Башҡортостан сит илдәргә 426 мең тонна иген һатҡан

Ауыл хужалығын күҙәтеү хеҙмәте 2024 йыл һөҙөмтәләре буйынса шундай һан иғлан итте. Тауар 20 илгә оҙатылған. Башҡортостан игенен Әзербайжан, Беларусь, Бельгия, Германия, Иран, Ҡаҙағстан, Ҡырғыҙстан, Ҡытай күпләп алған. Башҡортостанда "Халыҡ-ара кооперация һәм экспорт" тигән милли проект ғәмәлгә ашырыла. Уға ярашлы, экспортты арттырыу маҡсаты ҡуйыла.

Урындағы башланғыстар программаһы Миәкәлә 117 мәсьәләне хәл итте

Урындағы башланғыстарҙы яҡлау программаһы ярҙамында һуңғы йылдарҙа Миәкә районында йәмғеһе 117 мәсьәлә хәл ителгән. Быйыл да төбәк ауылдары республика проектына ҡушылырға теләк белдергән. Улар ауыл мәҙәниәт йортон төҙөкләндереү, һыу селтәрҙәрен яңыртыу кеүек һәм башҡа бурыстар ҡуйған.

Аҡъяр ауылында традицион йәйәнән уҡ атыу буйынса район-ара турнир үтте

Махсус хәрби операция геройҙарына арналған ярышта ир-егеттәр һәм ҡатын-ҡыҙҙар араһында көслөләр асыҡланды. Уҡ атып мәргәнлектә һынашыу - башҡорт халҡында борондан ҡалған йола. Һуңғы йылдарҙа спорттың был төрө республика төбәктәрендә киң танылыу алды. Хәйбулла районында ойошторолған бәйгелә хужаларҙан тыш, тағы ла тиҫтәгә яҡын төбәктән 50-нән ашыу кеше ҡатнашты.

Белорет юлының бер өлөшөндә мобиль элемтә булдырылды

Архангел һәм Ҡолмас ауылдары араһында 6 станция урынлаштырылды. Һанлы үҫеш министрлығынан хәбәр итеүҙәренсә, был эштәр милли проект буйынса башҡарылған. Элек бында элемтә булманы. Хәҙер Терекле, Ҡурғаш, Күлтабан, Ҡолмас, Уҫаҡлы ауылдары халҡы мобиль телефон ҡуллана ала. Киләсәктә Инйәр-Белорет араһында 5 элемтә станцияһы урынлаштырыу планлаштырыла.

Радий Хәбиров эш сәфәре менән Баҡалы районында булды

Башҡортостан башлығы Радий Хәбиров эш сәфәре менән Баҡалы районында булды. Көн тәртибендә республика етәксеһе йомортҡа етештереүҙә махсуслашҡан ҡошсолоҡ фабрикаһы эшмәкәрлеге менән танышты. Район үҙәгендәге хужалыҡта тауыҡтар тәүлегенә 90 мең йомортҡа һала. Инвестиция проекты буйынса фермала һуңғы ике йылда производство йыһаздары яңыртылған, комплекс майҙаны киңәйтелгән. Бынан тыш, эш сәфәре барышында Радий Хәбиров Ахман ауылында капиталь ремонтан һуң асылған мәҙәниәт йорто, фельдшер-акушерлыҡ пункты һәм Баҡалы ауылындағы «Хәрби дан» паркында булды, халыҡ менән аралашты.

Башҡортостанда яугирҙарға һәм уларҙың ғаиләләренә ярҙам саралары киңәйтелә

Махсус хәрби операцияла улдарын юғалтҡан әсәләрҙе берләштереү, йәрәхәтләнгән яугирҙарға психологик ярҙам күрһәтеү өсөн белгестәр әҙерләү, адаптив спорт үҙәктәре ойоштороу. Был Махсус хәрби операцияла ҡатнашыусылар һәм уларҙың ғаилә ағзаларына ярҙам күрһәтеү йылын үткәреү буйынса Ойоштороу комитетының тәүге ултырышында тәҡдим ителгән башланғыстарҙың бер нисәүһе. Эшлекле һөйләшеүҙә Башҡортостан башлығы, Хөкүмәт ағзалары һәм йәмәғәт ойошмалары вәкилдәре ҡатнашты.

