«Әр-Рахим» йәмиғ мәсетенең манараларын көпләү тамамланды

Бөгөн башҡарылған эш һөҙөмтәһе менән республика башлығы Радий Хәбиров танышты. Манаралар Грециялағы «Тассос» ятҡылығының тәбиғи ташы менән тышланды. Артабан эшселәр мәсеттең ҡыйығын ябыуға тотонасаҡ. Республика етәксеһе ҡулланыласаҡ материалдар һәм эш темпы менән ҡыҙыҡһынды.

Өфөнөң Дим биҫтәһендә глэмпинг-парк төҙөләсәк

Проект менән «Инвестиция сәғәте»ндә «Феникс» компанияһы етәксеһе Евгения Машко таныштырҙы. Майҙансыҡты әҙерләүгә һәм рекреацион объекттар төҙөүгә 250 миллион һум йүнәлтеү күҙаллана. Башҡортостандың Үҫеш корпорацияһы ярҙамында ер участкаһы һайланған һәм кәрәкле проект документацияһы әҙерләнгән.

Ике аҙналыҡ ялдан һуң хәрбиҙәрҙең бер төркөмө йәнә алғы һыҙыҡҡа юлланды

Күптәр өсөн был иҫәп буйынса бишенсе отпуск булған. Мобилизация буйынса махсус хәрби операция бурыстарын үтәгән яҡташтарыбыҙҙы ғаиләләре, дуҫтары оҙатты. Яугирҙар «Өфө-Арена» комплексы эргәһендәге майҙандан хеҙмәт урынына тиклем уңайлы шарттарҙа биш автобуста бара.

Ватанды һаҡлаусыларға ярҙам: Ишбирҙелә фәһемле осрашыу һәм концерт үтте

Баймаҡ районы Ишбирҙе ауылы биләмәһендә Махсус хәрби операцияла ҡатнашыусыларға һәм уларҙың ғаилә ағзаларына ярҙам итеү йылын асыу тантанаһы үтте. Ошо уңайҙан фәһемле осрашыу, хәрби-патриотик концерт ойошторолдо.

Башҡортостанда юл буйы сервисын үҫтереү программаһы ойошторолоуға - 5 йыл

Ошо ваҡыт эсендә республика трассаларында йөҙләп объект сафҡа индерелгән, иҫке биналар төҙөкләндерелгән. Кафе, дарыухана, йылы бәҙрәф, ҡунаҡхана, кибет төҙөлгән, башҡа уңайлыҡтар булдырылған. Рәсәй юл буйы сервистары исемлегендә иң яҡшы тәжрибә тип табылды.

Асҡын районы ирекмәндәре маскировка селтәрҙәре үрә

Дошман күҙенә күренмәй, тимәк,яугирҙарҙың ғүмерен яҡшыраҡ һаҡлай. Маскировкалау селтәрҙәренең яңы төрө махсус хәрби операция биләмәһендә ҙур ихтыяж менән файҙалана. Был турала Асҡын районы хәрбиҙәренең береһе ҡайтҡан саҡта һөйләгән. Яҡташтары өсөн был ябай һүҙ генә булмай. Улар шунда уҡ пенопласт һәм капрон ярҙамында һаҡланыу сараһының яңы төрөн үрергә тотона. Ҡош осошонан ҡарағанда, селтәр аҫтындағы техника емерелгән бина ҡалдыҡтары һәм күмерләнгән кирбес кеүек тойола. Был эштә Асҡын ауылының беренсе мәктәбе уҡыусылары һәм уҡытыусылары ла әүҙем ярҙамлаша.

Үҙ проектыңа миллион һум: Өфөлә грант алыу буйынса интенсив үтте

Үҙ проектыңа миллион һумға тиклем нисек грант йәлеп итеү тураһында Өфөлә үткән интенсивта һүҙ барҙы. Башҡортостан Йәмәғәт палатаһының Ресурстар үҙәге белгестәре грант шарттары һәм тәртибе менән таныштырып, ҡатнашыусыларҙың проекттарын баһаланы. Тәжрибә уртаҡлашыуға республика район - ҡалаларынан 200-гә яҡын кеше килгәйне. Улар төрлө йүнәлеш буйынса үҙ проекттарын тәҡдим итте.

