Стәрлетамаҡта Ағиҙел йылғаһы аша яңы күпер төҙөлөшө башланды

Был турала социаль селтәрҙә Республика башлығы Радий Хәбиров белдерә. “Беҙ күпәтн ҡала халҡына күперҙе төҙөкләндерергә вәғәҙә биргән инек. Яңы ике һыҙатлы күпер икенсеһенә алмаш була. Уның буйынса хәрәкәтте киләһе йыл аҙағына асырға планлаштырабыҙ. Ағиҙел йылғаһы аша күпер урындағы халыҡ өсөн ҙур әһәмәткә эйә- ул Стәрлетамаҡты баш ҡала һәм райондар менән бәйләй. Был мөһим транспорт артерияһын мотлаҡ тәртипкә килтерәсәкбеҙ”, тип яҙған Радий Хәбиров.

Башҡортостан ветерандарына Еңеүҙең 80 йыллығы уңайынан аҡса түләнә

Ил Президенты Указы менән Бөйөк Ватан һуғышында ҡатнашыусылар һәм инвалидтарға, уларҙың тол ҡатындарына, “Блокадалы Ленинградта йәшәүсе”, “Ҡамауҙа ҡалған Севастополдә йәшәүсе”, “Ҡамауҙа ҡалған Сталинградта йәшәүсе” билдәләре менән бүләкләнгән граждандарға һәм бәлиғ булмаған концлагерь тотҡондарына 80 мең һум аҡса бирелә. Бөйөк Ватан һуғышы осоронда тылда эшләгәндәр, һуғыш йылдарында фиҙаҡәр хеҙмәте өсөн СССР-ҙың орден-миҙалдары менән бүләкләнгәндәр һәм концлагерь, төрмә, геттолар тотҡондарына 55 мең һум түләнә. Социаль фондтың республика буйынса бүлексәһенән хәбәр итеүҙәренсә, әле Башҡортостанда түләү алырға хоҡуҡлы 7 мең ярымдан ашыу граждан, шул иҫәптән 116 Бөйөк Ватан һуғышында ҡатнашыусы һәм инвалид йәшәй. Аҡса апрель пенсияһы менән бергә бирелә.

Радий Хәбиров Рәсәй спорт министрының беренсе урынбаҫары Одес Байсолтанов менән осрашты

Башҡортостан башлығы Радий Хәбиров Рәсәй спорт министрының беренсе урынбаҫары Одес Байсолтанов менән осрашты. Республика хөкүмәт йортонда үткән ултырышта төбәктә спорт инфраструктураһы үҫеше, күләмле спорт сараларын ойоштороу һәм яңы объекттарҙы төҙөү һорауҙары ҡаралды. Башҡортостанда граждандарҙы сәләмәт һәм әүҙем тормошҡа йәлеп итеү йүнәлешендә күп яҡлы эш алып барыла. Ошо маҡсатта 16 яңы спорт объекты төҙөлөшө дауам итә.

Өфөлә һаңғырауҙар спорты буйынса ҡышҡы спартакиаданы ябыу тантанаһы үтте

Башҡортостан декабрҙә Бойондороҡһоҙ дәүләттәр берләшмәһе илдәренең физик мөмкинлеге сикләнгән балалар спартакиадаһын ҡабул итәсәк. Был турала Радий Хәбиров бөгөн һаңғырауҙар спорты буйынса ҡышҡы спартакиаданы ябыу тантанаһында белдерҙе. Хәбәр итеүебеҙсә «Беҙ бергә. Спорт» тип аталған ярыштар республикала 10 көн дауамында барҙы.

Әбйәлил районында иҡтисади үҫеш: яңы эш урындары һәм социаль проекттар

Эре предприятиеларҙың барлыҡҡа килеүе - өҫтәмә эш урындары ғына түгел, социаль-иҡтисади, инфраструктура үҫеше лә. Әбйәлил районында «Цемикс» предприятиеһы уңышлы эшләп килә. Ойошманан килгән килем социаль объекттарҙы төҙөүгә, юлдарҙы ремонтлауға тотонола. Әбйәлил районы «Яҡтыкүл» шифаханаһы менән дә дан тота. Әлеге ваҡытта унда 200-ҙән ашыу кеше ял итә. Бынан тыш, районда ауыл хужалығы тармағы ла иғтибар үҙәгендә.

Мәскәүҙә Башҡортостандың хәрби руханиҙары тураһындағы фильмдың премьераһы үтте

Махсус хәрби операцияла ҡатнашыусы яугирҙарға рухи ярҙам иткән Хәмзә хәҙрәт менән отец Виктор тураһында төшөрөлгән «Пути твои» фильмы баш ҡаланың «Рәсәй» милли үҙәгендә күрһәтелде. Был турала тәүгеләрҙән булып социаль селтәрҙәрҙә Башҡортостан башлығы Радий Хәбиров хәбәр итте.

