 айҙа 9 меңдән ашыу янғын теркәлгән. “Һалҡын миҙгелдә хәүефһеҙлек ҡағиҙәләренә айырыуса иғтибарлы булырға кәрәк”, ти комитет вәкиле Шамил Харисов.

Коммуналь хеҙмәт өсөн түләү киләһе йылда артасаҡ

Торлаҡ-коммуналь хеҙмәттәр өсөн түләү үҙгәреү индексы билдәләнде. Премьер-министр Михаил Мишустин тейешле документҡа ҡул ҡуйҙы. Башҡоростанда уның кимәле 10,9 процент була. Коммуналь түләүҙәрҙең июлдән үҙгәреүе көтөлә. Быйыл хаҡ арттырылманы. Уҙған йылдың июлендә һәм декабрендә түләү ҡиммәтләнгәйне.

Башҡортостанда 2024 йылға йәшәү минимумы раҫланды

1 ғинуарҙа ул 13 мең 753 һум кимәлендә билдәләнде. Хеҙмәт йәшендәге халыҡ ҡатламы өсөн ул 14 мең 991, хаҡлы ялдағыларға 12 мең 530, балаларға 13 мең 340 һум булараҡ ҡабул ителде.
Ғаилә, хеҙмәт һәм халыҡты социаль яҡлау министрлығынан хәбәр итеүҙәренсә, йәшәү минимумы аҙ тәьмин ителгән ҡатламдың йәшәү кимәлен билдәләү өсөн ҡулланыла. Был күрһәткестән сығып дәүләт социаль ярҙамы тәғәйенләнә.

Балтас районында ер убылған

Балтас районында Көнтүгеш ауылы тирәһендә, урманда ер ишелеү һөҙөмтәһендә ҙур соҡор барлыҡҡа килгән. Упҡындың диаметры яҡынса утыҙ метр. Тәрәнлеге 20-30 метрға етә. Ошо урындан бер нисә метр алыҫлыҡта элегерәк ер ишелгән урын да бар. Соҡор ҡоро. Уның киҫелешендә ике-өс метр ҡыҙыл балсыҡ ҡатламын аҡ балсыҡ алмаштыра. Ун биш метр түбәнерәк-дымлы ҡатлам башлана. Яңы упҡын иҫке йырын менән тоташыуы ихтимал, тип фаразлай урындағы халыҡ.

Баймаҡта Мәктәпкәсә белем биреү учреждениелары хеҙмәткәрҙәре семинары үтте

Йәш быуынды тәрбиәләүҙә «Урал батыр» эпосының әһәмиәте. Баймаҡ ҡалаһының «Айыуҡай» Башҡорт балалар баҡсаһында район һәм ҡала тәрбиәселәре өсөн семинар ойошторолдо. Мәктәпкәсә белем биреү учреждениелары хеҙмәткәрҙәре балаларға рухи-әхлаҡи тәрбиә биреүҙә «Урал батыр» эпосы тәғлимәттәре ҡулланыуҙа тәжрибә уртаҡлашты.

Өфө машинистары хәйриә акцияһын ойошторған

Хеҙмәт хаҡын етем балаларға. Өфө машинистары хәйриә акцияһын ойошторған. Куйбышев тимер юл хеҙмәткәрҙәре Өфө-Силәбе рейсы өсөн тәғәйенләнгән хеҙмәт хаҡы өлөшөн етем балаларға ебәрергә ниәтләгән. Рейс ошо көндәрҙә булған. Йәмғеһе 25 мең һумлыҡ хеҙмәт хаҡын ирекмәндәр Бөрө балалар йортона оҙатмаҡсы.

Башҡортостан йәштәре 11 миллион һум федераль грантҡа эйә булды

Йәштәр эштәре буйынса федераль агентлыҡ конкурс һөҙөмтәләре менән таныштырҙы. Унда айырым кешеләр ҡатнашты. Беҙҙең республиканан 21 автор грант алған. Иң ҙур суммаға, 822 мең һумға, Валерий Пивоваров лайыҡ булған. Ул “Һөнәрҙәр ҡалаһы” тигән проект әҙерләгән. Балаларға йылға буйлап поход ойоштороу, студент отрядтары эшмәкәрлеген алып барыу, йәш журналистар мәктәбен ойоштороу, эшҡыуарлыҡты үҫтереү кеүек проекттар федераль грантҡа тормошҡа ашырыла.

Республика парламентында эксперт советтары булдырыла

Улар даими комитеттар янында эшләп килә, тине спикер Константин Толкачев. Тәүге советтар ойошторолған. Мәғлүмәт сәйәсәте буйынса советты депутат Шамил Вәлиев етәкләй. Спорт буйынса совет етәксеһе вазифаһын Рөстәм Әхмәҙинуров алды. Дин эштәре буйынса советты Вячеслав Пятков, Мәғариф буйынса советты Айбулат Хажин етәкләне.