Ҡаңны ырыуы башҡорттары ҡор йыйҙы

Бүздәк башҡорттары ҡор йыйҙы. Ҡаңны ырыуы вәкилдәренең ҡоролтайы бөгөн район үҙәгендә үтте. Сарала ҡатнашыусылар Бөтә донъя башҡорттары ҡоролтайының алтынсы съезында ҡабул ителгән ҡарарҙар, Бүздәк районында алып барылған эштәр менән танышты.

Өфөлә Факиһа Туғыҙбаеваның тыуыуына 75 йыл тулыуға арналған түңәрәк өҫтәл үтте

«Фатихамды бирәм һиңә». Тап ошо исем аҫтында «Торатау» Конгресс-холлында Башҡортостандың халыҡ шағиры, Салауат Юлаев исемендәге дәүләт премияһы лауреаты Факиһа Туғыҙбаеваның тыуыуына 75 йыл тулыуға арналған түңәрәк өҫтәл үтте. Һөйләшеүҙә танылған әҙиптәр, музей-китапхана хеҙмәткәрҙәре, әҙәбиәтселәр, тел белгестәре ҡатнашты.

Хәйбулла районы Федоровка ауылында ҡышҡы балыҡ тотоу буйынса ярыш уҙҙы

«Айыҡ ауыл» республика конкурсы сиктәрендә Хәйбулла районы Федоровка ауылында ҡышҡы балыҡ тотоу буйынса ярыш уҙҙы. Уны яңы ғына ойошторолған «Таяныс» атайҙар клубы үткәрҙе. Балыҡ ҡармаҡларға күрше ауыл вәкилдәре лә килде, тотош ғаиләләре менән ҡатнашыусылар ҙа булды.

Силәбе өлкәһе Арғаяш районында медицина кластары асыла

Башҡорт дәүләт медицина университеты вәкилдәре район етәкселеге менән осрашты. Төп маҡсат – табип һөнәренә ҡыҙыҡһыныу тәрбиәләү һәм кадрҙар резервы булдырыу. Медицина университеты уҡытыусылары химия, биология, физика һәм генетика дәрестәрен дистанцион рәүештә алып барасаҡ. Был турала Башҡортостандың Силәбе өлкәһендәге вәкиллегенән хәбәр итәләр.

Башҡортостанда һаңғырау спортсылар араһында ҡышҡы спартакиада уҙғарыла

Ул 6 февралдә башлана һәм 10 көн дауам итә. Ярыштарҙы асыу тантанаһы 8 февралдә була. Илдең 30 төбәгенән 800-ҙән ашыу кеше ҡатнашыуы көтөлә. Улар саңғыла йүгереү, сноуборд, хоккей, футзал, шахмат, керлинг, тау саңғыһы спортында көс һынаша. Вице-премьер-Спорт министры вазифаһын башҡарыусы Руслан Хәбибов белдереүенсә, - Башҡортостандың ҙур халыҡ-ара һәм Рәсәй ярыштарын уҙғарыу тәжрибәһе бар, беҙҙә заманса спорт инфраструктураһы булдырылған.

Башҡортостанда күп балалы ғаиләләргә ер өсөн сертификат бирелә

1 ғинуарға ҡарата улар 4 мең 450 кешегә тапшырылған. Һәр береһенең суммаһы - 250 мең һум. Сертификатты ер участкаһы, йә торлаҡ алыу өсөн тотонорға була, тип хәбәр итәләр Ер һәм мөлкәт мөнәсәбәттәре министрлығынан. 2020 йылдан Башҡортостанда күп балалы ғаиләләрҙең ер участкаһы, йә сертификат алыу мөмкинлеге бар. Сертификатты файҙаланыу ваҡыты сикләнмәгән.

Ҡайғылы хәбәр

71 йәшендә Арыҫлан Мөбәрәков исемендәге Сибай дәүләт башҡорт драма театрының баш рәссамы, Рәсәйҙең һәм Ҡалмыҡстандың атҡаҙанған артисы Валерий Яшкулов вафат булған. Ауыр юғалтыу хаҡында Сибай театрында хәбәр иттеләр.

Валерий Яшкулов М. Горький исемендәге Мәскәү художество театры янындағы Немирович-Данченко исемендәге мәктәп-студияһының постановка бүлеген тамамлаған.