Синоптиктар яҙғы һауа торошон фаразланы

Быйылғы ҡыш һымаҡ, ул ғәҙәттәгенән йылы килер тип күҙаллана. «Яндекс Һауа торошо» метеорологтары хәбәр итеүенсә, яҙ айҙарында Атлантика диңгеҙенән йылы һауа ағымы әүҙемләшә. Һауа температураһы климатик норманан 1 градустан юғарыраҡ булмаҡсы. Был Рәсәйҙең Европа өлөшөндә, Уралда, Көнбайыш һәм Көнсығыш Себерҙә, Алыҫ Көнсығышта күҙәтеләсәк. Апрель Өфөлә лә йылы килә. Был үҫемлектәрҙең вегетация осорон, шул иҫәптән сәскә атыу ваҡытын тиҙләтә.

Өфөлә «Китапты һөйөү менән бүләк итегеҙ» тип исемләнгән акцияға старт бирелде

Башҡортостанда Китап бүләк итеү көнө билдәләнә. Ошо уңайҙан республикала «Китапты һөйөү менән бүләк итегеҙ» тип исемләнгән акцияға старт бирелде. Уны Зәйнәб Биишева исемендәге «Китап» нәшриәте «Ватанды һаҡлаусылар» фондының республикалағы филиалы һәм Матбуғат һәм мәғлүмәт саралары агентлығы менән берлектә ойоштора.

Рәхим Мерәҫев: фәнгә һәм белемгә хеҙмәт итеүсе шәхес

Ябай ауыл уҡыусыһынан юғары мәктәп профессорына тиклем. Өфө фән һәм технологиялар университеты профессоры, филология фәндәре докторы, Башҡортостандың атҡаҙанған фән эшмәкәре, Рәсәй Федерацияһы юғары мәктәбенең атҡаҙанған хеҙмәткәре, Салауат Юлаев ордены кавалеры Рәхим Зәки улы Мерәҫев был юлды тырышлығы, эшһөйәрлеге, телдәрҙе өйрәнеүгә булған көслө ынтылышы арҡаһында уңышлы үтә алған. Бөтә илдә билдәлелек яулаған уҡытыусы үҙенең күркәм ғүмер байрамын яратҡан студенттары һәм коллегалары менән бергә ҡаршыланы.

Радий Хәбиров «Һоҡланғыс кешеләр тормошо» рубрикаһында Ринат Мөхәмәтәйәнов таныштырҙы

Бөгөн - Совет ғәскәрҙәрен Афғанстандан сығарыуға 36 йыл. Башҡортостан башлығы Радий Хәбиров «Һоҡланғыс кешеләр тормошо» рубрикаһының сираттағы сығарылышын Ринат Мөхәмәтәйәновҡа арнаны.

Афған һуғышы ветерандары хәтер усағын һүндермәй

Тарихи дата айҡанлы бөгөн төрлө министрлыҡ-ведомство етәкселәре, хәрби ветерандар, яугир-интернационалистар «Ҡайғылы әсә» һәйкәленә сәскә һалды, һәләк булғандарҙы иҫкә алды. Афған һуғышы илебеҙ тарихындағы ҡайғылы биттәрҙең береһе, хәрби бәрелештәр 1979 йылдың 25 декабренән 1989 йылдың 15 фев­раленә тиклем дауам итә. Йәғни, был ҡан ҡойош 9 йылдан ашыуға һу­ҙыла. Афғанстанда 620 мең совет һалдаты, офицеры интернациональ бурысын үтәй. Башҡортостандан афған һуғышында 9 мең яҡташыбыҙ ҡатнаша, уларҙың 343-ө һәләк була, 5-һе хәбәрһеҙ юғала. Республика халҡы интернациональ бурысын үтәгәндә ғүмере өҙөлгән егеттәрҙе онотмай.

Баймаҡ районының Үрге Таулыҡай мәктәбендә Герой партаһы асылды

Герой партаһы. Ил кимәлендә старт алған Бөтә Рәсәй мәғариф проекты Башҡортостан район-ҡалалары мәктәптәрен иңләй. Йәш быуынды Бөйөк Ватан һуғышы һәм тыл ветерандары, махсус хәрби операцияла ҡатнашыусылар өлгөһөндә тәрбиәләү, уларҙы хөрмәтләү маҡсатында ойошторолған сара Баймаҡ районында ла үтте. Үрге Таулыҡай мәктәбе уҡыусылары Ватан тарихын дәреслектәрҙән уҡып ҡына түгел, ә районда, ауылда тыуып-үҫкән герой яҡташтары аша ла белә.

