Башҡортостанда һаулыҡ һаҡлау өлкәһе финанслау 1,5 тапҡырға артты

Биш йыл эсендә Башҡортостанда һаулыҡ һаҡлау өлкәһен финанслау бер ярым тапҡырға тиерлек артып, 119 миллиард һумға еткән. Был турала Радий Хәбиров бөгөн Башҡортостан башлығы ҡарамағындағы һаулыҡ һаҡлауҙы үҫтереү буйынса советтың беренсе ултырышында белдерҙе.

Махсус хәрби операция биләмәһендә эшләгән ирекмән ҡатын-ҡыҙҙар отряды Башҡортостанға ҡайтты

Ҡыйыу йөрәкле гүзәл заттар Луганск госпиталендә 16 көн хеҙмәт итә. Ирекмәндәрҙе Совет майҙанында республиканың эшҡыуарлыҡ һәм туризм министры вазифаһын башҡарыусы Зөһрә Гордиенко ҡаршы алды.
Хәтерегеҙгә төшөрәбеҙ, «Беренсе тирмә» төбәк проектын ойоштороу тәҡдимен Башҡортостан башлығы ла хуплай. Ноябрь аҙағында алыҫ юлға сыҡҡан икенсе төркөм ирекмәндәре яу яланынан килтерелгән яралыларҙы йыуындырыу, ашатыу, төрлө медицина тикшереүҙәренә йөрөтөү, операция үткәргәндәрҙе тәрбиәләү, хатта сәс алыу кеүек бик күп эш башҡара.

Иглин районы халҡы махсус хәрби операция биләмәһенә сираттағы гуманитар ярҙам оҙатты

Ылауҙа күсмә мунсалар, квадрокоптерҙар, тепловизор, рация, бензобысҡы һәм башҡа кәрәк-яраҡтар тупланған. Райондың ирекмәндәр ойошмаһы яҡташтарыбыҙ өсөн фронтҡа окоп шәмдәре, йылы кейем, күстәнәстәр әҙерләгән.

Салауат Юлаев һәйкәле яҙмышы: «Мин ҡайтырмын» фильмы тамашасыға юллана

Салауат Юлаев һәйкәлен төҙөкләндерөү тарихы, уны реставрациалау ваҡытлымы, юҡмы? «Мин ҡайтырмын» документаль фильмы авторҙары ошо һорауҙарға асыҡлыҡ индереүҙе тәү маҡсат итеп ҡуя. Уны БСТ телеканалы «Самрау» фонды менән берлектә әҙерләй. Фильм Башҡортостан Башлығы грантына төшөрөлә.

Башҡорт мәҙәниәтен йәштәр араһында таратыуҙың яңы юлы

Милли колоритлы өс үлсәмле наклейкалар. Ауырғазы районында башҡорт һүрәттәре, ҡанатлы һүҙҙәр һәм республика район-ҡалаларын менән тәүге 3d стикерҙар етештерелә башланы. Башҡортостанда йәшәүселәр һәм ҡунаҡтар уларҙы теләп һатып ала.

Республикала спорт ярыштары еңеүселәренә түләүҙәр арта

Башҡортостан хөкүмәте премьер-министры Андрей Назаров ошо турала белдерҙе. Һүҙ Олимпия һәм Паралимпия уйындарында, башҡа ҙур ярыштарҙа ҡатнашыусылар һәм чемпион исемен алыусылар тураһында бара. Айлыҡ стипендияның минималь күләме 8, иң юғары суммаһы 38 мең һум була. Уны алыусыларҙың йәше лә кәмегән. Хәҙер айлыҡ түләүҙәр 13 йәштән бирелә башлай. Олимпия спортсыларын тәрбиәләгән тренерҙарға аҡсалата дәртләндереү ҡарала. 2023 йылдан башлап уларға дәүләт стипендияһы күсерелә. Бындай түләү беҙҙең республикала ғына индерелгән.

Өфөлә зоопарк төҙөү өсөн участка бүленгән

Ул Урмансылар паркында урынлашҡан. Биләмә ғәмәлдәге вольер менән сиктәш була. Объектты 2027 йылда төҙөй башлау ҡарала. Тропик павильон өсөн шиншилла, таш баҡа һәм башҡа хайуандар алыу планлаштырыла. Күргәҙмә галереяһына үҙенсәлекле ҡоштар ебәрелә. Паркта шулай уҡ арыҫлан, дөйә һәм дөйәғоштар урынлаша.