«Рәссам ижади дәүерендә 150-нән ашыу төрлө жанрҙағы спектаклгә сәхнә биҙәлешен һәм костюмдарын әҙерләй. Валерий Борисовичтың ижады менән Рәсәй төбәктәренең күп театрҙары таныш: Алтай, Бүрәт, Башҡортостан, Ҡалмыҡстан, Ҡарасәй-Черкессия, Ингушетия, Татарстан, Саха-Яҡут республикалары. 2021 йылдың авгусынан Валерий Борисович Башҡортостанда эшләне. Ул Өфө, Туймазы, Салауат, Сибай театрҙарында үҙенең ҡабатланмаҫ оҫталығын күрһәтте», — тип һөйләне театрҙан коллегалары.

Башҡортостан Донбаста тыныс тормошто тергеҙеүҙә ҙур ярҙам күрһәтә

Өсөнсө йыл шефлыҡҡа алынған Луганск халыҡ республикаһының Красный Луч, шулай уҡ Донецк халыҡ республикаһы ҡалаларында эш алып барыла. Яңы төбәктәрҙәге объекттарҙы тәртипкә килтереүҙә беҙгә подрядсылар ярҙамға килә. Уларҙың береһе, «Төҙөлөш өлкәһендә берҙәм заказсы» компанияһы менән Мариуполдә хеҙмәттәшлек итәбеҙ, тип яҙған социаль селтәрҙәрҙә Радий Хәбиров.

Яңауыл ҡалаһында 21 кешегә яңы йорттан фатир асҡысы тапшырылды

Өс ҡатлы йорт Башҡортостанда ауыл биләмәләрен комплекслы үҫтереү программаһы ярҙамында сафҡа ингән. 2024 йыл һөҙөмтәләренә ярашлы, федераль программа Нуриман, Борай, Илеш, Бәләбәй, Тәтешле һәм Яңауыл райондарында әүҙем тормошҡа ашырыла. Был урындағы ойошма-предприятиеларҙы йәш кадрҙар менән тәьмин итеүгә лә булышлыҡ итә.

«Башҡортостан» мотоуҡсылар полкы яугирҙары йәнә фронтҡа юлланды

Яңы көс менән еңеү артынан. «Башҡортостан» мотоуҡсылар полкы яугирҙары йәнә фронтҡа юлланды. Хәрби хеҙмәткәрҙәр ике аҙналыҡ отпускта булған. Ватан һаҡсылары әйтеүенсә, ҡыҫҡа ваҡытлы ял тиҙ үткән. Шуға ҡарамаҫтан, улар ғаиләләре һәм яҡындары менән осрашҡан, йорт мәшәҡәттәре менән булышҡан. Бынан тыш, улар хаттар яҙған уҡыусылары менән дә осраша. Илһөйәрлек дәрестәрендә хәрбиҙәр балаларға үҙҙәренең хеҙмәте һәм яу яланында полкташтары күрһәткән батырлыҡтар тураһында һөйләй.

Башҡортостан юлдаш телеканалында Андрей Мигуновҡа бағышланған Комбат «Скиф» фильмы күрһәтелә

Иртәгә, киске сәғәт 7-се яртыла Башҡортостан юлдаш телеканалында Рәсәй Геройы, «Башҡортостан» полкының Сергей Зорин исемендәге танк батальоны командиры Андрей Мигуновҡа бағышланған Комбат «Скиф» фильмының премьераһы күрһәтелә.

Бүздәк районы Ҡаран ауылында «Эх, самауыр сәйе» тамашаһы ойошторолдо

Эх, самауыр сәйе. Бүздәк районы Ҡаран ауылында ошондай исем аҫтында бай тарихлы, хуш еҫле, йырлы-моңло тамаша ойошторолдо. Кисә «Айыҡ ауыл» конкурсына әҙерлек сиктәрендә уҙғарыла. Ҡарандар быйыл абруйлы конкурстың республика этабына сыҡҡан. Әле ауылда көн һайын тиерлек ижади, фәнни, мәҙәни, спорт саралары үтә, был эшкә олоһо ла, кесеһе лә йәлеп ителгән

Өфө районы Шамонин ауылында ҡышҡы уйындар үтте

Икенсе йыл рәттән ойшторолған байрамда урындағы халыҡ саңғыла, күңелле старттарҙа көс һынашты. Ҡышҡы уйындарҙы ойоштороуҙо өс ғаилә үҙ өҫтөнә алған - Барлыбаевтар, Ғилметдиновтар һәм Юлдашбаевтар сараның программаһын әҙерләп, ауылдаштарға байрам кәйефе бүләк итте. Тулыраҡ мәғлүмәт киләһе яҙмала.