Өфө халыҡ-ара бизнес аҙналығына әҙерләнә

Ул 22 ноябрҙә башлана һәм өс көн дауам итә. Быйыл форумда Ҡытай, Ҡаҙағстан Үзбәкстан, Беларусь Төркиә, Иран һәм башҡа дәүләт вәкилдәре ҡатнашыуы көтөлә. Өфө ҙур халыҡ-ара саралар уҙғарыу урынына әүерелә, тип яҙа социаль селтәрҙә Премьер-министр Андрей Назаров. Был сара ла ҙур һөҙөмтә бирергә тейеш, Башҡортостандың халыҡ-ара майҙанда тағы нығыныуы көтөлә.

Башҡортостанда илһөйәрлек тәрбиәһен ойоштороуға грант булдырыла

Яртышар миллиондан 10 грант. Башҡортостан башлығы киләһе йылдан республиканың дөйөм белем биреү ойошмаларында илһөйәрлек тәрбиәһен ойоштороуға грант булдырыу тураһында указға ҡул ҡуйҙы. Документҡа ярашлы, уҡыу йылы һөҙөмтәләренән сығып 500 мең һумлыҡ 10 грант бүлеү ҡарала. Еңеүселәр мәғариф һәм фән министрлығы ойошторған конкурс нигеҙендә һайлап алына.

Башҡортостан мәктәптәре техника паркын яңырта

Бөгөн республиканың төрлө райондарында урынлашҡан 39 белем усағы яңы автобус алды. Транспорт сараһы асҡыстарын мәктәп директорҙарына Мәғариф һәм фән министры Илдар Мәүлитбирҙин тапшырҙы.

Ишембай ҡалаһы ағинәйҙәре яугирҙарға гуманитар ярҙам әҙерләй

Ишембай ҡалаһының Иҫке Ишембай биҫтәһе ағинәйҙәре махсус хәрби операцияла ҡатнашыусы яҡташтарыбыҙға гуманитар ярҙам әҙерләй. Көн һайын яугирҙарға ойоҡбаштар бәйләнә, йылы кейемдәр тегелә, ризыҡ әҙерләнә.

Үзбәкстанда 30 йылдан ашыу башҡорт ижтимағи-мәҙәни үҙәге уңышлы эшләп килә

Бөгөн тарихи ватанынан алыҫта йәшәгән милләттәштәребеҙ ниндәй уйҙар менән, нисек көн итә? Киләһе репортаж ошо хаҡта.

Башҡортостанда юғары класс уҡыусыларына хәрби пилот булыу хаҡында һөйләнеләр

Күсмә асыҡ ишектәр көнө. Воронеж ҡалаһындағы «Профессор Николай Жуковский һәм Юрий Гагарин исемендәге Хәрби-һауа академияһы» Башҡортостанда ҡунаҡта. Хәрби уҡыу-ғилми үҙәге Өфө фән һәм технологиялар университеты нигеҙендә асыҡ ишектәр көнөн уҙғарҙы. Белем усағы Хәрби һауа-йыһан көстәренә белгестәр әҙерләй.

Өфөлә үҙенсәлекле балалар араһында үткән республика конкурсына йомғаҡ яһалды

Өфөлә үҙенсәлекле балалар араһында «Ушинскийҙың әкиәтле дәрестәре» республика конкурсына йомғаҡ яһалды. Конкурс 2006-сы йылдан бирле үткәрелә. Унда 17 йыл эсендә 2 меңгә яҡын бала ҡатнашҡан. Мәкәрим Төхвәтшин исемендәге Республика һуҡырҙар китапханаһы башланғысы менән ойошторолған сара хаҡында тулыраҡ киләһе яҙмала.

Хөкүмәт электр самокатын йөрөтөүселәргә штрафтар тураһында башланғысты хупланы

Проект Федерация Советында әҙерләнгән. Уға ярашлы, иҫерек килеш велосипедта йә электр самокатында йөрөүселәргә 30 мең һумға тиклем штраф һалына. Бер электр самокатында ике кеше йөрөһә, улар 3 мең һум түләргә тейеш була.

Башҡортостанда 2024 йылға йәшәү минимумы раҫланды

Ул 1 ғинуарҙан 13 мең 753 һум була. Хеҙмәт йәшендәге халыҡ өсөн сумма 14 мең 991, хаҡлы ялдағыларға - 12 мең 530, балаларға - 13 мең 340 һум булараҡ ҡабул ителде. Башҡортостан Ғаилә, хеҙмәт һәм халыҡты социаль яҡлау министрлығынан хәбәр итеүҙәренсә, йәшәү минимумы аҙ тәьмин ителгән ҡатламдың йәшәү кимәлен билдәләү өсөн ҡулланыла. Ошо күрһәткестән сығып дәүләт социаль ярҙамы тәғәйенләнә.