Өфөлә Тәнзилә Дәүләтбирҙинаның китабы донъя күрҙе

Зәйнәб Биишева исемендәге Башҡортостан «Китап» нәшриәтендә Тәнзилә Дәүләтбирҙинаның «Уйлы заман» тигән китабы донъя күрҙе. Яҙыусының һигеҙенсе китабына һуңғы йылдарҙа ижад ителгән поэмалары, шиғырҙары, хикәйәләре тупланған.

Автор заман һулышын һиҙгер тоя, үҙенең әҫәрҙәрендә сағыу картиналар һәм тәрән уйланыуҙар аша тормош асылын, донъяға ҡарашын, уй-фекерҙәрен һәм хис-тойғоларын асып бирә. Шиғырҙар һәм поэмалар ихласлығы, үҙенсәлеге, фәлсәфәүи уйланыуҙары менән айырылып тора. Хикәйәләр мауыҡтырғыс, тормошсан сюжеттар, заманға ауаздашлығы менән хәтерҙә ҡала.

Башҡортостан депутаты ришүәтселектә ғәйепләнеп ҡулға алынды

БР Дәүләт Йыйылышы – Ҡоролтай депутаты Алексей Локотченко айырыуса ҙур күләмдә ришүәт алыуҙа аралашсы булыуҙа ғәйепләнә. 16 декабрҙә Өфөнөң Совет районы суды уны 2025 йылдың 30 ғинуарына тиклем һаҡ аҫтына алыу тураһында ҡарар сығарҙы.

Башҡортостан Дәүләт Йыйылышы рәйесе Константин Толкачев депутат Алексей Локотченконың ҡулға алыныуына аңлатма бирҙе:

«Законда суд ҡарары сығарылғансы депутат статусын алып ташлау ҡаралмаған. Вәкәләттәрҙе депутаттың үҙенең теләге менән туҡтатырға мөмкин. Әгәр Алексей Юрьевич ғариза яҙһа, депутаттар уны ҡараясаҡ. Хәтерегеҙгә төшөрәм, уҙған саҡырылыш депутаты Дмитрий Чувилин вәкәләт ваҡыты тамамланғансы тикшереү аҫтында булды», – тине Константин Толкачев.

Ялға ҡайтҡан хәрбиҙәр «Өфө-Арена» боҙ һарайы алдындағы майҙандан йәнә Донбасҡа юлланды

Улар махсус хәрби операцияға 2022 йылдың көҙөндә мобилизация буйынса алынған. Хеҙмәт урынына яугирҙар дүртенсе тапҡыр ялға ҡайтҡандан һуң оҙатылды. Автобусҡа шулай уҡ хәрби шарттарҙа кәрәкле әйберҙәр, аҙыҡ-түлек, йылы кейемдәр тейәлде. Ялдарҙа улар ғаиләләре, туғандары менән күрешкән.

Башҡортостанда GSM-модуль менән йыһазландырылған янғынды иҫкәртеүсе 500-се ҡоролма ҡуйылды

Бушлай прибор Благовещен районы Ильина Поляна ауылда йәшәүсе Гундеровтар ғаиләһенә тапшырылды. Пилот проект республика етәксеһе Радий Хәбиров башланғысы менән ғәмәлгә ашырыла. Программа буйынса яҡшыртылған ҡоролма менән һуҡыр, һаңғырау, түшәктә ятҡан инвалидтар тәьмин ителә. Ғәҙәти датчиктан айырмалы рәүештә, ул ғәҙәттән тыш хәл осрағында сигналды бер юлы дүрт адресҡа: ашығыс хеҙмәттәргә, туғандарға, опека органдарына һәм ауыл биләмәһенә тапшыра.

Өфөнөң этнология һәм этнография музейында Алтын Урҙа дәүеренә арналған күргәҙмә асылды

Рәсәй фәндәр академияһының төбәк ғилми үҙәге коллективы XIV быуат башы һәм урталарындағы артефакт менән таныштыра. Табылған ҡомартҡылар араһында көнкүреш, металл әйберҙәр һәм ҡоралдарҙы күрергә мөмкин.

Башҡортостан башлығы Радий Хәбиров төбәктең оператив штаб ултырышын үткәрҙе

Бөгөн Башҡортостан башлығы Радий Хәбиров төбәктең оператив штаб ултырышын үткәрҙе. Осрашыуҙа төбәктең инфраструктура һәм сәнәғәт объекттарын террор хәүефенән һаҡлауҙы тәьмин итеү мәсьәләләре тикшерелде.

