Башҡортостанда төнөн хәмер һатылмай

1 марттан спиртлы эсемлектәр менән сауҙаны көйләүсе законға төҙәтмәләр көсөнә инде. Уға ярашлы, күп фатирлы йорттарҙа урынлашҡан дөйөм туҡланыу урындарында 23 сәғәттән иртәнге 8-гә тиклем хәмер һатыу тыйыла. Бындай сикләү ресторандарға ҡағылмай.

Өфө нефть эшкәртеү заводында янғын технологик процестар арҡаһында булыуы мөмкин

Был турала Ғәҙәттән тыш хәлдәр министрлығынан хәбәр итәләр. Әле янғын урынында тәфтишселәр һәм эксперттар эшләй. Ғәҙәттән тыш хәл бөгөн төндә булды. Янғында һәләк булыусылар, зыян күреүселәр юҡ, тип хәбәр итәләр "Башнефть" компанияһынан.

Медик яҡташыбыҙ МХО-ла юғары наградаға лайыҡ булған

Асҡын районынан аҡ халатлы яугир МХО биләмәһендә күрһәткән батырлығы өсөн «Һәләкәткә осраусыларҙы ҡотҡарған өсөн» миҙалы менән наградланған. Уның позывнойы «Клычок», күптән түгел үҙ теләге менән МХО-ға юлланған.

Кибермутлашыусылар әүҙемләшкән

Дәүләт Йыйылышы-Ҡоролтай рәйесе Константин Толкачев парламент депутаттары исеменән ҡылынған мутлашыу осраҡтары артыуы тураһында белдерҙе. Аферистар ялған хаттар һәм СМС-хәбәрҙәр ебәрә. Төрлө ысулдар менән аҡса күсерергә, шәхси мәғлүмәттәрҙе асырға күндерергә тырыша. Депутаттар кешенән шәхси мәғлүмәт, йә аҡса күсереүҙе һорамай. Халыҡҡа иғтибарлы булырға, мәғлүмәт-хәбәрҙәрҙең дөрөҫлөгөн тикшерергә кәңәш ителә.

Башҡортостанда ауыл советтары һаҡланып ҡала

Урындағы үҙидаралыҡ тураһында федераль закон проекты икенсе уҡыуҙа ҡабул ителде. Уға ярашлы, ил төбәктәре бер йә ике кимәлдәге урындағы үҙидара системаһына күсеүҙе үҙ аллы һайлай. Башҡортостан парламенты рәйесе Константин Толкачев белдереүенсә, беҙҙә 800-ҙән ашыу административ-территориаль берәмек бар. Ғәмәлдә булған ике кимәлдәге система һөҙөмтәле эшләй, уны һаҡлап ҡалырға кәрәк.

Рәсәйҙә отгул биреү тәртибе үҙгәрҙе

1 мартта Рәсәйҙә Хеҙмәт кодексына төҙәтмәләр көсөнә инде. Башҡортостан хеҙмәт инспекцияһынан хәбәр итеүҙәренсә, ял һәм байрам көнөндә эшкә сыҡҡан хеҙмәткәр икеләтә түләү урынына өҫтәмә ял алырға хоҡуҡлы. Отгулды йыл эсендә файҙаланырға кәрәк. Был көндәр отпускыға өҫтәлә ала. Хеҙмәткәр эштән бушатылғанда эштә булған ял көндәре өсөн компенсация түләнергә тейеш.

Башҡортостанда ғилми-технологик үҫеш буйынса дәүләт комитеты булдырылды

Төбәк башлығы Радий Хәбиров тейешле Указға ҡул ҡуйыуы тураһында хәбәр итте. Шулай уҡ оператив кәңәшмәлә йәмәғәт биләмәләрен төҙөкләндереү, дәүләт хеҙмәттәрен һанлаштырыу мәсьәләләре лә күтәрелде. Күптән түгел «Башҡортостан геройҙары» кадрҙар проектына ғаризалар ҡабул ителә башлағайны, бөгөнгә программалла ҡатнашырға теләүселәр 600-ҙән ашҡан.

Радий Хәбиров нефть эшкәртеү заводында янғын һүндереүҙә ҡатнашыусыларға рәхмәт белдерҙе

Башҡортостан башлығы Радий Хәбиров нефть эшкәртеү заводында янғын һүндереүҙә ҡатнашыусыларға рәхмәт белдерҙе. Утҡа ҡаршы көрәшкә 100 кеше һәм 28 берәмек техника йәлеп ителгән. Төбәк етәксеһе шулай уҡ ғәҙәттән тыш хәл пилотһыҙ осоу аппараты һөжүменән һуң башланды тигән имеш-мимештәрҙе кире ҡаҡты. Төбәктең антитеррор комиссияһы аппараты етәкселеге лә был мәғлүмәттең дөрөҫлөккә тура килмәүе тураһында хәбәр итте. Янғын сәбәбе яҡынса асыҡланған, зыяндың техноген характерҙа булыуы билдәле.

Рәсәй Геройы Александр Доставалов исемендәге батальон яугирҙары нацистарҙы артҡа сигендерә

Подразделение фронт һыҙығы алға күсеү сәбәпле, дислокацияһын алмаштыра. Хәрби техника, блиндаждар, идара итеү пункты ла яңы урынға күсә. Позицияларға тәү сиратта элемтәселәр инә. Улар артабанғы эште координациялау өсөн бәйләнеш булдыра.

Ейәнсура районынан 8 йәшлек Әмир Мәһәҙиев яугирҙарға планшетҡа тип йыйған аҡсаһын тапшырған

Ейәнсура районынан 8 йәшлек Әмир Мәһәҙиев махсус хәрби операция яугирҙарына планшетҡа тип йыйған аҡсаһын тапшырған. Бының өсөн ул копилкаһын ватҡан. Йыйылған суммаға һатып алынған ике рация хәрбиҙәргә оҙатылған да инде. Малай менән БЮТ ижади төркөмө осрашты.