Афған ветерандары: үткәндәр һабағы – бөгөнгә маяҡ

Хәрби бәрелештәр алып барыу шарттары, технологиялар нисек кенә үҙгәрмәһен яуҙа алған тәжрибә алыштырғыһыҙ ҡала. Афған һуғышында интернационал бурысын үтәүселәр бөгөн дә сафта һәм уларҙың туғандарса яурыны махсус хәрби операция яугирҙарына ныҡлы терәк булып тора. Шуравиҙар өсөн һуғыш 36 йыл элек тамамланыуға ҡарамаҫтан, әле лә улар Ватаныбыҙ тыныслығын яҡлап көрәшә.

Борай ауылында көрәш буйынса республика беренселеге үтте

Бөйөк Ватан һуғышында еңеүҙең 80 йыллығына һәм махсус хәрби операцияла ҡатнашыусыларға ярҙам йылына арналған бәйгелә төрлө йәштәге егеттәр бил һынашты. Милли көрәш беренселеге республиканың төрлө район-ҡалаларынан йыйылған 314 малайҙы берләштерҙе.

Өфөлә «Минең Рәсәйем: музыкаль сәйәхәт» фестивале асылды

Рәсәй телевидениеһы алып барыусыһы һәм актриса Оксана Федорова Өфөлә «Минең Рәсәйем: музыкаль сәйәхәт» фестивален асты. Федор Шаляпиндың тыуған көнөнә арналған сара өс көн дауам итте.

Тәрбиәселәргә — 575 мең һум аҡса

Башҡортостанда балалар баҡсалары тәрбиәселәре республика Башлығы грантын оторға мөмкин. Конкурста 35 йәшкә тиклемге өлкән тәрбиәселәр, тәрбиәселәр, педагог-психологтар, педагог-логопедтар, уҡытыусы-дефектологтар, музыкаль етәкселәр, физкультура буйынса инструкторҙар ҡатнаша ала. Иң мөһиме, белем биреү ойошмаһында эш стажы ике йылдан кәм булмаҫҡа тейеш.

Ведомствола белдереүҙәренсә, грант конкурсында ҡатнашыу өсөн ғаризалар 1 мартҡа тиклем ҡабул ителә. Конкурс шарттары тураһында тулыраҡ мәғлүмәтте бында белергә мөмкин.

Башҡортостан юлдарында аварияларҙың күбеһендә водителдәр ғәйепле

Был турала баш автоинспектор Владимир Севастьянов белдерҙе. Уҙған йылда республикала 2 мең 900-ҙән ашыу юл-транспорт ваҡиғаһы булған. Уларҙа 397 кешенең ғүмере өҙөлгән, 3 мең ярымдан ашыуы йәрәхәтләнгән. Аварияларҙың 85 процентында водителдәр ғәйепле тип табылған.

Башҡортостанда халыҡ яҙыусыһы Камил Йыһаншиндың 75 йәше билдәләнә

Республика Башлығының ошо турала Указы бар. Документ менән рәсми мәғлүмәттәр порталында танышырға була. Юбилей саралары быйыл була. Указдың үтәлеше өсөн премьер-министрҙың беренсе урынбаҫары Урал Килсенбаев яуаплы. Камил Йыһаншин 1950 йылдың 15 мартында тыуған.

Радий Хәбиров МХО яугирен генерал Шайморатов миҙалы менән бүләкләне

Махсус хәрби операцияла ҡатнашыусы, танк батальонының эвакуация бүлексәһе командиры Мөҙәрис Аҫылбаев Башҡортостан Башлығы указы менән генерал Шайморатов миҙалы менән бүләкләнде. Яҡташыбыҙға дәүләт наградаһын Радий Хәбиров тапшырҙы.

«Мөҙәрис Ғәфүр улы күптән яуҙа ҡатнаша, бер нисә тапҡыр наградланған. Ҡотлайбыҙ», — тине Радий Хәбиров.

"Башҡорт ихаталары" программаһы үтәлешен халыҡ баһалай

31 мартҡа тиклем күп фатирлы йорттарҙа йәшәүселәрҙең фекере өйрәнелә. Премьер-министр урынбаҫары Рөстәм Ғәзизов белдереүенсә, бындай тикшеренеү халыҡтың теләктәрен иҫәпкә алыу, ваҡытында тейешле саралар күреү мөмкинлеге бирә. Быйыл Йәмәғәт палатаһы тикшеренеү һөҙөмтәләре буйынса ремонт-тәртипкә килтереү эштәре башҡарылған биләмәләрҙә буласаҡ. Программа Радий Хәбиров башланғысы менән 2019 йылдан ғәмәлгә ашырыла.