Радий Хәбиров «Абилимпикс» чемпионаты һәм «Профессионалдар» хәрәкәте еңеүселәре менән осрашты

Башҡортостан башлығы Радий Хәбиров Шишмә районындағы «Патриот» хәрби-илһөйәрлек паркында «Абилимпикс» чемпионаты һәм «Профессионалдар» хәрәкәте еңеүселәре менән осрашты. Сарала барлығы 80 кеше ҡатнашты. Быйыл республика «Профессионалдар» хәрәкәте йыйылма командаһы Рәсәйҙең иң яҡшы биш командаһы исемлегенә индерелде.

Радий Хәбиров Ермолаев ҡасабаһындағы яңы йыл ҡаласығы менән бәйле хәлде контролгә алды

Башҡортостан башлығы Радий Хәбиров Ермолаев ҡасабаһындағы яңы йыл ҡаласығы менән бәйле хәлде контролгә алды. Алдараҡ Көйөргәҙе районы хакимиәте башлығы Юлай Ильясов боҙ ҡаласығын төҙөүгә тәғәйенләнгән аҡсаны янғындан зыян күргән ғаиләгә йүнәлтергә тәҡдим итте.

Өфөлә «Юлдаш Рlus» милли йәштәр фестиваленә йомғаҡ яһалды

«Торатау» конгресс-холл сәхнәһендә «Юлдаш Рlus» милли йәштәр фестиваленә йомғаҡ яһалды. Быйыл радионың йомғаҡлау сараһы милли йәштәр фестивале булараҡ үтте. Ул Республика Башлығы гранты ярҙамында ойошторолдо. Һәләтле Башҡортостан йәштәрен асыусы иң ҙур музыкаль ваҡиғаларҙың береһе хаҡында киләһе яҙмала.

Тәтешле районында «Урал батыр» башҡорт халыҡ ҡобайыры көнө үтте

Мифтахетдин Аҡмулла исемендәге Башҡорт дәүләт педагогия университенының «Башҡорт фольклоры» ғилми-тикшеренеү үҙәге башланғысында ул өсөнсө йыл тормошҡа ашырыла. Быйыл ул тәүге тапҡыр тәжрибә нигеҙендә районға сыҡты.

Яңы йыл юғалтыуҙар һәм еңеүҙәр менән килмәксе

Был турала Өфө нумерологтары билдәләне. Йондоҙҙар тормошта кәрәкмәгән әйберҙәрҙән баш тартырға йөръәт итеүселәргә бәхет вәғәҙәләй. Йылан йылы башланыуға тиклем ике аҙнанан кәмерәк ваҡыт ҡалып бара. Байрам төнө хәтерҙә ҡалһын өсөн, өҫтәлгә нимә әҙерләргә һәм нимә кейергә? Белгестәр яуабы киләһе яҙмала.

Башҡортостан хөкүмәте премьер-министры урынбаҫарҙары билдәле булды

Бөгөн Республика парламенты депутаттары пленар ултырышта вице-премьерҙарҙы хупланы. Премьер-министрҙың беренсе урынбаҫары-Иҡтисади үҫеш һәм инвестиция сәйәсәте министры итеп Рөстәм Моратов тәғәйенләнә. Беренсе вице-премьер вазифаһын шулай уҡ Урал Килсенбаев ала. Азамат Абдрахманов вице-премьер-Башҡортостан хөкүмәте аппараты етәксеһе була. Вице-премьерҙар вазифаһында Илшат Фәзрахманов һәм Александр Шельдяев эшен дауам итә. Улар Ауыл хужалығы һәм Сәнәғәт, энергетика һәм инновациялар министрлыҡтарын етәкләй. Премьер-министр урынбаҫары вазифаһында Ирек Сәғитов ҡала. Стәрлетамаҡтың элекке башлығы Рөстәм Ғәзизов шулай уҡ вице-премьер вазифаһын ала. Ер һәм мөлкәт мөнәсәбәттәре министры Наталья Полянская хөкүмәттә вице-премьер статусында эшләйәсәк. Башҡортостан министрлыҡ һәм ведомстволар етәкселәре Республика Башлығы Указы менән тәғәйенләнә.

Республикала яңы йыл каникулында спиртлы эсемлек һатыу сикләнә

Сауҙа һәм хеҙмәттәр министрлығынан хәбәр итеүҙәренсә, 3, 4, 5 ғинуарҙа магазиндарҙа киске сәғәт 5-тән иртәнге 10-ға тиклем хәмер алып булмай. 6 ғинуарҙа 17 сәғәттән төнгө 11-гә тиклем араҡы һатыу тыйыла. Сикләүҙәр кафе һәм ресторандарға ҡағылмай.