Бөйөк Ватан һуғышы ветераны Сәлимйәүһәр Вәлиуллинға Өфөнөң почетлы гражданины исеме бирелде

Баш ҡалала йәшәүсе Бөйөк Ватан һуғышы ветераны Сәлимйәүһәр Вәлиуллинға Өфөнөң почетлы гражданины исеме бирелде. Совет районы хакимиәте ветеранды етеп килгән Бөйөк Еңеүҙең 80 йыллығы менән ҡотлап юбилей миҙалы менән дә бүләкләне.

Республиканың китапхана эшмәкәрлегенә юғары баһа

Әхмәтзәки Вәлиди исемендәге Милли китапхана «Рәсәйҙең әҙәби мираҫы» Бөтә Рәсәй әҙәби мәҙәни-ағартыу проектының икенсе миҙгеле еңеүсеһе. Рәсәй әҙәби-ағартыу проекты етәксеһе, шағир, Санкт-Петербургта йәшәүсе махсус хәрби операция ветераны Алексей Преснаков, яҙыусылар, республиканың баҫма һәм электрон киң мәғлүмәт саралары вәкилдәре ҡатнашлығында уҙған сара хаҡында ентекләберәк киләһе яҙмала.

Өфө районы Булгаков ауылындағы «Суфия» мәсетендә тәүге ифтар уҙҙы

Ауылдағы өсөнсө иман йорто былтыр асылғайны. Изге Рамаҙан айының тәүге көнөндә киске ауыҙ асыуға мәсеткә уны төҙөргә ярҙам итеүселәр һәм уларҙың яҡындары йыйылды. Диндарҙарҙың киләсәккә пландары ҙур.

Ришат Төхвәтуллин Башҡортостандың халыҡ артисы исемен алды

Бөгөн Ришат Төхвәтуллинға Башҡортостандың халыҡ артисы исеме бирелде. Награданы йырсыға республика Башлығы Радий Хәбиров тапшырҙы.

Артист рәхмәт һүҙҙәрен, «Элмәлек» башҡорт халыҡ йырын һуҙып ебәрҙе.

Радий Хәбиров бер төркөм хеҙмәт алдынғыларына дәүләт наградаларын тапшырҙы

Ватанға фиҙәҡәр һәм тоғро хеҙмәт өсөн - ихтирам билдәһе. Республика башлығы Радий Хәбиров бер төркөм хеҙмәт алдынғыларына Рәсәйҙең һәм Башҡортостандың дәүләт наградаларын тапшырҙы. Бүләкләнеүселәр араһында төрлө тармаҡ белгестәре, шул иҫәптән сәнәғәт, ауыл хужалығы предприятиелары етәкселәре һәм хеҙмәткәрҙәре, ғалимдар, табиптар, эшҡыуарҙар булды.

Башҡортостанда ужым сәсеүлектәренең 90 проценттан ашыуы яҡшы ҡышлаған

Ауыл хужалығы министрлығынан хәбәр итеүҙәренсә, быйылғы уңыш өсөн 248 мең гектарҙа ужым культуралары сәселгән. Тупраҡтың бындай температураһы ярайһы уҡ яҡшы, ти белгестәр. Сөнки йылы һауа торошо ужым культураларында төрлө ауырыуҙар һәм ҡоротҡостар барлыҡҡа килтереүе ихтимал.

Ейәнсура районының Кинйәбулат ауылы «Айыҡ ауыл» исеме өсөн көрәшә

Урында саңғы ярышы һәм «Ғаилә менән ҡышҡы уйындар» эстафетаһы уҙғарылды. Күләмле сара йөҙәрләгән кешене, күрше райондарҙан һәм Ырымбур өлкәһе ҡунаҡтарын йыйҙы.

Мәскәүҙә «Сыңрау торна» башҡорт музыкаһы фестивале еңеүселәре билдәләнде

Тәүгә уҙғарылған музыкаль бәйгелә вокал, инструменталь, хореография, яңғыҙ һәм коллектив номерҙар менән 35 конкурсант көс һынашты. Фестиваль баш ҡалала «Башҡортостан студенттары һәм аспиранттары Ассоциацияһы» башланғысында Башҡортостан башлығы гранттар фонды ярҙамында ойошторолған.

Башҡортостан башлығы бер төркөм хеҙмәт алдынғыларына дәүләт наградаларын тапшырҙы

Ватанға фиҙаҡәр һәм тоғро хеҙмәт өсөн - ихтирам билдәһе. Республика башлығы Радий Хәбиров бер төркөм хеҙмәт алдынғыларына Рәсәйҙең һәм Башҡортостандың дәүләт наградаларын тапшырҙы. Бүләкләнеүселәр араһында төрлө тармаҡ белгестәре, шул иҫәптән ауыл хужалығы, сәнәғәт, нефть һәм энергетика предприятиелары хеҙмәткәрҙәре булды.

Өфөлә «Кескәй принцессалар балы» үтте

Башҡортостан башлығы Радий Хәбиров ҡатнашлығында ойошторолған сараға мөмкинлектәре сикләнгән ҡыҙҙар саҡырылды. Байрамға республиканың төрлө район-ҡалаларында йәшәүсе 286 ҡыҙ һәм уларҙың әсәләре саҡырылғайны. Төбәктә матур йолаға әйләнгән сарала гүзәл заттар иҫтәлекле бүләктәр алып ҡыуанды, Башҡорт дәүләт опера һәм балет театрында спектакль ҡараны.