Бәләбәй районынан сираттағы ылау Махсус хәрби операция биләмәһенә барып етте

Тыуған яҡтың ҡайнар сәләме. Бәләбәй районынан сираттағы ылау Махсус хәрби операция биләмәһенә барып етте. Гуманитар миссияны Бәләбәй ҡалаһы хакимиәте башлығы Сергей Караберов етәкләне.

Өфө районы Жуков ауылында яңы табип амбулаторияһы асылды

Медицина учреждениеһында терапевт, акушер-гинеколог, балалар табибы ҡабул итеү ойоштора. Шулай уҡ көндөҙгө стационар эшләй. Объектты асыу тантанаһынан репортаж.

Башҡортостан йәмәғәтселеге Марсэн Мөхәмәҙиев менән хушлашты

Башҡортостан йәмәғәтселеге телевидение ветераны, Рәсәй Кинематографистар союзы ағзаһы Марсэн Мөхәмәҙиев менән хушлашты. Уға 75 йәш ине.

Шыршыларҙы утилләштереү буйынса акция башланды

Өфөлә бөгөн һәм иртәгә, шулай уҡ 25 һәм 26 ғинуарҙа Яңы йыл шыршыларын үтилләштереү буйынса экология акциялары ойошторола. Байрамды биҙәгән урман ҡупшыҡайҙарын баш ҡаланың һәр районында махсус ҡабул итеү пункттарына тапшырырға була. Акцияның маҡсаты- граждандар иғтибарын ҡалдыҡтарҙы айырым йыйыу проблемаһына йәлеп итеү һәм ҡулланылған шыршыларҙы икенсел эшкәртеүгә оҙатыу.

Башҡортостанда Яңы йыл алдынан 175 шыршыны рөхсәтһеҙ ҡырҡҡандар

Урман хужалығы министрлығы "Шыршы" операцияһы һөҙөмтәләрен иғлан итте. Ул 25 ноябрҙән 8 ғинуарға тиклем уҙғарылды. 1 мең 700-ҙән ашыу рейд ойошторолған, рөхсәтһеҙ ағас ҡырҡыусылар тотолған. Урманға зыян 1 миллион 600 мең һумға баһаланған.

Радий Хәбиров Дүртөйлө районы Әсән ауылында йәшәүсе Диана Ғәзина тураһында яҙған

Республика башлығы Радий Хәбиров «Һоҡланғыс кешеләрҙең тормошо» рубрикаһында Дүртөйлө районы Әсән ауылында йәшәүсе Диана Ғәзина тураһында яҙған.

Павловка һыуһаҡлағысында ҡаргиҙәрҙә йөрөүҙең хәүефтәре тураһында иҫкәртәләр

Боҙҙа ҡаргиҙәрҙә елдереү хәүефле. Павловка һыуһаҡлағысында ғына һуңғы айҙа үҙйөрөшлө техника менән бәйле ике күңелһеҙ осраҡ теркәлгән. Тулыһынса туңып етмәгән йылғаларҙа фажиғәләрҙе иҫкәртеү маҡсатында республиканың Ғәҙәттән тыш хәлдәр буйынса дәүләт комитеты хеҙмәткәрҙәре рейдҡа сыҡты. Тулыраҡ киләһе яҙмала.

Миәкә районы ауылдары махсус хәрби операция яугирҙарына сираттағы гуманитар ылау әҙерләй

Берҙәмлектә беҙҙең көс. Миәкә районы ауылдары махсус хәрби операция яугирҙарына сираттағы гуманитар ылау әҙерләй. Әйберҙәр алғы һыҙыҡтағы яҡташтары һорауы буйынса тупланған. Бынынң өсөн махсус штаб булдырылған.

Иглин районында махсус хәрби операция яугиры Вячеслав Чудов иҫтәлегенә мемориаль таҡтаташ асылды

Вячеслав Евгеньевич Рәсәй тимер юлдары компанияһының 49-сы юлсылар машина станцияһында эшләй. Үҙ теләге менән махсус хәрби операцияға юллана. Яҡташыбыҙ былтыр апрелдә яу яланында һәләк була. Фронтта күрһәткән ҡаһарманлыҡтары өсөн ул вафатынан һуң «Батырлыҡ ордены» менән бүләкләнә. Вячеслав Чудов иҫтәлегенә мемориаль таҡтаташ ул эшләгән станция бинаһына беркетелгән.

Хәлил ауылында 4 айҙа яңынан төҙөлгән заманса мәсет асылды

4 ай ҙа 10 көн тигәндә яңы мәсет. Әбйәлил районы Хәлил ауылында 6 сентябрҙә янып көл-күмергә әйләнгән мәсет урынында заманса иман йорто үҙ ишектәрен асты. Был объектты халҡыбыҙҙың берҙәмлегенә, Хәлил ауылы кешеләренең йүнселлегенә һәйкәл тип әйтергә мөмкин. Сөнки төҙөлөшкә һәр кем үҙ өлөшөн индергән: берәүҙәр ҡул көсө, икенселәре аҡсалата, өсөнсөләре һүҙ менән булышлыҡ иткән. Мәсәғүт Мортазин исемендәге Хәлил ауылы мәсетен асыу тантнаһынан репортаж.

«Донъя һылыуҡайы» конкурсында тәүге тапҡыр Башҡортостан ҡыҙы сығыш яһаясаҡ

Башҡортостандан Лас-Вегасҡа. «Донъя һылыуҡайы» конкурсында тәүге тапҡыр Башҡортостан ҡыҙы сығыш яһаясаҡ. Матурлыҡ бәйгеһендә Ауырғазы районында тыуып үҫкән, әлеге ваҡытта Өфөлә йәшәгән Гөлназ Ғәбитова ҡатнашасаҡ. Шәфҡәт туташы булып эшләгән Гөлназ Лас-Вегаста үтәсәк ярышҡа әҙерлек барышы менән таныштырҙы.

Бөрйән районында Бөтә донъя башҡорттары ҡоролтайының киңәйтелгән ултырышы үтте

Бөрйән башҡорттары ҡор йыҙы. Бөрйән районында Бөтә донъя башҡорттары ҡоролтайының киңәйтелгән ултырышы үтте. Һөйләшеү милли ойошманың алтынсы съезы ҡарарҙарын тормошҡа ашырыу, ҡоролтай проекттарында ҡатнашыу, мәғлүмәт һуғышына ҡаршы көрәш һәм башҡа мөһим бурыстар тураһында барҙы.

Вице-премьер Дмитрий Чернышенко Өфөлге ишкәкселәр комплексын уникаль тип атаны

- Биш йылда 500 спорт ҡоролмаһы төҙөлдө, йөҙләгән майҙансыҡ яңыртылды, 10 мең белгес әҙерләнде. Илдең бөтә төбәктәрендә спорт инфраструктураһы булдырылды. Шул иҫәптән Өфөлә ишкәкселәр өсөн уникаль комплекс асылды, - тине Дмитрий Чернышенко. Республика баш ҡалаһында был объект уҙған йылда файҙаланыуға тапшырылды.

Ҡурсаулыҡ биләмәләрендә даими рейдтар уҙғарыу тураһында закон ҡабул ителә

Проект әҙерләнгән. Спикер Константин Толкачев белдереүенсә, һаҡланған биләмәләр ҙур, уларҙы контролдә тотоу өсөн бер нисә көн йөрөргә кәрәк. Әлеге ҡануниәт буйынса оҙайлы рейдтар уҙғарырға ярамай. Закон ҡабул ителһә, инспекторҙар теләгән ваҡытта рейдҡа сыға, документтарҙы, транспорты тикшерә ала, тине Дәүләт Йыйылышы-Ҡоролтай рәйесе. Закон проекты ғинуар аҙағында парламенттың пленар ултырышында ҡарала.